Kala Kyasoneka Matesu
17 Mu kubhita izuwa isamanu Jezú wexana Phetele, Tiyaku ni phang’yê Nzwá, anga wa ambata ku mulundu walebha. 2 Mwene-phe wa lunguluka bhu pholo yâ, o pholo yê, yakexile mu mwika kala o mwanya, o izwatu yê yakexile mu bhenya* kala o mukengeji. 3 Mu kyenyiki, kwa a tukulukila Mozé ni Elija, anga akala mu zwela nê. 4 Phetele anga utangela Jezú, wixi: “Ngana, kima kyambote kukala bhabha. Se wa kyandala, nganda tunga bhabha balaka* jitatu, imoxi phala eye, imoxi phala Mozé, o ya mukwá phala Elija.” 5 Kyoso Phetele kyakexile hanji mu zwela, dituta di mwika dya avungina, anga kutunda dízwi mu dituta, dyexi: “Yú mwéne o Mon’ami wakazola, eme nga mu xikina. Mu ivwidilyenu.” 6 Kyoso o maxibulu kyevu kiki, wôma wa akwata, hé afukama. 7 Jezú-phe, wazukama yu wa akwata, anga wa atangela, wixi: “Balumukenu. Kimukale ni wôma.” 8 Kyoso kya balumuka, kamono dingi muthu wengi, maji Jezú ngó. 9 Kyoso ene kyakexile mu tuluka ku mulundu, Jezú wa a tendelesa, wixi: “Ki mu tangele muthu o kisumwa kiki, katé kyanda fukununa o Mon’a muthu mw’alunga.”
10 O maxibulu mê a mu ebhwidisa, exi: “Mukonda dyahi-phe o jimesene ja kulonga o Kitumu azwela kwila, Elija mwéne wanda dyanga o kwiza?” 11 Mwene wa atambwijila, wixi: “Mu kidi, Elija wanda kwiza mwene ni kuyukisa o ima yoso. 12 Maji, ngi mi ambela kwila Elija wejile kyá, ene ka mwijidile, maji a mu bhange yoso ya mesenene. Kyene we kimoxi, o Mon’a muthu anda mu talesa hadi kwa ene.” 13 O maxibulu atendela kwila, mwene wakexile mu atangela yalungu ni Nzwá dya Batizu.
14 Kyoso kyabhixila bhwa kexile o mundu, sayi diyala wa mu zukama yu wa mu fukamena, anga u mwambela, wixi: 15 “Ngana, mon’ami mu kwatele henda, mukonda wala ni uhaxi wa kikonya. Ithangana yavulu wene mu bwa mu túbhya ni mu menya. 16 Nga mu bheka kyá ku maxibulu mé, maji ene katena ku mu saka.” 17 Jezú wambe, wixi: “Mwiji wakambe o kixikanu, wadyanguka! Katé bhebhi nganda kala ni enu? Katé bhebhi nganda mi lendukila? Mu bhekyenu bhabha.” 18 Jezú wabazela o dimonyo, anga o dimonyo ditunda ku mona, mwene anga udisanza mu kithangana kyenyókyo. 19 O maxibulu-phe azukama kwa Jezú, anga a mu ebhwidisa, exi: “Mukonda dyahi ki twatena kukaya o dimonyo?” 20 Mwene wa atambwijila: “Mukonda o kixikanu kyenu kyatolo. Mu kidi, ngi mi ambela kwila, se o kixikanu kyenu kisoka ni lumbundu lwa mbutu ya mustarda, mwanda tangela o mulundu yú: ‘Tunda bhabha, ndé bhanyá,’ o mulundu wanda tunda. Kana-ku kima ki mwanda lémbwa ku kibhanga.” 21 ——
22 Kyoso kyakexile mu Ngalileya Jezú watangela o maxibulu mê, wixi: “O Mon’a muthu anda mu bhakula* bhu maku a athu, 23 ene anda mu jibha, anga mu kizuwa kya katatu anda mu fukununa.” Mu kiki, o maxibulu a luwala kyavulu.
24 Kyoso kyabhixila mu mbanza ya Kafalanawú, o akwa kutambula o kitadi kya lubhaku lwa tembulu,* azukama kwa Phetele ya a mu ebhwidisa, exi: “O mesene yenu kene mu futa o kitadi kya lubhaku lwa tembulu?” 25 Phetele wa a tambwijila, wixi: “Ufuta mwéne.” Maji kyoso kyabokona mu inzo, Jezú mwéne wadyangela ku mwambela, wixi: “Ximá, ihi i ubanza? O jisobha ja ngongo jene mu bhinga o malubhaku* kwa nanyi? Ku twana inga ku asonyi?” 26 Kyoso mwene kyambe: “Ku asonyi,” Jezú wa mu ambela, wixi: “Kyene mwene, mu kiki-phe o twana kabhingi kufuta o lubhaku. 27 Maji phala ki twa bhangese ku dibhala, ndé mu kalunga utakule o nzolo, ukwate o mbiji yoso i udyanga kutamba; ki wanda ijikula o dikanu, wanda sanga-mu dibele dimoxi dya phalata.* Katula o dibele, udibhane kwa ene phala eme, n’eye.”