Kala Kyasoneka Nzwá
5 Kyoso kyabhiti o ima yiyi, kukala fesa ya Jijudé, Jezú anga ubanda mu Jeluzaleme. 2 Mu Jeluzaleme, bhu mbandu a Mwelu wa Jimbudi, bhwakexile ditangi dya dikota dya menya, ad’ixana Betezata mu dimi dya Hebalayiku. Mu jimbandu ja ditangi mwakexile jiphiladi. 3 Mu kididi kyenyókyo mwakexile jihaxi javulu, ifofo, inema ni athu a katele* o maku ni inama. 4 —— 5 Mwenyomo, mwakexile diyala wakatele kyá mu makwinyi atatu a mivu ni dinake. 6 Mu kumona o diyala wazeka bhenyobho, ni kwijiya kwila mwene wakatele kyá mu mivu yavulu, Jezú wa mwibhwidisa: “Wamesena kudisanza?” 7 O haxi wa mu tambwijila, wixi: “Ngana, kingala ni muthu phala ku ngitula mu ditangi kyoso kya fwafwa o menya. Ki ngi sota kuya-mu, kwiza muthu wengi u ngi twamenena.” 8 Jezú wa mutangela, wixi: “Balumuka! Zangula o kipoya kyé ni wende.” 9 Mu kithangana kyenyókyo, o diyala wadisanze. Wazangula o kipoya kyê, wamateka kwenda.
Kizuwa kyenyókyo, kyexile kya Sábhalu. 10 Mukonda dya kiki, o Jijudé amateka kuzwela ku diyala a mu sakele, exi: “Lelu kya Sábhalu, eye kutokala kwambata o kipoya kyé.” 11 Mwene wa atambwijila: “O diyala wa ngisake, mwene we wa ng’ambela: ‘Zangula o kipoya kyé ni wende.’” 12 Ene a mwibhwidisa, exi: “Nanyi o diyala wa kutangela kwila, ‘zangula o kipoya kyé ni wende’?” 13 O diyala a mu sakele kejidile se Jezú nanyi, mukonda Jezú watundile mw’axaxi ka mundu wakexile bhenyobho.
14 Kyoso kyabhiti o ima yiyi, Jezú wa mu sange mu tembulu, yu wa mwambela: “Talesa, eye wadisanze. Kana kuta dingi kituxi, phala ki ubhite mu jiphaxi javulu, o ja dyangele ndenge.” 15 O diyala wayi, yu watangela o Jijudé kwila, Jezú mwéne wa mu sake. 16 Mukonda dya kiki, o Jijudé akexile mu zukutisa Jezú, kuma mwene wakexile mubhanga o ima yiyi mu kizuwa kya Sábhalu. 17 Maji Jezú wa atambwijila, wixi: “Tata yami wa mukalakala hanji katé kindala, eme wami nga mukalakala.” 18 Mukonda dya kiki, o Jijudé akexile musota ndunge phala ku mujibha, kuma mwene kexile ngó mu bhukumukina o kijila kya Sábhalu, maji wakexile we muzwela kwila Nzambi Tat’ê, mu kudisokesa ni Nzambi.
19 Kyenyiki Jezú wa ambela dingi, wixi: “Ni kidi kyoso ngi mi tangela kwila, o Mona katena kubhanga kima kimoxi mu vondadi yê, maji ubhanga ngó o ima yamona Tat’ê kubhanga. Mukonda ima yoso ibhanga o Tata, yene we ibhanga o Mona. 20 Mukonda o Tata wazolo o Mona, anga u mu londekesa o ima yoso ibhanga mwene. Mwene wanda mu londekesa ikalakalu ya betakota, o yiyi ndenge, phala enu mu diwane. 21 Kala o Tata kya balumuna o madifundu ni kwabhana o mwenyu, o Mona ubhana we mwenyu kwa yó woso wamesena mwene. 22 O Tata kafundisa muthu, maji wabhana o kikalakalu kya kufundisa kwa Mona, 23 phala athu oso abhane kijingu kwa Mona, kala kyabhana o kijingu kwa Tata. Woso kabhana kijingu kwa Mona, kabhana we kijingu kwa Tata wa mutumu. 24 Ni kidi kyoso ngi myambela kwila, woso wívwa o maka mami ni kuxikina Yó wa ngi tumu, wala ni mwenyu wakalelaku. Mwene kanda mufundisa, maji wafwile, yu wavutuka ku mwenyu.
25 “Ni kidi kyoso ngi myambela kwila, o kithangana kikiza, kyene kyabhixila kyá, kya madifundu kwívwa o dízwi dya Mon’â Nzambi. Oso-phe abhana mátwi, anda vutuka ku mwenyu. 26 Kála o Tata mwéne o fixi* ya mwenyu, wabhana we kwa Mon’ê o kutena kwa kubhana o mwenyu. 27 Mwene anga wa mubhana ungana phala kufundisa, mukonda mwéne o Mon’a muthu. 28 Ki mu diwane mukonda dya ima yiyi, kuma kithangana kikiza kya athu oso ala mu jimbila kwívwa o dízwi dyê 29 ni kutunda-mu. Oso abhange ima yambote, anda kwa fukununa phala kutambula o mwenyu, oso abhange ima yayibha, anda kwa fukununa phala kwa fundisa. 30 Eme kingitena kubhanga né ngó kima kimoxi mu vondadi yami. Kala kya ngitangela Tata, kyene ki ngi fundisa. Mu kiki, o kufundisa kwami kwakidi, mukonda kingene musota kubhanga o vondadi yami, maji o vondadi ya yó wa ngitumu.
31 “Se éme ngó ngi dibhana umbangi, o umbangi wami ki wakidi. 32 Sayi muthu wengi ubhana umbangi walungu n’eme, ngejiya kwila o umbangi wê, wakidi. 33 Enu mwatumikisa athu kwa Nzwá, mwene yu wabhana umbangi wakidi walungu n’eme. 34 Eme kingixikina o umbangi wa muthu, maji ngizwela o ima yiyi phala enu mubhuluke. 35 O diyala dyódyo dyexile kandeya kawama, kamwika. Mu ithangana yofele mwa mesenene kusanguluka ni mukengeji wê. 36 Maji o umbangi ungala nawu, wa betakota o wa Nzwá ndenge. Mukonda o ikalakalu ya ngi bhana Tata yami, o ikalakalu inga mubhanga, yéne ibhana umbangi kwila, o Tata mwéne wa ngi tumikisa. 37 O Tata wa ngi tumikisa, wabhana umbangi walungu n’eme. Enu nuka mwevu o dízwi dyê né kumona o pholo yê. 38 Enu kimwala ni maka mê ku mixima yenu, mukonda ki muxikina yó a mu tumikisa.
39 “Enu mwene mutokwesa o Mikanda Ikôla, mukonda mubanza kwila bhukaxi ka Mikanda Ikôla mwanda tambula o mwenyu wakalelaku, maji yéne ibhana o umbangi walungu n’eme. 40 Kyenyiki, enu ki mu mesena kwiza kokwami, ni mutambule o mwenyu. 41 Eme kingixikina o kijingu kya athu, 42 maji ngejiya kwila ku mixima yenu, ki mwazolo Nzambi. 43 Ngeza mu dijina dya Tata yami maji enu ki mwa ngi tambulula. Maji se muthu wengi weji kwiza mu dijina dyê mwene, enu mweji ku mu tambulula. 44 Kyebhi ki mwanda ngixikina se musota kutambula o kijingu ki mudibhana mudyenu, muveji dya kusota o kijingu kitunda kwa Nzambi imoxi-èlele? 45 Ki mubanze kwila, nganda mi tatela kwa Tata yami. Sayi muthu u mi tatela, Mozé, yó mwa mudyelela. 46 Mu kidi, se mwa xikinine Mozé, mweji ngi xikina we eme, mukonda mwene wasoneka yalungu n’eme. 47 Maji se ki muxikina o ima yasoneka Mozé, kyebhi ki mwanda xikina o ima i nga muzwela?”