Ikalakalu ya Jipoxolo
18 Kyabhiti o ima yiyi, Phawulu watundu ku Atena, wabhixila mu mbanza ya Kolindu. 2 Mwenyomo wasange-mu Judé mukwa Pondu, dijina dyê Akila, watundile ku Itálya ni muhatu wê Pidisila, mukonda o Nguvulu Kilawudyu watumu kukaya o Jijudé joso akexile mu Loma. Phawulu anga uya mwakunda. 3 Kuma ene akexile ni ufunu umoxi, mwene wexile kubhata dyâ ni kukalakala kumoxi ni ene mu kutunga o jibalaka. 4 Mu jisábhalu joso, mwene wakexile mulonga mudilombe* ni kuxikinisa o Jijudé ni Jingeleku.
5 Kyoso Sila ni Timote kyatundu ku Masedonya, Phawulu wa dibhakwile kyangó mu kulonga o mak’â Nzambi, mu kubhana umbangi ku Jijudé ni kulondekesa ni kidi kyoso kwila, Jezú mwéne o Kidistu. 6 Kuma ene akexile mu muzukutisa ni ku mu xongwena, mwene wa kukumuna o izwatu yê, yu wa ambela: “O manyinga menu akale kuthandu dyenu. Eme ngazele. Kindala, ngandaya mubokela akwa jixi jengi.” 7 Kyenyiki, mwene watundu mwenyomo,* wayi mu inzo ya diyala amwixana Tisyu dya Justu, mubhezi wa Nzambi. O inzo yê ya zukamene ni dilombe.* 8 Maji Kidispu, o mutwameni wadilombe ni mwiji wê woso, axikana Ngana. Athu avulu akwa Kolindu evu o mak’â Nzambi, axikana we Ngana, ya a abatizala. 9 Mu usuku, o Ngana watangela Phawulu mu kisumwa, wixi: “Kana kukala ni wôma, suluka mu kuzwela, kana kudixibha. 10 Mukonda eme ngala n’eye, sé-ku muthu wanda kubhanga kima kyayibha. Kuma mu mbanza yiyi mwala athu avulu a ngi tokala.” 11 Mwene ukala mwenyomo muvu umoxi ni jimbeji jisamanu mu kulonga o mak’â Nzambi ku athu.
12 Kyoso Ngadyu kyexile nguvulu mu mbanza ya Akaya, o Jijudé jabakana, ayi mukwata Phawulu, ya a mubheka mu inzo ya kufundisa, 13 ambe, exi: “O diyala didi, wa mu xikinisa o athu kubheza Nzambi mu ukexilu wengi, kana mu ukexilu utuma o jinguvulu jetu.” 14 Mu kyenyiki, ande dya Phawulu kumateka o kuzwela, Ngadyu watangela o Jijudé, wixi: “Se o diyala didi wabhangele kima kyayibha mba watele kituxi kyadikota, eme ngeji m’ividila ni mwanyu woso. 15 Maji se maka alungu ni izwelu, majina, mba maka a kijila kyenu, enu mwéne mwatokala kubatula o maka enyá. Eme ki ngamesena kukala ngi mufundixi wa ima yiyi.” 16 Mwene anga u akaya mu inzo ya kufundisa. 17 Ene akwata Sosetene o mutwameni wa dilombe,* ya amateka ku mubeta mu inzo ya kufundisa. Maji Ngadyu ka mesenene kudita mu maka yá.
18 Kyoso Phawulu kyabhiti izuwa yavulu mu mbanza ya Kolindu, wadilekela ni jiphange, wadilôngo mu ulungu yu wayi ku Sídya, kumoxi ni Pidisila ni Akila. Mu mbanza ya Sengeleya, mwene wabhutu o ndemba, mukonda wabhangele kikanenu kwa Nzambi. 19 Ene anga abhixila mu mbanza ya Efezu, Phawulu wa axisa mwenyomo. Wabokona mudilombe,* yu wakwatekesa o Jijudé kutendela o Mikanda Ikôla. 20 Sumbala o athu akexile ku mubhinga phala kuxala-mu dingi tu izuwa, mwene kaxikina, 21 maji wa alekela, yu wa ambela: “Se Jihova wa kyandala nganda vutuka dingi kuku.” Kyenyiki, mwene watundu mu mbanza ya Efezu, 22 wayi ku Sezaleya. Anga ubanda ku Jeluzaleme wa menekena o jiphange mu kilunga, wa kulumuka ku Andiyokiya.
23 Kyabhiti thembu mwenyomo, watundu-mu, yu wayi mu jisanzala joso ja Ngalásya ni ja Fidíjya, ni kuswinisa o maxibulu oso.
24 Sayi Judé mukwa Xandediya dijina dyê Apolo, wabhixila mu Efezu. Mwene wexile mesene mukulonga, wexile ni kwijiya kwavulu kwalungu ni Mikanda Ikôla. 25 Mwene a mulongele yalungu ni Jihova, wexile muthu waswina, mukonda dya kutena kwa Nzambi. Wakexile muzwela ni kulonga yalungu ni Jezú ni kidi kyoso, maji wejidile ngó yalungu ni batizu yabokele Nzwá. 26 Mwene wamateka kuzwela ni kuswina kwoso mu dilombe.* Kyoso Pidisila ni Akila kya mwivu, amwixana bhu mbandu, ya a mu lombolwela kyambote o njila ya Nzambi. 27 Kuma Apolo wa mesenene kuya mu mbanza ya Akaya, o jiphange asonekena o maxibulu mwenyómo, phala a mu tambulule ni henda yoso. Kyabhixila-mu, wakwatekesa athu avulu axikanene Ngana mu ngalasa ya Nzambi. 28 Mwaxaxi ka mundu, mwene wakexile mu londekesa ni kuswina kwoso kwila o Jijudé ja tondalele, mu kwa londekesa bhukaxi ka Mikanda Ikôla kwila, Jezú mwéne o Kidistu.