Habakuke
1 Njimbu yatambula polofeta Habakuke* mu kisumwa. Mwene wambe:
2 ‘Jihova tata, ngidikola kate bhebhi mu kubhinga o kikwatekesu, maji ku ngivu?
Kate bhebhi nganda dikola kokwé phala ku ngibhulula ku usweya? Mukonda dyahi kwa muzubha o usweya?
3 Mukonda dyahi wa mu ngehela kumona o kuyibha?
O athu atatesa akwâ, wa mu a ehelela-hi kiki?
Mukonda nga mumona kibwikilu ni usweya.
Kwala we kuzoka ni jimvunda javulu.
4 Séku muthu ubelesela o kijila,
Kikwene kuyuka.
Mukonda o athu ayuka, a akondoloka ku athu ayibha.
Mukiki, o kuyuka kwakidi akulembwa.
5 “Talesenu kyambote o ifuxi ni mumone yanda bhita!
Enu mwanda sasumuka, mwanda diwana.
Mukonda mu izuwa yenu kwanda bhita kima,
Enu kimwanda kixikina né mwene se a mitangela-kyu.
6 Nganda tumikisa akwa Kaladeya,
Kifuxi kyayibha kibhanga o ima sé kuxinganeka.
Ene abokona mu jimbanza javulu ja ixi,
Phala kutambula jinzo jangene.
7 O kifuxi kiki kikwatesa wôma wavulu.
Éne asola o ijila yâ. Kaxikina o ungana wa kifuxi kyengi.
8 O jikabalu jâ jilenga dingi ni lusolo, o ingo ndenge,
Jene ja teme dingi, o makombe a mukwata o yama mu usuku ndenge.
O jikabalu jâ ja ita, jiza ni kutitila,
O jikabalu jâ ja mutunda dikanga.
Ene akwata o kima kyamesena ni lusolo kala kibhanga o holokoko.
9 Ene oso eza mubhanga usweya.
Kyoso kyadyongeka, ela kala o kitembwe kitunda ku mbandu kutundila o dikumbi,
O athu a akwika a abhongolola kala museke.
10 Ene atobhesa o jisobha,
Kasuwu o jinguvulu.
Jimbanza joso jofikidile ajisebhulula,
Atuta mavu phala kubhanga mulundu bhu mbandu a ilumbu ya mbanza, n’atene kubokona-mu ni ku itolola.
11 Ene-phe aya ni lusolo kala o kitembwe, anga asomboka,
Maji kyanda fwama ku akastikala mukonda dya ima yene mubhanga,
Kuma phala ene, o nzambi yâ mwéne wa abhana o kutena.”*
12 Éye mwene ngana Jihova, wene-ku tunde ukulu.
Nzambi yami, Ukôla, eye k’ufu.*
Jihova tata, eye wasolo akwa Kaladeya phala kufundisa bhu kididi kyé.
Ditadi dyami, eye wa asolo phala kutubazela.
13 Mesu mé azele, kaxikina kumona o phulu ya mubhanga o athu.
Kuxikina o kuyibha kuku.
Mukonda dyahi-phe ulendukila o athu ayibha?
Mukonda dyahi udixibha kyoso athu ayibha kyabhanga o phulu ku athu ambote?
14 Mukonda dyahi wehela o athu ku atalatala kala jimbiji mu musanza wa kalunga,
Kala yama yakambe mutwameni u akwatekesa.
15 Ene* akwata o athu ni nzolo.
Akwata o athu mu mawanda mâ a makota,
Abhongolola o athu yá mu mawanda mâ ofele.
Kiki kya asangulukisa kyavulu.
16 Kiki kya abhangesa kubhakula jisata ku mawanda mâ a makota,
O mawanda mâ ofele a ohela wasu wa dizumba,
Mukonda dya mawanda mâ, ene ala ni kudya kwambote,
O kudya kwâ kunetesa.
17 O kwila ene anda suluka ni kukwata o jimbiji ni wanda wâ wadikota?*
O kwila anda suluka ni kujibha o athu sé ku akwatela henda?