Kwa Titu

2 Eye-phe kolokota mu kuzwela yalungu ni ulongelu wambote.* 2 O adyakime a mala, atokala kukala athu alanga o jihânji jâ, akwa ujitu, akwa kilunji, ala ni kixikanu kyakolo, alondekesa o henda, a kolokota mu kuswina. 3 Kyene we kimoxi, o adyakime a ahatu, atokala kukala ni wendelu wambote, katokala kukala akwa kutatela makutu, ni mu ubhika wa kunwa vinyu yavulu, maji akale alongexi a ima yambote, 4 phala atene kulonga* o ilumba kuzola anumi’â ni kuzola o twana twâ, 5 n’a kale ni kilunji, adibhake mu kuzela, akalakadi ku mabhata, ahatu ambote, atumaka o anumi, phala kaxingise* o maka ma Nzambi.

6 Kolokota we mu kutendelesa o minzangala ya mala n’a kale ni kilunji, 7 ni ubhane phangu mu ima yoso yambote i ubhanga. Longa o ima yayuka* ni kidi kyoso, 8 ni izwelu yambote* katena ku izwela kyayibha, phala akwa jiphata sonyi ja akwate, kakale ni kima kyoso-kyoso kya ku tufundisa nakyu. 9 O abhika atokala kutumaka o jingana jâ mu ima yoso, mu kusota kwa sangulukisa o mixima, sé kwa tambwijila kyayibha, 10 né kwa nyana o imbamba yâ, maji alondekese ufiyele, phala mu ima yoso yabhanga afwamese o ulongelu wa Nzambi, Mubhuludi wetu.

11 Mukonda Nzambi wa tulondekesa o henda yê, mu kubhulula athu oso. 12 O henda yiyi i tulonga kudituna o ufusa ni jihânji jayibha ja mundu, phala tukale ni kilunji, ni kulondekesa o kuyuka* ni wôma wa Nzambi mu ngongo mwenyumu, 13 kyoso kituya ni kukinga o kidyelelu kyetu kya kuzediwa ni kutukuluka kwa fuma ya Nzambi yadikota, ni kwa Mubhuludi wetu, Jezú Kidistu. 14 Mwene wabhana o mwenyu wê phala ku tubhulula* mu ima yoso yayibha,* ni kuzelesa o athu n’a kale mundu wê waswina mu kubhanga ima yambote.

15 Kolokota mu kuzwela o maka enyá, mu kutendelesa,* ni kubazela ni kutena kwoso. Kana kwehela muthu u kutobhesa.