Ku Akwa Ngalásya
2 Kyabhiti kwinyi ni kiwana kya mivu, ngayi dingi mu Jeluzaleme kumoxi ni Balanabé, Titu nga mwambata we. 2 Mukonda Ngana Jezú wa ngi tangele mu kisumwa kwila nga tokalele kubanda-ku. Eme nga tangela o jiphange yalungu ni njimbu yambote i nga muboka ku athu akwa jixi jengi. Maji nga jimbulwila ngó athu ofele, yó akexile ni ujitu mu kilunga. Nga bhange kiki, phala kwijiya kwila o kikalakalu ki nga bhangele ki kyexile kya kingoho.* 3 Né mwene Titu nga kexile nê, sumbala mukwa Ngelexya, sé-ku muthu wa jijidikile ku mu saya. 4 Maji o maka yá amoneka mukonda dya jiphange ja makutu, a bokwene mu kilunga bhofele-bhofele. Ene abokona phala kulonda o ufôlo utwala nawu mwa Kidistu Jezú, n’a tubhange tu abhika. 5 Maji etu ki tu atumaka, né ngó lumoxi,* phala mu kolokote mu kidi kya njimbu yambote.
6 Maji yalungu ni yó afikile kwila athu afuma, (o fuma ya kexile nayu ki nga ibhana valolo mukonda Nzambi kene mu fundisa o muthu mu ima ya mona ku mesu) o mayala yá ka ngibhana né ngó ndunge imoxi ya ubhe. 7 Maji kyoso ene kya mono kwila a ngi tumine kuboka o njimbu yambote kwa yó ka asaye, kala Phetele kya mu tumu kubokela yó a asaye 8 (mukonda o yó wabhana o kutena kwa Phetele phala kukala poxolo ya athu a asaye, wa ngibhana we o kutena kwa kukala poxolo ya athu akwa jixi jengi), 9 ni kya mono kwila Nzambi wa ngi londekesa o ngalasa yê, Tiyaku, Sefa* ni Nzwá edile kala jingunji mu kilunga, asununa o maku mâ a kadilu mu kukolesa o ukamba wetu. Ene abhange kiki phala eme ni Balanabé twende mu bokela athu akwa jixi jengi, ene-phe ende mu bokela yó a asaye. 10 Ene a tubhingi phala ki tujimbe o jingadyama, eme wami ngene mu bhanga nguzu yavulu phala kukumbidila o maka enyá.
11 Kyoso Sefa* kyabhixila ku Andiyokiya, nga mubazela bhu pholo ya mundu, mukonda mwene watondalele.* 12 Kuma ande dya kubhixila o mayala a tundile kwa Tiyaku, mwene wakexile mudya kumoxi ni athu akwa jixi jengi, maji kyoso o mayala yá kya bhixila, mwene wa lunguluka, yu wa disondolola ku athu enyá, mukonda wakexile ni wôma wa Jijudé, yó a asaye. 13 O jiphange ja mukwá, o Jijudé, adibundu kumoxi mu mangonya mê, katé mwene ni Balanabé wa akayela we mu mangonya mâ. 14 Maji kyoso ki nga mono kwila ene kakexile mu tumaka o kidi kya njimbu yambote, nga tangela Sefa* bhu pholo ya mundu woso, ngixi: “Sumbala eye u Judé, maji wala ni wendelu wa akwa jixi jengi, kiwala ni wendelu wa Jijudé, mukonda dyahi wa mu jijidika athu akwa jixi jengi kukayela o ukexilu wa Jijudé?”
15 Etu a tuvwala kala tu Jijudé, kitwala kala o athu akwa jixi jengi akwa ituxi. 16 Twejiya kwila, o muthu ka mu mono kwa Nzambi kala muthu wayuka mukonda dya kutumaka o ima yosoneke mu kijila, maji mukonda dya kukala ni kixikanu kwa Jezú Kidistu. Kyenyiki twala ni kixikanu kwa Kidistu Jezú, phala a tumone kala tu athu ayuka mu kukala ni kixikanu kwa Kidistu, kana mu ima yosoneke mu Kijila, kuma sé-ku muthu a mu mona kala muthu wayuka mukonda dya kutumaka o Kijila. 17 Se athu a tu mona kala tu akwa ituxi, mukonda dya Nzambi ku tu mona kala tu athu ayuka bhukaxi ka Kidistu, o kwila kiki kilombolola kuma Kidistu wa mu tu swinisa kuta kituxi? Kana ngana! 18 Se ngi tungisa dingi o ima i nga budile kyá, ngi londekesa kwila ngi mukwa kubhukumukina o Kijila. 19 Bhukaxi ka ima yosoneke mu Kijila, eme ngafu phala o Kijila, ni ngi kale ku mwenyu phala kusidivila Nzambi. 20 Kindala a ngi phaphela ku taka* kumoxi ni Kidistu. K’eme dingi ngala ku mwenyu, maji Kidistu mwéne wala ku mwenyu moxi dyami. O mwenyu u ngala nawu kindala, ngala nawu mukonda dya kixikanu kyami kwa Mon’a Nzambi. Mwene wa ngi zolo yu wabhana o mwenyu wê mukonda dyami. 21 Eme ki ngi ditunu o ngalasa ya Nzambi, mukonda se o muthu a mu mona kwila wayuka bhukaxi ka Kijila, Kidistu phe wafu mu kingoho.