Kala Kyasoneka Luka

4 Bhenyobho Jezú wezala ni nzumbi ikôla, watundu mu ngiji ya Njolodá, anga o nzumbi ikôla i mwendesa katé ku mukáwu, 2 mu makwinyi awana a izuwa, a mutendala kwa Dyabhu. Mu izuwa yenyóyo mwene kadi kima, kyoso kyabhiti o izuwa yenyóyo, ukala ni nzala. 3 Dyabhu anga u mwambela, wixi: “Se eye u mon’a Nzambi, bhangesa o ditadi didi kukituka mbolo.” 4 Maji Jezú wa mu vutwila: “Kyósoneke: ‘O mwenyu wa muthu kiwijila ngó ku mbolo.’”

5 Dyabhu wa mubheka ku mulundu wadileka, yu wa mulondekesa o mautuminu moso ma ngongo, mu kithangana kyenyókyo. 6 Mu kusuluka, Dyabhu wa mwambela, wixi: “Nganda kubhana o maungana moso ni fuma ya mautuminu yá, mukonda a ngibhana-wu. Eme wami ng’a bhana kwa yó woso u nga mesena. 7 Mu kiki, se u ngibheza ngó lumoxi bhu pholo yami, yoso yiyi ngi kubhana-yu.” 8 Jezú-phe wa mu tambwijila, wixi: “Kyosoneke kwila, ‘mu kubheza kikale ubheza ngó Jihova Nzambi yé, mwéne ngó u mu sidivila.’”

9 Mwene anga u mubheka mu Jeluzaleme, u mwimanesa kuthandu* dya tembulu, u mwambela, wixi: “Se eye u mon’â Nzambi, ditakule bhoxi, 10 mukonda kyosoneke: ‘Mwene wanda bhana kitendelesu ku jianju jê kyalungu n’eye, phala ku kulanga. 11 Ene-phe anda kuzenza bhu maku, phala ki udibhukane ku ditadi.’” 12 Jezú-phe wa mu vutwila, wixi: “Kyosoneke we kwila, ‘Jihova Nzambi yé, kana ku mu polovala.’” 13 Kyoso Dyabhu kyazubha ku mutendala, wa muxisa, katé mu kithangana kyengi kyatokala.

14 Jezú anga uvutuka mu Ngalileya wezala ni kutena kwa nzumbi ikôla. Fuma yê ya dimwange mu jisanzala joso. 15 Mwene anga umateka kwalonga mu malombe* mâ. Athu oso akexile mu muximana.

16 Mwene anga uya mu sanzala ya Nazalé, mwa musasele. Mu kizuwa kya Sábhalu mwene wabokona mu dilombe* kála kyexile o kifwa kyé, anga wimana phala kutanga o Mikanda ikôla. 17 Kyenyiki, amubhana o mukanda wa polofeta Izaya, mwene wa ujikula, yu wasange o kididi m’osoneke, exi: 18 “O nzumbi ya Jihova yala kuthandu dyami, mukonda mwene wa ngi undu phala kuboka o njimbu yambote ku jingadyama. Mwene wa ngitumu kubokela o ufôlo ku abhika ni kujikula o mesu a ifofo, ni kubhulula oso a mutala hadi, 19 ni kuboka o kithangana kya kutambula o mabesá a Jihova.” 20 Jezú wajika o mukanda, wa ubhana ku mukwá dilombe,* anga uxikama. Athu oso mu dilombe akala mu mutala swí. 21 Mwene anga umateka kwatangela: “O izwelu yiyi ya Mikanda Ikôla imwevu, lelu ya dikumbidila.”

22 Athu oso amateka ku mu zwela kyambote, anga adiwana ni izwelu yambote yakexile mutunda mukanu dyê, akala muzwela, exi: “Yú ki mwéne o mon’a Zuze?” 23 Mukonda dya kiki, mwene wa ambela, wixi: “Sé phata, mwanda ngitanga o sabhu yiyi: ‘Musaki, disake eye mwene’, bhanga we mumu, mu mbanza mwa kuvwalela, o ima itwevu kwila wa ibhange mu Kafalanawú.’” 24 Mwene wambe, wixi: “Ngi mitangela o kidi kwila, sé-ku polofeta a muxikina mu mbanza mwa mu vwalela. 25 Ngi mitangela o kidi kwila, mu izuwa ya Elija, mu Izalayele mwakexile atudi avulu a ahatu, kyoso kyabhiti mivu itatu ni mbeji jisamanu sé kunoka mvula, anga mu ixi yenyóyo mu kala nzala yadikota. 26 Né mwene kiki, Elija ka mu tumikisa ku ahatu yá mu Izalayele, maji ku mutudi ngó umoxi mukwa Salefá, mu ixi ya Sidónya. 27 Mu Izalayele mwakexile we athu avulu akexile ni mabhute mu izuwa ya polofeta Elizewu, maji sé-ku muthu mudyâ amusakele,* kikale ngó Nahamane o mukwa Sídya.” 28 Athu oso evu o maka enyá mu dilombe,* akexile ni njinda yavulu. 29 Kuma ene atungile ku mulundu, abalumuka, a mu katula mu mbanza ni lusolo, ya amwambata ku dikenye, phala ku mulundula-mu. 30 Maji mwene wabhiti bhukaxi kâ, yu wayé.

31 Anga uya mu Kafalanawú, mu mbanza ya Ngalileya. Mwene wakexile mwalonga mu kizuwa kya Sábhalu, 32 ene anga adiwana ni ukexilu wê wa kulonga, mukonda mwene wakexile mwalonga ni ungana. 33 Mu dilombe mwexile diyala wexile ni dimonyo, yu wadikola ni dízwi dya swina, wixi: 34 “Awá! Ihi i wamesena kokwetu Jezú dya Nazalé? Weza phala ku tu bwikisa? Eme nga kwijiya kyambote se eye nanyi: Eye u Muthu Ukôla wa Nzambi.” 35 Maji Jezú wa mubazela, wixi: “Dixibhe, tunda kwa mwene.” Kyoso kyazubha kuvunda o diyala bhoxi mw’axaxi kâ, o dimonyo dyatundu mu mukutu wê, sé ku mu kwama. 36 Kyenyiki, o athu adiwana, ya amateka kudyambela mudyâ, exi: “Kiki kima kyahi? Mukonda mwene utumina o jinzumbi jayibha ni ungana ni kutena, jene anga jitunda!” 37 Mukonda dya kiki, o fuma yê yakexile mu dimwanga mu jisanzala joso, mu mbanza yenyóyo.

38 Kyoso kyatundu mu dilombe,* mwene wabokona mu inzo ya Ximá. O ukow’a Ximá wakatele, wakexile ni febele yavulu, anga abhinga kwa Jezú phala ku mu kwatekesa. 39 Jezú wemana bhu mbandu yê, anga ubhangesa kwila o febele ibhwa, yene anga ibhita. Mu kithangana kyenyókyo, o muhatu wabalumuka yu wamateka kwa lambela kudya.

40 Kyoso o dikumbi ki dyakexile kyá mu boba, a mubhekela athu akexile ni mauhaxi a maukexilu oso. Mwene wakexile mwasaka, mu kwatula o maku mê kuthandu dyâ. 41 O madimonyo we akexile mu tunda mu mikutu ya athu ni kudikola, exi: “Eye u Mon’a Nzambi.” Maji mwene wakexile mwa bazela, kexile mwa ehela kuzwela, mukonda a mwijidile kwila mwéne Kidistu.

42 Mu kamene, mwene watundu yu wayi ubheka wê ku mukáwu. O mundu anga ukala ku mu sota, ya abhixila katé bhwakexile mwene. Ene ka mesenene kwila mwene u axisa. 43 Mwene wa ambela, wixi: “Eme ngatokala we kuboka o njimbu yambote ya Utuminu wa Nzambi mu jimbanza ja mukwá, mukonda kyene kya ngi tumikisa.” 44 Mwene wa suluka mu kuboka mu malombe* a Judeya.