Mikeya
6 Ngamidyondo, ivwenu ya muzwela Jihova.
Balumukenu muzwele o milonga yenu ku milundu,
O tumilundu twivwe o mázwi menu.
2 Enu mu milundu, ivwenu o milonga ya Jihova.
N’enu we, mu madisesa ma ixi mwakwata kyambote.
Mukonda Jihova wakwata mvunda ni mundu wê.
O mulonga wê wa ukwata ni akwa Izalayele.
3 “Mundu wami, ima yahi yayibha i nga mibhange?
Ima yahi i ngabhange phala ku mitalesa hadi?
Zwelenu o ima i ngabhange.
4 Mukonda nga mikatula mu ixi ya Ijitu,
Nga mibhulula mu ixi ya ubhika.*
Eme ngasolo Mozé, Alá ni Midiyana phala ku myendesa.
5 Mundu wami ngamidyondo, lembalalenu o kikanenu kyabhange Balake sobha ya Mowabe.
Ni kitambwijilu kya mubhana kwa Balamu mon’a Bewole,
Ni ima yabhiti tunde ku Xitimi ndu ku Jidingale.
Mukyenyiki, mwanda tena kutongolola kwila Jihova wa mibhangela ima yavulu yambote.”
6 Kima kyahi ki ngandaya-nakyu bhu pholo ya Jihova?
Ihi i nganda kwambata, kyoso ki nganda fukamena Nzambi watungu ku dyulu?
Nganda kwambata jisata ja kwoha,
Ni kangombe ka muvu umoxi?
7 O kwila Jihova wanda sanguluka ni jimidi ja tumbudi,
Ni nzungule ya máji?
O kwila nganda bhakula mon’ami wa dyanga mukonda dya kubhukumuka kwami?
O kwila nganda bhakula mon’ami kala sata ya ituxi yami?
8 Jihova wa kutangela kya yalungu ni ima yafwama, eye u muthu wakime.
Ihi i kubhinga mwene phala ku ibhanga?
Mwene u kubhinga ngo kubhanga o ima ni kuyuka* ni kubhanga o mbote.
Ni kwenda jinga bhu pholo ya Nzambi yé ni kuditulula.
9 O dízwi dya Jihova a mudivwa mu mbanza,
Oso yó ala ni kwijiya kwakidi, dijina dyê anda dikwatela wôma.
Bhanenu mátwi kwa ngana wakwata o mbangala bhu maku.
10 O kwila mu inzo ya mukwa phulu mwala hanji jimbongo jatambula mu kubhanga ima yayibha?
O kwila mwala hanji efa* yotolese phala kuzonga-nayu o wenji?
11 O kwila ki ngeji kala ni kikuma se ngikala ni kizongelu kya jipezu ja makutu?
Ni kizongelu phala ku nganala-nakyu o athu?
12 O jimvwama jé akwa usweya.
O athu atungu mu mbanza yé, azwela makutu.
Mukanu dyâ mutunda makutu.
13 “Kyenyiki, nganda kukastikala kyavulu.
Nganda kubwika mukonda dya ituxi yé.
14 Wanda dya, maji kiwanda kwikuta,
Wanda kala ni nzala yavulu.
Wanda sota kusweka jimbote bhu kididi kyakondama, maji kiwanda tena.
Ima yoso i wanda kwambata nganda ibhakula ku jinguma jé.
15 Wanda kuna, maji kiwanda bhongolola.
Wanda bhanga máji a mividi, maji kiwanda tena kubhanga-nawu kima.
Wanda titidila o jiuva, o vinyu kiwanda inwa.
16 Mukonda mwa mukayela o ijila ya Omidi, ni kubhanga o ima yayibha yabhangele o dibhata dya Akabe,
Ni kukayela o jindunge jâ.
Mukonda dya kiki nganda mikastikala.
O athu anda diwana mu kumona o ima i nganda mibhanga.
Ifuxi yoso yanda misebhulula.”