O Mukanda wa Dyanga ku Akwa Tesalonika
2 Enu akwetu jiphange, enu mwejiya kwila etu ki twa mikundu mu kingoho. 2 Kala ki mwejiya, sumbala twatale hadi ni ku tutalatala kyayibha ku mbanza ya Filipu, maji ni kikwatekesu kya Nzambi yetu twasange nguzu* phala ku mitudila o njimbu yambote ya Nzambi, sumbala ni izukutisu yavulu.* 3 O itendelesu itubhana, ki ijila ku itondalu, né ku ufusa, né bhukaxi ka kunganala muthu, 4 maji Nzambi wa tuxikina phala ni tutule o njimbu yambote, kyenyiki, etu kituzwela phala kusangulukisa o athu, maji phala kusangulukisa Nzambi, yó utonginina o mixima yetu.
5 Enu mwejiya kwila, etu nuka twa mitangele izwelu yambote phala ku minganala, nuka twabanze kudilondekesa kwila tu athu ambote, phala kunganyala kima, Nzambi mbangi ya maka enyá! 6 Etu kitwexile musota o fuma ya athu, né o yenu, né ya athu a ka mukwa. Sumbala tweji tena kukibhanga kuma tu jipoxolo ja Kidistu, maji ki twa mibhingi jimbongo. 7 Maji kyoso kitwexile mwaxaxi kenu, twa lendukile, twakexile kala o mama ya kiledi ya mu kwamwisa, ulanga* kyambote o twana twê. 8 Kyenyiki, mukonda dya henda yetu kokwenu, ki twa mesenene ngó ku mibokela o njimbu yambote ya Nzambi maji twa bhakwile we o myenyu yetu kokwenu, mukonda twamizolo kyavulu.
9 Mu kidi, jiphange, enu mwamono o nguzu ni kikalakalu ki twabhange. Kyoso kitwexile mu mibokela o njimbu yambote ya Nzambi, etu twa kalakala usuku ni mwanya mu kudikila o ibhindamu yetu, phala ki tu mitalese hadi. 10 Enu mwala mu jimbangi, Nzambi we mbangi, kwila, kyoso kitwexile mwaxaxi kenu twexile tujifiyele, twexile tu athu ayuka, kitwexile ni kima kya ku tu tatela mu kaxi kenu, enu mu axikani. 11 Enu mwejiya kwila twexile ku mitendelesa, ku mikonda o malamba, ni ku midimuna, kala kyoso o tata kya bhanga ku twana twê. 12 Phala musuluke mu kwenda kala kya wabhela Nzambi, yó wa mixana ku Utuminu wê ni ku fuma yê.
13 Kyenyiki, kyene kitwene musakidila jinga Nzambi sé kufula, mukonda kyoso ki mwatambula o mak’â Nzambi, u mwevu kokwetu, mwa axikina kana kala maka a athu maji kala o mak’â Nzambi, a mu myendesa we enu, mu axikani. 14 Enu akwetu phange jami, enu mwa mukayela o phangu ya ilunga ya Nzambi yala mu Judeya, yala mwa Kidistu Jezú, mukonda enu a mitalesa hadi ku akwa ixi yenu, kala ene kya atalesa hadi ku Jijudé. 15 Ene ajibha katé mwene Ngana Jezú ni jipolofeta, ya a tuzukutisa we. Ene we ka musangulukisa Nzambi, mukonda o ima yabhanga ki ibhekela mbote ku athu. 16 Mukonda a mu tufidisa kubokela o akwa jixi jengi phala na bhuluke. Mu kubhanga kiki, ene a musuluka mu kubandekesa o ituxi yâ, maji o njinda ya Nzambi ya atukulukila.
17 Enu jiphange, kyoso kya tusandula kokwenu* mu kakithangana kofele, (ku mukutu ngó, ki ku muxima kana) twa mesenene kyavulu ku mimona pholo ni pholo. Mu kyenyiki twabhange nguzu yavulu phala kubhanga kiki.* 18 Mukonda dya kiki, twa mesenene kuya ku mikunda, kyene mwene, eme Phawulu, ki ngafikisa ngó lumoxi kana, maji mu luyadi, maji Satanaji wa tuxitila o njila.* 19 Mu kithangana kyoso Ngana Jezú kyanda vutuka, nanyi wanda kala o kidyelelu kyetu, o kisangusangu kyetu, ni kitundu kyetu kya kusanguluka bhu pholo yê? Ki enu mwene? 20 Mu kidi, enu mwala mu fuma yetu ni kisangusangu kyetu.