Zakadiya

2 Ngabhetula o mesu bhulu, ngamono diyala wakwata lungoji lwa kuzonga bhu maku. 2 Nga mwibhwidisa: “Eye wamuya kwebhi?”

Mwene wa ngitambwijila: “Ngamuya muzonga Jeluzaleme, phala kwijiya o kulebha ni kuzanza kwê.”

3 Bhenyobho, o anju yakexile muzwela n’eme yasondoloka, anga kwiza anju yengi mudisanga-nê. 4 O anju yeza yambela mukwâ: “Lenga kate bhwala o munzangala, mutangele kiki: ‘“Jeluzaleme yanda kwizala ni athu ni ibhaku. Ene kanda bhinga kutunga ilumbu.” 5 Jihova wambe kiki: “Eme nganda kala ngi ilumbu ya túbhya mu jimbandu jê. Nganda kwizalesa o mbanza ni kubhenya kwami.”’

6 “Zenu! Zenu! Tundenu ni lusolo mu ixi yala ku mbandu ya thunda.” Kiki kyene kyambe Jihova.

“Mukonda nga mimwange mu jixi javulu.”* Kiki kyene kyambe Jihova.

7 “Zenu, enu mu mundu wa Ziyone! Lengenu, enu mwatungu ni mon’a kilumba, Babilonya. 8 Kuma Jihova dya ifuxi, yó kyoso kyazubha ku mubhana kijingu, wa ngitumikisa ku ifuxi yexile munyana o ima yenu, wambe kiki: ‘Woso u mikwata, wa muxuka o mulembu mu dyesu dyami. 9 Kindala nganda kwazengela o lukwaku lwami. O yó exile abhika anda tambula o imbamba ya jingana jâ.’ Enu mwanda kwijiya kwila Jihova dya ifuxi, mwéne wa ngitumu.

10 Jihova wambe, wixi: “Éye u mon’a kilumba wa Ziyone, dikole ni kisangu-sangu. Mukonda éme ngiza, nganda tunga mwaxaxi ké.” 11 Mwene wambe: “Mu kizuwa kyenyokyo, ifuxi yavulu yanda kala ku mbandu yami, eme ngi Jihova. Ene anda kituka mundu wami, eme nganda tunga mwaxaxi kâ.” Ene anda kwijiya kwila Jihova dya ifuxi, mwene wa ngitumikisa kokwenu. 12 Jihova wanda tambula Judá kala undundu wê mu ixi ikôla, wanda sola dingi Jeluzaleme. 13 Mundu woso udixibhe bhu pholo ya Jihova, mukonda mwene wa mutumina tunde bhu kididi kyê kikôla bhwa tungu.