Dimatekenu
39 Zuze amwambata ku Ijitu, sayi diyala amwixana Potifale, wexile kabhitangu ukalakala mu inzo ya Falawó, mutwameni wa alangidi, wa musumbu ku akwa Ijimayele, amwambatele ku Ijitu. 2 Maji Jihova wexile ni Zuze. Mukiki, Zuze wexile muditunda kyambote mu yoso yexile mubhanga, anga ukala musidivila mu inzo ya ngana yê o mukwa Ijitu. 3 Ngana yê anga umona kuma, Jihova wexile ni Zuze. Jihova wexile mubhangesa Zuze kuditunda kyambote mu yoso yexile mubhanga.
4 Zuze wexile musanga ngalasa bhu pholo ya ngana yê, anga ukala selevende yê. Kyenyiki, Potifale wa mubhana o kikalakalu kya kulanga o inzo yê ni ima yoso ya mutokalele. 5 Tunde o kithangana kyoso o mukwa Ijitu kya bhana kwa Zuze o kikalakalu kya kulanga o inzo yê ni ima yoso ya mutokala, Jihova wabesowala o dibhata dya mukwa Ijitu mukonda dya Zuze. O dibesá dya Jihova dyexile mu ima yoso yexile-nayu m’onzo ni ku mabhya. 6 Mukusukaku, Potifale wabhana kwa Zuze o kikalakalu kya kulanga o ima yoso ya mutokalele, mwene kexile mu tandanganya ni kima, kikale ngo o kudya kwê. Zuze wa wabhele we o pholo, wexile ni mukutu wambote.
7 Mukubhita thembu, o muhatu wa ngana yê wamateka kuta o mesu kwa Zuze ni kumutangela: “Tuzekyetu!” 8 Maji mwene wexile mudituna ni kutambwijila o muhatu wa ngana yê, wixi: “Ngana yami k’ejiya o ima yala n’eme kubhata, yoso ya mutokala wangibhana-yu eme phala ku ilanga. 9 M’onzo mumu kimwala muthu wa ngitundu, mwene we kangifidisa kima kyoso-kyoso, kikale éye ngo, kuma u muhat’wê. Kyebhi-phe ki ngitena kubhanga o kuyibha kwoso kuku ni ngite kituxi kwa Nzambi?”
10 O muhatu wakexile muzwela ni Zuze izuwa yoso, maji Zuze kaxikina kuzeka-nê, né ngo kukala-nê. 11 Maji sayi kizuwa, kyoso mwene kyabokona m’onzo phala kubhanga o sidivisu yê, né ngo selevende imoxi kiyexile ku bhata. 12 Kyenyiki, o muhatu u mukwatela mu izwatu yê anga u mwambela: “Zeka n’eme!” Maji mwene waxisa o izwatu bhu maku mê, anga ulengela bhu kanga. 13 Kyoso o muhatu kyamono kwila Zuze wa muxila o kizwatu bhu maku yu walenge, 14 wamateka kudikola, mu kwixana o mayala atokala mu inzo yê, yu wexile mwa atangela: “Talenu! O mukwa Hebelewu yú watubhekela mwadi wami, wamesena kututobhesa. Mwene weza mu ngisota phala kuzeka n’eme, maji ngamateka kudikola ni dízwi dyaswina. 15 O kya ngivu o kudikola, waxisa o kizwatu kyê bhu mbandu yami, yu walenge.” 16 Kyenyiki, mwene watula o kizwatu kya Zuze bhu mbandu yê kate ngana ya Zuze kyabhixila ku bhata.
17 Bhenyobho, o muhatu wa mutangela we o ima ya tangele kya ku mayala, wixi: “O selevende mukwa Hebelewu u watubhekela, weza mu ngisota phala kungitobhesa. 18 Maji kyoso ki ngamateka o kudikola, mwene waxisa o kizwatu kyê bhu mbandu yami, yu walenge.” 19 Kyoso ngana ya Zuze kyevu o izwelu ya muhat’wê, kwila: “Kiki kyene kya ngibhange selevende yé,” njinda ya mukwata. 20 Mukyenyiki, o ngana ya Zuze wa mukwata yu wa mute mu kaleya, mu kididi mwexile mukala o jipelezu ja sobha. Mwene anga ukala jinga mwenyomo, mu kaleya.
21 Maji Jihova wakexile ni Zuze, yu wexile mu mulondekesa o henda yakidi ni ku mubhangesa kusanga ngalasa ku mesu a mutwameni wa jikasalelu. 22 Kyenyiki, o mutwameni wa jikasalelu wabhana kwa Zuze o kikalakalu kya kwendesa o jipelezu joso mu kaleya, mwéne wexile mulanga o ima yoso yexile mubhanga mu kaleya. 23 O mutwameni wa jikasalelu kexile mutandanganya ni ima yexile mulanga Zuze, mukonda Jihova wexile ni Zuze, Jihova wexile mu besowala Zuze mu ima yoso yexile mubhanga.