Dya Kayadi Dya Malunda

6 Bhenyobho, Solomá wambe: “Jihova wambe kwila weji tunga mu matuta edi bwí. 2 Kindala, eme nga kutungila inzo yafwama kinene, kididi phala utunge-mu kate ku hádya ni hádya.”

3 Kyenyiki, o sobha walunguluka, watale o mundu woso wa Izalayele wemanene hanji, yu wamateka ku ubesowala. 4 Mwene wambe: “Jihova, o Nzambi ya Izalayele a muximane, yó wakumbidila o ima yakanena kwa tat’etu Davidi kyoso kyambe: 5 ‘Tunde mu kizuwa ki ngakatula o mundu wami wa Izalayele ku Ijitu, kingasolo mbanza yengi mwaxaxi ka miji ya Izalayele phala kutunga-mu inzo phala o dijina dyami a dijingise mwenyomo. Kingasolo we muthu phala kutumina o mundu wami wa Izalayele. 6 Maji ngasolo o mbanza ya Jeluzaleme, phala o dijina dyami a dijingise mwenyomo. Ngasolo we Davidi, phala atumine o mundu wami wa Izalayele.’ 7 Tat’etu Davidi, wamesenene kyavulu kutunga inzo phala kujingisa o dijina dya Jihova, o Nzambi ya Izalayele. 8 Maji, Jihova wambela tat’etu Davidi, wixi: ‘Eye wamesena kyavulu kutunga inzo phala kujingisa o dijina dyami, kima kyambote kukala ni hanji ya kubhanga kiki. 9 Maji-phe, k’eye wanda ngitungila o inzo. O mon’ê wanda muvwala, mwéne wanda tunga o inzo phala kujingisa o dijina dyami.’ 10 Jihova wakumbidila o kikanenu kyabhange, mukonda ngabhingana tat’etu Davidi, éme ngaxikama ku kyandu kya ungana kya Izalayele kala kyakanene Jihova. Ngatungu we inzo phala kujingisa o dijina dya Jihova, o Nzambi ya Izalayele, 11 éme ngatula-mu o Álaka, mwala o kikutu kyabhange Jihova ni kifuxi kya Izalayele.”

12 Mukusuluka, Solomá wemana ku pholo ya kalatódyu ka Jihova ni ku pholo ya mundu woso wa Izalayele, yu waleka o maku. 13 (Solomá wabhangele ditala dya ngondo, yu wadite mukaxi ka kithádi. O ditala dyenyidi dyexile ni kovadu* jitanu mu kukula ni kovadu jitatu mu kuzanza ni kovadu jitatu mu kulebha. Mwene anga ubanda-ku.) Mwene wafukama ku pholo ya mundu woso wa Izalayele, yu waleka o maku bhulu, 14 yu wambe: “Ngana Jihova, u Nzambi ya Izalayele, seku Nzambi wasokela n’eye kikale ku dyulu, kikale mu ixi. Eye ubhaka o kikutu, ukwatela henda ku jiselevende jé abhaka o itumu yé anga a ibelesela. 15 Eye wakumbidila o kikanenu ki wabhange kwa tat’etu Davidi, selevende yé. Wabhange o kikanenu ni dikanu dyé, lelu eye wa kikumbidila. 16 Jihova tata, u Nzambi ya Izalayele, kumbidila o kikanenu ki wabhange kwa tat’etu Davidi, o selevende yé, kyoso ki wa mwambela: ‘Kwanda kala jinga muthu ku mbutu yé wanda kala ku pholo yami, wanda xikama ku kyandu kya Izalayele, se o twana twé adilanga mu wendelu wâ, mu kukayela o ijila yami, kala ki wabhange eye.’ 17 Kyenyiki-phe, Jihova, u Nzambi ya Izalayele, ngakudyondo kumbidila o kikanenu ki wabhange kwa selevende yé Davidi.

18 “O kwila Nzambi utena kutunga ni athu mu ixi? O dyulu dya madyulu, Eye kutena kusoka-mu, kwambe dingi o inzo yiyi i nga kutungila! 19 Mukiki-phe, ivwa o musambu ni kudyonda kwa selevende yé, u Jihova Nzambi yami. Ngakudyondo, ivwa o kudikola ni musambu wa mubhanga lelu o selevende yé kokwé. 20 O mesu mé atalele ku inzo yiyi usuku ni mwanya, o kididi ki wambele kwila o dijina dyé eji dijingisa mwenyomo. Ivwa o musambu wa mubhanga o selevende yé bhwa lungila o kididi kiki. 21 Ivwa o kudyonda kwa selevende yé ni kudyonda kwa mundu wé Izalayele, kyoso kyasamba bhwa lungila o kididi kiki. Ivwa o misambu yâ, tunde ku dyulu o kididi ku watungu, loloka o ituxi yâ.

22 Se kukala diyala uta kituxi kwa mukwâ anga a mu jijidika kuloka, o kyanda kwila waloko, anga wiza ku kalatódyu ké mu tembulu yiyi, 23 eye-phe ivwa tunde ku dyulu, fundisa o jiselevende jé. Belesa woso watondala, mu kubhangesa o kikuma kyê kukala ku thandu dya mútwe wê. O yó kabhange kima kyayibha mulungise, u mubesowale kala kyafwama mu kuyuka kwê.

24 Se o mundu wé Izalayele a atolola ku jinguma jâ mukonda dya kuta ituxi kokwé, anga avutuka kokwé ni kuximana o dijina dyé ni kusamba ni ku kudyondela, mu kubhinga o kikwatekesu kyé mu inzo yiyi, 25 kyenyiki-phe, ivwa tunde ku dyulu, loloka o ituxi ya mundu wé Izalayele ni kwabheka dingi mu ixi i wabhana kwa ene ni ku jikuku jâ.

26 Se o dyulu dijika, anga kukamba kunoka mvula mukonda dya mundu wé kuta jinga ituxi kokwé, anga usamba bhwa lungila o kididi kiki ni kuximana o dijina dyé, anga udyela o ituxi yâ mukonda dya ku atatesa,* 27 kyenyiki, ivwa o jiselevende jé, tunde ku dyulu ni kuloloka o ituxi ya mundu wé, Izalayele. Wa alonga kyambote o njila yatokala kwendela anga ubheke mvula mu ixi i wabhana ku mundu wé kala undundu.

28 “Se mu ixi mukala nzala, dibhebhu, kutema kwavulu, mofu mba mahoho avulu, mba mahoho azanga o idima, mba jinguma jikondoloka o ixi mba dibhebhu dyoso-dyoso mba uhaxi, 29 anga muthu umoxi mba o mundu wé woso wa Izalayele usamba, mba udyonda mu kubhinga o kikwatekesu kyé mu kima kyoso-kyoso (kuma kala muthu wejiya o kutata kwê ni ndolo ya muxima wê), kyoso ene kyanda sununa o maku kwa lungila o inzo yiyi, 30 mu kyenyiki, u aloloka tunde ku dyulu bhu kididi kyé bhu watungu, u akwatekesa, u abesowala kala kyafwama mu jinjila jâ, kuma eye wejiya o mixima yâ (mukonda eye ngo wejiya o mixima ya athu oso), 31 phala o mundu wé a kukwatele wôma ni wende mu jinjila jé mu izuwa yoso yanda tunga mu ixi i wabhana ku jikuku jetu.

32 “O yó akwa jixi jengi, katokala ku mundu wé Izalayele, se ene evwa kuzwela yalungu ni dijina* dyé, ni ima i wabhange ni lukwaku lwé lwaswina, anga atunda mu ixi ya dikanga phala kwiza ni kusamba bhwa lungila o inzo yiyi, 33 mukiki-phe, ivwa, tunde ku dyulu koko, o kididi ku watungu, bhanga yoso yanda kubhinga o mukwa ixi yengi phala athu oso mu ngongo ejiye o dijina dyé anga adixile, kala kyene mubhanga o mundu wé Izalayele. Phala ejiye we kwila, o dijina dyé ene muditumbula mu inzo yiyi i ngatungu.

34 “Se o mundu wé uya mulwa ita ni jinguma jâ, kabasa kididi mwanda kala ene, anga a samba kokwé bhwa lungila o mbanza yiyi i wasolo, ni mu inzo yiyi i ngatungu phala o dijina dyé, 35 kyenyiki-phe, tunde ku dyulu, ivwa o musambu ni kudyonda kwâ mu kubhinga kikwatekesu anga u abhangela kyoso kyayuka.

36 “Se ene ata kituxi kokwé, (kuma seku muthu ukamba kuta kituxi) anga u akwatela njinda, wa abhakula ku jinguma jâ, ene anga a ambata kala abhika ku ixi ya jinguma, kikale dikanga, kikale bhwa zukama, 37 se adyela mu ixi mwa ambata, anga avutuka kokwé, mu ku kudyondela mu ixi ya yó a ambata, he amba exi: ‘Twate kituxi, twabhange kima kyayibha,’ 38 mu ixi ya jinguma jâ mwa akwikila, se ene avutuka kokwé ni muxima woso, he asamba kokwé kwa lungila o ixi i wabhana ku jikuku jâ, o mbanza i wasolo ni inzo i ngatungu phala kujingisa o dijina dyé, 39 kyenyiki-phe tunde ku dyulu, o kididi ku watungu, ivwa o misambu ni kudyonda kwâ mu kubhinga kikwatekesu, anga u abhanga kyoso kyayuka ni kuloloka o kituxi kya mundu wé.

40 “Mukiki, ngakudyondo Nzambi yami, o mesu mé atone, o mátwi mé evwidile jinga o misambu yanda bhanga bhu kididi kiki. 41 Jihova Nzambi tata, banda bhu kididi kyé kya kunyoha, éye ni Álaka ya kutena kwé. Jihova Nzambi, o akunji yé u azwika ni kubhuluka. O yó akukala fiyele asanguluke mukonda dya mbote yoso i wa abhangela. 42 Jihova Nzambi tata, kana kudituna o selevende yé i wasolo. Lembalala o henda* i wakwatela kwa selevende yé Davidi.”