O Mukanda wa Kayadi ku Akwa Tesalonika
2 Kyenyiki jiphange, yalungu ni kutukuluka kwa Ngana yetu Jezú Kidistu ni ku tubhongolola kwa mwene, twa mibhingi kwila, 2 kanenu kwehela muthu kulungulula o ibanzelu yenu mu ima imwejiya kwila ya kidi, mba ku mitesa wôma kwila o kizuwa kya Jihova kyabhixila kya. Ki mu tandanganye we se ene azwela kwila, o njimbu yiyi yatundu kwa Nzambi, mba a itanga mu mikanda anga azwela kwila etu twa isoneka.
3 Kanenu kwehela muthu ku mijimbidisa,* mukonda ande dya kwiza o kizuwa kyenyókyo, kya dyanga kwanda moneka yó akwa kubalukila Nzambi ni kutungununa o kiswéya,* o mona wa kibwika. 4 Mwene nguma, udizangeleka kuthandu dya ima yoso yene mubheza o athu, a imona kala nzambi. Anga uxikama mu tembulu ya Nzambi ni kudilondekesa kala nzambi. 5 Ki mwa mu lembalala kwila kyoso kingexile ni enu, eme ngexile mu mitangela kya o ima yiyi?
6 Kindala enu mwejiya kwila, o kiswéya a mu mufidisa kubhanga o ima, anda mu tungununa mu kithangana kyatokala. 7 Mu kidi, o kuyibha kwa muthu yú kwa dimonekena sumbala mwene wala mu kaswekele. Maji o kuyibha kwa muthu yú kwanda nangenena katé o kithangana kyanda mu tungununa. 8 Mu kiki anda tungununa o muthu wa kisweya anga o Ngana Jezú wanda mubwika ni izwelu ya kutena* yanda tunda mu dikanu dyê. Wanda mujikinisa mu kizuwa kya kutukuluka kwê. 9 Satanaji mwéne ufunyisa o kutukuluka kwa kisweya, ni isunji yoso, ni ijimbwete ni madiwanu a makutu, 10 ni mangonya moso. O ima yiyi inganala o athu anda kwa fundisa ni ku abwikisa, mukonda dya kukamba kuxikina o ilongesu ya kidi, yeji kwa bhulula. 11 Kiki kyene kibhangesa Nzambi kwehela ku anganala ni ku a jimbidisa, phala na xikine mu makutu. 12 Phala ku afundisa enyoso mukonda kaxikina o kidi maji awabhela kubhanga o ima yayibha.
13 Kyenyiki jiphange, twabhingi kusakidila jinga Nzambi mukonda dyenu, enu a mizolo kwa Jihova. Mukonda tundé kudimatekenu Nzambi wa misolo phala mu bhuluke, mu ku mizelesa ni nzumbi yê ikôla, ni kwila mwaxikina o kidi. 14 Kyene kya mixanena mwene bhukaxi ka njimbu yambote i twa mitudila, phala mu tambule o fuma ya Ngana yetu Jezú Kidistu. 15 Kyenyiki jiphange, swinenu ni kudikwatenena mu ima i twa milongo, kikale bhukaxi ka njimbu i twa mitudila mba bhukaxi ka mukanda u twa misonekena. 16 Kyenyiki, o Ngana yetu Jezú Kidistu ni Ngana Nzambi, Tata yetu watuzolo, wa tukondo o malamba sé kufula, wa tubhana kidyelelu kyambote bhukaxi ka ngalasa yê, 17 a mi ximbakatese o mixima ni ku miswinisa, mu kuzwela ni mu kubhanga o ima yoso yambote.