Ku akwa Jihebelewu
6 Kuma twaxisa kyá kudima o maulongelu adyanga alungu ni Kidistu, tu sulukyenu mu kukula mu nzumbi, sé kuta kaboko kengi: O kudyela o ikalakalu yakambe valolo,* kukala ni kixikanu kwa Nzambi, 2 o ulongelu wa batizu, ni wa kutula o maku kuthandu dya muthu, o difukunukinu dya madifundu, ni kufundisa kwa kalelaku. 3 O ima yiyi twanda ku ibhanga, se kikala mu vondadi ya Nzambi.
4 Yalungu ni yó a ajimbulwila o ima kwa Nzambi, ene atambula o ujitu utunda ku dyulu, o nzumbi ikôla. 5 yó atambula o maka ambote a Nzambi ni makutena a mundu wanda kwiza ku hádya. 6 O kixikanu kyâ ene akitexi, sé-ku muthu wa abhangesa dingi kudyela mukonda ene a mu phaphela dingi o Mon’a Nzambi ku taka, a mu musebhulula bhu pholo dya mundu. 7 Mukonda o mavu atambula o dibesá dya Nzambi kyoso ki noka mvula. Anga o mavu abhana o idima yambote ku idimakaji. 8 Maji se o mavu abhana minya ni holokoso, a axisa, anga Nzambi uloka o mavu, mu kusukaku a ajokotesa.
9 Mu kyenyiki jiphange jami jakazola, sumbala twa muzwela yalungu ni ima yiyi, maji o ima i mwa mubhanga yanda mi kwatekesa o kubhuluka. 10 Nzambi wayuka, kyenyiki mwene kanda jimba o kikalakalu kyenu ni henda i mwene mu londekesa mu dijina dyê mu kukwatekesa o athu o’sole ni mu kukolokota mu kwa kwatekesa jinga. 11 Maji twamesena kwila kala muthu mudyenu aswine, phala n’a kale ni kidyelelu kya kidi katé ku disukilu, 12 phala kimukale mu akwa usudi, maji mukayele o phangu ya yó bhukaxi ka kixikanu kyâ, ni mwanyu wâ, atambula o ima ya akanena.
13 Kyoso Nzambi kyabhange o kikanenu kyê kwa Mbalahamu, kuma sé-ku dingi muthu wa mutundu weji mulokela, mwene walokela mu dijina dyê mwéne, 14 Mwene wambe, wixi: “Mu kidi nganda kubesowala, ni kidi kyoso nganda kusokolola.” 15 Kyenyiki Mbalahamu kyazubha kulondekesa mwanyu, watambula o kikanenu kiki. 16 Mukonda o athu ene muloka mu dijina dya muthu wa atundu, o kuloka kuku kwene o disukilu dya maka oso, kuma phala ene, o kuloka kijimbwete kya kwila o ima ya muzwela ya kidi. 17 Kyene we kimoxi, kyoso Nzambi kyalondekesa kyambote ku alundudi a kikanenu kwila o vondadi yê ki yeji lunguluka, ni kuloka mwene walondekesa kwila o kikanenu kya kidi. 18 Bhukaxi ka kuloka kwê ni kikanenu kyê, Nzambi yó katena kutanga makutu, wa tuswinisa, etu twalengela kwa mwene phala kutambula o kilangidilu ni tutene kudikwatenena mu kidyelelu kitwala nakyu. 19 O kidyelelu kitwala nakyu ku mwenyu wetu kyedi kala o kifikidilu kya naviyu, kyene kyakolo, kyakwata, anga kibokona kwema dya kulutina. 20 Kwenyóko kwene kwa tu twamenena kubokona Jezú, mwene wabhange kiki phala o mbote yetu, yu wakituka Mukunji wabetakota katé ku hádya ni hádya kala kyexile Melekizedeke.