Dya Dyanga Dya Malunda
17 Kyoso Davidi kyakexile kya mu inzo* yê, wambela polofeta Natane, wixi: “Tala, eme ngatungu mu inzo ya mixi ya misédulu, maji o Álaka ya Kikutu kya Jihova yala mu balaka.” 2 Natane watambwijila Davidi, wixi: “Bhanga yoso ya kukala ku muxima, mukonda o Nzambi yakidi wala n’eye.”
3 Mu usuku wenyó, Nzambi wambela Natane, wixi: 4 “Ndé, wambela Davidi selevende yami: ‘Jihova wambe kiki: “K’eye wanda tunga inzo phala ni ngikale-mu. 5 Tunde o kizuwa ki ngakatula Izalayele ku Ijitu, kate mu kizuwa kya lelu, eme nuka ngatungile mu inzo. Maji ngene mutunda kididi anga ngiya kididi kyengi mu jitenda ni mu jibalaka.* 6 Mu mivu yoso i ngexile ni akwa Izalayele, o kwila sayi kizuwa ngebhwidisa ku afundixi a Izalayele, u nga asolo phala kulanga o mundu wami, mu kwamba: ‘Mukonda dyahi kangitungila inzo ni mixi ya misédulu?’”’
7 “Kyenyiki, selevende yami Davidi, u mutangela kiki: ‘Jihova dya ifuxi wambe kiki: “Eme nga kukatula mu kwinga ni kulanga o kibhanga kya jimbudi phala kukala u mutwameni wa mundu wami wa Izalayele. 8 Eme nganda kala n’eye bhwoso bhu uditela, nganda bwika o jinguma jé joso, nganda fumanesa o dijina dyé, kala o athu ala ni fuma mu ngongo. 9 Eme nganda sola kididi phala o mundu wami wa Izalayele, ene anga atunga mwenyomo. Ene anda tunga mu kididi kyenyiki, kibhwanda kala dingi muthu u azukutisa. Kanda kwatalesa dingi hadi ku athu ayibha, kala kyakexile mubhita m’ukulu, 10 tunde mu kizuwa ki ngasolo afundixi phala kulanga o mundu wami wa Izalayele. Nganda tolola o jinguma jê joso. Ngikwambela dingi: ‘Jihova wanda tunga dibhata* phala eye.’
11 “‘“Kyoso ki wanda fwa kala kyafu o jikuku jé, nganda bhangesa kwila ku mbutu yé, o mon’ê mwene u kubhingana ku usobha, nganda kolesa o utuminu wê. 12 Mwéne wanda tunga o inzo phala eme. Nganda bhangesa o utuminu wê kunangenena kate ku hádya ni hádya. 13 Eme nganda kala ngi tat’ê, mwene anga ukala mon’ami. Nganda mukwatela jinga henda,* kinganda mubhana dikunda kala ki ngabhange ni yó wa kudyangele ku utuminu. 14 Eme nganda musola kala sobha mu inzo yami kate ku hádya ni hádya. O ungana wê wene wanda kalelaku.”’”
15 Natane watangela o izwelu yoso ni kisumwa kyoso kiki kwa Davidi.
16 Kyenyiki, sobha Davidi wabokona, waxikama bhu pholo ya Jihova, yu wasambe: “Eme nanyi, u Jihova Nzambi? O mwiji wami ananyi, phala u ngibhange o mbote yoso yiyi? 17 Eye u Nzambi, mu ima yoso yiyi wate-ku dingi, mu kwamba kwila o inzo ya selevende yé yene yanda xalela-ku kate ku hádya. Eye u ngitala kala ngi diyala dya katunda, u Jihova Nzambi. 18 Ihi i ngatokala kuzwela dingi eme ngi selevende yé Davidi, yalungu ni ku ngizangeleka? Kuma eye wejiya kyambote o selevende yé. 19 Jihova tata, mukonda dya selevende yé ni muxima* wé, eye wabhange o ima yoso yiyi yamakota, mu kulondekesa o kutena kwé. 20 Jihova, kana-ku muthu wasoko n’eye. Kana-ku Nzambi yengi, kikale ngo eye. Kuma yoso itwevu ilondekesa o kidi kiki. 21 Kifuxi kyebhi mu ixi kyasokela ni mundu wé, Izalayele? O Nzambi yakidi, wa abhulula kala mundu wê. Wafumanesa o dijina dyé mu kubhanga ima yamakota ikwatesa wôma. Eye wakaye o ifuxi bhu pholo ya mundu wé, wa abhulula ku Ijitu. 22 Eye wasolo o kifuxi kya Izalayele kala mundu wé kate ku hádya ni hádya. Eye u Jihova wadibhange u Nzambi yâ. 23 Kindala, u Jihova, kumbidila o kikanenu ki wabhange kokwami ni ku mwiji wami kate ku hádya, bhanga jinga kala ki wakanena. 24 O dijina dyé dinangenene, adiximane kate ku hádya ni hádya, phala o athu azwele: ‘Jihova dya ifuxi o Nzambi ya Izalayele, mwéne o Nzambi ya akwa Izalayele.’ O inzo ya selevende yé Davidi isuluke mu kutumina bhu pholo yé. 25 Nzambi yami, eye watungununa ku selevende yé o vondadi yé ya ku kutungila dibhata.* Kiki kyene kyabhangesa o selevende yé kukala ni nguzu ya kubhanga o musambu yú. 26 Jihova, eye u Nzambi yakidi, wakanena o ima yiyi yambote ku selevende yé. 27 Kyenyiki, se kyala mu vondadi yé, besowala o inzo ya selevende yé, inangenene kate ku hádya ni hádya, kuma eye u Jihova, wa ibesowala. Yene anda ibesowala kate ku hádya ni hádya.”