Kala Kyasoneka Matesu

13 Mu kizuwa kyenyókyo, Jezú watundu mu inzo mwakexile, anga uya mu xikama bhu mbandu* a kalunga. 2 Kuma mundu wavulu wa mu bhongolokela, mwene wasambela mu ulungu, anga uxikama. O mundu woso anga ukala bhu mbandu a kalunga. 3 Mwene wa alongo ima yavulu bhukaxi ka ifika, wixi: “Ivwenu! Mukuni wa jimbutu watundu phala kukuna. 4 Kyoso kyakexile mu kuna o jimbutu, sayi jiji jasonokena bhu mbandu a njila, o jinjila jiza jimoma o jimbutu. 5 Ja mukwá jasonokena bhu matadi bhwala ngó mavu ofele, jene anga ji sabhuka ni lusolo, mukonda o mavu ala ngó kuthandu. 6 Maji kyoso kyatu o mwanya, jene ja lela, anga ji kukuta, mukonda ja kambele jindanji. 7 Ja mukwá jasonokena mu minya, o minya ikula ifuta o jimbutu. 8 Ja mukwá jasonokena mu mavu ambote, anga ji mateka kwima ibundu. Bhwala yiyi ima luhama, o yóyo makwinyi a samanu, ya mukwá makwinyi atatu. 9 Woso wala ni mátwi, évwe.”

10 O maxibulu mê eza anga a mu ibhwidisa, exi: “Mukonda dyahi wa mu alonga bhukaxi ka ifika?” 11 Mwene wa atambwijila: “Enu amibhana o kutena kwa kutongolola o ikutu ya Nzambi yalungu ni Utuminu wa dyulu, maji ene kana. 12 Mukonda woso wala ni kima anda mu bhana dingi, n’a kale ni ima yavulu, maji woso kala ni kima, katé mwene ni kima kyofele kyala nakyu, anda mu tambula-kyu. 13 Kiki kyene ki ngi bhangesa kwalonga bhukaxi ka ifika; mukonda atala maji atala mu kingoho, évwa, maji o ima yevwa ka itendela. 14 Kwa ene kwa mu dikumbidila o kikanenu kya Izaya, kyambe: ‘Mu kidi mwanda kwivwa mwene, maji ki mwanda tena kutendela. Mwanda tala mwene, maji ki mwanda tena kumona. 15 Mukonda o muxima wa mundu yú, wakolo. Ene a xiti o mátwi phala k’évwe. A xiti o mesu mâ phala ka mone; mixima yâ ki i tongoloka, phala n’a lunguluke ni ngi asake.’

16 “Maji enu mwazediwa mukonda o mesu menu amona, o mátwi menu évwa. 17 Mu kidi ngi mi ambela kwila, jipolofeta javulu ni athu ayuka, amesenene kumona o ima i mwa mu mona, maji ka i mwene, ni kwivwa o ima i mwa mu kwivwa, maji ka ivwile.

18 “Ivwenu-phe o dilombolwelu dya kifika kya diyala wakunu o jimbutu. 19 Kyoso o muthu kyévwa o maka ma Utuminu, anga ukamba ku atendela, Satanaji* wiza anga uvuza yokune ku muxima wê; yiyi yene o mbutu yokune bhu mbandu a njila. 20 O mbutu yokune bhu matadi, ilombolola o muthu wivwa o maka ma Nzambi, anga ni lusolo u axikina ni ngalasa yoso. 21 Maji mwene kala ni jindanji moxi dyê, mu kiki unangenena ngó ka kithangana. Kyoso kimoneka ibhidi mba izukutisu mukonda dya maka ma Nzambi, mwene udibhala* ni lusolo. 22 O mbutu yokune mu minya, ilombolola o muthu wivwa o maka ma Nzambi, maji o jihânji ja kumesena o ima ya mundu yú* ni kudyanguka kwa jimbongo, kubhaka o maka ma Nzambi mwavundu, mu kiki, ene akamba kwima ibundu. 23 O mbutu yokune mu mavu ambote ilombolola o muthu wivwa o maka ma Nzambi, anga u atendela, wima ibundu, o yiyi luhama, o yoyo makwinyi a samanu, o ya mukwá makwinyi atatu.

24 Mwene-phe wa atela kifika kyengi, wixi: “Utuminu wa dyulu wasokela ni diyala wa kunu jimbutu jambote mu dibhya dyê. 25 Kyoso-phe o athu kyayi ku kilu, o nguma yê weza yu wa kunu jimbundu ja yangu mu kaxi ka jimbutu ja tiliku,* yu wayé. 26 Kyoso o kixina ki kyakulu, anga kimateka kwima o ibundu, kwamoneka we o jimbundu ja yangu. 27 Kyenyiki o abhika amukwa dibhata, eza ya a mu ibhula, exi: ‘Ngana, ki wa kunu ngó jimbutu jambote mu dibhya dyé? O jimbundu ja yangu-phe jatundu kwebhi?’ 28 Mwene wa atambwijila, wixi: ‘Sayi nguma wabhange kiki.’ O abhika a mu tangela, exi: ‘Wamesena kwila tuya-ko ni tu vuze o jimbundu ja yangu?’ 29 Mwene wambe, wixi: ‘Kana, mukonda mu kuvuza o jimbundu ja yangu, mu tena we kuvuza o tiliku. 30 Ehelenu-ju kukula kumoxi, katé mu kithangana kya kubhongolola. Mu kithangana kya kubhongolola, nganda tangela o abhongolodi kwila: Dyangenu hanji kuvuza o jimbundu ja yangu, ni mu ji kute mu ita phala ku ji jokotesa. Anga mu bhongolole o tiliku, ni mu itule mu inzo ya kubhaka o idima.’”

31 Mwene wa atela dingi kifika kya mukwá, wixi: “O Utuminu wa dyulu wa difwangana ni lumbundu lwa mustarda,* lwa kunu o diyala mu dibhya dyê. 32 Mu kidi, lulu lwéne o lumbundu lwa beta o kutola ku jimbutu joso. Maji ki lu kula-phe, lu kituka muxi, idima yoso ndenge. O jinjila jibhita bhulu jiza, anga jisanga diswamenu mu jithangu jê.”

33 Mwene anga wa atela kifika kyéngi, wixi: “O Utuminu wa dyulu wa difwangana ni felemendu, muhatu wa ikatula, anga u ifungisa ni izongelu itatu ya makota ya fuba,* katé fuba yoso ki ifutunuka.”

34 Ima yoso yiyi Jezú wa itangela o mundu bhukaxi ka ifika. Mu kidi, mwene kakexile mwa tangela kima sé kuta ifika, 35 phala ku dikumbidila o izwelu ya polofeta, kyoso kyambe: “Nganda jikula o dikanu dyami ni ifika; nganda tanga o ima yosweke tundé ku dimatekenu.”*

36 Kyoso kyaxisa o mundu, mwene wabokona m’onzo. O maxibulu mê a mu zukama, anga a mu tangela, exi: “Tu jimbulwile o kifika kya jimbundu ja yangu mu dibhya.” 37 Mwene wa atambwijila, wixi: “O mukuni wa jimbutu jambote, o Mon’a muthu; 38 o dibhya dilombolola o ngongo. O jimbutu jambote-phe, o an’a Utuminu, o jimbundu ja yangu, o an’a Satanaji,* 39 o nguma wa ji kunu, Dyabhu. O kubhongolola kulombolola o dizubhilu dya mundu,* o abhongolodi, o jianju. 40 Kala kya bhongolola o jimbundu ja yangu, anga a ji jokotesa mu túbhya, kyene we kyanda bhita ku dizubhilu dya mundu.* 41 O Mon’a muthu wanda tumikisa o jianju jê, anga jene janda katula mu Utuminu wê o ima yoso ibhangesa kudibhala, ni yó abhanga o ima yazembe Nzambi, 42 anga anda atakula mu kijiku kya wama o túbhya. Mwéne mwanda kala o kudila kwâ ni kudikokota ku mazu. 43 Mu kithangana kyenyókyo, o athu ayuka anda bhenya kála o dikumbi, mu Utuminu wa Tata yâ. Woso wala ni mátwi, évwe.

44 “O Utuminu wa dyulu wa difwangana ni jimbote josweke ku mukáwu, anga diyala u jisanga, yu wa jisweka dingi. Mu kusanguluka kwê, uya u sumbisa o imbamba yoso yala nayu, anga usumba o mukáwu.

45 “Lwa mukwá dingi, o Utuminu wa dyulu wa difwangana ni ngenji usota jiphélula jambote. 46 Kyoso kyasange phélula imoxi yala ni valolo yadikota, mwene wayi, ni lusolo wasumbisa o imbamba yoso yakexile nayu, anga usumba o phélula.

47 “Lwa mukwá dingi, o Utuminu wa dyulu wa difwangana ni wanda a u takula mu menya a kalunga, anga ukwata jimbiji ja idifwa yoso. 48 Kyoso kyezala o wanda, o atambi a usunga kumbandu a kalunga* anga axikama, o jimbiji jambote a jita mu itutu, maji o jayibha a ji texi. 49 Kyene we kyanda bhita ku dizubhilu dya mundu.* O jianju janda tunda ni kukatula o athu ayibha mw’axaxi ka athu ayuka, 50 anga anda atakula ku kijiku kya wama o túbhya. Mwéne mwanda kala o kudila kwâ ni kudikokota ku mazu.

51 “O kwila mwa tendela o ima yoso yiyi?” Ene a mu tambwijila, exi: “Xé.” 52 Mu kiki-phe mwene wa atangela: “Kyenyiki, mesene yoso kyoso kyadilonga yalungu ni Utuminu wa dyulu, u difwangana ni diyala, ngana ya inzo, ukatula ku dilundilu dyê, ima ya ubhe ni ima yókulu.”

53 Kyoso Jezú kyazubha kuta o ifika yiyi, utunda-bhu. 54 Kyabhixila mu mbanza yê, wamateka kulonga o athu mu dilombe* dyâ, mu kiki ene adiwana, yá ambe, exi: “Kwebhi o diyala didi kwasange o unjimu yú ni kutena kwa kubhanga o madiwanu? 55 Yú ki mwene o mon’a musongi wa mabaya?* O many’â ka mu ixana Madiya, o jiphange jê ki Tiyaku, Zuze, Ximá ni Juda? 56 O jiphange jê ja ahatu, kala kumoxi n’etu? Kwebhi-phe kwasange o ima yoso yiyi?” 57 Anga, ene ka mu xikina.* Maji Jezú wa atangela, wixi: “Polofeta kakala ni kijingu mu ixi yê ni ku bhata dyê.” 58 Kuma ene kakexile ni kixikanu, mwene kabhange madiwanu avulu mu mbanza yenyóyo.