Ikalakalu ya Jipoxolo
28 Kyoso ki twa bhuluka, tweza mu kwijiya kwila o kikôlo* akixana Malta. 2 O akwa kikôlo* a tulondekesa henda ya dikota. Kuma kwexile mu noka ni kubhanga mbambi, ene atuzalela, ya a wika túya. 3 Phawulu wabongo jihwínyi, yu wajite mu túbhya. Mukonda dya kutema, mu jihwínyi mwa tundu dyuta, anga di munaminina mu lukwaku. 4 O akwa kikôlo* kyamono kwila o dyuta dya munaminina mu lukwaku, amateka kuzwela mudyâ, exi: “Mu kidi, o diyala didi kijibhangânga! Sumbala mwene wabhuluka mu musanza wa kalunga, maji o nzambi ya muhatu ya kuyuka,* ka mwehela kukala ku mwenyu.” 5 Mwene wa kukumuna o dyuta mu túya, maji o dyuta ki dya mu numata. 6 Ene akexile mukingila kwila o mukutu wê ujimba mba mwene ufwa. Kyakingila ithangana yavulu ni kumona kwila, mwene wexile kyambote, alungulula o ibanzelu yâ. Anga amateka kuzwela kwila mwene wexile nzambi.
7 Mu jimbandu jenyojo mwakexile mabhya atokalele ku mutwameni wa kikôlo amwixana Pubilu. Mwene wa tutambulula kyambote, yu watuzalela mu izuwa itatu. 8 O tata ya Pubilu wakexile bhu hama mukonda wakatele, wakexile ni febele ni kabwalala. Kyenyiki, Phawulu wayi mu mukunda, wasambe, wamutula o maku kuthandu dyê, yu wa musake. 9 Kya bhiti o ima yiyi, o jihaxi ja mukwá ja kikôlo ja kexile muya kwa mwene, yu wakexile mwa saka. 10 Ene atubhana mawujitu avulu. Kyoso ki twakexile mu dilônga mu naviyu atubhana yoso i twa bhindamene.
11 Mu kubhita mbeji jitatu, twa sambela mu naviyu yakexile ni fikula ya an’â Nzewuji ku pholo. O naviyu yatokalele ku ixi ya Xandediya, yene yabhitile o kixibhu mu kikôlo. 12 Twabhixila ku Silakuza, anga tukala kwenyóko izuwa itatu; 13 kyoso ki twa tundu-ku, twayi ku Leji. Mu kubhita kizuwa kimoxi, kwamateka kubhusa kitembu kya tundile ku mbandu ya lwiji. Mu kizuwa kyakayela twabhixila ku Poteyole. 14 Kwenyóko twasange-ku jiphange, ene a tu dyondela phala kukala-nawu sambwadi dya izuwa. Kyoso kyabhiti o izuwa yiyi, twayi ku Loma. 15 O jiphange kwenyóko kyevu kwila, etu twabhixila, eza katé bhu Kitanda kya Apiyu ni bhu kididi akixana Izalelu Itatu,* phala kudisanga n’etu. Kyoso Phawulu kya amono, wasakidila Nzambi, anga uswina dingi. 16 Kyoso ki twabhixila ku Loma, Phawulu amwehela kutunga ubheka wê ni disoladi phala ku mulanga.
17 Mu kubhita izuwa itatu, mwene watumu kwixana o mayala afuma a Jijudé. Kyoso kya dyongekele, mwene wa ambela, wixi: “Enu akwetu jiphange, sumbala ki nga bhange kima kyayibha ku athu, mba kubhukumukina o ijila ya jikuku jetu, maji né kiki a ngite mu kaleya mu Jeluzaleme, ya a ngi bhakula ku akwa Loma. 18 Kyazubha ku ngibhanga ibhwidisu, amesenene kungyeha, mukonda ka sange kikuma kyeji bhangesa ku ngijibha. 19 Kuma o Jijudé a ngi lungulukila, ngamono kwila nga tokalele kubhinga phala kuya kwa Sézalu. Maji ki nga bhange kiki phala kutatela o kifuxi kyami. 20 Kyene ki nga bhingila phala ku mi mona ni kuzwela n’enu, kuma a ngi kutu ni malubhambu yá, mukonda dya kidyelelu kya akwa Izalayele.” 21 Ene a mu tangela: “O akwa Judeya ka tu sonekena yalungu n’eye, sé-ku phange watundu kwenyóko wa tutangela kima kyayibha kyalungu n’eye. 22 Maji twafika kwila kima kyambote we ku kwívwa, mukonda mu jimbandu joso twene mu kwívwa ima yayibha yalungu ni ubhezelu yú.”
23 Ene abakana phala kudisanga ni Phawulu. Athu avulu ayi ku mu kunda mu inzo mwa kexile. Tundé mu kamene katé mu usuku, mwene wa alombolwela kyambote o maka alungu ni Utuminu wa Nzambi, bhukaxi ka Kijila kya Mozé ni mikanda ya Jipolofeta, mu kwa kwatekesa kukala ni kixikanu kwa Jezú. 24 Sayi athu axikina o ima yazwelele mwene, maji a mukwá aditunu. 25 Kuma adiwanuna mudyâ, ene oso amateka ku mwangana, maji Phawulu wa zwela ngó kiki:
“O polofeta Izaya walungilyé kyoso bhukaxi ka nzumbi ikôla kyambela o jikuku jenu, wixi: 26 ‘Ndé watangele o mundu yú kwila: “Enu mwanda kwívwa mwene, maji ki mwanda tendela, mwanda tala mwene, maji ki mwanda tongolola. 27 Mukonda o muxima wa mundu yú wakolo, ene axiti o mátwi phala k’evwe, axiti o mesu mâ phala ka mone. Mixima yâ ki itongoloka phala n’a lunguluke ni ngi a sake.”’ 28 Ijiyenu-kyu kwila Nzambi wabhana o kubhuluka kuku ku akwa ifuxi yengi, ene-phe anda kwívwa.” 29 ——
30 Phawulu anga ukala mivu iyadi mu inzo ya lukalele. Mwene wakexile mu tambulula ni henda yoso o athu akexile mu mukunda, 31 mu kwabokela o Utuminu wa Nzambi, ni kwalonga ni kuswina kwoso yalungu ni Ngana Jezú Kidistu, sé ku mufidisa.