Ikalakalu ya Jipoxolo
16 Phawulu wabhixila mu mbanza ya Delebe ni ya Listra. Ku Listra kwexile dixibulu dijina dyê Timote, many’â wexile Judé, waxikinine Ngana, maji tat’ê wexile Ngeleku. 2 O jiphange ku Listra ni ku Ikônyu, akexile ku muximana kyavulu. 3 Phawulu wa mesenene kuya kumoxi ni Timote mu ukunji, kyenyiki wa musaye mukonda dya Jijudé atungile mu jimbandu jenyojo, kuma enyoso ejidile kwila, o tat’ê wexile Ngeleku. 4 Mu kuya mu jimbanza, ene akexile mutangela ku jiphange o itendelesu yabhana o jipoxolo ni tufunga mu Jeluzaleme, phala a ibelesele. 5 Kyenyiki, o ilunga yakexile muswina dingi mu kixikanu, anga ikala mu dibandekesa izuwa yoso.
6 Ene abhiti ku Fidíjya ni ku jimbandu ja Ngalásya, mukonda o nzumbi ikôla ya afidisile kuboka o mak’â Nzambi mu kibatu kya Azya. 7 Kyoso kya kulumuka ku Mizya, a mesenene kuya mu mbanza ya Bitinya, maji Jezú bhukaxi ka nzumbi ikôla ka ehela kuya-mu. 8 Ene abhiti mu Mizya, ya akulumuka ku Tolowade. 9 Mu usuku wenyó Phawulu wamono kisumwa. Mwene wamono diyala mukwa Masedonya wemana ni ku mu dyondela, wixi: “Zá kuku ku Masedonya, u tu kwatekese.” 10 Kyoso Phawulu kyazubha kumona o kisumwa, twasolo kuya ku Masedonya, mukonda twa xinganeka kwila, Nzambi wa mesenene kuma, tu abokela o njimbu yambote.
11 Kyenyiki twa habe mu ulungu, twatundu ku Tolowade, etu twayi ku Samotalásya. Maji mu kizuwa kya mukwá twayi ku Neyapolo, 12 ki twatundu kwenyóko twayi ku Filipu, mbonge yatokala ku akwa Loma, o mbanza ya betakota ku jisanzala ja Masedonya. Etu twabhiti izuwa mu mbanza yenyiyi. 13 Mu kizuwa kya Sábhalu, twatundu mu mbanza, etu twayi ku ndundu ya ngiji mukonda twabanzele kwila, kwakexile kididi kya kusamba. Twaxikama, twamateka o kuzwela ni ahatu akexile kwenyóko. 14 Sayi muhatu wexile mu kwívwa, o dijina dyê Lídya, mukwa Tiyatila, mubhezi wa Nzambi. Mwene wakexile mu sumbisa izwatu ya katunda. Jihova wa mujikula o muxima phala kwívwa o ima yakexile mu zwela Phawulu. 15 Kyoso mwene ni akwa inzo yê kyazubha ku a batizala, mwene wa tudyondela, wixi: “Se mwa ngimono kwila ngi muthu wafiyele bhu pholo ya Jihova, zenu ni mukale mu inzo yami.” Mwene wa jiji phala kuya-nê kumoxi.
16 Sayi kizuwa kyoso ki twakexile muya mu kididi kya kusamba, twa takana ni muhatu wakexile ni nzumbi yayibha, dimonyo dya kuzambula. Mukonda dya kuzambula kwê, mwene wakexile mubhana kitadi kyavulu ku jingana jê. 17 O kilumba kiki kyakexile mukayela Phawulu ni etu, ni kudikola: “O mayala yá abhika a Nzambi Sukeku, ene a mu mibokela o njila ya kubhuluka.” 18 Mwene wakexile mubhanga kiki mu izuwa yavulu. Kuma Phawulu ka mesenene ku mwivwa dingi, wasakuka, wambela o nzumbi yayibha: “Mu dijina dya Jezú Kidistu, nga kutumu, tunda mwa mwene.” Mu kithangana kyenyókyo, o nzumbi anga itunda mwa mwene.
19 Kyoso o jingana jê kyamono kwila, o kidyelelu kya kutambula o kitadi kyabhu, a kwata Phawulu ni Sila, a akoka katé bhu kitanda ku atwameni. 20 Kyatula ku atwameni a mbanza, a atangela, exi: “O mayala yá a mubhekela kavwanza mu mbanza yetu. Ene Jijudé, 21 a mu tulonga ima ki twatokala ku ikayela mba ku ibhanga, mukonda tu akwa Loma.” 22 O mundu woso wa alungulukila. O atwameni a mbanza akatula o izwatu ya Phawulu ni Sila, ya atumu kwabeta ni jixikote. 23 Kyazubha kwabeta kyavulu, a atakula mu kaleya, atumu kwa kasalelu phala kwa langidila kyambote. 24 Kasalelu kyatambula o kitumu, wa ate mukaleya kazongo yu wakutu o inama yâ ku dibaya.
25 Mukaxi ka usuku, Phawulu ni Sila akexile mu samba ni kuximana Nzambi ni mimbu, o jipelezu ja mukwá akexile mwa evwa. 26 Mu kithangana kyenyókyo kwabhiti kitungutu kyadikota, o madisesa akaleya atunguta. O mabhitu moso ajikuka, anga o malubhambu a jipelezu ajituka. 27 Kyoso o kasalelu kya balumuka ku kilu, wamono kwila o mabhitu akaleya ajikuka, wasungu o xibhata yê yu wa mesenene kudijibha, mukonda wabanzele kwila o jipelezu joso jalenge. 28 Maji Phawulu wadikola, wixi: “Kana kudijibha, mukonda etu enyoso twala bhabha!” 29 Mu kyenyiki, mwene wabhingi phala ku mubhekela kandeya. Wabokona ni lusolo, ni kuteketa ni wôma, wafukamena Phawulu ni Sila. 30 Mwene wa ambata bhukanga, wa ebhwidisa: “Ihi i ngatokala kubhanga phala kubhuluka?” 31 Ene a mu tambwijila: “Xikana Ngana Jezú, phala eye ni mwiji wê mu bhuluke.” 32 Kyenyiki, mwene ni mwiji wê a alongo o mak’â Jihova. 33 Mu usuku wenyó mwene wa ambata yu wa asukula o jifidila. Mu kithangana kyenyókyo, mwene ni mwiji wê woso a a batizala. 34 Kasalelu wa ambata kubhata dyê, wa asidivila o kúdya ku meza, mwene ni mwiji wê woso a sanguluka kyavulu mukonda dya kuxikana Nzambi.
35 Mu kamene, o atwameni a mbanza atumikisa alangidi phala kutangela o kasalelu, exi: “Eha o mayala enyó.” 36 O kasalelu watangela Phawulu, wixi: “O atwameni a mbanza atumina mayala phala ku myeha kiyadi kyenu. Tundenu kindala, ndenu ni kutululuka.” 37 Maji Phawulu wa atangela: “Ene atubeta ni jixikote mwaxaxi ka mundu, sé ku tufundisa, sumbala tu akwa Loma, atute mukaleya. Kindala amesena kwila, tu tunda mu kaswekele? Kiki kana! Ene mwéne eze n’a twambate bhukanga dya mbanza.” 38 O alangidi atangela o maka enyá ku atwameni a mbanza. Kyoso ene kyevu kwila o mayala exile akwa Loma, wôma wa akwata. 39 O atwameni ayi kwa Phawulu ni Sila, a abhingi muloloki, o kyazubha kwakatula mukaleya, a atumu kutunda mu mbanza. 40 Maji Phawulu ni Sila kyatundu mu kaleya ayi mu inzo ya Lídya. Kyoso kyamono o jiphange jâ ene a aswinisa, anga aya.