O Mukanda wa Kayadi ku Akwa Tesalonika

1 Eme Phawulu, Sidivanu* ni Timote twa musonekena o kilunga kya akwa Tesalonika, kyatokala kwa Nzambi o Tata, ni kwa Ngana yetu Jezú Kidistu:

2 O ngalasa ni paze ya Nzambi o Tata, ni ya Ngana yetu Jezú Kidistu ikale ni enu.

3 Jiphange jami, twatokala mwene kusakidila jinga Nzambi mukonda dyenu. Kiki kyene kyatokala, mukonda o kixikanu kyenu kyakolo dingi, o henda yenu mudyenu ya mu dibandekesa. 4 Mukonda dya kyenyiki, tu miximana mwaxaxi ka ilunga ya Nzambi, mukonda dya kukolokota kwenu ni kixikanu ki mwene mu londekesa mu kudibhana ni izukutisu* ni ibhidi i mwa mubhita nayu. 5 Kiki kilondekesa kwila, Nzambi ufundisa ni kuyuka, ni kwila enu mwa fwama kutambula o Utuminu wa Nzambi mukonda dya jiphaxi ji mwa mubhita naju.

6 Kuma Nzambi muthu wayuka, mwene wanda fundisa yó ene mu mitalesa hadi. 7 Maji enu ene mu mitalesa hadi, mwanda tambula dinyohenu kumoxi ni etu, mu kithangana kyoso o Ngana Jezú kyanda tukuluka tunde ku dyulu, kumoxi ni jianju jê jala ni kutena. 8 Mwene wanda kwijila mu mulengu wa túbhya phala kufundisa yó kejiya Nzambi ni yó kabelesela o njimbu yambote yalungu ni Ngana yetu Jezú. 9 Enya anda ku afundisa ni ku abwikisa katé ku hádya ni hádya bhu pholo ya Ngana, ene kanda mona dingi o kutena kwê kwa dikota. 10 Kyoso mwene kyanda kwiza ni athu’ê osole* phala kutambula o fuma ni ku muximana mu kizuwa kyenyókyo mwaxaxi ka athu ala ni kixikanu, mukonda o umbangi u twa mibhana mwa utambula ni kixikanu mwaxaxi kenu.

11 Kiki kyene ki tubhangesa ku mitumbula jinga mu misambu yetu, phala Nzambi yetu a mi mone kwila mu athu mwa fwama kutambula o kixanu kya mwenyu. Bhukaxi kakutena kwê, mwene wanda bhanga o ima yoso yambote ya wabhela, ni kutenesa o kikalakalu kimwene mubhanga ni kixikanu. 12 Phala o dijina dya Ngana yetu Jezú difumane bhukaxi kenu, enu wenu mu fumane bhukaxi ka mwene, mu ngalasa ya Nzambi yetu ni ya Ngana yetu Jezú Kidistu.