Kisumwa Kyalondekesa Kwa Nzwá
17 Anju imoxi yatokala ku sambwadi dya jianju ja kexile ni sambwadi dya matijela, yeza ya ngambela: “Zá, nganda kulondekesa o kifundisu kya kidyanzunga kyadikota kya xikama kuthandu amenya avulu. 2 O jisobha ja ngongo jabhange undumbu* ni mwene, o athu atungu mu ngongo akodiwa ni vinyu ya undumbu* wê.”
3 Ni kutena kwa nzumbi ikôla o anju ya ng’ambata mu kikangalakata, anga ngimona muhatu waxikama kuthandu dya kyama kya muxitu kya kusuka. O kyama kyakexile ni majina avulu a kuxongwena nawu Nzambi. Kyakexile we ni sambwadi dya mítwe ni dikwinyi dya jingela. 4 O muhatu wate izwatu ya kusuka wa di yudika ni ulu, ni matadi ala ni valolo yavulu, ni jiphélula, wa kwata kopho ya ulu yezala ni imbamba ya ufusa, ni ima yoso yayibha ya undumbu* wê. 5 Bhu dibhômo dyê a soneka-bhu dijina. O dijina didi, kisunji, dyexi: “Babilonya ya dikota, o mama ya idyanzunga yoso, ni ya maufusa moso a ngongo.” 6 Ngamono kwila o muhatu wa kodiwa ni manyinga a athu a asolo ni manyinga a jimbangi ja Jezú.
Kyoso ki nga mu mono nga diwana kyavulu. 7 Kyenyiki o anju ya ngi ambela: “Mukonda dyahi eye wadiwana? Nganda kutangela o dijimbulwilu dya kisunji kyalungu ni muhatu, ni kyama kya mwambata kyala ni sambwadi dya mítwe ni dikwinyi dya jingela. 8 O kyama ki wamono, kyexile-ku, ki kyala-ku dingi, kyanda tunda dingi mu dikungu dyazongo, maji anda kibwikisa. O athu atungu mu ngongo, yó tundé kudimatekenu dya mundu ka asoneka o majina mu mukanda wa mwenyu, anda diwana kyoso kyanda mona kwila, o kyama kya muxitu kya kexile-ku, ki kyala-ku dingi, maji ku hádya kyanda tukuluka dingi.
9 “Phala kutendela o ima yiyi, kubhinga unjimu: O sambwadi dya mítwe, ilombolola sambwadi dya milundu, bhwa xikama o muhatu. 10 Kwala we sambwadi dya jisobha: Kitanu kya jisobha jabu kyá, imoxi yala-ku, o ya mukwa kiluwa ibhixila, maji kyoso ki yanda bhixila yene yanda nangenena kakithangana kofele mu kutumina. 11 O kyama kya muxitu kya kexile-ku, maji ki kyala-ku dingi, kyene we o sobha ya kanake, maji kyatundu ku sambwadi dya jisobha, o kyene anda kibwikisa we.
12 “O dikwinyi dya jingela ji wamono, jilombolola dikwinyi dya jisobha, ki jitambula luwa o utuminu wâ, maji ene atambula kyá ungana wa kutumina kala jisobha mu ola imoxi, kumoxi ni kyama kya muxitu. 13 Ene ala ni kixinganeku kimoxi ngó, mu kiki abhana o kutena ni ungana ku kyama kya muxitu. 14 Ene anda lwa ita ni Kambudi, maji kuma o Kambudi mwéne o Ngana ya jingana ni Sobha ya jisobha, wanda kwatolola. O yó ala kumoxi ni Kambudi a exana athu a asolo, o jifiyele, anda tolola we.”
15 O anju ya ngambela: “O menya u wamono mwaxikama o kidyanzunga, alombolola miji, ifuxi, madyembu ni madimi. 16 O dikwinyi dya jingela ji wamono ni kyama kya muxitu, anda zemba o kidyanzunga, ene anda mu koka ni ku muzula, anda dya o xitu yê ni ku mwoha mu túbhya. 17 Mukonda Nzambi wate ku mixima yâ, o vondadi ya kubhanga o kima kya mukala ku muxima. Kyene, o kubhanga o kixinganeku kyala ku mixima yâ, o kubhana o utuminu wâ ku kyama kya muxitu katé kyanda dikumbidila o mak’â Nzambi. 18 O muhatu u wamono, ulombolola o mbanza yadikota yala ni utuminu utumina o jisobha ja ngongo.”