Zakadiya

14 “Talesa! O kizuwa kya Jihova ki kiza. Mu kizuwa kyenyokyo, o jimbote jé* anda jitambula ku jinguma jé ni kudiwanena-naju mudyâ mu ixi yé. 2 Nganda bhongolola o ifuxi yoso phala kubhânga ni akwa Jeluzaleme. O mbanza anda itambula, anda nyana o ima yoso mu jinzo, o ahatu anda ku ata jiphanda. Avulu mu mbanza anda kwa ambata phala ku akwika mu ixi yengi, maji o yó anda subhuka mu mbanza, kanda ku ajibha.

3 “Jihova wanda kwiza mubhânga ni ifuxi yiyi kala kyabhângele ni jinguma jé mu ukulu. 4 Mu kizuwa kyenyokyo, o inama yê yanda tula ku mulundu wa midiva wazukama ni mbanza ya Jeluzaleme ku mbandu ku tundila o dikumbi. O mulundu wa midiva anda uwanuna mukaxi, tunde ku mbandu ku tundila o dikumbi ndu ku mbandu ku fwila o dikumbi,* bhwanda kala honga yadikota. Mbandu ya mulundu yanda kala ku thunda, o ya mukwa ku mbandu ya lwiji. 5 Enu mwanda lengela mu honga ya milundu yami, mukonda o honga ya milundu yami, ya kaya kate ku Azele. Enu mwanda lenga, kala ki mwalengele mukonda dya kitungutu kya ixi kyabhitile mu izuwa ya Uziya, sobha ya Judá. Jihova, Nzambi yami wanda kwiza, o athu’ê oso osole anda kala kumoxi ni mwene.

6 “Mu kizuwa kyenyokyo, ki kwanda kala mukengeji. Mukonda dya mbambi, o ima yanda kola kala matadi. 7 O kizuwa kiki, anda kijiya kala kizuwa kyatokala kwa Jihova, kizuwa kyakatunda. Kikwanda kala mwanya, kikwanda kala usuku, mukonda ni mu ngoloxi, kwanda zela hanji. 8 Mu kizuwa kyenyokyo, mu Jeluzaleme mwanda kunguluka menya a mwenyu. O menya anda kungulukila ku mbandu jiyadi: Mbandu, ku musanza wa kalunga wala ku mbandu ku tundila o dikumbi,* o mbandu yamukwa, ku musanza wa kalunga wala ku mbandu ku fwila o dikumbi.* Kiki kyanda bhita mu kithangana kya mvula ni mu kithangana kya kixibhu. 9 Jihova wanda kala Sobha ya athu oso mu ngongo. Mu kizuwa kyenyokyo, athu oso anda bheza ngo Jihova. Ene anda ximana ngo o dijina dyê.

10 “O ixi yoso yiyi, tunde ku Jeba kate ku Limone, ku mbandu ya lwiji ya Jeluzaleme, yanda difwa ni honga ya Halabá. O mbanza ya Jeluzaleme anda izangeleka, anda itunga dingi bhu kididi kyê, tunde bhu Mwelu wa Bejamí ndu bhu Mwelu wa Dyanga. Bhenyobho, yanda suluka, tunde bhu Mwelu wala ku hota ni mu jinzo ja matala ja Hananele, ndu ku matangi kwene mu kamena o vinyu ya sobha. 11 O athu anda tunga mwenyomo, kanda ibhubhidila dingi phala ku ibwika. O athu anda tunga mu Jeluzaleme ni kutululuka.

12 “Didi dyene o dibhebhu dyanda bheka Jihova, ku ifuxi yoso yanda bhânga ni akwa Jeluzaleme: O mukutu wâ wanda bola sumbala ala hanji ni mwenyu, o mesu mâ, anda bola we. O dimi dyâ dyanda bolela mu dikanu.

13 “Mu kizuwa kyenyokyo, Jihova wanda ku abhangesa kukala mu kavwanza mudyâ. Muthu ni muthu wanda kwata mukwa phala kubhânga-nê. 14 Akwa Judá anda dibunda we ni akwa Jeluzaleme mu kulwa ita. Ene anda bhongolola o jimbote joso ja ifuxi ya akondoloka: Ulu yavulu, phalata yavulu ni izwatu yavulu.

15 “Dibhebhu dya mukwa dya difu ni dibhebhu dyódyo dya dyanga, dyanda kwata we o jikabalu ni jimula ni jikamelu ni jijumendu ni ibhaku yoso ya jinguma jâ.

16 “Enyoso anda subhuka ku ifuxi yejile mulwa ita ni Jeluzaleme, anda banda muvu ni muvu phala kubheza* Jihova dya ifuxi o Sobha, ni kubhanga we o Fesa ya Jibalaka. 17 Maji se mu ifuxi yiyi mukala mwiji ukamba kubanda mu Jeluzaleme phala kubheza Jihova dya ifuxi o Sobha, mu ixi yâ kimwanda noka mvula. 18 Se akwa Ijitu akamba kubanda ni kubokona mu Jeluzaleme, mu ixi yâ kimwanda noka mvula. Jihova wanda kwabhekela dibhebhu, kala o dibhebhu dyanda bheka ku ifuxi yamukwa mukonda dya kukamba kuya mu Fesa ya Jibalaka. 19 Kaka kene o kastiku kanda bhana ku akwa Ijitu, ni ku ifuxi yoso mukonda dya kituxi kyâ, kya kukamba kuya mu Fesa ya Jibalaka.

20 “Mu kizuwa kyenyokyo, o tungunga tukala mu jixingu ja jikabalu, anda soneka-mu kiki: ‘O kuzela kwa tokala kwa Jihova!’ O jimbya ja makota jala mu inzo ya Jihova, janda difwangana ni matijela ala bhu pholo ya kalatódyu. 21 O jimbya joso mu Jeluzaleme ni mu Judá, janda kala jimbya jikôla, janda tokala kwa Jihova dya ifuxi. Athu oso anda bhakula o jisata, anda kwiza, anda lambela mu jimbya jenyiji. Mu kizuwa kyenyokyo, kikwanda kala dingi mukwa Kanana,* mu inzo ya Jihova dya ifuxi.”