Kala Kyasoneka Matesu
8 Kyoso kyatuluka ku mulundu, kifuxi kyadikota ki mu kayela. 2 Mukwa dibhute u mu zukama, u mu fukamena* anga uzwela, wixi: “Ngana se wamesena, utena ku ngi saka.”* 3 Mu kiki, mwene usununa o lukwaku lwê, u mu kwata, anga uzwela: “Nga mesena! Disanze.” Mu kithangana kyenyókyo, mwene udisanza ku dibhute dyê. 4 Jezú-phe u mu tangela: “Dilange phala ku ki tangele muthu, maji ndé udilondekese ku mukunji, ni ubhane o ujitu kala kizwela o Kijila kya Mozé. O akunji n’a mone kwila eye wadisanze.”
5 Kya bokona mu Kafalanawú, kabhitangu ka masoladi u mu zukama, u mu dyondela, 6 wixi: “Ngana, selevende yami wa kumbama kubhata, ka mu tena kwenda, wamutala hadi yavulu.” 7 Mwene wa mwambela: “Kyoso ki nganda bhixila-ku, nganda mu saka.” 8 Kabhitangu ka masoladi anga u mu vutwila: “Ki ngi fwama ku ku tambulula kubhata dyami, maji zwela ngó kima kimoxi phala selevende yami n’a disanze. 9 Eme wami, ngi muthu a ngi tumina, ngala we ni masoladi ngene mwa tumina, sayi yú ngi mu tangela, ‘Ndé!’ mwene uya, o mukwá ngi mu tangela ‘Zá!’ mwene wiza, o mubhika wami, ngi mu tangela: ‘Bhanga kiki!’ mwene u kibhanga.” 10 Kyoso Jezú kyevu o izwelu yiyi, wadiwana anga utangela yó akexile mu mu kayela, wixi: “Ngi mi tangela ni kidi kyoso kwila, mu Izalayele yoso, ki ngi sange-mu muthu wala ni kixikanu kyadikota kala kiki. 11 Maji eme ngi mi ambela kwila, athu avulu anda tunda ku mbandu ku tundila o dikumbi ni ku fwila o dikumbi, anda xikama ku meza kumoxi ni Mbalahamu, Izake ni Jakobo mu Utuminu wa dyulu; 12 maji o an’a Utuminu anda kwa takula mu kitombe bhu kanga. Bhenyobho, bhene bhwanda kala o kudila kwâ, ni kudikokota ku mazu.” 13 Kyenyiki Jezú wambela o kabhitangu ka masoladi, wixi: “Ndé. Kuma eye walondekesa kixikanu, ki kubhite kála ki wabhingi.” Mu kithangana kyenyókyo, o selevende yê wadisanze.
14 Kyoso Jezú kya bokona mu inzo ya Phetele, wasange ukow’ê mu hama wala ni febele. 15 Mu kiki, mwene wa mu kwata mu lukwaku, yu wadisanze, anga umateka kwa lambela kudya. 16 Kyoso kyabhixila o usuku, a mu bhekela athu avulu akexile ni madimonyo, mwene anga ukaya o madimonyo ni dízwi dimoxi ngó, usaka oso akatele, 17 phala ku dikumbidila o izwelu ya polofeta Izaya, kyoso kyambe: “Mwene wambata o mawuhaxi ni jindolo jetu.”
18 Kyoso Jezú kyamono o kifuxi kyadikota kya mu kondoloka, watumu o maxibulu mê kuya ku sambwa. 19 Mesene ya kulonga o Kijila u mu zukama u mu tangela, wixi: “Mesene, nganda kukayela kwoso-kwoso ku uya.” 20 Maji Jezú wa mu vutwila: “O mikenge yala ni jingenda, o jinjila jala ni ikalanga, maji o Mon’a muthu kalé ni kididi kya kutula o mútwe.” 21 Dixibulu dya mukwá u mu tangela: “Ngana, ngehele hanji, ngi dyange kufunda tat’etu.” 22 Jezú wa mu vutwila, wixi: “Suluka mu ku ngi kayela, ehela o madifundu kufunda o madifundu mâ.”
23 Mwene wabokona mu ulungu, o maxibulu mê a mu kayela. 24 Anga kumateka kitembu kyadikota mu kalunga, mu kiki o ulungu wakexile mu kwizala ni menya, maji Jezú wexile mu zeka. 25 Ene anga aya mu mu balumuna, a mwambela, exi: “Ngana, tubhulule, twanda fwa!” 26 Kyenyiki mwene wa a tangela, wixi: “Mukonda dyahi mwala ni wôma wavulu,* enu mwa tolo o kixikanu?” Mwene ubalumuka, ubazela o kitembu ni menya a kalunga, anga kukala kutululuka kwa dikota. 27 Mu kiki, o maxibulu adiwana, anga azwela: “Mwenyú muthu wa kidifwa kyahi, katé ni kitembu ni menya a kalunga a mu belesela?”
28 Kyoso mwene kya bhixila ku sambwa, mu sanzala ya akwa Ngandala, kiyadi kya mala akexile ni madimonyo, atundu ku jimbila* adisange-nê. Ene exile ifumbe, kana muthu watenene kubhita mu kikoka kyenyókyo. 29 Anga amateka kudikola, exi: “Mon’a Nzambi, ihi i wamesena kokwetu? O kwila weza bhabha phala ku tu talesa hadi ande dya kithangana kyoxinde?” 30 Dikanga dya kididi kyenyókyo, bhwa kexile kibhanga kya jingulu jakexile mu dya. 31 Mu kiki, o madimonyo akwata ku mu dyondela, exi: “Se u tu kaya, tu tumine kubokona mu kibhanga kya jingulu.” 32 Mwene anga wa atangela, wixi: “Ndenu!” Ene atunda abokona mu jingulu. O jingulu joso ji ditakula mu dikenye* mu musanza wa kalunga, anga jifwila mu menya. 33 O athu akexile mu langa o jingulu alenge, abokona mu mbanza, atange yabhitile, katé mwene o ima yabhiti ni athu akexile ni madimonyo. 34 Athu oso mu mbanza atundu, eza mu di sanga ni Jezú. Kyoso kya mumono, a mu dyondela phala kutunda mu sanzala yâ.