Kala Kyasoneka Matesu
4 Bhenyobho Nzambi wendesa Jezú bhukaxi ka nzumbi ikôla katé ku mukáwu, phala ku mu tendala kwa Dyabhu. 2 Kya zubha kujejuwala mu makwinyi a wana a izuwa ni makwinyi a wana a usuku, mwene ukala ni nzala. 3 Dyabhu anga ubhixila, u mwambela, wixi: “Se eye u mon’â Nzambi, bhangesa o matadi yá kukituka jimbolo.” 4 Mwene wa mu tambwijila, wixi: “Kyósoneke: ‘O mwenyu wa muthu ki wijila ngó ku mbolo, maji mu maka moso matunda mu dikanu dya Jihova.’”
5 Dyabhu u mu bheka mu Jeluzaleme* anga u mu imanesa ku thandu* dya tembulu. 6 Anga u mwambela, wixi: “Se eye u mon’â Nzambi, ditakule bhoxi, kuma kyósoneke: ‘Mwene wanda bhana kitendelesu kya lungu n’eye ku jianju jê.’ ‘Ene-phe anda mu zenza bhu maku, phala ki u dibhukane ku ditadi.’” 7 Jezú-phe u mwambela, wixi: “Kyósoneke we kwila: ‘Jihova Nzambi yé, kana ku mu polovala.’”
8 Lwa mukwá dingi, Dyabhu u mu bheka ku mulundu wadileka kinéne, anga u mu londekesa o mautuminu moso a ngongo ni fuma yâ. 9 Anga u mwambela, wixi: “Ima yoso yiyi ngi ku bhana-yu se u ngi fukamena ni ku ngi bheza ngó lumoxi.” 10 Jezú wa mwambela, wixi: “Tunda bhabha Satanaji! Kuma kyósoneke: ‘Mu kubheza, kikale ubheza ngó Jihova Nzambi yé, mwéne ngó u mu sidivila.’” 11 Mu kiki, Dyabhu wamuxisa, anga kweza jianju jikala mu mu kwatekesa.
12 Kyoso Jezú kyevu kwila Nzwá a mu te mu kaleya, utunda anga uya mu Ngalileya. 13 Kyaxisa o mbanza ya Nazalé, wayi mutunga mu Kafalanawú ku mbandu a kalunga, mu jisanzala ja Nzebulone ni Nafitali, 14 phala ku dikumbidila o izwelu ya polofeta Izaya, kyoso kyambe: 15 “Enu mu akwa ixi ya Nzebulone ni ixi ya Nafitali, mwatungu mu kikoka kiya ku kalunga, ku sambwa dya Njolodá, Ngalileya dya ifuxi! 16 O athu axikamene mu kitombe, a mono mukengeji wonene, o axikamene mu kididi kya vundu, kibhekela o kufwa, kwa amwikina mukengeji.” 17 Tundé mu kithangana kyenyókyo, Jezú wamateka o kuboka, mu kuzwela: “Dyelenu, mukonda o Utuminu wa dyulu wazukama.”
18 Kyoso kyakexile mu kwenda mu mbandu ya Kalunga ka Ngalileya, mwene wamono jiphange jiyadi. Ximá a mwixana Phetele ni phang’yê Mandele. Ene a kexile mu takula wanda mu menya, kuma exile atambi a jimbiji. 19 Mwene wa a tangela, wixi: “Ngi kayelyenu phala ngi mi bhange mu atambi a athu.” 20 Mu kithangana kyenyókyo, ene axisa o mawanda mâ, anga a mu kayela. 21 Kyende-ko dingi ku pholo, wamono jiphange jiyadi ja mukwá, Tiyaku mon’â Nzebedewu ni phang’yê Nzwá. Ene akexile mu ulungu ni tat’â Nzebedewu mu kutunga o mawanda, Jezú anga wa exana. 22 Mu kithangana kyenyókyo, axisa tat’â mu ulungu anga a mu kayela.
23 Mwene anga u nyunga o Ngalileya yoso ni kulonga mu malombe,* ni kuboka o njimbu yambote ya Utuminu ni kusaka o mauhaxi moso ku athu. 24 Fuma yê anga i di mwanga mu Sídya yoso. Mu kiki, athu akala ku mu bhekela jihaxi joso, ni yó akexile ni jindolo javulu, ni yó akexile ni madimonyo, ni yó akatele kikonya ni inema, enyoso anga wa asaka. 25 Mu kiki mundu wavulu ukala mu mu kayela, a tundu mu Ngalileya, Dekapolo,* Jeluzaleme, ni Judeya, ni ku sambwa dya Njolodá.