Mukanda wa Kayadi ku Akwa Kolindu
5 Etu twejiya kwila, se o balaka yiyi, o inzo yetu mu ngongo a ibwikisa, Nzambi wanda tubhana inzo ya kalelaku ku dyulu, inzo ka ibhange ku athu. 2 Mu kidi etu twa mu kema mu inzo yiyi, twala ni hânji ya kubokona mu inzo ya tutokala, o inzo ya dyulu, 3 phala kyoso kyanda bhixila o kithangana kya kubokona-mu, katusange twakambe dibhata.* 4 Etu twala mu balaka yiyi, ene mu tuxina, mukonda ki twa mesena ku ixisa, maji twa mesena kubokona mu inzo ya mukwá, phala o mwenyu sé dizubhilu ubhwise o mwenyu yú. 5 Nzambi mwéne wa tu yudika phala o mwenyu sé dizubhilu, mwéne watubhana o nzumbi ikôla kala kidyelelu* kya kima kyanda kwiza.
6 Kyenyiki, etu tudyelela jinga, twejiya we kwila, kyoso ki tukala hanji ni mukutu mu xitu, twala dikanga dya Ngana, 7 mukonda etu ki twa mu kwenda bhukaxi ka ima i tumona, maji bhukaxi ka kixikanu. 8 Kuma twezala ni kidyelelu, kyeji tu wabhela dingi kuxisa o mukutu wa xitu phala kutunga kumoxi ni Ngana. 9 Kyenyiki, kikale se tutunga kumoxi ni mwene, mba tukala dikanga dya mwene, twa mesena ku mu sangulukisa. 10 Mukonda etu enyoso twa ka kwimana bhu pholo ya kyandu kya Kidistu, phala ku tufundisa mu ima i twabhange, kyoso ki twexile ni mukutu wa xitu, kikale mu ima yawabha mba yayibha.
11 Kuma twejiya ihi ilombolola kukala ni wôma wa Ngana, twa mu suluka mu kwijidisa o kidi ku athu, maji Nzambi wa twijiya kyambote. Twa mesena we kwila, enu wenu mu twijiya kyambote. 12 Ki twa mu sota kudiximana, maji twa mu mi swinisa phala mu dinanze mukonda dyetu, ni mu tene kutambwijila yó a dinanza mukonda dya jipholo jâ, kana mu ima yala ku mixima yâ. 13 Mukonda se twa saluka, twa salukila Nzambi, maji se tukala ni kilunji, phala o mbote yenu. 14 O henda ya Kidistu ituswinisa, mukonda etu twejiya kwila, muthu umoxi wa fwila athu oso, mu kidi athu oso afwile. 15 Mwene wa fwile bhu kididi kya athu oso, phala oso ala ku mwenyu kabhange dingi o vondadi yâ, maji abhange o vondadi ya yó wa afwila, anga a mu fukununa.
16 Kindala, kitwejiya dingi muthu mu ukexilu wa xitu. Né mwene Kidistu twa mu mwene kala muthu mu xitu, ku hádya ki twanda mu mona dingi mu ukexilu yú. 17 Kyenyiki, se muthu ukala kumoxi ni Kidistu, Nzambi u mubhanga muthu wa ubhe. O ima yokulu yabhiti kyá. Ivwenu! Kweza kyá ima ya ubhe. 18 Maji ima yoso yiyi itunda kwa Nzambi, yó wa tubhangesa kukala ni ukamba ni mwene bhukaxi ka Kidistu. Watubhana we o kikalakalu kya kukwatekesa o athu kukala ni ukamba ni mwene. 19 Kiki kilombolola kwila, bhukaxi ka Kidistu, Nzambi wa mu bhangesa o mundu kukala ni ukamba ni mwene, sé kukwata konda ya ituxi yâ. Mwene watubhana o kikalakalu kya kukwatekesa o athu kukala ni ukamba ni mwene.
20 Kyenyiki, twala tu akunji a Nzambi bhu kididi kya Kidistu, kiki kyedi kala Nzambi mwéne wa mu mi ambela bhukaxi ketu. Kuma twala bhu kididi kya Kidistu, tudyonda: “Kalenu ni ukamba ni Nzambi.” 21 O yó kejidile kituxi, Nzambi wa mu bhange sata ya kukúla o ituxi* mukonda dyetu, phala tukale tu athu a yuka bhu pholo ya Nzambi.