Ku akwa Jihebelewu
12 Kuma a tukondoloka ku kifuxi kyadikota kya jimbangi, tutudyenu o ima yoso ya tunemena ni kituxi ki tulandukisa. Tu lengyenu ni kukolokota o dikanga dya tukala kupholo, 2 mu kutonginina Jezú, o Mutwameni wa kixikanu kyetu, yó u tu kwatekesa kukala ni kixikanu kyatenena. Bhukaxi ka ngalasa ya mulondekesa, mwene wakolokota katé kyafu mu ku mu phaphela ku taka.* Mwene kakexile ni jisonyi, yu waxikama ku kadilu ka kyandu kya Nzambi. 3 Mu kyenyiki, xinganekenu o phangu ya yó wakolokota né mwene ni ku mu sebhulula ku akwa ituxi. Mu kubhanga kiki o akwa ituxi yá adibhekela ngó maka. Se muxinganeka mu phangu yiyi, kimwanda bhwila, kimwanda lembwa.
4 Mu kulwa ni kituxi kiki, enu kiluwa mu bhânga katé mu kufwa. 5 Enu mwadijimbi kyá o kitendelesu kyamibhana Nzambi kala mu an’ê kyoso kyambe, wixi: “Mon’ami kana kudituna o kibazelu kya Jihova, kana kuluwala kyoso mwene kya kulonga. 6 Mukonda Jihova ubazela woso wamuzolo. Mwene ubeta woso u mutambulula kala mona.”
7 Enu mwatokala kukolokota, mukonda o kukolokota kubhanga mbandu ku kibazelu kyenu.* Nzambi u mi talatala kala mu an’ê, kyenyiki mona kuxi ka mubazela kwa tata yê? 8 Maji se akamba ku mi bazela, kimwala dingi mu an’â kidi a Nzambi, maji mwala mu ana angene. 9 O jitata jetu mu xitu akexile mu tubazela, etu twakexile mwaxila. Kitwatokala we kubelesela ni lusolo lwoso o tata yetu mu nzumbi phala tukale ni mwenyu? 10 Mukonda o jitata jetu atubazela ngó mu kakithangana kofele, kala kyamesenene ene, maji Nzambi utubazela phala o mbote yetu ni tukale tu athu azele kala mwene. 11 Mu kidi, kyoso kya tubazela mu kithangana kyenyókyo tu luwala,* maji kyoso o kuluwala kuku ki kubhita kyá, o kibazelu kibhekela kutululuka ni kuyuka kwa yó a mwalonga.
12 Mu kyenyiki, zangulenu o maku menu mabotomoka ni jiphuna jenu jakambe o nguzu. 13 Kolokotenu mu kuyukisa o jinjila jenu phala o kinema kidisanze, muveji dya kubandekesa o unema wê. 14 Sotenu kukala ku paze ni athu oso, tu kolokote mu kukala ni mwenyu wazele. Woso ukamba kubhanga kiki, katena kumona Ngana. 15 Dilangyenu phala kibhukale muthu mudyenu ukamba kutambula o ngalasa ya Nzambi. Dilangyenu we phala mwaxaxi kenu kimusabhuke lundanji lwalulu lumitalesa hadi, anga lusambukisa athu avulu ni ndululu yê yakulula. 16 Dilangyenu phala mwaxaxi kenu kimukale muthu mukwa kubhanga o undumbu,* kabhana valolo mu ima ya Nzambi, kala Izawu wa sumbisile o ukota wê mu dilonga dimoxi dya kudya. 17 Mukonda enu mwejiya kwila, mu kubhita thembu kyoso mwene kyamesenene kutambula o dibesá, ka mu xikina. Sumbala mwene wamesenene kuxikinisa tat’ê ni masoxi ni ku mu dyondela, maji ka muxikina.
18 Mukonda enu ki mwazukama ku kima akikwata ni maku, kya wa mene túbhya né ku dituta dya xikatela mba ku kitombe, ni ku kitembu kya nguzu, 19 né ku mbimbi ya koloneta ni ya dizwi dyazwela ni enu. Kyazubha kwívwa o dízwi, o mundu wadyondele phala ka atangele dingi kima. 20 Mukonda ene katenene kutumaka o kitumu kyambe: “Se kyama kidyota ku mulundu, atokala kukijibha ni matadi.” 21 O kisuma kyamono Mozé kya mubhekela wôma wavulu, anga wambe, wixi: “Ngamuteketa ni wôma.” 22 Maji enu mweza ku mulundu wa Ziyone ni ku mbanza ya Nzambi ya mwenyu, o Jeluzaleme ya dyulu, kwala o jimidi ni jimidi ja jianju, 23 enu mwazukama we mwaxaxi ka athu avulu ni ka kilunga kya ana phandekumbi o majina mâ osoneke ku dyulu. Mwazukama we kwa Nzambi, o mufundixi wa athu oso, mwazukama we ku athu ayuka, o myenyu yâ amuyendesa ni kikwatekesu kya nzumbi ikôla. 24 Enu mwazukama we kwa Jezú o mukwatekexi wa kikutu kya ubhe, ni ku manyinga a zunzumuna mwene abetakota, o manyinga a Abele ndenge.
25 Dilangyenu, ki muditune kwívwa o muthu wa muzwela. Mukonda o athu aditunine kwívwa o muthu wakexile mwa dimuna, atambula kaxtiku. Etu we se tukamba kwívwa o muthu wa mu tudimuna tundé ku dyulu, twanda tambula we kaxtiku. 26 Mu thembu yenyoyo, o dízwi dyê dya tungutisa o ixi, maji kindala mwene wakanena, wixi: “Lwa mukwa dingi eme kinganda tungutisa ngó o ixi, maji ni dyulu we.” 27 O kizwelu “lwamukwa dingi,” kilombolola kubhwisa o ima yanda tunguta, o ima yobhange phala o ima ka itungutisa, inangenene. 28 Kuma twanda tambula Utuminu ki utena kutunguta, tu kolokotyenu mu kutambula o ngalasa ya Nzambi, mukonda yene yanda tu kwatekesa kubhanga o sidivisu ya Nzambi mu ukexilu wafwama ni wôma ni kuxila kwoso. 29 Mukonda o Nzambi yetu wedi kala túbhya tubwikisa.