Daniyele

6 Sobha Dályu wamono kwila, kima kyambote kusola hama makwinyi ayadi a jikabhitangu phala ku mukwatekesa mu utuminu wê woso. 2 Sobha wasolo ilamba itatu phala kwendesa o ikalakalu ya tubhitangu. Mwene wabhange kiki phala kamunyane o jimbote jê. Daniyele wexile mwaxaxi ka ilamba itatu yiyi. 3 Mwaxaxi ka ilamba ni jikabhitangu, Daniyele wexile muditungula mukonda mwéne wabetelekota mu kukala ni unjimu. Mukiki, o sobha wexile muxinganeka ku mubhana dingi ungana mu utuminu wê.

4 Mu thembu yenyoyo, o ilamba ni tubhitangu akexile musota kikuma phala kutatela Daniyele kwila, kexile mulanga kyambote o jimbote ja sobha. Maji kasange kima phala ku mutatela-nakyu, mukonda mwene wexile muthu wakidi, wafiyele, kabhangele kima kyayibha kyeji bhangesa ku mutatela. 5 Bhenyobho, o ilamba ni tubhitangu ambe, exi: “Kitwala ni kima phala kutatela Daniyele, kale tu mukwatela mu kijila kya Nzambi yê.”

6 Kyenyiki, o ilamba ni tubhitangu, adibhongolola ya ayi muzwela ni sobha, exi: “Sobha Dályu, kola mwenyu! 7 O ilamba yoso ya utuminu wê, o atwameni, o tubhitangu, o akwa kubhana o jindunge ni jinguvulu adibhongolola ya abakana kusonekesa ngonge ifidisa kwila, mu makwinyi atatu a izuwa, muthu woso ubhinga kima ku nzambi yoso-yoso mba ku muthu wengi, kokwé u mwenexi kana, a mutakule mu dikungu dya jihoji. 8 Kindala-phe eye u sobha, tuma kusoneka ngonge, ute-ku o dijina dyê phala ka ilungulule. Mukonda o kijila kya akwa Medya ni kya akwa Pélesa katena ku kijimuna.”

9 Bhenyobho, Sobha Dályu wasoneka o dijina dyê mu mukanda.

10 Kyoso Daniyele kyevu kwila sobha wasoneka o dijina dyê mu mukanda wa ngonge, wayi kubhata dyê. O jinjanena ja dixilu dyexile ku thala dya inzo, jalungile ku Jeluzaleme, jajikukile. Mwene wafukama, wasambe, yu waximana Nzambi yê kala kyexile mubhanga kya, lutatu ku kizuwa. 11 Mukyenyiki, o mayala enyó abokona mu inzo ya Daniyele, a musange wa musamba ni kudyonda kwa Nzambi yê.

12 Ene ayi muzwela ni sobha, a mulembalesa o ngonge, exi: “Eye ngana kusoneka o dijina dyé mu ngonge, eye wa ite kidimbu mu kwamba kwila, mu makwinyi atatu a izuwa, muthu woso ubhinga kima ku nzambi yoso-yoso mba ku muthu wengi, kokwé éye u mwenexi kana, a mutakule mu dikungu dya jihoji?” O sobha watambwijila, wixi. “O ngonge yakidi mwene! Mukonda o kitumu kya akwa Medya ni kya akwa Pélesa katena ku kijimuna.” 13 Bhenyobho, ambela o sobha, exi: “Daniyele o mukwa Judá a mukwikile, kamubelesela o ngonge i wabhana eye u sobha. Mwene wa musuluka ni kusamba kwa Nzambi yê lutatu ku kizuwa.” 14 Mu kwivwa o ima yiyi, o sobha waluwala kyavulu yu waxinganeka kubhanga kima phala kubhulula Daniyele. Mwene wabhange yoso kate kyafu o dikumbi phala ku mubhulula. 15 Mu kusuka-ku, o mayala yó, ayi kwa sobha ya a mwambela, exi: “Sobha ngana yetu, lembalala kwila, kala kyamba o kijila kya akwa Medya ni kya akwa Pélesa, o kitumu kyabhana o sobha, katena ku kijimuna.”

16 Kyenyiki, o Sobha watumu kutakana Daniyele ya a mutakula mu dikungu dya jihoji. O Sobha wambela Daniyele, wixi: “O Nzambi yé wene mu mubheza ithangana yoso, wanda kubhulula.” 17 Anga abheka ditadi, a dikundumuna ya axiti o dikungu. O Sobha anga u dijika ni kidimbu kya nela yê ni kya nela ya athu’ê afuma phala ki kulunguluke kima mu ukexilu wabatula o maka alungu ni Daniyele.

18 Bhenyobho, o Sobha wavutuka m’onzo yê. Usuku woso kadi kima, kaxikina ku muxikila mimbu, walembwa we kuzeka. 19 Kyoso kuma kikwaki, Sobha wabalumuka, wayi ni lusolo bhu dikungu dya jihoji. 20 Mu kuzukama bhu dikungu, o sobha wa mwixana ni kuluwala, yu wa mwibhwidisa: “Daniyele, u selevende ya Nzambi,* o kwila o Nzambi yé wene mu mubheza ithangana yoso watena ku kubhulula ku jihoji?” 21 Mu kithangana kyenyokyo, Daniyele watambwijila o sobha, wixi: “Sobha ngana yami, kola mwenyu! 22 Nzambi yami watumikisa o anju yê, yajika o makanu a jihoji, kijangibhange kima kyayibha. Mukonda mwene wamono kwila, eme kingala ni kikuma, kingabhange we kima kyayibha kokwé, Sobha.”

23 O sobha wasanguluka kyavulu yu watumu kukatula Daniyele mu dikungu. Kyoso Daniyele kya mukatula mu dikungu, amono kwila kamukwama, mukonda mwene wadyelele kwa Nzambi yê.

24 O Sobha anga utuma kutakana o mayala atatela Daniyele. A abheka ya atakula mu dikungu dya jihoji kumoxi ni an’â ni ahat’wâ. Mu dikungu-phe katula-mu luwa bhoxi, o jihoji ja akawidila bhulu, ya asasujula o ifuba yâ yoso.

25 Kyenyiki, o Sobha Dályu wasonekena o athu a jixi joso ni madimi moso atungu mu ngongo, wixi: “O kutululuka kwenu kuvule, muzediwe! 26 Nga mubhana o ngonge ya kwila, mu utuminu wami woso, o athu atokala kuxila ni kukala ni wôma wa Nzambi ya Daniyele. Mwene Nzambi ya mwenyu, wanda suluka ku mwenyu kate ku hádya ni hádya. O utuminu wê kanda ubwika, wanda tumina kate ku hádya ni hádya. 27 Mwene ulanga, ubhulula, ubhanga ijimbwete ni madiwanu ku dyulu ni mu ixi, mukonda wabhulula Daniyele mu makanu a jihoji.”

28 Kyenyiki, o ima yoso yende kyambote ku mwenyu wa Daniyele mu utuminu wa Dályu ni mu utuminu wa Silu o mukwa Pélesa.