Ku Akwa Loma
6 O kwila kiki kilombolola kuma twanda suluka mukuta ituxi phala o ngalasa ya Nzambi kokwetu i dibandekese? 2 Kana! Kuma o kituxi kikya mu tutumina dingi, kyebhi-phe ki twa muya hanji ni kuta ituxi? 3 Ki mwejiya kwila etu enyoso a tu batizala mwa Kidistu Jezú, a tu batizala mukufwa kwê? 4 Bhukaxi ka batizu yetu, atufundu kumoxi ni mwene. Kala Kidistu kya mu fukununa mw’alunga bhukaxi kakutena kwa fuma ya Tata, kindala etu twala we ni mwenyu wa ubhe. 5 Se tu fwa kala kyafu mwene, anda tu fukununa we kala kya mufukununa mwene. Kyenyiki twanda kala kumoxi ni mwene. 6 Twejiya kwila o ukexilu wetu wokulu a uphaphe kumoxi ni mwene ku taka,* phala o kutena kwa kituxi ki kukale dingi mu mukutu wetu, phala ki tukale dingi tu abhika a ituxi. 7 Mukonda woso wafu a muloloka o ituxi yê.*
8 Se twafu kumoxi ni Kidistu, tu xikina kwila twanda kala we kumoxi ni mwene ku mwenyu. 9 Twejiya kwila Kidistu kanda fwa dingi, kuma a mufukununa mw’alunga. O kalunga kikala dingi ni kutena kwa ku mutolola. 10 Mwene wafu mu lumoxi phala kuzubha o ituxi katé ku hádya ni hádya. Kindala mwene wala ku mwenyu, phala kubhanga o vondadi ya Nzambi. 11 Kyene we kimoxi, yalungu ni kituxi, mudimona kala mwafu, maji mwala ku mwenyu phala kubhanga o vondadi ya Nzambi, mu kukayela Kidistu Jezú.
12 Mukonda dya kiki, ki mwehele o kituxi kutumina kala sobha mu mikutu yenu, mu ku mi bhangesa kutumaka o jihânji ja mikutu yenu. 13 Kanenu kubhakula o mikutu* yenu mu ituxi kala jifalamenda phala kubhanga o ima yayibha. Maji dibhakulyenu kwa Nzambi, kala mu athu mwatundu mu kufwa, énu mweza ku mwenyu. Bhakulenu we o mikutu* yenu kwa Nzambi, kala jifalamenda ja kubhanga naju ima yambote. 14 O kituxi ki kyatokala ku mitumina, mukonda ki mwala bhoxi dya Kijila, maji mwala kyá mu ngalasa ya Nzambi.
15 O kwila kiki kilombolola kuma, twatokala kuta kituxi, mukonda kitwala bhoxi dya Kijila, maji twala kyá mu ngalasa ya Nzambi? Kana! 16 Ki mwejiya kwila se mu dibhakula kala mu abhika mu kutumaka muthu, mukala mu abhika a mwene? Kyenyiki se mukala mu abhika a kituxi, kyene kyanda mibhekela o kufwa, maji se mukala mu abhika a Nzambi ni ku mutumaka, mwanda kala mu athu ayuka. 17 Maji tu sakidila Nzambi, sumbala mwexile mu abhika a kituxi, kindala mwa mutumaka ni muxima woso o ilongesu i mwa tambula. 18 Kuma mwajituka kyá ku ituxi, mwakituka mu abhika a kuyuka. 19 Mukonda dya kuzoza kwenu* nga muzwela ima atena ku itendela kyambote ku athu. Kuma mwa bhakwile o mikutu yenu kala mu abhika a ufusa ni a kubhanga ima yayibha, kindala, bhakulenu o mikutu yenu kala mu abhika a kuyuka phala mukale mu athu azele. 20 Mukonda kyoso ki mwexile mu abhika a kituxi, ki mwabhingile kubhanga o ima yayuka.
21 Ima yahi i mwexile mubhanga m’ukulu? Ima i mi bhekela jisonyi kindala, mukonda o disukilu dya ima yenyóyo, o kufwa. 22 Kuma a mibhulula kyá ku ituxi, anga mwakituka mu abhika a Nzambi, bhangenu o ima yazele. O disukilu dya ima yiyi o mwenyu wakalelaku. 23 Kuma, o futu ya kituxi o kufwa, maji o ujitu ubhana Nzambi, o mwenyu wakalelaku bhukaxi ka Ngana yetu Kidistu Jezú.