DIVULU DYA DYANGA DYA SAMUWELE

1 Kwexile diyala mukwa Lamatayimu dya Zofi* ku milundu ya Ifalayíme, a mwixanene Elikana. Mwene wexile mon’â Jelohamu, mon’â Elihu, mon’â Tohu, mon’â Zufu mukwa Ifalayíme. 2 Mwene wexile ni ahatu ayadi, umoxi dijina dyê Ana, o mukwa Penina. Penina wexile ni twana, maji Ana kexile ni mona. 3 Mivu yoso o diyala didi wexile mutunda mu mbanza yê ni kuya kate ku Silo phala kubheza ni kubhakula jisata kwa Jihova dya ifuxi. Hofini ni Fineya, o twana tuyadi twa Elí, exile musidivila kala akunji a Jihova.

4 Sayi kizuwa kyoso Elikana kyabhakula sata, wabhana jimbandu ja xitu kwa muhat’wê Penina ni ku twana twê twa mala ni twa ahatu, 5 Maji kwa Ana, mwene wa mubhana o mbandu yadikota mukonda mwene wazolele dingi Ana. Maji-phe Jihova kabhanene twana kwa Ana.* 6 Penina* anga ukala ku mutatesa jinga phala ku mubhangesa kudivwa kyayibha mukonda dya Jihova kukamba ku mubhana twana. 7 Mivu yoso Penina wexile mubhanga kiki. Ithangana yoso, kyoso Ana kyexile muya mu inzo ya Jihova, Penina wexile mu mutatesa. Mukonda dya kiki, mwene wexile ngo mudila, kexile mudya. 8 Kyenyiki, o munum’yê Elikana wa mwibhwidisa: “Ana, mukonda dyahi wa mudila? Mukonda dyahi wafulu o kudya? Mukonda dyahi waluwala kyavulu?* Eme kingakukala kota, o dikwinyi dya ana ndenge?”

9 Kyazubha kudya ni kunwa ku Silo, Ana wabalumuka. O mukunji Elí waxikamene bhu kyalu kyê, bhu mwelu wa inzo ya Jihova.* 10 Ana wexile ni kikote ku muxima anga u mateka kusamba kwa Jihova ni kudila kyavulu. 11 Mwene wabhange o kikanenu kiki kwa Nzambi, mukwamba: “Eye u Jihova dya ifuxi, tala o hadi yoso i ngene mutala eme ngi selevende yé, se u ngilembalala ni u kambe kujimba o selevende yé, anga u ngibhana mon’â diyala, eme nganda mubhakula kwa Jihova izuwa yoso ya mwenyu wê, mwene kanda ku mubhuta o ndemba.

12 Kyoso mwene kyayi ni kusamba kyavulu kwa Jihova, Elí wexile mutalela o mizumbu yê. 13 Ana wexile muzwela ku muxima, o mizumbu yene ngo yexile mu dizambesa, maji o dízwi dyê kidyexile mutunda. Mukonda dya kiki, Elí wabanzele kwila Ana wakodiwile. 14 Elí wa mwibhwidisa: “Kate bhebhi bhu wandaya ni kunwa ni kukodiwa? Kana kunwa dingi vinyu.” 15 Ana wa mutambwijila: “Kana ngana yami, eme ngala ni kikote ku muxima, kinganu vinyu mba uhólwa wengi, maji ngamujikula o muxima wami kwa Jihova. 16 Kana kubanza kwila o selevende yé muhatu wayibha, kuma ngene musamba kate kindala mukonda ngaluwala kyavulu, ngala ni kikote ku muxima.” 17 Kyenyiki Elí wa mwambela: “Ndé ni kutululuka, o Nzambi ya Izalayele a kubhane o kima kiwamubhingi.” 18 Mwene wa mutambwijila: “O selevende yé asange ngalasa ku mesu mé.” Kyenyiki, o muhatu wayi, anga ukala mudya kya. Mwene kaluwalele dingi.

19 Kyenyiki, mu kamene kikwaki, ene a bheza Jihova anga a vutuka kubhata dyâ ku Lamá. Elikana anga uzeka ni muhat’wê Ana, Jihova u lembalala dingi Ana.* 20 Mu kubhita muvu,* Ana wemita, u vwala mon’â diyala anga u muluka o dijina dya Samuwele,* kuma mwene wambe, wixi: “Eme ngamubhingi kwa Jihova.”

21 Mu kithangana kyatokala, Elikana wayi ni mwiji wê woso phala kubhakula sata ya muvu kwa Jihova, ni kubhana sata ya kukumbidila kikanenu. 22 Maji Ana kayi kumoxi ni ene, kuma wambela mwadi wê, wixi: “Kyoso mona kinganda mubatula o kwamwa, kyene kinganda mwambata ku pholo ya Jihova, n’a xale kya mwene kwenyoko.” 23 Kyenyiki, mwad’wê Elikana, wa mwambela: “Bhanga kala kya kuwabhela.* Xala kubhata kate kiwanda mubatula o kwamwa. Jihova a kumbidile o kima kiwazwela.” Kyenyiki, o muhatu waxala kubhata mukulanga o mona kate kya mubatula o kwamwa.

24 Kyoso kya mubatula o kwamwa, wambata o mona ku Silo, kumoxi ni kangombe ka mivu itatu ni efa* imoxi ya fadinya ni mbinda ya vinyu. Anga u bhixila ni kamona mu inzo ya Jihova ku Silo. 25 Mukusuluka, ajibha o kangombe anga ambata o kamona kwa Elí. 26 Kyenyiki, o muhatu wambe: “Disesa ngana, ngiloloke, kala eye ngana kiwene ku mwenyu, o muhatu wexile musamba kwa Jihova mu kididi kiki, éme. 27 Yú o mon’â diyala u ngabhingi mu musambu. Jihova watambwijila o musambu wami. 28 Mukonda dya kiki, eme ngimubhakula* kwa Jihova. Mwene wanda tokala kwa Jihova ku mwenyu wê woso.

Kyenyiki, mwene* u fukama bhenyobho mu kubheza Jihova.

2 Kyenyiki Ana mu kusamba wambe:

11 Mukusuluka, Elikana wayi kubhata dyê ku Lamá, maji o mon’ê waxala ni mukunji Elí, yu wamateka kusidivila Jihova.

12 O an’â Elí exile athu ayibha, kexile muxila Jihova. 13 O kima kyexile mubhanga ni mbandu ya xitu yasatela, yatokalele kutambula o akunji ku mundu, kyenyiki: Kyoso o muthu kyexile jinga mubhakula o sata, kwexile mukwiza o mukwatekexi wa mukunji ni kinyengenu* kyadikota bhu maku, mu kithangana kyexile mulamba o xitu, 14 mwene wexile muxuka o kinyengenu* mu imbya yakexile mu lambela-mu. O mukunji wexile muxala ni yoso yexile mukatula ni kinyengenu.* Kiki kyene kyakexile mubhanga ku athu oso akwa Izalayele akexile muya ku Silo. 15 Ku mbandu yengi, ande mwene dya muthu wexile mubhakula o jisata kwoha o banya, kwexile mukwiza o mukwatekexi wa mukunji, yu wexile muzwela, wixi: “Bhana o xitu ku mukunji n’a izuze. Mwene kanda xikina kutambula xitu yolambe kya, kikale ngo ya wisu.” 16 Kyoso o muthu kyexile mutambwijila: “Kya dyanga, twehele hanji kwoha o banya, mukusuluka ambata yoso iwamesena.” O mukwatekexi wexile mutambwijila: “Kana, ngibhane mwene o xitu kindala. Se ngwé ku ngibhana, éme mwene nganda ikatula!” 17 Kyenyiki, o kituxi kya a kwatekexi kyadibandekesa dingi ku pholo ya Jihova, mukondao mayala enyá, kexile muxila o jisata ja Jihova.

18 Maji Samuwele wexile musidivila Jihova, wazwatele efodi ya linyu sumbala wexile hanji mona-ndenge. 19 Mivu yoso, man’yâ wexile mu mutungila kadivunga ni ku mwambatela-ku, kyoso kyexile muya ni mwadi wê phala kubhana o sata ya muvu ni muvu. 20 Kyenyiki, Elí wabesowala Elikana ni muhat’wê Ana, yu wambe: “Jihova akubhe mona bhukaxi ka muhat’wé, mu kididi kya yó mwa mubhana* kwa Jihova.” Ene anga avutuka kubhata. 21 Jihova wabesowala Ana phala atene kwimita dingi. Mwene anga uvwala twana tutatu twa mala ni twana tuyadi twa ahatu. O kambonga Samuwele anga uya ni kukula kyoso kyaya ni kusidivila Jihova.

22 Elí wakukile kya kyavulu, mwene wevu yoso yexile mubhanga o twana twê ku Izalayele yoso, ni kwila o twana twê exile muzeka ni ahatu akexile mukalakala bhu mwelu wa balaka ya kudyongekela-mu. 23 Mwene wexile mutangela an’ê, wixi: “Mukonda dyahi mwa musuluka ni kubhanga o ima yiyi? O ima i ngamukwivwa yalungu ni enu, ima yayibha. 24 An’ami tata! O ima i ngamukwivwa bhukaxi ka mundu wa Jihova, ki ima yambote. 25 Se o muthu uta kituxi kwa mukwa, o muthu wengi utena kubhinga kwa Jihova phala ku muloloka.* Maji se o muthu uta kituxi kwa Jihova, nanyi utena ku musambela?” Maji ene kamesenene kwivwa o tata yâ, kuma Jihova wamesenene kwabhakula phala kufwa. 26 Maji o kambonga Samuwele wasuluka ni kukula. Mwene exile mu muwabhela dingi kwa Jihova ni ku athu.

27 Sayi diyala dya Nzambi weza kate kwa Elí, yu wa mwambela: “Kiki kyene kyambe Jihova: ‘O kwila kingidilondekesa mu inzo ya tat’enu, kyoso kimwatungile mu Ijitu kala mu abhika mu inzo ya Falawó? 28 Mwene a musolo bhukaxi ka miji ya akwa Izalayele, phala kusidivila kala mukunji wami ni kubanda ku kalatódyu kami ni kubhana jisata ni kwoha wasu wadizumba* ni kuta efodi ku pholo yami. Eme ngabhana ku jikuku jenu jisata ja kwoha mu tubhya, jexile mubhana akwa Izalayele. 29 Mukonda dyahi kimwene muxila* o jisata jami, jingatumu kubhana mu inzo yami? Mukonda dyahi eye wamuxila dingi o an’ê, eme ndenge, mu kudinetesa ni jitumba ja xitu jene mubhana o mundu wami wa Izalayele?

30 “‘Kyenyiki, Jihova Nzambi ya Izalayele wambe kiki: “Mukidi eme ngambela o dibhata dyé ni dibhata dya jikuku jé kwila, mweji ngisidivila jinga.” Maji kindala Jihova wambe, wixi: “Kiki kikyanda bhita dingi, mukonda nganda jingisa yó a ngijingisa, o yó a kambe kungixila, kinganda kwa suwa.” 31 O izuwa phala kuzubha o kutena kwé ni kutena* kwa tat’é yamubhixila, mukondakana-ku diyala mu inzo yé, wanda bhixila ku ukukilu. 32 Kumbote yoso yene mubhanga mu Izalayele, eye wanda mona o nguma yé mu inzo yami. Mu inzo yé nuka dingi mwanda kala muthu wanda kuka. 33 O muthu watokala ku mwiji wé, u ngikamba ku mukatula musidivisu yami mu kalatódyu, wanda bhangesa kwila, o mesu mé kamone dingi kyambote ni ku kubhangesa kukala ni kikote. Maji athu avulu mu inzo yé, anda fwila ku xibhata. 34 O kima kyanda bhita ni twana twé tuyadi, Hofini ni Fineya kyanda kala kijimbwete phala eye. Kiyadi kya anda fwa mu kizuwa kimoxi. 35 Mukusuluka nganda bheka mukunji wami wafiyele. Mwene wanda bhanga yoso i sangulukisa o muxima wami. Nganda mutungila dibhata dinangenena, mwene wanda kwenda ku pholo ya selevende yami i ngasolo. 36 Woso u subhuka mu inzo ya Elí, wanda kwiza ku pholo yê ni ku mufukamena phala mwene kutambula kitadi ni mbolo ni kwamba: “Ngakudyondo ngite ngo kala ngi mukunji phala ngitene kutambula kakibhesu* ka mbolo ni ngidye.”’”

3 Kyenyiki, o kambonga Samuwele wakexile musidivila Jihova kumoxi ni Elí. Mu izuwa yenyoyo kikwexile athu avulu akexile mutambula o kizwelu kya Jihova, kikwexile we isumwa yavulu.

2 Sayi kizuwa, Elí wakexile muzeka bhu kididi kyê, o mesu mê a fuwetele kya. Mwene kakexile mumona dingi kyambote. 3 O kandeya ka Nzambi ki kajimine hanji, Samuwele wakexile muzeka mu tembulu* ya Jihova, bhwakexile o Alaka ya Nzambi. 4 Kyenyiki, Jihova wexana Samuwele. Mwene watambwijila: “Eme bhabha.” 5 Mwene walenge kate bhwexile Elí, yu wa mwambela: “Eme bhabha, wangixana?” Elí wambe: “Kingikwixana kana, vutuka uzeke.” Kyenyiki, mwene wayi yu wazeka. 6 Jihova wamwixana lwamukwa: “Samuwele!” Kyenyiki, Samuwele wabalumuka wayi kate kwa Elí, yu wa mwambela: “Eme bhabha, kuma wangixana.” Maji Elí wambe: “Kana mon’ami, kingikwixana. Vutuka uzeke.” 7 (Samuwele kejidile hanji Jihova, kuma Jihova kazwelele-nê hanji.) 8 Jihova anga u mwixana dingi muveji ya katatu: “Samuwele!” Kyenyiki, mwene wabalumuka wayi kate kwa Elí, yu wa mwambela: “Eme bhabha, kuma wangixana.”

Mu kithangana kyenyokyo Elí watongolola kwila, Jihova mwéne wakexile mukwixana o kambonga. 9 Elí wambela Samuwele, wixi: “Ndé uzeke. Se mwene u kwixana dingi, u tambwijila kiki: ‘Zwelé Jihova, o selevende yé wa mukwivwa.’” Samuwele anga uya uzeka bhu kididi kyê.

10 Jihova wiza, wimana bhenyobho anga u mwixana kala kyabhangele mu ithangana yamukwa: “Samuwele, Samuwele!” Samuwele u mutambwijila, wixi: “Zwelé Ngana yami, o selevende yê yu wívwa.” 11 Jihova wambela Samuwele, wixi: “Nganda bhanga kima mu Izalayele, kyanda bhangesa kwila woso wívwa o kima kiki wanda sasumuka.* 12 Mu kizuwa kyenyiki, nganda kumbidila o ima yoso i ngakanena yalungu ni inzo ya Elí. 13 Mutangele kwila, nganda fundisa jinga o dibhata dyê, mukonda dya kikuma kyejiya kyambote. Twana twê a mubhanga ima yayibha phala kulokalala Nzambi, maji mwene ka abazela. 14 Kiki kyene kya ngibhangesa kulôkela o inzo ya Elí, kuma séku jisata janda bhangesa kujima o kituxi kya inzo ya Elí.”

15 Samuwele anga uzeka kate kikwaki. Mu kamene u jikula o mabhitu a inzo ya Jihova. Samuwele wexile ni wôma wakutangela kwa Elí o kisumwa kyamono. 16 Kyenyiki, Elí wexana Samuwele: “Samuwele mon’ami!” Mwene watambwijila: “Eme bhabha.” 17 Elí wa mwibhwidisa: “Ihi yakutangela mwene? Kana ku ngiswekela kima, ngakudyondo. Nzambi a kukaxtikale kinene, se u ngiswekela kima mu yoso yazwela mwene.” 18 Kyenyiki, Samuwele wa mutangela yoso, kamuswekela kima. Elí wambe: “Jihova mwene wakyambe. Mwene abhange kala kya mu wabhela.”

19 Samuwele anga u suluka mu kukula, Jihova hé ukala ni mwene. Mu ima yoso yazwela mwene, kibhukambe kizwelu kyakambe kudikumbidila.* 20 Izalayele yoso, tunde ku Dane kate ku Beleseba eza mukwijiya kwila, Jihova wasolo Samuwele kala polofeta. 21 Jihova wasuluka ni kumonekena Samuwele ku Silo, kuma Jihova watukulukile Samuwele ku Silo, bhukaxi ka izwelu ya Jihova.

4 Samuwele anga u suluka mu kutangela o mak’â Nzambi ku Izalayele yoso.

Kyenyiki, o akwa Izalayele ayi mubhânga ni akwa Fidíxa. O akwa Izalayele akexile bhwa zukamene Ebenezele, o akwa Fidíxa akexile ku Afeke. 2 Akwa Fidíxa a disokejeka phala kubhânga ni akwa Izalayele, maji o ita yabhonzele kyavulu. Akwa Izalayele a atolola ku akwa Fidíxa. Akwa Fidíxa ajibha midi jiwana ja mayala akwa Izalayele mu ita. 3 Kyoso o masoladi kyavutuka* bhu kididi kyâ, o adyakime akwa Izalayela ambe, exi: “Mukonda dyahi lelu Jihova wehela ku tutolola ku akwa Fidíxa? Ndokwenu ku Silo mutakana o Álaka ya Jihova phala ikale n’etu ni i tubhulule ku jinguma jetu.” 4 Kyenyiki, a tumikisa o akunji ku Silo, ya eza ni Álaka ya Kikutu kya Jihova dya ifuxi, waxikama ku kyandu kyê kya ungana kyala kuthandu a* jikelubini. Kyoso kyambata o Álaka ya Kikutu kya Nzambi ya kidi, Hofini ni Fineya o twana tuyadi twa Elí, ayile we.

5 Kyenyiki, kyoso o Álaka ya Kikutu kya Jihova ki yabhixila bhwexile akwa Izalayele, enyoso a mateka kudikola, o kididi bhwexile ene kyatunguta. 6 Kyoso akwa Fidíxa kyevu o kudikola, ambe: “Jibuya jahi jamutunda bhu kididi bhwala akwa Jihebelewu?” Mukusuka-ku, eza mu kwijiya kwila o Álaka ya Jihova yabhixila bhu kididi kya akwa Izalayele. 7 Akwa Fidíxa wôma wa akwata ya ambe: “Nzambi wabhixila bhwala akwa Izalayele!” Ambe dingi: “Ayiwé, kiki nuka kya tubhitile! 8 Kokolo dyetu! Nanyi wanda tubhulula bhu maku a Nzambi Muteni wa Yoso? Mwéne o Nzambi yabwika akwa Ijitu ni mabhebhu mu kikangalakata. 9 Swinyenu, kolokotenu, enu mu akwa Fidíxa, phala kimukale mu abhika akwa Jihebelewu, kala ene kyakexile abhik’enu. Swinyenu, bhângenu mu ita!” 10 Kyenyiki, akwa Fidíxa abhânge ya atolola akwa Izalayele. Akwa Izalayele alenge kala muthu mu balaka yê. Kwafu athu avulu. Makwinyi atatu a midi a masoladi akwa Izalayele. 11 Ku mbandu yamukwa, o Álaka ya Nzambi a itambula. Hofini ni Fineya, o twana tuyadi twa Elí, twafu.

12 Sayi diyala mukwa Bejamí watundu mu ita ni kulenga kate ku Silo, wabhixila mu kizuwa kyenyokyo ni izwatu ya tandujuka ni mavu mu mútwe. 13 Kyoso kyabhixila o diyala, Elí waxikamene bhu kyalu kyê bhu mbandu a njila, mu kukinga. O muxima wê wakexile muteketa mukonda wa thandanganyele ni Álaka ya Nzambi yakidi. Kyoso o diyala kyabokona mu mbanza yu watula o njimbu, o athu mu mbanza yoso a mateka kuta nzongo. 14 Kyoso Elí kyevu o nzongo, webhwidisa: “O nzongo yiyi yahi?” Kyenyiki, o diyala dyenyidi, u lenga kate bhwexile Elí phala ku mutudila o njimbu. 15 (Elí wexile kya ni makwinyi avwa ni dinake dya mivu, o mesu mê afwefwetele kya, mwene kexile mutena kumona dingi.) 16 Kyenyiki, o diyala wambela Elí, wixi: “Ngatundu mu ita, lelu mwene ngalenge-ku.” Elí wa mwibhwidisa: “Ihi yabhiti mon’ami?” 17 O diyala wabheka o njimbu, wambe: “Akwa Izalayele a lenge akwa Fidíxa, masoladi* avulu afu. O twana twê tuyadi Hofini ni Fineya afu we, o Álaka ya Nzambi yakidi a itambula.”

18 Kyoso mwene kyatumbula o Álaka ya Nzambi yakidi, Elí wabu ni dikunda bhoxi ku kyalu kyaxikamene kyexile bhu mbandu a dibhitu. Mwene wabukuka o xingu yu wafu, mukonda wakukile kya yu wanetene. Mwene wafundisa akwa Izalayele mu makwinyi awana a mivu. 19 O mukaji a mon’ê, muhatu wa Fineya wemitine, wexile kya phala kuvwala. Kyoso kyeza mu kwijiya kwila o Álaka ya Nzambi yakidi a itambula, ni kwila o ukowakime ni mwadi wê afu, mwene wafukama, o jindolo ja kuvwala ja mukwata yu wavwala. 20 Kyoso kyakexile mufwa, o ahatu a mukondolokele a mwambela: “Kukale ni wôma, eye wavwala mon’a diyala.” Mwene katambwijila, ne ngo kukisuwa.* 21 O mona wa muluku o dijina dya Ikabode,* yu wambe: “Kijingu kyatundu kya mu Izalayele.” Mwene wambe kiki mukonda o Álaka ya Nzambi yakidi a itambwile, ni kwila o ukowê ni munum’yê afwile we. 22 Mwene wixi: “O kijingu kyatundu kya mu Izalayele. Mukonda o Álaka ya Nzambi yakidi a itambula.”

5 Kyoso akwa Fidíxa kyatambula o Álaka ya Nzambi yakidi, atundu nayu bhu Ebenezele anga a yambata ku Ajidode. 2 O akwa Fidíxa a kwata o Álaka ya Nzambi yakidi anga a yambata kate mu inzo* ya Dangoni, ya a itula bhu mbandu a Dangoni. 3 Mu kamene ka selu kyoso akwa Ajidode kyabalumuka, a mono kwila o kiteka kya Dangoni kyabu ni pholo bhoxi bhu mbandu a Álaka ya Jihova. Kyenyiki, a kwata o kiteka kya Dangoni ya a kitula dingi bhu kididi kyê. 4 Mu kizuwa kyakayela kyoso kya balumuka mu kamene kaselu, a mono kwila o kiteka kya Dangoni kyabu ni pholo bhoxi ku pholo ya Álaka ya Jihova. O mútwe ni maku a Dangoni a abatula, anga akala bhu dibhitu. Kwasubhukile ngo o mbandu ya mukutu wedile kala wa mbiji.* 5 Mukonda dya kiki kate mu kizuwa kyalelu, o akunji a Dangoni ni oso a bokona mu inzo ya Dangoni ku Ajidode, kene mudyota bhu mwelu wa dibhitu.

6 Jihova anga u kaxtikala akwa Ajidode. Mwene wabheka uhaxi wabhonzo ku mundu woso ni mu jisanzala joso ja akwa Ajidode, mwene wabhangesa o mundu woso kukala ni uhaxi wa mukila. 7 Kyoso o mayala akwa Ajidode kyamono o ima yexile mubhita, ambe: “O Álaka ya Nzambi ya Izalayele ki i tokala kukala n’etu, kuma o lukwaku lwê, lweza kuthandu dyetu ni kuthandu dya nzambi yetu Dangoni.” 8 Kyenyiki, exana o jinguvulu joso ja akwa Fidíxa ya a ebhwidisa: “Ihi i twatokala o kubhanga ni Álaka ya Nzambi ya Izalayele?” Ene a tambwijila: “Ambatenu o Álaka ya Nzambi ya Izalayele ku Ngate.” Kyenyiki, ambata kwenyoko o Álaka ya Nzambi ya Izalayele.

9 Kyoso kyambata o Álaka kwenyoko, Jihova wakaxtikala o athu oso mu mbanza, mukonda dya kiki, ene a thandanganyele. Mwene wakaxtikala o athu oso mu mbanza, mu kwabhangesa kukala ni uhaxi wa mukila. 10 Kyenyiki, ambata o Álaka ya Nzambi yakidi ku Ekolone. Maji kyoso o Álaka ya Nzambi yakidi kiyatula ku Ekolone, o akwa Ekolone, a mateka kudikola, exi: “Ene abheka o Álaka ya Nzambi ya Izalayele bhabha phala kutujibha!” 11 Kyenyiki, a tumikisa akunji, ya exana o jinguvulu joso ja akwa Fidíxa anga ambe, exi: “Ambatenu o Álaka ya Nzambi ya akwa Izalayele ni mu i vutule mu kididi kyê, phala etu ni mundu wetu, kitufwe.” O athu oso mu mbanza exile ni wôma wa kufwa mukonda o lukwaku lwa Nzambi yakidi lwexile kuthandu dyâ. 12 O athu a kambele kufwa, akwata o uhaxi wa mukila. O kudikola kwa athu mu mbanza mukubhinga kikwatekesu, kwabhixila kate ku dyulu.

6 O Álaka ya Jihova yabhange sambwadi dya jimbeji ni akwa Fidíxa. 2 Akwa Fidíxa exana o akunji ni akwa kuzambula, ya ebhwidisa: “Ihi i twatokala kubhanga ni Álaka ya Jihova? Tu tangelyenu, ihi i twatokala kubhanga phala ku i vutukisa bhu kididi kyê?” 3 Ene a tambwijla: “Kyoso kimwanda tumikisa o Álaka ya Kikutu kya Jihova, o Nzambi ya Izalayele, mu i tumikisa ni sata. Kanenu kufula kutumikisa sata ya kuloloka o ituxi. Se mubhanga kiki mwanda disanza, mwanda kwijiya se mukonda dyahi mwene wa mi kaxtikala.” 4 Kyenyiki, akwa Fidíxa ebhwidisa: “Sata yebhi ya kituxi, i twatokala kutumikisa?” Ene a tambwijila: “Mu yudika mabhumbu* atanu a ulu, phuku jitanu ja ulu, kala o muxinda wa jinguvulu ja akwa Fidíxa. Kuma enu ni jinguvulu jenu, a mikaxtikala ni dibhebhu didi. 5 Bhangenu iteka ya uhaxi wenu wa mukila, ni iteka ya jiphuku ya muzanga o ixi, anga mubhana kijingu ku Nzambi ya Izalayele. Nange mwene u sosolola o kaxtiku kabheka kokwenu, ku jinzambi jenu ni ku ixi yenu. 6 Mukonda dyahi mukolesa o muxima, kala kyabhangele akwa Ijitu ni Falawó? Kyoso Nzambi kya a talatala ni kuyibha kwoso, ene anga eha akwa Izalayele kuya, akwa Izalayele anga atunda. 7 Yudikenu dikalu a disunga kwala o mama jiyadi ja ngombe jala ni twana kiluwa a jizwika jungu mu xingu. Kyenyiki, mukwika o dikalu ku jimama ja jingombe, maji o twana mutwambata mu kibhanga, dikanga dya jimama. 8 Tulenu o Álaka ya Jihova mu dikalu, o mu ngonga bhu mbandu yê muta-mu o ima yoso ya ulu, i mwanda bhana kala sata ya kituxi. Mukusuluka, mu yeha phala n’eye. 9 Anga mu italela, se iditela ku kikoka kiya ku Beteseme, ku mbambe yê, twanda kwijiya kwila mwéne watubhekela o windwa yú. Se kana, twanda kwijiya kwila ki mwene watubhekela o wíndwa yú. O kima kyabhiti n’etu uhaxi ngó.”

10 Ene abhange kala kya a tendelesa. Akwata ku mama jiyadi ja jingombe jala ni twana, a jikwika ku dikalu, o twana twa jingombe anga atwambata ku kibhanga. 11 Mukusuluka, atula o Álaka ya Jihova mu dikalu, atula-mu we o ngonga mwakexile o jiphuku ja ulu ni iteka yâ, ya mikila. 12 O jingombe jayila ku kikoka kiya ku Beteseme, jene jasuluka kwendela mu kikoka kiki ni kudikola, kijibhambuka né ngo ku kadilu mba ku kyasu. Kyenyiki, o jinguvulu ja akwa Fidíxa akayela o jingombe kate bhwa suku o mbambe ya Beteseme. 13 O akwa Beteseme akexile mu bhongolola o tiliku mu honga. Kyoso kyabhetula o mesu, ya a mono o Álaka, a sanguluka kyavulu. 14 O dikalu dya bokona mu dibhya dya Josuwé, o mukwa Beteseme, anga dimana bhu mbandu a ditadi dyadikota. Kyenyiki, abatula o mabaya a dikalu, ya abhakula o jingombe kala jisata ja kwoha phala Jihova.

15 O Jilevita akatula o Álaka ya Jihova, ni ngonga yakexile bhu mbandu a Álaka ni ima ya ulu, anga a itula kuthandu dya ditadi dyadikota. Mu kizuwa kyenyokyo, o mayala a Beteseme abhakula jisata ja kwoha phala Jihova.

16 Kyoso o kitanu kya jinguvulu kya akwa Fidíxa kyamono kiki, a vutuka ku Ekolone mu kizuwa kyenyokyo. 17 O mikila ya ulu yatumikisa akwa Fidíxa kala sata ya kituxi kwa Jihova, yenyiyi: Umoxi wa Ajidode, umoxi wa Ngaza, umoxi wa Axikilone, umoxi wa Ngate, umoxi wa Ekolone. 18 O jiphuku ja ulu a jisokesa ni jimbanza ja akwa Fidíxa, ja tokala ku jinguvulu jitanu, kikale o jimbanza ja makota ni jisanzala.

O ditadi dyadikota bhwatula o Álaka ya Jihova, dyala mu dibhya dya Josuwé, o mukwa Beteseme kate mu kizuwa kyalelu. 19 Maji Nzambi wabwika akwa Beteseme, mukonda dya kutala o Álaka ya Jihova. Wabwika makwinyi atanu a midi ni makwinyi asambwadi a mala* bhukaxi ka mundu. Ene anga a mateka kudila mukonda Jihova wa abhekela kibwika kyadikota. 20 Kyenyiki, o mayala akwa Beteseme ebhwidisa: “Nanyi utena kwimana ku pholo ya Jihova, o Nzambi ukôla? O mwene mukutunda bhukaxi ketu, wandaya kwa nanyi?” 21 Kyenyiki, ene a tumikisa akunji ku akwa Kidyate-Jadimi, phala kwa atangela: “Akwa Fidíxa a vutula o Álaka ya Jihova. Zenu mu itakane.”

7 Kyenyiki, o mala a Kidyate-Jadimi ambata o Álaka ya Jihova monzo ya Abinadabe ku kamulundu, ene asolo Eliyazale mon’â Abinadabe phala kulanga o Álaka ya Jihova.

2 Kwabhiti thembu yavulu, kifwa makwinyi ayadi a mivu, tunde o Álaka ki yabhixila ku Kidyate-Jadimi. Kyenyiki, o mundu wa akwa Izalayele a mateka dingi kusota o kikwatekesu kya Jihova. 3 Samuwele anga wambela o dibhata dyoso dya akwa Izalayele, wixi: “Se mwavutuka ni muxima woso kwa Jihova, bwikenu o iteka ya akwa jixi jengi ni iteka ya Axitolote bhukaxi kenu, vutukenu kwa Jihova ni muxima wenu woso, mu sidivilyenu mwéne ngo. Mwene wanda mibhulula bhu maku a akwa Fidíxa.” 4 Kyenyiki, akwa Izalayele abwika o iteka ya Bahale ni ya Axitolote, anga a sidivila ngo Jihova.

5 Mukusuluka, Samuwele wambe: “Ongekenu o Izalayele yoso ku Mixipa ni ngi mi sambele kwa Jihova.” 6 Kyenyiki, adyongeka ku Mixipa, akatula menya a alundulula ku pholo ya Jihova, afula kudya mu kizuwa kyenyokyo. Ene ambe: “Twate kituxi kwa Jihova.” Samuwele anga u mateka kusidivila kala mufundixi wa akwa Izalayele ku Mixipa.

7 Kyoso akwa Fidíxa kyevu kwila o akwa Izalayele a dyongeka ku Mixipa, o jinguvulu ja akwa Fidíxa ayi mubhânga ni akwa Izalayele. Kyoso kyevu kiki, akwa Izalayele akala ni wôma wa akwa Fidíxa. 8 Kyenyiki, akwa Izalayele ambela Samuwele: “Suluka ni kutusambela kwa Jihova, o Nzambi yetu, phala n’a tubhulule bhu maku a akwa Fidíxa.” 9 Mukiki-phe, Samuwele wakwata kambudi kexile mukwamwa hanji, yu wakabhakula kwa Jihova kala sata ya kwoha. Samuwele anga u samba kwa Jihova phala mwene na kwatekese akwa Izalayele, Jihova u mutambwijila. 10 Kyoso Samuwele kyexile mubhana o sata ya kwoha, akwa Fidíxa akexile mukwiza phala kubhânga ni akwa Izalayele. Mu kizuwa kyenyokyo Jihova watumikisa nzaji ku akwa Fidíxa, ene anga a thandanganya. Kyenyiki, akwa Fidíxa a atolola ku akwa Izalayele. 11 O mayala akwa Izalayele anga atunda ku Mixipa, a kayela akwa Fidíxa kate ku mbandu ya lwiji ku Betekale mu kwajibha mu njila. 12 Samuwele anga u kwata ditadi, u ditula bhukaxi ka Mixipa ni Jezana, anga u dixana Ebenezele,* mukwamba: “Kate bhabha Jihova wa tukwatekesa.” 13 Kyenyiki, akwa Izalayele atolola akwa Fidíxa. Ku mwenyu woso wa Samuwele Jihova kehela dingi akwa Fidíxa kuzukutisa akwa Izalayele. 14 Lwamukwa, o jimbanza ja tambwile akwa Fidíxa ku akwa Izalayele, a jivutula ku akwa Izalayele, tunde ku Axikilone kate ku Ngate. Akwa Izalayele atambula o ixi yoso ku akwa Fidíxa.

Kwakexile we kutululuka bhwaxaxi ka akwa Izalayele ni akwa Mamodi.

15 Samuwele wasuluka ni kufundisa akwa Izalayele ku mwenyu wê woso. 16 Mivu yoso wexile mu nyunga mu mbanza ya Betele, Jidingale, Mixipa, mu kufundisa akwa Izalayele mu ididi yenyiyi. 17 Maji wexile muvutuka ku Lamá, mukonda kwene kwexile o inzo yê; kwene we kwakexile mufundisa akwa Izalayele. Mwene watungu kalatódyu phala Jihova ku Lamá.

8 Kyoso Samuwele kya kuka, mwene wasolo an’ê kala afundixi mu Izalayele. 2 O mon’ê wa dyanga a mwixanene Jowele, o mon’ê wa kayadi a mwixanene Abiya, éne exile o afundixi ku Beleseba. 3 Maji o twana twê kitwexile mukayela o phangu yê. Exile akwa lwimbi ni kutambula kitadi kya mangonya, ene kexile mufundisa ni kuyuka.

4 Mukubhita thembu, o adyakime oso a Izalayele a dyongeka, ya ayi kate kwa Samuwele ku Lamá. 5 Ene a mwambela, exi: “Ngana, eye wakuka kya. O twana twé kene mukwendela mu jinjila jé. Tubhane sobha phala kutufundisa, kala kyala o ifuxi yamukwa.” 6 Maji kyoso kya mwambela kwila, “tubhane sobha phala kutufundisa,” Samuwele waluwala* kyavulu. Kyenyiki, mwene wasambe kwa Jihova. 7 Jihova wa mwambela, wixi: “Bhanga yoso yakubhingi o mundu, mukonda ene kakuditunu eye, maji a ngiditunu eme kala ngi sobha. 8 Ene a musuluka ni kubhanga o ima yene mubhanga kya tunde o kizuwa ki nga akatula ku Ijitu kate lelu. A ngibhana dikunda, a sidivila jinzambi jengi, kyene kya mubhanga n’eye. 9 Kindala bhanga ya mukubhinga ene. Maji kana kweha ku atendelesa ni kidi kyoso, mu kwa jimbulula ihi yanda kwabhinga o sobha yanda kwatumina.”

10 Kyenyiki, Samuwele watangela o izwelu yoso ya Jihova, ku mundu wa mubhingile o sobha. 11 Mwene wambe: “O sobha wanda mitumina wala ni kutena kwa ku mibhinga o ima kala yiyi: Mwene wanda bhangesa an’enu kusidivila ku makalu mê a ita ni ku jikabalu jê, amoxi anda kala mulenga ku pholo a makalu mê. 12 Mwene wanda sola amoxi kala jikabhitangu phala kutumina midi ya athu ni jikabhitangu phala kutumina makwinyi atanu a athu, amukwa anda dima ku mabhya mê, kubhongolola o idima yê ni kubhanga mawuta phala kubhânga mu ita ni jifalamenda phala o makalu mê. 13 Mwene wanda tuma o an’enu a ahatu kubhanga ngwendu* ya dizumba, kulamba ni kubhanga jimbolo. 14 Mwene wanda tambula o mabhya menu a mividi ni midiva ni ku abhana ku jiselevende jê. 15 Mwene wanda tambula mbandu ya kakwinyi ya jimbutu ni mividi yenu, wanda jibhana ku jikabhitangu ja inzo ya sobha ni ku jiselevende jê. 16 Mwene wanda mitambula o abhik’enu a mala ni a ahatu, o jingombe jenu janete ni jijumendu jenu phala kubhanga o ikalakalu yê. 17 Mwene wanda tambula mbandu ya kakwinyi ya jimbudi jenu, enu mwanda kituka mu abhik’ê. 18 Kwanda bhixila o kizuwa kimwanda dikola mukonda dya sobha i mwasolo, maji Jihova kanda mitambwijila.”

19 Maji o mundu kabhana mátwi mu izwelu ya Samuwele, ya ambe: “Kibhwalé maka! Etu twamesena mwene kukala ni sobha phala ku tutumina. 20 Kyenyiki, twanda difwangana ni ifuxi yamukwa. O sobha yetu wanda tufundisa, wanda twendesa ni kubhânga mu ita yetu.” 21 Kyazubha kwivwa yoso yazwela o mundu, Samuwele wabhitulula yoso kwa Jihova. 22 Jihova wambela Samuwele wixi: “Ivwa o mundu! Sola sobha yanda kwatumina.” Kyenyiki, Samuwele wambela o mayala akwa Izalayele: “Kala muthu a vutuke mu mbanza yê.”

9 Kwexile diyala watokalele ku mwiji wa Bejamí a mwixanene Kiji, mon’â Abiyele, mon’â Zelodi, mon’â Bekolate, mon’â Afiya. Mwene wexile mukwa Bejamí, wexile we mvwama. 2 Mwene wexile ni mon’a diyala a mwixana Sawulu, munzangala wafwamene kyavulu. Mu Izalayele yoso kimwexile diyala wa wabhele o pholo kala mwene. Mwene walebhele dingi athu oso ndenge. Mu kulebha, athu oso a musukile ngo mu isuxi.

3 Sayi kizuwa o jijumendu ja Kiji, tat’â Sawulu ja jimbidila. Kyenyiki, Kiji wambela mon’ê Sawulu: “Ngakudyondo, ndé ni mukwatekexi umoxi musota o jijumendu ja jimbidila.” 4 Ene ajisoto ku milundu ya Efalayíme ni mu ixi ya Saliza maji kajisange, abhiti we mu ixi ya Salime maji o jijumendu kajisange-ku, ajisoto mu ixi yoso ya akwa Bejamí, maji kajisange.

5 Kyoso kyabokona mu ixi ya Zufu, Sawulu wambela o mukwatekexi wexile-nê, wixi: “Kota se tuvutuka, mukonda kiki kyanda bhangesa tat’etu kuthandanganya n’etu, muveji dya kuthandanganya ni jijumendu.” 6 Maji o mukwatekexi wa mutambwijila, wixi: “Sayi diyala dya Nzambi mu mbanza yiyi, mwene a muxila kyavulu. Yoso izwela mwene i dikumbidila, tuye-ku hanji kindala, nange mwene utena kutulondekesa o njila i twatokala kuditela.” 7 Kyenyiki, Sawulu wambela o mukwatekexi wê, wixi: “Se tuya-ku, twanda kwambata ihi phala o diyala dya Nzambi? Kitwaletu ni mbolo mu mbwenga yetu, né ujitu phala o diyala dya Nzambi. Ihi itwala nayu i tutena ku mubhana?” 8 O mukwatekexi wambela Sawulu, wixi: “Ngala ni tuphalata bhu maku, ngitena kutubhana ku diyala dya Nzambi, phala mwene n’a tulondekesa o njila i twatokala kuditela.” 9 (M’ukulu, mu Izalayele, kyoso o muthu kyexile muya musota o itendelesu ya Nzambi, exile muzwela: “Twende kwa mukwa kumona o isumwa.” Mukonda m’ukulu, o jipolofeta exile mwa exana akwa kumona o isumwa.) 10 Sawulu wambela o mukwatekexi wê, wixi: “Ndunge yambote, tuye-ku hanji.” Kyenyiki ayi mu mbanza mwakexile o diyala dya Nzambi ya kidi.

11 Kyoso kyexile muya mu mbanza, a disange ni ilumba exile muya muteka menya, ya a ebhwidisa: “O mukwa kumona o isumwa yú koko?” 12 Ene atambwijila: “Kyene mwene, mwene wala kwenyoko, ndenu ni lusolo. Mwene wabhixila lelu mu mbanza, mukonda mu kizuwa kyalelu o mundu wanda bhakula jisata ku mulundu ukôla. 13 Kyoso kimwanda bokona mu mbanza, mwanda musanga ande dya mwene kubanda ku mulundu ukôla phala kudya. O mundu kiwanda dya ande dya mwene kubhixila mukonda mwéne u besowala o sata. Kyene ngo o yó a exana kyanda dya. Bandenu kindala mwene, mwanda musanga.” 14 Kyenyiki, ayi mu mbanza. O kyoso kyabokona mu mbanza, amono Samuwele wa mukwiza kwa mukwijila ene, phala kubanda ku mulundu ukôla.

15 Kizuwa ande dya Sawulu kubhixila, Jihova wazwelele kwa Samuwele, wixi: 16 “Mungu mu ola kala yiyi, nganda tumikisa diyala watokala ku mwiji wa Bejamí, watokala ku mu unda kala mutwameni wa mundu wami wa Izalayele. Mwene wanda bhulula o mundu wami bhu maku a akwa Fidíxa. Kuma ngamono o hadi yamutala o mundu wami, o kudikola kwâ, kwabhixila kate kokwami.” 17 Kyoso Samuwele kyamono Sawulu, Jihova wa mwambela, wixi: “Didi dyene o diyala di ngakutangela. Mwéne wanda tumina o mundu wami.”*

18 Kyoso Sawulu kyazukama bhwa kexile Samuwele, bhu mwelu wa mbanza, wa mwibhwidisa: “Nga kudyondo ngitangele, kwebhi kwala o inzo ya diyala mukwa kutala o isumwa?” 19 Kyenyiki, Samuwele watambwijila Sawulu, wixi: “Eme mwene ngimukwa kumona o isumwa. Ngitwamenene kate ku mulundu ukôla. Lelu mwanda dya n’eme. Mungu mu kamene, nganda kwehela ni uye ni ku kutangela yoso i wamesena kwijiya.* 20 Kana kuthandanganya ni jijumendu ja jimbidila izuwa itatu kudima, mukonda ajisange kya. O jimbote joso mu Izalayele jatokala kwa nanyi? Ki jakutokala eye ni dibhata dyoso dya tat’enu? 21 Sawulu wa mutambwijila, wixi: “Eme ngi mukwa Bejamí, o mwiji wabeta o kutola mu Izalayele. Ku miji yoso ya Bejamí, o mwiji wami kiwala ni valolo yavulu.”

22 Mukusuluka, Samuwele wambata Sawulu ni mukwatekexi wê mu kididi kyakudila, yu wa a xikamesa bhu kididi kyabetakota mwaxaxi ka yó exile mwenyomo. Mu kididi kyenyokyo mwexile makwinyi atatu a mayala. 23 Samuwele wambela o diyala wexile mulamba o kudya, wixi: “Ngibhekele o thumba ya xitu inga kutumu o kubhaka.” 24 Mukiki, o mukwa kulamba wakatula o kinama kya kibhaku ni yoso yexile-mu, yu wasidivila Sawulu. Samuwele wambe: “O kudya kuku a kubhake phala eye, dya mwene, mukonda a kubhake phala udye mu kithangana kiki. Kuma ngambe: ‘Nganda tambula ajitu.’” Kyenyiki, mu kizuwa kyenyokyo Samuwele wadi kumoxi ni Sawulu. 25 Mukusuluka, a kulumuka ku mulundu ukôla ya ayi kate mu mbanza. Samuwele anga u suluka mu kudizwelesa ni Sawulu kuthandu a inzo. 26 Mu kamene kaselu ene a balumuka. Samuwele anga wixana Sawulu wakexile kuthandu a inzo, yu wa mwambela: “Diyudike ni ngikusule.” Kyenyiki, Sawulu wadiyudika, mwene ni Samuwele anga atunda. 27 Kyoso kyexile mu kulumuka mu kutunda mu mbanza, Samuwele wambela, Sawulu: “Tangela o mukwatekexi n’a tu twamenene ku pholo.” (Kyenyiki, mwene wa atwamenena.) “Maji eye xala bhabha ni ngikutangele o kizwelu kya Nzambi.”

10 Samuwele wakwata o ngalafa ya máji, yu walundulula o máji mu mútwe wa Sawulu, wa mubhana nzobole yu wa mwambela, wixi: “Jihova wa ku undu kala mutwameni wa mundu wê. 2 Lelu kyoso kiwandaya, wanda disanga ni mala ayadi bhwa zukama o mbila ya Lakele mu mbambe ya Bejamí ku Zeliza. Ene anda kwambela: ‘O jijumendu ji mwakexile mukenga a jisange kya, maji tat’enu, wajimbi kya o maka ya a jijumendu, kindala wa thandanganya n’enu. Mwene webhwidisa: “Kwebhi kunganda sanga mon’ami?”’ 3 Mukusuluka ndé kate bhu kimuxi kyadikota kya Tabola. Kwenyoko, wanda disanga ni mala atatu a mubanda ku Betele phala kubheza o Nzambi ya kidi. Umoxi wambata hombo jitatu, o mukwa wambata mbolo jitatu, o mukwa hanji, wambata mbinda yadikota ya vinyu. 4 Ene anda kumenekena, anda kubhana mbolo jiyadi. Xikina o jimbolo janda kubhana. 5 Mukusuluka, wanda bhixila bhu kamulundu ka Nzambi yakidi, kwenyoko wanda sanga-ko kibuka kya masoladi akwa Fidíxa. Kyoso kiwanda bhixila mu mbanza, wanda sanga kibuka kya jipolofeta a mutuluka ku mulundu ukôla, a muzwela kala jipolofeta, o ku pholo dyâ sayi athu a muxika jimbéndu, jingoji, jimbánza ni jingoma. 6 O nzumbi ya Jihova, yanda kubhana kutena. Eye wanda zwela kala upolofeta kumoxi ni ene, anga u kituka u muthu wengi. 7 Kyoso kiwanda mona o ijimbwete yoso yiyi kubhita, bhanga yoso i utena, mukonda o Nzambi yakidi wala n’eye. 8 Mukusuluka, ngitwamenene ku Jidingale, nganda kusanga kwenyoko, phala kubhana jisata ja kwoha ni jisata ja paze, u ngikingila mu sambwadi dya izuwa kate kingibhixila. Anga ngikutangela i watokala o kubhanga.”

9 Kyoso Sawulu kyadilekela ni Samuwele, Nzambi wamateka kulungulula o muxima wa Sawulu. Mu kizuwa kyenyokyo, o ijimbwete yoso yadikumbidila. 10 Kyenyiki, atunda kwenyokyo, ayi ku kamulundu, o kibuka kya jipolofeta eza mudisanga-nê. Mu kithangana kyenyokyo, o nzumbi ya Nzambi ya mubhana kutena, anga wamateka kuzwela kala polofeta bhukaxi kâ. 11 Kyoso o athu oso a mwijidile kya mumono kuzwela kala polofeta, adyambela mudyâ: “Ihi yabhiti ni mon’â Kiji? O kwila Sawulu we polofeta?” 12 Kyenyiki, sayi diyala watungu kwenyoko webhwidisa: “O ya-phe, o tata yâ nanyi?” Kyene kyabhangesa kuta o sabhu, yamba: “O kwila Sawulu wala we mwaxaxi ka jipolofeta?”

13 Kyoso mwene kyazubha kuzwela kala polofeta, wabande ku mulundu ukôla. 14 Ku pholo dya kwenda o phange ya tat’â Sawulu, webhwidisa Sawulu ni mukwatekexi wê, wixi: “Mwa mutunda kwebhi?” Sawulu watambwijila: “Twayile musota o jijumendu maji kitujisange, etu twayi kwa Samuwele.” 15 O phange ya tat’â Sawulu wa ebhwidisa dingi: “Ihi yamitangela Samuwele? Ngamidyondo, ngitangelyenu.” 16 Sawulu wa mutambwijila: “Samuwele wa tutangela kwila o jijumendu a jisange kya.” Maji Sawulu kazwela kima mu yoso ya mutangela Samuwele, yalungu ni utuminu.

17 Kyenyiki, Samuwele wongeka o mundu ku pholo ya Jihova ku Mixipa. 18 Mwene wambela akwa Izalayele: “Jihova o Nzambi ya Izalayele wambe kiki: ‘Eme ngakatula Izalayele ku Ijitu, nga abhulula bhu maku a akwa Ijitu, ni bhu maku a jisobha joso exile mu mitalesa o hadi. 19 Mu kyenyiki mu kizuwa kya lelu, enu mwabhana dikunda kwa Nzambi yenu wa mibhulula ku hadi yoso ni ku ubhika, mukwamba: “Kana! etu ngwetu. Tubhane sobha phala ku tutumina.” Mukiki-phe Zukamenu ku pholo ya Jihova ku mwiji ni mwiji ni mu jimidi ni jimidi.’”

20 Kyenyiki, Samuwele wabhangesa o miji yoso ya akwa Izalayele kuzukama, anga asolo-bho o mwiji wa akwa Bejamí. 21 Mukusuluka, asolo o mwiji wa Bejamí mu mwiji ni mwiji, ya asolo-bho o mwiji wa akwa Matitide. Mukusuka-ku asolo Sawulu, mon’â Kiji, maji kyoso kyamusoto kamusange. 22 Kyenyiki, ebhwidisa Jihova: “O kwila o diyala wala kya bhabha?” Jihova watambwijila: “Kyene, wala kunyá, waswama bhukaxi ka mabunda.” 23 Kyenyiki, ayi mu mutakana ni lusolo, ya eza-nê. Kyoso mwene kyemana bhukaxi ka mundu, mwéne wabetele-kota mu kulebha, athu oso a musukile ngo bhu kisuxi. 24 Samuwele wambela o mundu woso, wixi: “Talenu o muthu a musolo kwala Jihova. Bhukaxi ka mundu séku muthu wasokela-nê.” O mundu woso wamateka kudikola, exi: “Tanaku sobha!”

25 Samuwele watangela o mundu yalungu ni maujitu a jisobha, yu wa isoneka mu divulu, anga u ditula mu balaka ya Jihova. Mukusuluka, Samuwele watumina o mundu kuvutuka mu jinzo jâ. 26 Sawulu we wayi kubhata dyê ku Ngibeya, Jihova wabhangesa o masoladi ku muxinjikila. 27 Kyenyiki, sayi mayala ayibha ambe exi: “O diyala didi dyanda tubhulula kyebhi?” Ene a muxongwena, kamubhana maujitu. Maji Sawulu wadixibha,* kazwela kima.

11 Nahaji mukwa Amone, weza mulwa ita ni akwa Jabeze ku Ngiliyade. O akwa Jabeze ambela Nahaji, exi: “Bhanga kikutu n’etu ni tukale twa bhik’enu.” 2 Nahaji mukwa Amone wambe kiki: “Nganda bhanga kikutu n’enu se muxikina kwila, kala muthu mudyenu a mutubula o dyesu dyê, dya kadilu. Nganda bhanga kiki phala kubheka jisonyi ku Izalayele yoso.” 3 O adyakime akwa Jabeze a mutambwijila, exi: “Tubhane sambwadi dya izuwa, phala tutumikise akunji mu jimbanza joso ja Izalayele, se kikumoneka muthu u tubhulula, kyene kiwa kitudibhakula kokwenu.” 4 O akunji a bhixila mu mbanza ya Ngibeya, mwatungile Sawulu, a tangela o maka ku mundu, o mundu woso wamateka kudila ni dízwi dya swina.

5 Mu ola yenyonyo, Sawulu wakexile mutunda mukwinga o ibhaku, yu wakexile kudima dya ibhaku. Mwene webhwidisa: “Ihi ya mubhita? Mukonda dyahi o mundu wa mudila?” Ene a mutangela yoso yambe o mayala akwa Jabeze. 6 Kyoso Sawulu kyevu o izwelu yiyi, o nzumbi ya Nzambi anga i mubhana o kutena, mwene ukala ni njinda yavulu. 7 Mu kyenyiki, mwene wakwata ku jingombe jiyadi, wajibatula mu jithumba, jithumba yu wajitumikisa ku jimbanza jojo ja akwa Izalayele bhukaxi ka akunji. O akunji atokalele kuzwela: “Kiki kyene kyanda bhita ni jingombe ja yó, a dituna kukayela Sawulu ni Samuwele!” Mukiki, Jihova u bhangesa o mundu kukala ni wôma, enyoso anga a tunda phala kubhânga.* 8 Sawulu wakondala o mundu ku Bezeke. O atokala ku mwiji wa akwa Izalayele atenesa hama jitatu ja midi, o atokala ku mwiji wa akwa Judá atenesa makwinyi atatu a midi. 9 Mukusuluka, ene ambela o akunji ejile, exi: “Tangelenu o mala akwa Jabeze ku Ngiliyade kwila, mungu kyoso o mwanya kiwanda twa, enu mwanda bhuluka.” O akunji ayi, ya atangela o maka yá ku mayala akwa Jabeze, ene asanguluka kyavulu. 10 O mala akwa Jabeze atangela akwa Amone, exi: “Mungu twanda dibhakula kokwenu, anga mutubhanga yoso i mwamesena.”

11 Mu kizuwa kyakayela, Sawulu wa wanuna o mayala mu ibuka itatu, mu makolombolo* ene ayi kate bhwa kexile akwa Amone, ya a suluka ni kwa ajibha kate o mwanya kiwatu. O a subhuka-bhu anga a mwangana, kana-bhu dingi kiyadi kyatena kwendela kumoxi. 12 O mundu watangela Samuwele, wixi: “Nanyi wambe: ‘O kwila Sawulu mwéne wanda tu tumina?’ Tubhekelenu o mayala ambe kiki phala kwa ajibha.” 13 Maji Sawulu wambe, wixi: “Kimwatokala kujibha muthu mu kizuwa kyalelu, mukonda Jihova lelu wabhulula o mundu wa Izalayele.”

14 Mukusuluka, Samuwele wambela o mundu, wixi: “Ndokwenu ku Jidingale, phala kulondekesa dingi kwila Sawulu mwéne o Sobha. 15 Kyenyiki, o mundu woso wayi kate ku Jidingale, Sawulu anga a mubhanga sobha ku pholo ya Jihova. Mukusuluka, ene a bhakula jisata ja paze kwa Jihova, bhenyobho Sawulu ni Izalayele yoso asanguluka kyavulu.

12 Samuwele anga wambela akwa Izalayele: “Ngabhange* yoso i mwa ngibhingi, ngamibhana sobha. 2 Yú mwéne o sobha wanda mitumina.* Eme-phe nga kuka kya, ngala kya ni jimvi, o twana twami ala bhwamoxi ni enu. Ngamyendesa tunde mu u nzangala wami kate mu kizuwa kyalelu. 3 Emyú, se ngamibhange kima, zwelenu kindala ku pholo ya Jihova ni ku pholo ya sobha wamusolo.* Nanyi ngamunyana o ngombe yê mba jumendu? Nanyi nga mutambula kima mu mangonya mba nga muzukutisa? O kwila ngaxikina ku ngibhomba ni kima phala kingibatule o milonga ni kuyuka? Se kyene kingabhange, nganda mivutwila yoso.” 4 Ene atambwijila: “Kana, ngana. Eye kutambula kima mu mangonya, kutuzukutisa. Kiwaxikina we kutambula kima ku muthu woso-woso.” 5 Kyenyiki, mwene wa atangela, wixi: “Mu kizuwa kyalelu, Jihova mbangi. Lelu o sobha yé wamusolo mbangi we ya kwila, enu kimutena kungitatela kima.”* Kyenyiki, ene ambe: “Kyene, mwene mbangi.”

6 Kyenyiki, Samuwele wambela o mundu, wixi: “Jihova, o Nzambi yakatula o jikuku jenu mu ixi ya Ijitu bhukaxi ka Mozé ni Alá, mwene mbangi. 7 Kindala kalenu mwene bhu mwala, eme nganda mifundisa ku pholo ya Jihova ni ku milembalesa o ima yoso yambote yabhange Jihova phala o mbote yenu ni ya jikuku jenu.

8 Kyoso Jakobo kyayi ku Ijitu o jikuku anga jenu jidikola kwa Jihova mu kubhinga kikwatekesu, Jihova watumikisa Mozé ni Alá phala kukatula o jikuku jenu ku Ijitu ni ku abhangesa kutunga mu kididi kiki. 9 Maji ene a jimbi Jihova Nzambi yâ. Nzambi anga wa a bhakula* bhu maku a Xixela, o mutwameni wa kifuxi kya masoladi akwa Hazole ni bhu maku akwa Fidíxa ni bhu maku akwa Mowabe, yó ejile mubhânga nawu. 10 Ene anga adikola kwa Jihova mu kubhinga kikwatekesu, exi: ‘Twate kituxi, kuma twabhana dikunda kwa Jihova phala kubheza Bahale ni iteka ya Axitolote. Kyenyiki, tubhulule bhu maku a jinguma jetu phala tu kusidivile.’ 11 Mukiki, Jihova watumikisa Jelubahale, Bedani, Jefete ni Samuwele yu wa mibhulula bhu maku a jinguma jenu, phala mutunge ni kutululuka. 12 Kyoso Nahaji o sobha ya akwa Amone kyeza phala kubhânga ni enu, enu mwa jiji mu ku ngizwela, ‘twamesena mwene kukala ni sobha u tutumina,’ sumbala Jihova Nzambi yenu, mwene o Sobha yenu. 13 Kindala o sobha i mwasolo, i mwabhingi yu bhabha. Talenu! Jihova wa mibhana sobha. 14 Se mukala ni wôma wa Jihova ni ku musidivila, se mubelesela o kizwelu kyê anga mukamba kubhukumukina o kitumu kya Jihova, se enu ni sobha ya mu mitumina mukayela Jihova Nzambi yenu, mwa mubhanga kyambote. 15 Maji se mukamba kubhana mátwi ku dízwi dya Jihova anga mu bhukumukina o kitumu kya Jihova, Jihova wanda mi kaxtikala enu ni jitata jenu. 16 kindala imanenu mu ididi yenu ni mutale o madiwanu anda bhanga Jihova ku pholo yenu. 17 Etu twala mu kithangana kya kubhongolola o tiliku. Kikyene? Maji nganda dyondela Jihova, phala n’a tumikise jinzaji ni mvula. Kyenyiki, mwanda kwijiya ni kumona kwila o kima kimwabhange kya kubhinga sobha, kyayibha kinene bhu mesu a Jihova.”

18 Mukusuluka, Samuwele wasambe kwa Jihova, Jihova anga u tumikisa jinzaji ni mvula mu kizuwa kyenyokyo. O mundu anga ukala ni wôma wavulu wa Jihova ni wa Samuwele. 19 O mundu woso anga wambela Samuwele, wixi: “Tusambele kwa Jihova, Nzambi yé, mukonda kitwamesena kufwa. Kuma ku ituxi yetu twabandekesaku o kituxi kiki kya kubhinga sobha.”

20 Samuwele wambela o mundu, wixi: “kimukale ni wôma. Mukidi enu mwate mwene kituxi kyadikota, maji kindala, kanenu kweha kubheza Jihova. Sidivilenu Jihova ni muxima woso. 21 Kanenu ku mubhana dikunda phala kukayela ima yamakutu, ima kiyala ni valolo, ki itena kubhulula, mukonda ima ya kingoho. 22 Jihova kanda bhana dikunda ku mundu wê mukonda dya dijina dyê dyonene, kuma Jihova wamisolo phala mukale mu mundu wê. 23 Maji mudyami kyeji kala kituxi kwa Jihova se ngikamba ku misambela. Nganda suluka ni kumyendesa mu njila yatokala. 24 Ngimibhinga kwila muxila Jihova, mu musidivila ni ufiyele woso,* ni muxima wenu woso. Lembalalenu o ima yoso yambote yamibhange mwene. 25 Maji se mujiza mu kubhanga o ima yayibha anda mi bwika, kikale enu ni sobha yenu.”

13 Kyoso Sawulu kyakituka sobha mwene wexile ni . . .* ya mivu, mwene watumina o ixi ya Izalayele mu mivu iyadi. 2 Sawulu wasolo midi jitatu ja mayala akwa Izalayele. Midi jiyadi jaxala ni Sawulu ku Mikimaji ku milundu ya Betele, o midi yamukwa yaxala ni Jonatá ku Ngibeya ya Bejamí. O mayala asubhuka, mwene wa atumu kala muthu kuvutuka ku balaka yê. 3 Kyenyiki, Jonatá watolola o kibuka kya masoladi kya akwa Fidíxa exile ku Jeba, o akwa Fidíxa eza mukwijiya o kima kyabhiti. Mukusuluka, Sawulu watumu kuxika koloneta mu ixi yoso ya Izalayele, mukwamba: “Ivwenu, enu mu akwa Jihebelewu.” 4 O akwa Izalayele evu o ngolokela ya kwila, “Sawulu watolola o kibuka kya masoladi kya akwa Fidíxa, kindala o akwa Fidíxa ala ni njinda yavulu ya akwa Izalayele.” Kyenyiki, exana o mundu phala kukayela Sawulu ku Jidingale.

5 Akwa Fidíxa adibhongolola we phala kubhânga ni akwa Izalayele, ni makwinyi atatu a jimidi ja makalu a ita, midi jisamanu ja jikabalu, ni masoladi avulu edile kala o museke bhu mbandu a musanza wa kalunga. Ene abande ya emena ku Mikimaji ku Bete-Avane ku mbandu kutundila o dikumbi. 6 Kyoso o mayala akwa Izalayele kyamono kwila atate, ala mu kilwezu, amateka kudisweka ku mabanda, mu mixitu, mu matadi, mu imbaka ya matala ni mu makungu. 7 Sayi akwa Jihebelewu, azawuka o ngiji ya Njolodá phala kuya mu ixi ya Ngade ni Ngiliyade. Maji-phe, Sawulu waxala ku Jidingale, o athu oso exile mu mukayela exile mu teketa ni wôma. 8 Sawulu wakingila sambwadi dya izuwa, kifwa o kithangana kyaxindi Samuwele, maji Samuwele kamoneka ku Jidingale. O athu exile ni Sawulu amateka kudimwanga. 9 Mukusuka-ku Sawulu wambe, wixi: “Ngibhekelyenu o ibhaku phala kubhakula o sata ya kwoha ni jisata ja paze.” Kyenyiki, mwene wabhakula o sata ya kwoha.

10 Kyoso Sawulu kyazubha kubhakula o sata ya kwoha, Samuwele wabhixila. Kyenyiki, Sawulu wayi mudisanga-nê yu wa mu menekena. 11 Samuwele anga wibhwidisa Sawulu, wixi: “Ihi iwabhange?” Sawulu wa mutambwijila, wixi: “Ngamono kwila o mundu wexile mu ngibwazeka,* eye ngana kubhixila mukithangana kiwaxindi, o akwa Fidíxa exile mu dibhongolola ku Mikimaji. 12 Mukonda dya kiki, ngadyambela mudyami, ngixi: Kindala o akwa Fidíxa a mukwiza mubhânga n’eme ku Jidingale. Eme kingisoto o kikwatekesu kya Jihova. Kyenyiki, ngadivu kwila ngatokalele kubhakula sata ya kwoha.”

13 Samuwele wambela Sawulu, wixi: “O kima kiwabhange kyayibha.* Ki wabelesela o kitumu kya kubhana Jihova Nzambi yé. Se wa kibelesele, Jihova weji bhangesa o utuminu wé kunangenena mu Izalayele kate ku hádya ni hádya. 14 Maji kindala-phe, o utuminu wé kiwanda nangenena. Jihova wanda sanga diyala dyengi disangulukisa o muxima wê, Jihova wanda musola phala kukala mutwameni wa mundu wê, mukonda eye kubelesela o kitumu kya kubhana Jihova.”

15 Kyenyiki, Samuwele watundu ku Jidingale yu wayi ku Ngibeya ya Bejamí. Sawulu wakondala o mayala exile-nê, enyoso atenesa hama jisamanu ja mayala. 16 Sawulu ni mon’ê Jonatá ni mayala amukwa exile-nê, axala ku Ngibeya ya Bejamí. O akwa Fidíxa exile ku Mikimaji. 17 O masoladi akwa Fidíxa atundu mu jibalaka jâ mu ibuka itatu. Kibuka kimoxi kyaditela mu kikoka kya Ofila kate mu ixi ya Suwale. 18 O kibuka kya kayadi kyaditela mu kikoka kya Betolone. O kibuka kya katatu kyaditela mu kikoka kyayi kate mu mbambe yexile mu honga ya Nzeboyime, ku mbandu yazukama ni kikangalakata.

19 Mu Izalayele kimwexile dingi muthu wexile mukalakala ni fwelu. Mukonda akwa Fidíxa ambele, exi: “Kitwehele akwa Jihebelewu kubhanga jixibhata ni sosa.” 20 Mukonda dya kiki, o akwa Izalayele exile muya ku akwa Fidíxa phala kuzwikisa, o jimvu jâ, ni makuwa ni matemu mâ ni ibholola yâ. 21 Phala o akwa Izalayele kuzwikisa o jimvu jâ, o ibholola yâ ni matemu mâ, exile mufuta Pim imoxi.* 22 Kyenyiki, mu kizuwa kya kubhânga, o mayala exile ni Sawulu ni Jonatá kexile ni xibhata mba jisosa, Sawulu ngo ni mon’ê Jonatá exile ni mawuta.

23 O kibuka kyamukwa kya masoladi kya akwa Fidíxa, ayi kate mu honga ya Mikimaji.

14 Sayi kizuwa, Jonatá mon’â Sawulu wambela o mukwatekexi wexile mu kwambata o mawuta mê, wixi: “Tuye ku mbandu yamukwa bhwala o masoladi akwa Fidíxa.” Maji mwene kazwela kima kwa tat’ê. 2 Sawulu wakexile mwene bhwa zukama ni mbanza ya Ngibeya, bhoxi dya kilembeketa kya muxi wa lomá wexile ku Mingolone. Mwene wakexile ni hama jisamanu ja mayala. 3 (Ahiya mon’â Ahitube wexile phange ya Ikabode, mon’â Fineya, mon’â Elí o mukunji wa Jihova ku Silo, mwéne wakexile mukwambata o Efode.) O mayala kejidile kwila Jonatá watundile. 4 Mu njila mwexile mubhita Jonatá phala kubhixila kate bhwexile o masoladi akwa Fidíxa, ku mbandu jiyadi ja njila bhwexile ndanji yedile kala mazu. Ndanji imoxi a ixanene Bozeze, o yamukwa Sene. 5 Ndanji imoxi yexile ku mbandu ya thunda bhwa zukama ni Mikimaji, ndanji yamukwa yexile ku mbandu ya lwiji, ya zukama ni Jeba.

6 Jonatá wambela o mukwatekexi wê, wixi: “Ndoko tuye kwala yó akambe ku asaya, nange Jihova u tukwatekesa. Mukonda séku kima kitena kufidisa Jihova kubhulula, kikale ni athu avulu mba ni athu ofele.” 7 O mukwatekexi wê wa mwambela, wixi: “Bhanga kala kya kuwabhela! Ndé bhwoso bhu wamesena. Bhwoso bhu wandaya, eme nganda kukayela.” 8 Kyenyiki, Jonatá wambe: “Twende kate bhwala o mayala enyo, phala ene atumone. 9 Se ene atwambela, exi: ‘Imanenu bhenyobho, étu twiza.’ Etu twanda kwimana bhu kididi kyetu, kitwandaya bhwala ene. 10 Maji se ene amba, exi: ‘Zenu ni mubhânge ni etu.’ Etu twandaya mubhânga nawu. Mukonda Jihova wanda kwabhakula bhu maku metu, kiki kyene kyanda kala o kijimbwete kyetu.”

11 Kyenyiki, kiyadi kyá ehela o akwa Fidíxa kwamona. O akwa Fidíxa ambe exi: “Talenu! O Jihebelewu ja mutunda mu makungu mwa diswekele.” 12 O masoladi akwa Fidíxa ambela Jonatá ni mukwatekexi wê, exi: “Zenu mwene kate bhabha ni tumilonge disá dyambote.” Jonatá watangela o mukwatekexi wê, wixi: “Ndoko twende, mukonda Jihova wanda kwabhakula bhu maku a Izalayele.” 13 Jonatá anga ubanda ni kwavula, o mukwatekexi wê uya ni ku mukayela. Jonatá wamateka kubhânga ni akwa Fidíxa, o mukwatekexi wê anga uya ni kujibha yó ka ajibha hanji kwa Jonatá. 14 Mu ita ya dyanga, Jonatá ni mukwatekexi wê ajibha makwinyi ayadi a mayala, mu kadikanga* ka kwila mavu a idima ku junda ya jingombe asuka ngo mukaxi.

15 Kyenyiki, o masoladi oso exile mu jibalaka ja akwa Fidíxa wôma wa akwata. Kate mwene ni masoladi exile ku pholo ya ita exile ni wôma wavulu, o ixi yamateka o kutunguta. Nzambi wabhangesa akwa Fidíxa kuteketa ni wôma. 16 O alangidi a Sawulu exile ku Ngibeya ya Bejamí, amono kwila, kwexile kavwanza kavulu bhu kididi bhwexile akwa Fidíxa.

17 Sawulu wambela o athu akexile-nê, wixi: “Sotenu kumona se nanyi wakambeku mudyetu.” Kyoso kyakondala o athu, amono kwila, Jonatá ni mukwatekexi wê kexile-bhu. 18 Kyenyiki, Sawulu wambela Ahiya, wixi: “Bheka bhabha o Álaka ya Nzambi yakidi.” (Kuma mu izuwa yenyoyo, o Álaka ya Nzambi yakidi yexile ni akwa Izalayele.) 19 Kyoso Sawulu kyexile muzwela hanji ni mukunji, o kavwanza kadibandekesa mu jibalaka ja akwa Fidíxa. Sawulu anga wambela o mukunji, wixi: “Ki kubhingi kubhanga dingi o kima kiki.”* 20 Kyenyiki, Sawulu ni athu exile-nê kumoxi, adyongeka ya ayi phala kubhânga. Kyoso kyabhixila-ku, amono kwila akwa Fidíxa exile mubhânga mudyâ. Kwexile kavwanza kavulu mu kididi kyenyokyo. 21 O akwa Jihebelewu adibundile kumoxi ni akwa Fidíxa m’ukulu, exile kumoxi mu usoladi, avutuka dingi mu kudibunda ni akwa Izalayele exile ni Sawulu ni Jonatá. 22 Kyoso o mayala akwa Izalayele adiswekele ku milundu ya Efalayime kyeza mukwijiya kwila o akwa Fidíxa alenge, ene wa abokona mu ita ya ayi ni kukaya akwa Fidíxa. 23 Kyenyiki, Jihova wabhulula o akwa Izalayele mu kizuwa kyenyokyo. Ene ayi ni kulwa o ita kate ku Bete-Avene.

24 Maji mu kizuwa kyenyokyo, o mayala akwa Izalayele atohokele kyavulu mukonda Sawulu walokele mukwamba: “Lamba dya yó udya kama koso-koso* ande dya kubhixila o usuku mba ande dya eme kutolola o jinguma jami.” Mukonda dya kiki séku muthu wadi kima.

25 Mukusuluka, enyoso ayi ku muxitu, ya asange wemba bhoxi. 26 Kyoso kyabokona mu muxitu ya amono o wemba,* séku muthu wa udi. Mukonda exile ni wôma wa kuloka kwa Sawulu. 27 Maji Jonatá kevwile o kuloka kwa tat’ê. Mwene wasununa o mbangala yexile nayu bhu maku yu wa ite mu wemba. Kyazubha o kudya, mwene anga ukala dingi ni nguzu.* 28 Kyenyiki, sayi diyala wamwambela, wixi: “Tat’é waloko mukwamba: ‘Lamba dya yó udya kima lelu.’ Kiki kyene kyabhangesa o mundu kubhwila kyavulu.” 29 Kyenyiki, Jonatá wambe: “Tat’etu wabhange kima kyayibha* ku mundu wetu. Talenu! Mu kudya bhofele ku wemba yú, nguzu yami yavutuka.* 30 Kyeji beta-kota se athu lelu adile ku ima itwatambula ku jinguma jetu, tweji jibha dingi masoladi avulu akwa Fidíxa.”

31 Mu kizuwa kyenyokyo, ene ayi ni kujibha akwa Fidíxa tunde ku Mikimaji kate ku Ajalone. O mayala anga atohoka. 32 Kyenyiki, mu kumona o ima ya jinguma jâ o lwimbi lwa akwata, ya akwata o jimbudi ni ngombe ni tungombe atujibha anga adya o xitu ni manyinga. 33 Kyenyiki, Sawulu a mutangela, exi: “O mundu wamuta kituxi kwa Jihova mu kudya o xitu ni manyinga mê.” Kyenyiki, Sawulu wambe: “Enu mwate kituxi kyadikota, bhangenu lusolo. Ngibhekelyenu ditadi dyadikota bhabha.” 34 Sawulu wambe: “Tangelenu o mundu woso kwila, ‘kala muthu abheke o ngombe yê, ni mbudi yê phala ku ijibha bhabha ni mu idye. Ki mute kituxi kwa Jihova, mu kudya o xitu ni manyinga.’” Mukonda dya kiki usuku wenyo, kala muthu weza ni ngombe yê anga a ijibhila mwenyomo. 35 Sawulu anga utunga kalatódyu phala Jihova. Kaka kene o kalatódyu kadyanga kutunga mwene phala Jihova.

36 Ku pholo dya kwenda Sawulu, wambe: “Ndoko, tukaye akwa Fidíxa tunde mu usuku kate mu kamene ni tu atambule o imbamba yâ. Kitwehele muthu ni mwenyu. ” Ene amwambela: “Bhanga kala kya kuwabhela ku mesu mé.” O mukunji wambe: “Tusotyenu kwijiya o kizwelu kya Nzambi yakidi mu kididi kiki.” 37 Sawulu anga usota o kizwelu kya Nzambi mukwamba: “O kwila ngatokala kuya mubhânga ni akwa Fidíxa? O kwila wanda kwabhakula bhu maku akwa Izalayele?” Maji mu kizuwa kyenyokyo Nzambi ka mutambwijila. 38 Kyenyiki, Sawulu wexana o jikabhitangu ja mundu, yu wambe: “Zukamenu enu enyoso, ni musote kwijiya se kituxi kyahi kitwate mu kizuwa kyalelu. 39 Mu dijina dya Jihova o Nzambi ya mwenyu wabhulula Izalayele, ngi mitangela o kidi kwila, né mwene se mon’ami Jonatá wate o kituxi, wanda fwa mwene.” Maji se-ku muthu wa mutangela kima. 40 Mukusuluka, Sawulu wambela o Izalayele: “Enu mukala ku mbandu yiyi, eme ni mon’ami Jonatá twanda kala ku mbandu yamukwa.” O mayala a mutambwijila: “Bhanga kala kya kuwabhela.”

41 Sawulu anga wambela Jihova, wixi: “Eye u Nzambi ya Izalayele, tutambwijile bhukaxi ka Tumini.” Anga asola-bhu Jonatá ni Sawulu, o kifuxi kya masoladi kana. 42 Kyenyiki, Sawulu wambe: “Tenu jisolote bhukaxi ketu, ni tumone se bhukaxi kami ni mon’ami Jonatá, nanyi anda musola.” Kyenyiki, asolo-bhu Jonatá. 43 Sawulu wambela Jonatá, wixi: “Ngitangele, ihi iwabhange?” Jonatá wa mutambwijila: “Ngalola ngo tu wemba* ni mbangala yami, eme bhabha, ngi jibhyenu!”

44 Sawulu wambela Jonatá, wixi: “Nzambi a ngikaxtikale, akibhange kinene, se lelu eye ukamba kufwa.” 45 Maji o mundu wambela Sawulu, wixi: “O kwila Jonatá o muthu wabheka o kikôwe kiki ku Izalayele watokala kufwa? Kana ngana! Mu dijina dya Jihova o Nzambi ya mwenyu, kikwanda bwa boxi né ngo lundemba ku mutwe wê . Mukonda mu kizuwa kyalelu, mwene wabhânge ni kikwatekesu kya Nzambi.” Kyenyiki, o mundu wabhulula Jonatá, mwene kamujibha dingi.

46 Kyenyiki, Sawulu kasuluka ni kukayela akwa Fidíxa, o akwa Fidíxa anga avutuka ku ixi yâ.

47 Sawulu wakolesa o ungana wê mu Izalayele. Mwene wabhânge ni jinguma joso ja mu kondolokele, kikale akwa Mowabe, akwa Amone, akwa Idomo ni jisobha ja Zoba ni akwa Fidíxa. Jinguma joso jexile mubhânga-nê, mwene wexile mu jitolola. 48 Mwene wabhânge ni kuswina kwoso, yu watolola akwa Amaleke ni kubhulula akwa Izalayele bhu maku a yó exile munyana o ima yâ.

49 O ana a mala a Sawulu exile Jonatá, Ixivi, Malekizuwa. Mwene wexile we ni ana ayadi a ahatu. O dikota dijina dyê Melabe, o ndenge dijina dyê Mikala. 50 O muhatu wa Sawulu dijina dyê Ahinowa, mon’â Ahimaze. O mutwameni wa kifuxi kya masoladi mê, dijina dye Abinele mon’â Nele, sekul’wa Sawulu. 51 Kiji wexile o tata ya Sawulu, o Nele tat’â Abinele wexile mon’â Abiyele.

52 Mu izuwa yoso ya mwenyu wa Sawulu, akwa Izalayele abhange ita yavulu ni akwa Fidíxa. Kyoso Sawulu kyexile mumona diyala dya nguzu, waswina, mwene wexile mu mukwata ni kumuta mu kifuxi kyê kya masoladi.

15 Samuwele wambela Sawulu, wixi: “Jihova wa ngitumikisa bhabha phala ku kusola kala sobha ya mundu wê, Izalayele. Kindala ivwa yazwela Jihova. 2 Jihova dya ifuxi wambe kiki: ‘Nganda fundisa o akwa Amaleke mu kima kyabhange ku akwa Izalayele, kyoso ene kyazukutisa akwa Izalayele mu njila mu kutunda ku Ijitu. 3 Ndé kindala, tolola o akwa Amaleke ni kubwikisa yoso yala nayu. Kana kwa kwatela henda, jibha o mayala ni ahatu, ana jindenge ni tubwetele, jimbudi ni jingombe, jikamelu ni jijumendu.’” 4 Sawulu wexana o kifuxi kyoso kya masoladi* anga u akondala ku Telayime. Kwexile hama jiyadi ja jimidi ja masoladi,* ni dikwinyi dya midi a mayala akwa Judá.

5 Sawulu wayi kate mu mbanza ya akwa Amaleke, yu wa abatamena mu honga. 6 Sawulu wambela akwa Kene, wixi: “Tundenu mwaxaxi ka akwa Amaleke phala eme kingimijibhe kumoxi ni ene. Kuma enu mwakwatela henda ku akwa Izalayele kyoso ene kyatundu ku Ijitu.” Kyenyiki, akwa Kene atundu mwaxaxi ka akwa Amaleke. 7 Mukusuluka, Sawulu ujibha akwa Amaleke, tunde ku Havila kate ku Sule, bhwa zukamene ni Ijitu. 8 Mwene wajibha o mundu woso ni xibhata, maji o sobha ya akwa Amaleke Akake, wa mubheka ni mwenyu. 9 Kyenyiki, Sawulu ni mundu wê, kajibha* Akake ni jimbudi ni jingombe janete ni ima yoso yambote, kamesenene ku ibwika. Maji o ima ka imesenene ni yakambele valolo, a ibwika.

10 Jihova wambela Samuwele, wixi: 11 “Ngadyela* mukusola Sawulu kala sobha, kuma mwene weha ku ngikayela, ka mu kumbidila dingi o izwelu yami.” Samuwele waluwalele kyavulu anga usamba kwa Jihova usuku woso. 12 Kyoso Samuwele kyabalumuka mu kamene phala kudisanga ni Sawulu, a mutangela, exi: “Sawulu wayi ku Kalumelu yu watungu-ku philadi phala kudifumanesa. Mukusuluka, Sawulu wavutuka ku Jidingale.” 13 Kyoso Samuwele kyadisange ni Sawulu, Sawulu wa mwambela, wixi: “Jihova akubesowale. Eme ngakumbidila ya ngitumu Jihova.” 14 Kyenyiki, Samuwele wambe, wixi: “Mukonda dyahi-phe nga mukwivwa o jibuya ja jingombe ni jimbudi?” 15 Sawulu watambwijila, wixi: “O jimbudi ni jingombe jiji, twa jikatula ku akwa Amaleke. Mukonda o mundu kajibha o ibhaku yadisanze phala ku isatela kwa Jihova, Nzambi yé. Maji o yasubhuka-ku, twa ibwika yene yoso.” 16 Mukusuluka, Samuwele wambela Sawulu, wixi: “Kwabhu kya! Nganda zwela ya ngitangela Jihova mu usuku wabhiti.” Sawulu anga u muvutwila, wixi: “Zwelé!”

17 Samuwele wa mwambela, wixi: “Eye kiwadivwile kwila watolele, kyoso kya kusolo phala kukala u mutwameni wa miji ya Izalayele, ni kyoso Jihova kya ku undu kala u sobha ya Izalayele? 18 Ku pholo dya kwenda Jihova wa kutumikisa yu wa kutendelesa, wixi: ‘Ndé, wa kabwike akwa Amaleke, akwa ituxi. Bhânga nawu kate kiwanda tolola enyoso.’ 19 Kyenyiki, mukonda dyahi wakambe kubelesela o kizwelu kya Jihova? Muveji dya kubelesela, eye wakwatela lwimbi lwa ima ya akwa Amaleke, eye wabhange o kima kyayibhila Jihova.”

20 Sawulu wambela Samuwele, wixi: “Maji eme nga belesela o kizwelu kya Jihova. Ngabhange yangitumu Jihova, ngabheka Akake sobha ya akwa Amaleke, eme ngabwikisa o mundu woso wa akwa Amaleke. 21 Maji o mayala akatula o jimbudi ni jingombe ja akwa Amaleke, o ima yambote yatokalele ku ibwika, ya eza nayu phala ku isatela kwa Jihova Nzambi yé, ku Jidingale.”

22 Samuwele wamwambela, wixi: “O kwila Jihova usanguluka dingi ni jisata ja kwoha, o kubelesela o kizwelu kya Jihova ndenge? Ijiya kuma, o kubelesela kota, o kubhana jisata ndenge. O kubhana mátwi kota, o banya ya mbudi ndenge. 23 Mukonda o kubhukumuka kwasokwe ngo ni kituxi kya kuzambula. O ukumbu* wasokwe ngo ni kubhanga o wanga ni kubheza o iteka.* Kuma eye waditunu o kizwelu kya Jihova, mwene kakuxikina dingi kala sobha.”

24 Mukusuluka, Sawulu wambela Samuwele, wixi: “Ngate kituxi, ngaxibhaka o kitumu kya Jihova ni itendelesu iwangibhana eye ngana, mukonda ngexile ni wôma wa mundu, éme ngabhange o kima kya ngibhingi ene. 25 Nga kudyondo, loloka o kituxi kyami, vutuka n’eme phala ngitene kubheza Jihova.” 26 Kyenyiki, Samuwele wambela Sawulu, wixi: “Kinganda vutuka n’eye, mukonda eye waditunu o kizwelu kya Jihova, Jihova wakuditunu kala u sobha ya Izalayele.” 27 Kyoso Samuwele kya mubhana o dikunda phala kuvutuka, Sawulu wa mukwata ku divunga dyê, o divunga anga ditanduka. 28 Samuwele anga wambela Sawulu, wixi: “Lelu Jihova wakutambula o ungana wa kutumina Izalayele, mwene wanda ku ubhana ku muthu wengi wabeta-kota, eye ndenge. 29 Ku mbandu ya mukwa, o Muteni wa Yoso wa Izalayele, wanda kumbidila o izwelu yê. Kanda lungulula o izwelu yê kana, kuma mwene kadifwangana ni muthu, ulungulula o ixinganeku yê.”

30 Kyenyiki, Sawulu wambela Samuwele, wixi: “Ngate kituxi. Maji ngakudyondo, ngijingise ku pholo ya adyakime ni ya Izalayele. Vutuka n’eme, eme nganda bheza Jihova o Nzambi yé.” 31 Kyenyiki, Samuwele wavutuka ni Sawulu, Sawulu anga ubheza Jihova. 32 Samuwele wambe, wixi: “Ngibhekelenu Akake o sobha ya akwa Amaleke.” Kyenyiki, Akake wayi ni wôma wavulu,* kuma wazwelele kya: ‘Ni kidi kyoso kanda ngijibha dingi.’ 33 Samuwele wambe, wixi: “Kuma o xibhata yé yabhangesa ahatu avulu kuxala sé twana, o mam’enu wanda xala we sé twana.” Mukusuluka, Samuwele wasasujula Akake ku pholo ya Jihova ku Jidingale.

34 Kyenyiki, Samuwele wayi ku Lamá, Sawulu wayi ku dibhata dyê mu Ngibeya ya Sawulu. 35 Kate ku ufwilu wê, Samuwele kadimono dingi ni Sawulu, kuma Samuwele waluwalele kyavulu mukonda dya Sawulu. Jihova wadyela mukusola Sawulu kala sobha ya Izalayele.

16 Mukusuluka, Jihova wambela Samuwele, wixi: “Mukonda dyahi eye waluwala hanji mukonda dya Sawulu, se kingamuxikina dingi kala sobha ya Izalayele? Izalesa lungela ni máji ni wende. Nganda kutumikisa kwa Jesé mukwa Beleme, mukonda ku twana twê, ngasolo-bhu umoxi phala kukala sobha.” 2 Kyenyiki, Samuwele wambe: “Kyebhi kingandaya-ku? Kyoso Sawulu kyanda kwijiya o maka yá, wanda ngijibha.” Jihova wa mutambwijila, wixi: “Ambata ngombe uzwela: ‘Ngeza phala kubhakula sata kwa Jihova.’ 3 Ixana Jesé ku sata, eme nganda kutangela yoso iwatokala o kubhanga. Watokala ku unda* yó unganda kulondekesa-nê.”

4 Samuwele anga ubhanga kala kya mutumu Jihova. Kyoso kyabhixila mu mbanza ya Beleme, o adyakime a mbanza ayi mudisanga-nê. Ene exile muteketa ni wôma, anga a mwibhula: “O kiweza kiki, o kwila kwala maka?” 5 Samuwele watambwijila: “Kané, sé-ku maka. Ngeza phala kubhakula sata kwa Jihova. Dizelesyenu* ni mwize kumoxi n’eme phala kubhakula o sata.” Mukiki, Samuwele wazelesa Jesé ni an’ê, mukusuluka wa exana phala o sata. 6 Kyoso kyabokona, Samuwele wamono Eliyabe yu wambe, wixi: ‘Sé phata yú mwéne o muthu amusolo kwa Jihova.’ 7 Maji Jihova wambela Samuwele, wixi: “Kana kutala o pholo yê mba o kulebha kwê, mukonda kingamuxikina. Kuma Nzambi kene mumona kala kimona o muthu. O muthu utala o pholo, maji Jihova utala o muxima.” 8 Mukusuluka, Jesé wexana Abinadabe, yu wa mubhangesa kubhita ku pholo ya Samuwele, maji Samuwele wambe: “Yú we kimwene amusolo kwa Jihova.” 9 Mukusuluka, Jesé wexana Xama, maji mwene wambe: “Yú we kimwene amusolo kwa Jihova.” 10 Kyenyiki, Jesé wabhangesa sambwadi dya an’ê kubhita ku pholo ya Samuwele, maji Samuwele wambela Jesé, wixi: “Ku ana ya, Jihova kasolo-bhu muthu.”

11 Kyenyiki, Samuwele webhwidisa Jesé, wixi: “Eye wala ngo ni ana ya? Mwene wa mutambwijila, wixi: “Kwakambe hanji o kasule, mwene wa mukwinga o jimbudi.” Samuwele-phe wambela Jesé, wixi: “Tuma ku mutakana, mukonda se mwene kabhixila bhabha kitwanda xikama phala kudya.” 12 Kyenyiki, watumu kumutakana. Mwene wakusulukile, wexile ni mesu afwama, wa wabhele o pholo. Jihova wambe: “Balumuka, mwenyú, watokala ku mu unda.” 13 Mukusuluka, Samuwele wakwata o lungela lwa máji, yu wa undu Davidi ku pholo ya jiphange jê. Tunde mu kizuwa kyenyokyo, o nzumbi ya Jihova yamateka kubhana kutena kwa Davidi. Ku pholo dya kwenda Samuwele wavutuka ku Lamá.

14 Kyenyiki, Jihova kexile mubhana dingi o kutena kwê kwa Sawulu, Jihova anga u mubhangesa kukala ni ixinganeku yayibha, yexile mu mu thandanganyesa. 15 O jiselevende ja Sawulu amwambela, exi: “Nzambi wa kubhekesa ixinganeku yayibha, ya mu kuthandanganyesa. 16 Ngakudyondo ngana! Tuma o jiselevende jê jala bhabha phala akusotele diyala dyala hete mukuxika o mbánza. Kyoso o kima kiki kibhita n’eye, mwene wanda xika o mbánza, eye wanda divwa kyambote.” 17 Kyenyiki, Sawulu wambela o jiselevende jê, wixi: “Kyawabha! Nga midyondo sotenu diyala wejiya kuxika kyambote, ni mwize-nê bhabha.”

18 Sayi mukwatekexi wambe: “Ngejiya kwila, Jesé o mukwa Beleme, wala ni mona wejiya kuxika kyambote o mbánza. Mwene diyala dya nguzu, muthu waswina. Mwene uzwela kyambote, wawabha o pholo, Jihova wene mu mukwatekesa.” 19 Mukonda dya kiki, Sawulu watumikisa akunji kwa Jesé phala kumwambela, wixi: “Ngitumikise mon’é Davidi wa mukwinga o ibhaku.” 20 Kyenyiki, Jesé wakwata jumendu, yu wa ilongo ni jimbolo ni mbinda ya vinyu ni hombo, anga u itumikisa ni mon’ê Davidi, kwa Sawulu. 21 Davidi wayi kwa Sawulu yuwamateka ku musidivila. Sawulu weza mu kuzola kyavulu Davidi, Davidi anga ukituka o mukwatekexi wê wakwambata o mata mê a ita. 22 Sawulu watumu kwambela Jesé, wixi: “Ngakudyondo, ehela Davidi ku ngisidivila, mukonda nga muwabhela kyavulu.” 23 Kyoso Nzambi kyexile mubhangesa Sawulu kukala ni ixinganeku yayibha, Davidi wexile muxika o mbánza. Mukiki, Sawulu wexile mudivwa kyambote, wexile mu tululuka. Mwene kexile mukala dingi ni ixinganeku yayibha.

17 Akwa Fidíxa abhongolola o masoladi mê phala o ita. Ene a dibhongolola mu mbanza ya Soko ku Judá, ya emana bhukaxi ka Soko ni Azeka mu Efezadanimu. 2 Sawulu ni masoladi akwa Izalayele a dibhongolola ya emana mu honga ya Elahe. Adiyudika we phala kubhânga ni akwa Fidíxa. 3 O akwa Fidíxa emana ku mbandu imoxi ya mulundu, o akwa Izalayele emana we ku mbandu yamukwa ya mulundu. O bhukaxi kâ bhwabhiti o honga.

4 Kyenyiki, mu balaka ya akwa Fidíxa kwatundu dizonda dijina dyê Ngoliya, mukwa Ngate. Mu kulebha mwene wexile ni kovadu jisamanu ni palumu imoxi.* 5 Ku mútwe wazwata kapasete ka ngondo, mu mukutu wazwata mbinza ya utadi yosokejeke kala ibhéla* ya mbiji. Mbinza yiyi yexile munema midi jitatu ja jixikulu ja ngondo.* 6 O inama wa ifikidila ni jixapa ja ngondo, mu isuxi wadifikidila ni ngubu ya ngondo. 7 Mwene wexile ni sosa yadikota. O ponda ya sosa* yê yexile munema hama jisamanu ja jixikulu ja felu.* O mukwatekexi wê wexile mu mutwamenena ku pholo ni ngubu yê. 8 Ngoliya wemana yu wambela o masoladi akwa Izalayele, wixi: “Mukonda dyahi mwa mudiyudika phala kubhânga? Eme ngi mukwa Fidíxa, enu ki mu jiselevende ja Sawulu? Solenu muthu phala eze mubhânga n’eme. 9 Se mwene ubhânga neme anga u ngijibha, etu twanda kala tu abhik’enu. Maji se eme ngimutolola anga ngimujibha, enu mwanda kala mu abhik’etu ni ku tusidivila.” 10 Ngoliya mukwa Fidíxa wambe dingi, wixi: “Lelu nganda xongwena* o masoladi akwa Izalayele. Tumenu muthu phala kubhânga n’eme!”

11 Kyoso Sawulu ni masoladi akwa Izalayele kyevu o izwelu ya mukwa Fidíxa, ene anga akala ni wôma wavulu.

12 Davidi wexile mon’â Jesé mukwa Efalata ya Beleme ku Judá. Jesé wexile ni dinake dya ana, maji mu izuwa ya Sawulu mwene wa kukile kyá. 13 O ana atatu a Jesé ayile mu ita ni Sawulu. O majina a ana atatu enyá: O mona wa dyanga dijina dyê Eliyaba, o wa kayadi,* dijina dyê Abinadabe, o mona wa katatu dijina dyê Xama. 14 Davidi wexile o kasule. O ana atatu exile o adyakime, ayile ni Sawulu.

15 Davidi wexile muya kwa Sawulu, anga uvutuka ku Beleme phala kulanga o jimbudi ja tat’ê. 16 Mu makwinyi awana a izuwa, o mukwa Fidíxa wexile mu xongwena o akwa Izalayele, mu kamene ni mu usuku.

17 Sayi kizuwa Jesé wambela mon’ê Davidi, wixi: “Ngakudyondo, kwata o efa* yiyi ya masa okange ni dikwinyi dya jimbolo, ambata-ju ku jiphange jé ala mu ita. 18 Ambata we o lete yiyi phala o mutwameni wa masoladi,* tala we kyebhi kyala o makota mé anga u ngibhekela njimbu yambote yalungu ni kyebhi kyala o jiphange jé.” 19 Ene exile kumoxi ni Sawulu ni masoladi akamukwa akwa Izalayele mu honga ya Elahe, mu kubhânga ni akwa Fidíxa.

20 Davidi wabalumuka mu kamene kaselu, yu waxisa muthu phala kulanga o jimbudi. Wasokejeka o ima, wayi kala kya mutendelesa tat’ê Jesé. Kyoso Davidi kyabhixila bhwexile o masoladi, ene exile mutunda phala kuya mu ita. Exile mudikola ni dizwí dya swina. 21 O akwa Izalayele ni akwa Fidíxa emana phala kubhânga, ya akexile muditala pholo ni pholo. 22 Davidi waxisa o imbamba ni muthu wene mu ilanga, yu wayi ni kulenga kate bhwexile o masoladi. Kyabhixila mwene webhwidisa ku jiphange jê se ene ala kyambote.

23 Kyoso Davidi kyexile muzwela ni makota mê, Ngoliya o dizonda mukwa Fidíxa ya Ngate, watundu bhu kididi kya akwa Fidíxa anga ubhitulula o izwelu ya zwelele kya. Davidi anga wivwa yazwela Ngoliya. 24 Kyoso akwa Izalayele kya mono o diyala, wôma wa akwata, ya alenge. 25 O mayala akwa Izalayele exile muzwela: “Mwamono o diyala didi? Mwene wa muxongwena* akwa Izalayele, o muthu wanda mujibha, sobha wanda mubhana umvwama wavulu ni mon’ê wa muhatu, o inzo ya tat’ê, kiyanda futa dingi lubhaku mba ima yamukwa mu Izalayele.”

26 Davidi webhwidisa o mayala exile bhu mbandu yê, wixi: “Ihi yanda tambula o muthu wanda jibha o diyala didi mukwa Fidíxa ni kukatula o lusebhu mu Izalayele? O muka Fidíxa yú akambe o ku musaya, nanyi mwene phala kuxongwena* o kifuxi kya masoladi kya Nzambi wene ku mwenyu?” 27 Amutangela o ima yazwelele kya: “Kiki kyene kyanda bhana ku muthu ujibha o diyala didi.” 28 Kyoso Eliyaba kota dya Davidi kyevu Davidi kudizwelesa ni mayala, njinda yamukwata yu webhwidisa Davidi: “Mukonda dyahi weza bhabha? O jimbudi jetu jatolo kya, wajixisa ni nanyi mu kikangalakata? Ngejiya kyambote o ukumbu wé ni kuyibha kwa muxima wé. Eye weza ngo mutala o ita.” 29 Davidi watambwijila, wixi: “Kima kyahi kingabhange dingi? Eme ngebhwidisa ngo!” 30 Mukusuluka, Davidi wayi mu kwibhwidisa dingi athu engi o maka ebhwidisa kya. Ya a mutambwijila kala kya mutambwijile kya.

31 Amoxi evu yazwela Davidi, ya atangela kwa Sawulu. Kyenyiki, Sawulu watumu kwixana Davidi. 32 Davidi wambela Sawulu, wixi: “Kibhukale muthu uteketa ni wôma mukonda dya mukwa Fidíxa yú. O selevende yé wandaya mubhânga ni mwene.” 33 Kyenyiki, Sawulu wambela Davidi, wixi: “Eye kutokala kubhânga ni mukwa Fidíxa yú, mukonda eye u mona-ndenge, mwene disoladi* kya tunde mu unzangala wê.” 34 Davidi wambela Sawulu, wixi: “Ngana yami, eme ngene mu kwinga o jimbudi ja tata yami. Kyoso ki kwamoneka hoji (ni úlusu) yakwata o kambudi, 35 eme nga ikaye kate ki nga ikwata, anga ngitambula o mbudi mukanu dyê. Kyoso yene ki yeza phala ku ngikwata, nga ixabe* bhu xingu* éme nga ijibha. 36 O mubhik’é wajibha kya hoji ni úlusu, kyene we kinganda bhanga ni diyala didi mukwa Fidíxa akambe o ku mu saya. Kuma mwene waxongwena* o kifuxi kya masoladi ya Nzambi wene ku mwenyu.” 37 Davidi wabandekesa-ku dingi wixi: “Jihova wa ngibhulula ku yala ya hoji ni úlusu, wanda ngibhulula we bhu maku ya diyala didi mukwa Fidíxa.” Kenyiki, Sawulu wambela Davidi, wixi: “Ndé, Jihova akulange.”

38 Sawulu wazwika Davidi ni izwatu yê ya ita. Mwene wamute o kapasete ka ngondo ku mútwe, yu wa muzwika ni divunga dya ita. 39 Davidi wate o xibhata mu izwatu yu wafikisa o kwenda, maji katenene kwenda mukonda nuka watele o izwatu yoyo. Davidi wambela Sawulu, wixi: “Kingamutena kwenda ni izwatu yiyi, mukonda kingejidila o izwatu yiyi.” Kyenyiki, Davidi wazula o izwatu ya ita, 40 anga wakwata o dikowe dyê, yu wakatula tumatadi tutanu twaxanana mu ngiji, anga ututa mu mbwenga yê. Mukusuluka, wayi ni kuzukama ku mukwa Fidíxa ni mbalafunda yê bhu maku.

41 Ngoliya o mukwa Fidíxa wexile muzukama dingi kwa Davidi, o mukwatekexi wê wa mutwamenene ku pholo. 42 O mukwa Fidíxa kyamono kwila Davidi wexile ngo ka munzangala wakusuluka, wa wabha o pholo, mwene wa mu sebhulula. 43 O mukwa Fidíxa wambela Davidi, wixi: “Wa mu ngimona ngi imbwa phala kwiza ku ngibeta ni mbangala?” Kyenyiki, mwene wabhingi ku jinzambi jê phala kubheka divuwa kwa Davidi. 44 Mwene wambela Davidi, wixi: “Zá kate bhabha, eme nganda kujibha, o xitu yé nganda ibhana ku jinjila jibhita bhulu ni ku yama ya muxitu.”

45 Davidi watambwijila o mukwa Fidíxa, wixi: “Eye wa mukwiza kokwami ni xibhata, sosa ni ngubu, maji eme ngiza kokwé mu dijina dya Jihova dya ifuxi, o Nzambi ya kifuxi kya masoladi a Izalayele yó wa muxongwena.* 46 Mu kizuwa kyalelu, Jihova wanda kubhakula bhu maku’ami, eme nganda kujibha, nganda batula o mútwe wé. Lelu nganda bhana o imbi ya kifuxi kya masoladi kya akwa Fidíxa, ku jinjila jibhita bhulu ni ku yama ya muxitu. Kyenyiki, athu oso mu ngongo anda kwijiya kwila sayi-ku Nzambi mu Izalayele. 47 Enyoso adibhongolola bhabha* anda kwijiya kwila, Jihova kabhulula ni xibhata mba ni sosa mukonda o ita yatokala kwa Jihova. Lelu, mwene wanda mibhakula bhu maku metu.”

48 Kyenyiki, o mukwa Fidíxa wayi ni kuzukama dingi phala kubhânga ni Davidi. Mukusuluka, Davidi wayi ni kulenga phala kubhânga ni mukwa Fidíxa. 49 Davidi wate o maku mu mbwenga, wakatula ditadi yu waditakula ni mbalafunda yê. O ditadi dyatula ku mukwa Fidíxa, dyabokona mu dibhômo dyê, mwene anga ubwa ni pholo bhoxi. 50 Kyenyiki, Davidi watolola o mukwa Fidíxa ni mbalafunda ni ditadi. Davidi wajibha o mukwa Fidíxa sumbala mwene kexile ni xibhata bhu maku. 51 Davidi wayi ni lusolo anga usambela kuthandu dya mukwa Fidíxa, wafomona o xibhata yexile mu mbunda ya mukwa Fidíxa, yu wazubha o ku mujibha mu ku mubatula o mútwe. Kyoso akwa Fidíxa kyamono kwila o dizonda dyâ a mujibha, ene alenge.

52 Kyenyiki, o mayala akwa Izalayele ni akwa Judá amateka o kudikola ni kukaya akwa Fidíxa, tunde mu honga kate ku mabhitu a mbanza ya Ekolone. O imbi ya akwa Fidíxa ya dimwange mu kikoka kya Sahalayime ndu ku Ngate, ku Ekolone. 53 Kyoso kyazubha kukaya akwa Fidíxa, akwa Izalayele avutuka ya ambata o imbamba yoso ya akwa Fidíxa.

54 Davidi wakwata o mútwe wa mukwa Fidíxa, yu wa wambata mu Jeluzaleme. Maji o mawuta a akwa Fidíxa wa abhake mu balaka yê.

55 Mu kithangana kyoso Sawulu kyamono Davidi kuya phala kubhânga ni mukwa Fidíxa, mwene webhwidisa Abinele o kabhitangu ka kifuxi kya masoladi: “Abinele, o munzangala yú mon’â nanyi?” Abinele watambwijila, wixi: “Sobha yami, ngikutangela o kidi kwila, eme we kingejiyami.” 56 O sobha wa mwambela, wixi: “Sota kwijiya se nanyi o tata ya munzangala yú.” 57 Kyenyiki, mu kuvutuka kyoso Davidi kyajibha o mukwa Fidíxa, Abinele wa mwambata kate kwa Sawulu. Davidi wa kwatele bhu maku o mútwe wa mukwa Fidíxa. 58 Sawulu wa mwibhwidisa, wixi: “Munzangala, eye u mona nanyi?” Davidi wa mutambwijila: “Eme ngi mon’â selevende yé, Jesé mukwa Beleme.”

18 Kyoso Davidi kyazubha kuzwela ni Sawulu, Jonatá ni Davidi akwata ukamba, he Jonatá u mateka kuzola Davidi kala kyadizolo mwene. 2 Tunde mu kizuwa kyenyokyo, Sawulu ukala ni Davidi. Sawulu kamwehela dingi kuvutuka ku dibhata dya tat’ê. 3 Jonatá uzola Davidi kala kyadizolo mwene, mu kyenyiki, mwene ni Davidi, ata kikutu. 4 Jonatá wazula o divunga dyê, o izwatu yê ya ita, yu wakwata o mufula ni phonda,* anga u ibhana kwa Davidi. 5 Davidi wamateka kuya mu ita, yu wakexile muditunda kyambote,* kabasa kididi kwakexile mu mutumikisa Sawulu. Kyenyiki, Sawulu wa musolo phala kukala kabhitangu ka masoladi, o mundu woso akiwabhela.

6 Kyoso Davidi ni masoladi kyakexile mutolola akwa Fidíxa, mu kuvutuka o ahatu a jimbanza joso ja akwa Izalayele, akexile musangesa sobha Sawulu ni kisangu-sangu kyoso mu kwimba, kukina, kuxika tungoma ni jingoji. 7 O ahatu akexile mukemba ni kwimba:

8 Sawulu kawabhela o mwimbu yú wa ahatu. Mukiki ukala ni njinda yavulu, yu wambe: “Ene abhana kijingu kwa Davidi mukwamba kwila, Davidi wajibha makwinyi a jimidi maji eme jimidi. Kwakambe ngo, anda mesena ku mubhana we o utuminu.” 9 Tunde mu kizuwa kyenyokyo, Sawulu kadyelele dingi Davidi.

10 Mu kizuwa kyakayela kyoso Davidi kyakexile muxika o mbánza kala kyakexile mubhanga kya, Nzambi wabhangesa Sawulu kukala ni ibanzelu yayibha yakexile mu muthandanganyesa. Kyenyiki mwene wila kala wala ni masambisambi mu inzo yê. Sawulu ukala ni sosa bhu maku. 11 Mwene watakula o sosa, mu kuxinganeka: ‘Nganda kuba Davidi ni sosa ku phalelu!’ Maji Davidi watena kulenga muveji jiyadi. 12 Kyenyiki, Sawulu ukala ni wôma wa Davidi kuma Jihova wakexile ni Davidi, maji kakexile mukwatekesa dingi Sawulu. 13 Kyenyiki, Sawulu wa musandula mwaxaxi kê, yu wa musolo kala kabhitangu ka midi a masoladi. Mukuya mu ita, Davidi mwéne wakexile ku pholo a masoladi. 14 Davidi wasuluka mukuditunda kyambote,* mukonda mu ima yakexile mubhanga, Jihova wakexile-nê. 15 Kyoso Sawulu kyamono kwila, Davidi wakexile muditunda kyambote, wôma wa mukwata. 16 O athu oso mu Izalayele ni mu Judá azolele Davidi, kuma mwéne wakexile mu atwamenena mu ita yâ.

17 Ku pholo dya kwenda Sawulu wambela Davidi, wixi: “Nganda kubhana mon’ami wa muhatu Melabe, o dikota, phala kukala muhat’wé. Kyenyiki, suluka mu ku ngisidivila kala udisoladi dya swina, mu kubhânga mu ita ya Jihova.” Mukonda Sawulu wakexile mubanza: ‘Mwene watokola kufwa. Maji ki bhu maku ami, kota se ufwa bhu maku a akwa Fidíxa.’ 18 Davidi wambela Sawulu, wixi: “Eme nanyi? O jindandu jami ni mwiji wa tata yami a nanyi mu Izalayele, phala ngikale ngiholome a sobha?” 19 Maji kyoso kyabhixila o kithangana kya Melabe mon’â Sawulu, ku mubhana kwa Davidi mu ukaza, mwene a mubhanene kya kwa Andidiyele mukwa Mehola.

20 O mona wamukwa wa Sawulu Mikala, wazolele kyavulu Davidi. Kyoso Sawulu kya mutangela o maka yá, wasanguluka kyavulu. 21 Kyenyiki, Sawulu waxinganeka: “Nganda mubhana-né n’a kale mubhetu phala abwe bhu maku akwa Fidíxa.” Lwamukwa, Sawulu wambela Davidi, wixi: “Lelu wanda kala holom’yami.” 22 Sawulu watangela we o jiselevende jê, mukwamba: “Exanenu Davidi mu kaswekele, mu mutangela kiki: ‘O sobha ni jiselevende jê joso akuwabhela, kyenyiki, xikina kukala holome a sobha.’” 23 Kyoso o jiselevende ja Sawulu kyatangela o maka yá kwa Davidi, Davidi wambe: “Mwafika kwila kima kya kutonoka, o ngadyama yahatu kala eme, kukala holome ya sobha?” 24 Mukusuluka, o jiselevende ja Sawulu a mutangela o ima yambe Davidi.

25 Kyenyiki, Sawulu wambe: “Tangelenu kiki kwa Davidi, ‘phala o kilembu, sobha wa mubhinga ngo hâma ya inyunga ya akwa Fidíxa, phala kuvutula phonzo ku jinguma ja sobha.’” Sawulu wakexile mufunya ndunge phala akwa Fidíxa kujibha Davidi. 26 Kyenyiki, o jiselevende jê, atangela o maka yá kwa Davidi, Davidi anga uwabhela o ndunge ya kukala holome ya sobha. Ande dya kubhixila o kithangana kyaxindi Sawulu, 27 Davidi ni masoladi mê, ayi, anga ajibha hâma jiyadi ja mala akwa Fidíxa. Davidi anga wambata o inyunga yâ kwa Sawulu, phala kukala holome ya sobha. Kyenyiki, Sawulu wa mubhana mon’ê Mikala, phala kukala muhat’wê. 28 Sawulu wamono kwila Jihova wakexile mukwatekesa Davidi ni kwila mon’ê Mikala, wazolele Davidi. 29 Kiki kyabhangesa dingi Sawulu kukala ni wôma wavulu wa Davidi. Kyenyiki, Sawulu weza mukala nguma ya Davidi ku mwenyu wê woso.

30 Kyoso o ilamba ya akwa Fidíxa kyakexile mukwiza mulwa nawu, Davidi wakexile muditunda dingi kyambote* o jiselevende joso ja Sawulu ndenge. Kyenyiki, o athu akexile mu muxila kyavulu.

19 Ku pholo dya kwenda, Sawulu watangela kwa mon’ê Jonatá ni jiselevende jê joso kwila, wa mesenene kujibha Davidi. 2 Kuma Jonatá mon’â Sawulu wazolele kyavulu Davidi, wa mutangela, wixi: “Tata yami Sawulu wamesa ku kujibha. Dilange, mungu mu kamene sota kididi phala kudisweka. 3 Ngandaya ni tata yami mu mukawu, twanda kwimana bhwa zukama o kididi bhu wanda disweka. Nganda zwela ni tata yami yalungu n’eye, kima kyoso-kyoso kingivwa, nganda kutangela.

4 Kyenyiki, Jonatá wazwela ima yambote kwa tat’ê Sawulu yalungu ni Davidi. Mwene wa mwambela: “Sobha, kana kuta kituxi kwa selevende yé Davidi, mukonda mwene ka kubhange kima kyayibha, maji mwene wa kubhange ngo o mbote. 5 Mwene wate o mwenyu wê mu kilwezu phala kujibha o diyala mukwa Fidíxa. Mukonda dya kiki, Jihova wabhana kikowe kyadikota* ku Izalayele yoso. Mu kumona o ima yiyi eye wasangulukile kyavulu. Mukonda dyahi uta kituxi mu kujibha Davidi se mwene kakubhange kima kyayibha?” 6 Sawulu wevu Jonatá, yu wakanena: “Mu dijina dya Jihova wene ku mwenyu, mwene kanda fwa.” 7 Ku pholo, Jonatá wexana Davidi yu wa mutangela o ima yoso yiyi. Mukyenyiki, Jonatá wambata Davidi kwa Sawulu, Davidi anga uvutuka mu kusidivila Sawulu kala kyexile mubhanga m’ukulu.

8 Mukubhita thembu kwamoneka dingi ita. Davidi wabhânge ni akwa Fidíxa, yu wajibha masoladi avulu. Akwa Fidíxa anga alenga.

9 Jihova wabhangesa Sawulu kukala ni ibanzelu yayibha* yakexile mu muthandanganyesa. Mwene waxikamene monzo yê ni sosa bhu maku, kyoso Davidi kyakexile muxika o kambânza. 10 Sawulu watakula o sosa kwa Davidi phala ku mu kuba ku phalelu, maji mwene wa sondoloka ni lusolo. O sosa anga itula ku phalelu. Mu usuku wenyó, Davidi walenge. 11 Ku pholo dya kwenda, Sawulu watumikisa mayala ku inzo ya Davidi phala kulonda Davidi, n’a mujibhe mu kamene. Maji Mikala muhatu wa Davidi wa mutangela: “Se kulenge mu usuku yú, mungu mu kamene anda kujibha.” 12 Ni lusolo lwoso Mikala wakwatekesa Davidi kutulukila bhu njanena, phala n’a lenge. 13 Mikala wakwata o kiteka* yu wakizekesa bhu hama, wakwata o wanda a ubhange ni kibha kya hombo yu wakitula bhu kididi kya Davidi kya kutula o mútwe, yu wavungu o kiteka ni imbamba.

14 Mukusuluka, Sawulu watumikisa athu phala kutakana Davidi, maji Mikala wambe: “Mwene wa mukata.” 15 Kyenyiki, Sawulu watumikisa dingi athu phala kutakana Davidi yu wa ambela: “Mubhekenu bhabha ni hama yê mwene, phala ngi mujibhe.” 16 O kyoso o mayala kyabokona, bhu hama asange-bhu, o kiteka* ni wanda wa kibha kya hombo bhu kididi bhweji kala o mútwe wa Davidi. 17 Kyenyiki, Sawulu webhwidisa Mikala: “Mukonda dyahi wa nginganala kiki, eye wakwatekesa nguma yami kulenga?” Mikala watambwijila, wixi: “Mwene wa ngambela kwila se ki ngi mu kwatekesele kulenga, weji ngijibha.”

18 Kyenyiki, Davidi walenge yu wadisange ni Samuwele ku Lamá. Davidi watangela kwa Samuwele yoso ya mubhangele Sawulu. Davidi ni Samuwele ayi ku Nayote anga akala kwenyoko. 19 Mukubhita thembu, Sawulu a mwambela: “Davidi wala ku Nayote, mu mbanza ya Lamá.” 20 Mu kithangana kyenyokyo Sawulu watumikisa mayala phala kukwata Davidi. O kyoso kyayi ya amono o jipolofeta adyakime amuta maka a upolofeta, o Samuwele wa akala ku pholo, o nzumbi ya Nzambi yeza ku mayala a Sawulu ene anga amateka kuzwela we kala jipolofeta.

21 Kyoso Sawulu kyeza mu kwijiya o maka yá, mwene watumikisa dingi mayala engi maji ene amateka we kuzwela kala jipolofeta. Kyenyiki, Sawulu watumikisa o kibuka kya katatu kya mayala, ene we amateka kuzwela kala jipolofeta. 22 Mukusuka-ku, Sawulu mwéne mwene kya wayi ku Lamá. Kyoso kyabhixila ku kixina kyadikota ku Seku, mwene webhwidisa: “Samuwele ni Davidi ala kwebhi?” a mutambwijila, exi: “Ala ku Nayote, mu mbanza ya Lamá.” 23 Kyenyiki, kyoso Sawulu kyakexile muya ku Nayote mu mbanza ya Lamá, o nzumbi ya Nzambi yeza kuthandu dyê, mwene anga wasuluka kwenda ni kuzwela kala polofeta kate kyabhixila ku Nayote mu mbanza ya Lamá. 24 Mwene wazula o izwatu, yu wamateka kuzwela kala polofeta ku pholo ya Samuwele anga uzeka bhenyobho ni thuxi,* kumbi dyoso ni usuku woso. Mukonda dya kiki o athu ene muzwela: “O kwila Sawulu wala we bhukaxi ka jipolofeta?”

20 Davidi walengela ku Nayote mu mbanza ya Lamá, wadisange-ku ni Jonatá yu wa mwibhwidisa: “Ihi ingabhange? Kima kyahi kyayibha kingabhange? Kituxi kyahi kingate kwa tat’enu phala mwene kumesena ku ngijibha?” 2 Jonatá wa mutambwijila: “Kiki kikyanda bhita, lémbwa, eye kanda kujibha. Tat’etu kene mubhanga kima, kikale kyadikota mba kyofele, sé kungitangela. Mukonda dyahi tat’etu weji ngiswekela o kima kiki? Kiki kikitena kubhita kana. 3 Kyenyiki, Davidi wa mujijidika ku mukanena, yu wambe: “Mukidi, tat’enu wejiya kwila eye wangizolo kyavulu. Nange mwene waxinganeka: ‘Kota se Jonatá kakijiye phala mwene kadivu kyayibha.’ Maji mu dijina dya Jihova wene ku mwenyu ni mu dijina dyé eye, ngikutangela o kidi kwila, kwakambe ngo anda ngijibha.”

4 Kyenyiki, Jonatá wambela Davidi, wixi: “Nganda bhanga yoso iwandala.” 5 Davidi wambela Jonatá, wixi: “Mungu o kizuwa kya mbeji ya thethama,* ngejiya kwila o sobha wanda mesena kwila, ngixikama-nê phala kudya. Maji Ngehele kuya mu mukawu kate mungu-diná mu usuku. 6 Se tat’enu wibhula se mukonda dyahi eme kingeza, mutangele kwila Davidi wa ngidyondela phala ku mwehela kuya ku mbanza yê ku Beleme phala kudya o sata ya muvu ni mwiji wê woso. 7 Se mwene utambwijila wixi: ‘Kyawabha,’ selevende yé kanda kala dingi ni wôma wa kima, maji se mwene utambwijila ni njinda, eye wanda kwijiya kwila mwene wamesena mwene ku ngibhanga kyayibha. 8 Kyenyiki, ngi kwatele henda eme ngi selevende yé, mukonda eye wabhange kikutu n’eme ku pholo ya Jihova. Maji se wamono kwila ngala ni kikuma kya kima, ngijibhe kya eye mwene. Mukonda dyahi weji ngibhakula kwa tat’enu?”

9 Jonatá wa mutambwijila, wixi: “Lukusuke! Kukizwele. Se ngiza mu kwijiya kwila tat’etu wamesena ku kubhanga kyayibha, nganda kutangela.” 10 Davidi watangela Jonatá, wixi: “Se tat’enu utambwijila ni njinda, nanyi wanda ngitangela?” 11 Jonatá wambela Davidi, wixi: “Zá, twende mu mukawu.” Kyenyiki, kiyadi kyâ ayi mu mukawu. 12 Jonatá wambela Davidi, wixi: “Jihova o Nzambi ya Izalayele akale mbangi ya kwila mungu mba mungu-diná mu ola yenyiyi, nganda londa tat’etu. Se mwene umesena ku kubhanga mbote,* nganda tuma ku kutangela. 13 Maji se o tat’etu yami umesena ku kubhanga kyayibha, Jihova a ngi kaxtikale,* akibhange kinene, se ngikamba ku kutangela ni kukwehela kuya ni kutululuka. Jihova a ku kwatekese kala kya kwatekesa tat’etu. 14 Ngilondekese henda kala Jihova kyene mulondekesa o henda yê, kikale kindala kingala hanji ku mwenyu, ni kyoso kinganda fwa. 15 Londekesa jinga henda ku mwiji wami, né mwene kyoso Jihova kyanda tolola o jinguma jé joso kulu dya mundu.” 16 Mukiki Jonatá wate kikutu ni dibhata dya Davidi mu kwamba: “Jihova akaxtikale o jinguma joso ja Davidi.” 17 Kyenyiki, Jonatá wabhangesa Davidi ku mu kanena dingi mukonda dya henda ya mukwatela. Mukonda wa muzolele kala kyadizolo mwene.

18 Jonatá wambe, wixi: “Mungu o kizuwa kya mbeji ya thethama, o athu anda mona kwila, kiwala mwaxaxi kâ, mukonda anda mona kuma mu kididi kyé ki mu xikama-mu muthu. 19 Mungu-diná, o athu anda tonginina kyambote kwila eye kiweza. Kyenyiki, wiza mu kididi kiki mu wadiswekele muveji iná,* ni ukale bhwa zukama o ditadi didi. 20 Mukiki, nganda takula mifula itatu ku mbandu ya ditadi kala nga muloza kima. 21 Kyoso kinganda tumikisa o mukwatekexi, nganda mutangela: ‘Ndé utakane o mifula.’ Se ngitangela o mukwatekexi ngixi: ‘O mifula yala mu mbandu yiyi bongayu,’ kyenyiki, eye utena kuvutuka ku mbanza mukonda mu dijina dya Jihova wene ku mwenyu, kiki kilombolola kwila yoso yala kyambote, eye kiwala dingi mu kilwezu. 22 Maji se ngitangela o munzangala, ngixi: ‘O mifula yala mu mbandu yengi,’ kota se ulenga, mukonda Jihova wa mu kutuma kulenga. 23 O yalungu ni kikutu kitwabhange, Jihova akale mbangi yetu kate ku hádya ni hádya.”

24 Kyenyiki, Davidi wayi mudisweka mu mukawu. Kyoso kyabhixila o kithangana kya mbeji ya thethama, o sobha waxikama ku meza phala kudya. 25 Kala kyexile kya o kifwa kyâ, o sobha waxikama mu kididi kyê ku mbandu ya phalelu, Jonatá waxikamene pholo ni pholo ni mwene, Abinele waxikamene ku mbandu ya Sawulu, maji mu kididi kya Davidi ki bhwa xikamene muthu. 26 Mu kizuwa kyenyokyo, Sawulu kazwela kima, mukonda waxinganeka: ‘Nange kwa mubhiti kima, mwene kadizelesa. Ngafika kwila mwene waxidi.’ 27 Mu kizuwa kyakayela kya mbeji ya thethama,* mu kizuwa kya kayadi, mu kididi kya Davidi kimwakexile we muthu. Kyenyiki, Sawulu webhwidisa mon’ê Jonatá, wixi: “Mukonda dyahi o mon’â Jesé maza ni lelu keza mudya n’etu?” 28 Jonatá watambwijila Sawulu, wixi: “Davidi wa ngidyondela phala ku mwehela kuya ku Beleme. 29 Mwene wambe: ‘Ngakudyondo ngehele kuya mukonda o mwiji wami wanda bhakula sata mu mbanza, o jiphange jami angixana. Kyenyiki, se ngasange ngalasa ku mesu mê, ngehele ngiye mutala o jiphange jami.’ Kiki kyene kya mubhangesa kukamba kwiza mudya ku meza a sobha.” 30 Kyoso kyevu o ima yiyi, Sawulu wafutuluka ni Jonatá, yu wa mwambela: “Eye u mona wabhukumuka! Wafika kwila eme kingejiya kwila eye wala ku mbandu ya mon’â Jesé? Kiki kyanda bheka jisonyi kokwê ni kwa mam’enu. 31 Se mon’â Jesé ukala hanji ku mwenyu, eye ni utuminu wé mwanda kala mu kilwezu. Kyenyiki, tuma ku mutakana mukonda mwene watokala kufwa.”*

32 Jonatá wambela tat’ê Sawulu, wixi: “Mukonda dyahi mwene watokala kufwa? Kima kyahi kyabhange mwene?” 33 Mu kithangana kyenyokyo, Sawulu wa mutakula o sosa phala ku mujibha. Kyenyiki, Jonatá weza mu kwijiya kwila, tat’ê wamesenene mwene kujibha Davidi. 34 Jonatá wabalumuka ku meza ni njinda, kadi dingi kima mu kizuwa kya kayadi kyoso kyabhiti o mbeji ya thethama. Kuma mwene waluwalele mukonda tat’ê wazwela ima yayibha yalungu ni Davidi ni kwila tat’ê wa muxongwena.

35 Mu kizuwa kyakayela mu kamene, Jonatá wayi ku mukawu kumoxi ni munzangala wexile o mukwatekexi wê phala kudisanga ni Davidi. 36 Mwene watangela o mukwatekexi wê, wixi: “Ndé ni lusolo kutakana o mifula inganda takula.” O mukwatekexi wayi ni lusolo, Jonatá watakula o mufula, o mufula anga usomboka o mukwatekexi wê. 37 Kyoso o mukwatekexi kyabhixila mu kididi mwatakwile Jonatá o mufula, Jonatá wadikola kwa mwene: “O mufula kiwala dingi ku pholo?” 38 Jonatá anga wambela o mukwatekexi: “Lenguluka ndé ni lusolo, kana kulaleka!” Kyenyiki, o mukwatekexi wakwata o mifula yu wavutuka kwa ngana yê. 39 O mukwatekexi kejidile o ima yexile mubhita, Jonatá ngo ni Davidi ejidile o ima yexile mubhita. 40 Mukusuluka, Jonatá wabhana o mata mê ku mukwatekexi, yu wa mwambela: “Ndé, ubheke o ima yiyi kubhata.”

41 Kyoso o mukwatekexi kyayi, Davidi watundu bhwakexile, bhwa zukamene ni mbandu ya lwiji anga ufukama ni pholo bhoxi muveji jitatu. Kyenyiki, kiyadi kyâ adibhana jinzobole, adidi, maji Davidi mwene wadidi dingi. 42 Jonatá wambela Davidi, wixi: “Ndé ni kutululuka mukonda kiyadi kyetu twate kikutu mu dijina dya Jihova, mu kwamba: ‘Jihova akale mbangi bhukaxi kami n’eye, ni bhukaxi ka mwiji wami* ni mwiji wé* kate ku hádya ni hádya.’”

Mukusuluka Davidi wayi, Jonatá anga uvutuka mu mbanza.

21 Mukusuluka, Davidi wayi ku Nobe mudisanga ni mukunji Ahimeleke. Mu kudisanga ni Davidi, Ahimeleke wamateka kuteketa ni wôma yu wa mwibhwidisa: “Mukonda dyahi weza ubheka we? Mukonda dyahi séku muthu weza n’eye?” 2 Davidi watangela o mukunji Ahimeleke, wixi: “O sobha wa ngitumu kubhanga kima yu wambe: ‘Kana kutangela muthu o kima ki ngakutumu o kubhanga, né ngo o itendelesu i ngakubhana.’ Mukonda dya kiki twabakana kididi phala kudisanga ni masoladi mami. 3 Ngana, se wala ni mbolo jitanu mba kama koso-koso tubhane.” 4 Kyenyiki, o mukunji wambela Davidi, wixi: “Kingala ni jimbolo atena kujidya ku muthu woso-woso, ngala ngo ni jimbolo jikôla. Se o mayala mé kazeka* ni ahatu, atena kujidya.” 5 Davidi wambela o mukunji, wixi: “Ejiya nakyu kwila, o ahatu a asandula kokwetu kala kyabhiti mu jiveji ja mukwa kyoso ki twatundu phala kuya mu ita. Se mu kubhanga ita yoso-yoso o mayala ene mu dizelesa, abha o mu kizuwa kyalelu?” 6 Kyenyiki, o mukunji wa mubhana o jimbolo jikôla, mukonda jene ngo jexile-bhu jokatule ku pholo ya Jihova, jobhinganese ni jimbolo ja ubhe mu kizuwa kyenyokyo kyexile mukatula o jimbolo.

7 Mu kizuwa kyenyokyo, o selevende ya Sawulu Doweki wakexile we bhenyobho ku pholo* ya Jihova. Doweki mukwa Idomo, mwéne wexile o mutwameni wa abhidi a Sawulu.

8 Davidi webhwidisa Ahimeleke, wixi: “Kwala ni sosa mba xibhata bhabha? Eme kingeza bhabha ni xibhata mba ni mawuta mami, kuma o kima kya ngibhingi o sobha, kima kyalusolo.” 9 O mukunji wa mutambwijila, wixi: “Ngala ni xibhata ya Ngoliya, o mukwa Fidíxa u wa mujibha mu honga ya Elahe. Yala bhabha, yovunge ni mulele kudima dya efode, se wamesena utena kuyambata, mukonda yene ngo yala bhabha.” Davidi wambe, wixi: “Ngibhane-yu, mukonda séku dingi xibhata yengi yathundu o xibhata yiyi.”

12 Mu kubanza o ima yexile muzwela o jiselevende, Davidi anga ukala ni wôma wavulu wa Akiji, o sobha ya Ngate. 13 Bhenyobho ku pholo yâ, Davidi ulungulula o kifwa kyê anga u dibhanga kala dilaji bhukaxi kâ. Mwene wexile mukwaza o mabhitu ni kudizezela máthe ku mwezu. 14 Mukusuka-ku, Akiji wambela o jiselevende jê, wixi: “Ki mwa mumona kwila diyala didi dyasaluka? Mukonda dyahi mwa ngibhekela-né? 15 O malaji u ngala nawu a ngisoko kya, mukonda dyahi mwa ngibhekela dingi o dilaji didi? Mukonda dyahi o diyala didi dyatokalele kubokona mu inzo yami?”

22 Kyenyiki, Davidi watundu kwenyoko yu walengela ku dibanda dya Adulamu. Kyoso jiphange jê ni dibhata dyoso dya tat’ê kyeza mu kwijiya o ima yiyi, ayi kate bhu kididi bhwexile mwene. 2 Enyoso exile mudibhana ni ibhidi ni yó exile ni makongo ni yó adivu kwila exile mwatalatala sé kuyuka, adibundu ni mwene. Davidi anga ukala kabhitangu kâ. O exile-nê kumoxi atenesene hama jiwana ja mayala.

3 Ku pholo dya kwenda Davidi watundu kwenyoko yu wayi ku Mixipa mu mbanza ya Mowabe, yu wambela o sobha ya Mowabe, wixi: “Ehela tat’etu ni mam’etu kukala ni enu kate ki ngijiya yanda ku ngibhanga Nzambi.” 4 Kyenyiki Davidi waxisa o jitata jê ni sobha ya Mowabe, ene anga atunga mu mbanza yenyoyo mu thembu yoso yakexile mulenga Davidi ni kudisweka.

5 Mukubhita thembu, polofeta Ngade wambela Davidi, wixi: “Kana kudisweka dingi ku milundu, ndé mu ixi ya Judá.” Kyenyiki, Davidi anga uya ukala ku muxitu wa Helate.

6 Sawulu weza mu kwijiya kwila, Davidi ni mayala mê a asange. Mu kithangana kyenyokyo Sawulu waxikamene mu kilembeketa kya muxi wa Mutamala bhu kamulundu ku Ngibeya ni sosa yê bhu maku. O jiselevende jê joso exile-nê kumoxi. 7 Sawulu wambela o jiselevende jê exile-nê kumoxi, wixi: “Ngamidyondo, ivwenu, enu mu akwa Bejamí. O kwila o mon’â Jesé wanda mibhana we mabhya ni mividi? O kwila mwene wanda misola phala mukale mu jikabhitangu ja kutumina jimidi ni jikabhitangu ja kutumina jihama ja masoladi? 8 Enu enyoso mwa ngilungulukila. Kana-ku muthu wa ngitangela kwila, mon’ami wabhange kikutu ni mon’â Jesé. Kana-ku muthu wa ngikwatela henda, né ngo ku ngitangela kwila mon’ami wafunyisa o selevende yami phala ku ngibatamena, kala kya mubhita kindala.”

9 Bhenyobho, Doweki o mukwa Idomo wexile ku pholo dya jiselevende ja Sawulu wambe: “Eme ngamono o mon’â Jesé kubhixila ku Nobe phala kudisanga ni Ahimeleke, mon’â Ahitube. 10 Ahimeleke wasoto kwijiya o kibanzelu kya Jihova kyalungu ni Davidi, yu wa mubhana kudya. Wa mubhana kate mwene o xibhata ya Ngoliya o mukwa Fidíxa.” 11 O sobha watumu kwixana ni lusolo o mukunji Ahimeleke, mon’â Ahitube ni akunji atokalele ku dibhata dya tat’ê ku Nobe. Kyenyiki, enyoso eza ku pholo ya sobha.

12 Sawulu wa mwambela, wixi: “Ivwa eye u mon’â Ahitube!” Mwene wa mutambwijila, wixi: “Xé ngana yami.” 13 Sawulu wa mwambela, wixi: “Mukonda dyahi eye ni mon’â Jesé mwa ngilungulukila? Mukonda dyahi wa mubhana mbolo ni xibhata, eye wasoto o kibanzelu kya Nzambi kyalungu ni mwene? Mwene wa ngilungulukila, yu wa ngibatamena kala kya mubhita kindala.” 14 Mukusuluka, Ahimeleke wambela o sobha, wixi: “Ku jiselevende jé joso, nanyi abeta-kota mu ku mudyelela dingi, Davidi ndenge? Mwene holome ya sobha. Mwéne wala ku pholo ya alangidi a sobha, amuxila we kyavulu mu inzo yé. 15 O kwila yiyi yene o veji ya dyanga i ngisota o kibanzelu kya Nzambi kyalungu ni Davidi? Eme nuka nga kulungulukile. Sobha, kana ku ngibhanga kima kyayibha, ngi selevende yé, ni ku athu oso atokala ku dibhata dya tata yami. Kuma o selevende yé kejidile o ima yexile mubhita.”

16 Kyenyiki, o sobha wa mwambela, wixi: “Ngikutangela o kidi kwila, eye ni athu oso atokala ku dibhata dya tat’é mwanda fwa mwene.” 17 Kyenyiki, sobha wambela o alangidi a mukondolokele, wixi: “Jibhenu o akunji a Jihova mukonda ene ala ku mbandu ya Davidi. Ene ejidile kwila Davidi wexile mulenga, maji kangitangela.” Maji-phe, o jiselevende ja sobha aditunu kujibha o akunji a Jihova. 18 Mukusuluka, sobha wambela Doweki, wixi: “Jibha o akunji oso.” Doweki o mukwa Idomo wamateka kujibha o akunji. Mu kizuwa kyenyokyo mwene wajibha makwinyi anake ni kitanu kya mayala exile ni Efode ya linyu. 19 Mwene wajibha we athu ni xibhata ku Nobe, o mbanza ya akunji. Mwene wajibha mayala ni ahatu, ana ndenge ni tubwetele, wajibha we jingombe, jijumendu ni jimbudi.

20 Maji-phe sayi mona umoxi wa Ahimeleke mon’â Ahitube walenge yu wayi mudibunda ni Davidi. Dijina dyê Abiyatale. 21 Abiyatale wambela Davidi, wixi: “Sawulu wajibha o akunji oso a Jihova.” 22 Kyenyiki, Davidi wambela Abiyatale wixi: “Kizuwa kyenyokyo kyoso ki ngamono Doweki mukwa Idomo, eme ngejidile kwila mwene wejitangela yoso kwa Sawulu. Kyenyiki se athu oso ku mwiji wa tat’enu afu, éme ngala ni kikuma. 23 Kala n’eme bhabha, kukale ni wôma. Mukonda o muthu wamesena ku kujibha, mwene wamesena we ku ngijibha. Eme nganda kulanga.”

23 Mu kubhita thembu atangela Davidi, exi: “Akwa Fidíxa a mubhânga ni akwa Keyila, ene a munyana o kudya kwala mu mabhya.” 2 Kyenyiki, Davidi wasoto o kitendelesu kya Jihova, mu kwibhwidisa: “O kwila ngatokala kuya mutolola akwa Fidíxa?” Jihova wa mutambwijila, wixi: “Ndé, tolola akwa Fidíxa, ubhulule o mbanza ya Keyila.” 3 Maji o mayala exile ni Davidi a mwambela: “Se etu ku Judá kuku twa muteketa kya ni wôma, abha se tuya ku Keyila mubhânga ni akwa Fidíxa?” 4 Kyenyiki, Davidi wasoto dingi o kitendelesu kya Jihova. Jihova wa mutambwijila, wixi: “Ndé, kulumuka kate ku Keyila mukonda nganda bhakula o akwa Fidíxa bhu maku mé.” 5 Kyenyiki Davidi wayi ni mayala mê kate ku Keyila, yu wabhânge ni akwa Fidíxa. Mwene wajibha-ku athu avulu, wambata o ibhaku yexile-ku yu wabhulula akwa Keyila.

6 Kyoso Abiyatale mon’â Ahimeleke kyalenge phala kudibunda ni Davidi ku Keyila, mwene wambatele efode imoxi. 7 Sawulu a mutangela, exi: “Davidi wala ku Keyila.” Sawulu wambe, wixi: “Nzambi wa ngibhakula-nê,* mukonda mwene wabokona mu mbanza yala ni mabhitu, mwene kanda tena kulenga.” 8 Kyenyiki, Sawulu wongeka o masoladi* mê moso, phala kuya mulwa o ita mu mbanza ya Keyila, ni kubatamena Davidi ni mayala mê. 9 Kyoso Davidi kyevu kwila, Sawulu wexile mu kwiza phala ku mujibha, mwene wambela Abiyatale o mukunji wixi: “Ngibhekele bhabha o efode.” 10 Davidi wambe, wixi: “Jihova tata, eye u Nzambi ya Izalayele. Eme ngevu kwila Sawulu wamesena kwiza mubwika o mbanza ya Keyila mukonda dyami. 11 O kwila o akwa Keyila* anda ngibhakula bhu maku a Sawulu? O kwila Sawulu wanda kwiza mwene kala ki ngevu? Jihova tata, u Nzambi ya Izalayele, ngakudyondo, ngitangele ngi selevende yé.” Jihova wambe: “Mwene wanda kwiza.” 12 Davidi webhwidisa: “O kwila akwa Keyila anda ngibhakula eme ni mayala mami, bhu maku a Sawulu?” Jihova wa mutambwijila: “Kyene mwene, anda mibhakula.”

13 Ni lusolo lwoso Davidi ni hama jisamanu jamala exile-nê kumoxi, atundu ku Keyila ya akexile muya mudisweka kididi, anga aya kididi kyengi. Kyoso Sawulu kya mutangela kwila Davidi watundu ku Keyila, mwene ka mukayela dingi 14 Davidi wasuluka ni kudisweka mu ididi yabhonzele ku musanga, ku mulundu wexile mu kikangalakata kya Zife. Sawulu wexile musota jinga Davidi, maji Jihova ka mubhakula bhu maku mê. 15 Kyoso kyexile mu kikangalakata kya Zife ku Holesa, Davidi weza mu kwijiya kwila,* Sawulu wakexile mu musota phala ku mujibha.

16 Kyenyiki, Jonatá mon’â Sawulu wadisange ni Davidi ku Holesa, mwene wa mukwatekesa kudyelela dingi kwa Jihova. 17 Mwene wa mwambela: “Kana kukala ni wôma, mukonda tat’etu Sawulu kanda tena ku kukwata, kana. Eye wanda kala sobha mu Izalayele, eme nganda kala ngi mukwatekexi wé. Tat’etu Sawulu wejiya o kidi kiki.” 18 Kyenyiki, kiyadi kyâ abhange kikutu ku pholo ya Jihova. Mukusuluka, Jonata wayi kubhata dyê, Davidi anga uxala ku Holesa.

19 Ku pholo dya kwenda o mayala akwa Zife ayi ku Ngibeya mutangela Sawulu, exi: “Davidi wadisweka bhwa zukama n’etu, mu ididi yabhonzo kubhixila-ku, ku Holesa ku kamulundu ka Hakila, kala ku mbandu ya lwiji* ya Jesimone.* 20 Kyoso eye u sobha ki wanda mesena kwiza, wizé, etu twanda mubhakula bhu maku mé. 21 Mukiki Sawulu wambe: “Jihova a mibesowale mukonda mwa ngikwatela henda. 22 Nga midyondo ndenu, musote kwijiya kyambote kwebhi kwala mwene, ni nanyi wa mu mono koko, mukonda a ngitangela kwila mwene wadimuka kyavulu. 23 Sotenu kyambote o ididi mwene mudisweka. Kyoso ki mu isanga, zenu mu ngitangele ni ngiye kumoxi n’enu. Se mwene ukala mu ixi yiyi, nganda musota ku miji yoso ya Judá kate ki ngi musanga.”

24 Kyenyiki, ene ayi ku Zife mu kudyangela Sawulu, kyoso Davidi ni mayala mê kyexile mu kikangalakata kya Mawone ku Halabá ku mbandu ya lwiji ya Jesimone. 25 Mukusuluka, Sawulu ni mayala mê ayi musota Davidi. Davidi wakulumuka kate ku ndanji anga uxala kwenyoko mu kikangalakata kya Mawone. Kyoso Sawulu kyevu kiki, wayi musota Davidi mu kikangalakata kya Mawone. 26 Kyoso Sawulu kyabhixila ku mbandu ya mulundu, Davidi ni mayala mê akexile ku mbandu yamukwa ya mulundu. Davidi wexile mulenga Sawulu ni lusolo lwoso, maji Sawulu ni mayala mê akexile muzukama phala kukwata Davidi ni mayala mê. 27 Maji kweza mukunji wambela Sawulu, wixi: “Zá ni lusolo, mukonda akwa Fidíxa eza mubhânga n’etu. 28 Kyenyiki, Sawulu weha kukaya Davidi, yu wayi mubhânga ni akwa Fidíxa. Mukonda dya kiki, o kididi kyenyokyo akiluku, Ndanji ya Kudisandula.

29 Kyenyiki, Davidi watundu kwenyoko, yu wayi mukala mu kididi kyeji bhonza ku musanga, ku Engedi.

24 Kyoso Sawulu kyavutuka mu kulwa o ita ni akwa Fidíxa, a mwambela, exi: “Davidi wala mu kikangalakata ku Engedi.”

2 Kyenyiki, Sawulu wasolo midi jitatu ja mayala mu Izalayele yoso, yu wayi musota Davidi ni mayala mê ku milundu kwene mukala o jihombo ja milundu. 3 Sawulu wabhixila mu kibhanga kya jingombe kyexile bhu mbandu a njila, bhwexile we dibanda, yu wabokona-mu phala kubhanga yene mubhanga o athu mu dixidixilu.* Davidi ni mayala mê, adiswekele bhu hota dya dibanda dyenyidi. 4 O mayala a Davidi a mwambela, exi: “Kiki kyene o kizuwa kya mu kutangela Jihova, wixi: ‘Nga kubhakula o nguma yé bhu maku mé, utena kubhanga i wamesena.’” Kyenyiki, Davidi wayi ni ku muzukama bhofele-bhofele, yu wabatula mbandu ya divunga dya Sawulu. 5 Mukusuluka, o muxima* wa Davidi wexile mu mutitila,* mukonda dya kubatula mbandu ku divunga dya Sawulu. 6 Davidi wambela o mayala mê, wixi: “Mukonda dya kuxila Jihova, eme nuka nganda bhanga o kima kiki kwa ngana yami, yó a mu undu kwa Jihova. Eme kinganda bhanga kima kyayibha kwa mwene. Mukonda mwene a mu undu kwa Jihova.” 7 Kyenyiki, ni izwelu yiyi Davidi watululukisa* o mayala mê yu wa afidisa kujibha Sawulu. Sawulu anga utunda bhu dibanda, usuluka njila yê.

8 Mukusuluka, Davidi watundu mu dibanda yu wadikola kwa Sawulu, wixi: “Ngana yami, eye u sobha!” Kyoso Sawulu kyasakuka yu watale kudima, Davidi wafukama ni pholo bhoxi. 9 Davidi wambela Sawulu, wixi: “Mukonda dyahi eye u ngana, wa mubhana mátwi ku jimbwembwe ja athu a muzwela kwila ngamesena ku kubhanga kyayibha? 10 Mu kizuwa kyalelu, eye wamono ni mesu mê kyebhi Jihova kya kubhakula bhu lukwaku lwami, mu dibanda. Maji kyoso kya ngitangela phala ku kujibha, eme nga kukwatela henda, eme ngambe: ‘Kinganda bhanga kima kyayibha kwa ngana yami, mukonda mwene muthu a mu undu kwa Jihova.’ 11 Tata yami, tala o mbandu ya divunga dyé bhu mak’wami. Kyoso ki ngabatula o mbandu yiyi ya divunga eme kingikujibha. Kindala utena kumona kwila, kingamesena ku kubhanga kyayibha mba ku kubhukumukina. Kingate we kituxi kokwe, sumbala eye wa mu ngisota phala ku ngijibha. 12 Jihova akale mufundixi wetu, Jihova a ku kaxtikale mu kima ki wa mu ngibhanga eye. Maji eme kinganda kujibha. 13 Kala kyambe o sabhu: ‘O kuyibha kwijila ku athu ayibha,’ maji eme kinganda kubhanga kima kyayibha. 14 Ihi yabhangesa o sobha ya Izalayele kutunda? Watundu phala kusota ihi? O imbwa ya difwila, inga phala kusota o mbwanana?* 15 Jihova akale o mufundixi, mwene wanda tufundisa kiyadi kyetu. Mwene wanda tokwesa kyambote o maka ni ku ngizokela. Wanda batula o maka ni kuyuka ni ku ngibhulula bhu maku mé.”

16 Kyoso Davidi kyazubha kuzwela o ima yiyi, Sawulu wa mwibhwidisa: Eye u mon’ami Davidi? Mukusuluka, Sawulu wamateka o kudila ni dízwi dyaswina, 17 yu wambela Davidi, wixi: “Eye wabeta-kota mu kukala u muthu wambote eme ndenge. Mukonda wa ngibhangela mbote, maji eme nga kuvutwila phulu. 18 Lelu, eye wa ngitangela o mbote i wa ngibhange, mu kukamba ku ngijibha, sumbala Jihova wa ngibhakula bhu maku mé. 19 Kuma, diyala dyebhi dikwata nguma yê, anga umweha kuya ngo sé ku mubhanga kyayibha? Jihova wanda kubesowala mu mbote i wa ngibhangela mu kizuwa kyalelu. 20 Kindala ngejiya ni kidi kyoso kwila, eye wanda kala u sobha. Eye wanda tumina Izalayele mu mivu yavulu. 21 Kyenyiki, mu dijina dya Jihova ngikanene kwila, kiwanda jibha o mwiji* wami ni kujima o dijina dyami mu inzo ya tat’etu.” 22 Kyenyiki, Davidi waxikina kukanena Sawulu. Mukusuluka, Sawulu wayi ku dibhata dyê, maji Davidi ni mayala mê avutuka bhu kididi bhwa diswekele.

25 Mukubhita thembu, Samuwele wafu. O Izalayele yoso adyongeka phala ku mudila ni ku mufunda bhwa zukamene o inzo yê, ku Lamá. Mukyenyiki, Davidi wayi mu kikangalakata kya Palane.

2 Ku Mawone, mwexile diyala wakexile mukalakala ku Kalumelu.* Mwene wexile ni umvwama wavulu, wexile ni midi jitatu ja jimbudi ni midi ya jihombo. Mwene wexile mubhuta o jimbudi jê, ku Kalumelu. 3 O diyala didi, dijina dyê Nabale, o muhatu wê Abingayíle. O muhatu wa wabhele o pholo, wexile ni kilunji, maji o diyala wexile muthu wayibha, wexile we kindanda. Mwene watokalele ku mwiji wa Kalebe. 4 Kyoso kyexile mu kikangalakata, Davidi wevwile kwila, Nabale wexile mubhuta o jimbudi jê. 5 Kyenyiki, Davidi watumikisa dikwinyi dya mayala kwa Nabale, yu wa ambela: “Ndenu kate ku Kalumelu. Kyoso kimwanda sanga Nabale, mu mu menekena mudijina dyami. 6 Mukusuluka, mu mwambela kiki: ‘Kukale kutululuka kokwé ni kudibhata dyé ni ku ima yoso iwala nayu. 7 Ngevu kwila eye ngana, wa mubhuta o jimbudi. Kyoso o abhik’é, kyexile mulanga o jimbudi kumoxi n’etu, etu ki twa abhange kima kyayibha, ki kwajimbila we kima mu thembu yoso itwexile kumoxi ku Kalumelu. 8 Ebhwidisa o mala mé, ene anda kutangela o kidi kiki. Ngakudyondo o mayala mami asange ngalasa ku mesu mé, kuma tweza mu kithangana kya kusanguluka.* Bhana kama koso-koso ku jiselevende jé ni kwa mon’é Davidi. Kama koso-koso ku wala na-ku utena kutubhana.’”

9 Kyenyiki, o mayala a Davidi ayi kwa Nabale ku mutangela o maka oso azwela Davidi. Kyoso ene kyazubha o kuzwela, 10 Nabale wambela o jiselevende ja Davidi, wixi: “Davidi nanyi? Nanyi o mon’â Jesé? Lelu, kwene abhika avulu ene mulenga o jingana jâ. 11 Mukonda dyahi ngeji katula o mbolo yami, o menya’mi ni xitu ya ibhaku i ngajibha phala o mayala akwa kubhuta o jimbudi, ni ku ibhana ku mayala kingejiya se atundu kwebhi?”

12 Mukyenyiki o mayala a Davidi avutuka, ya a mutangela o ima yoso yazwela Nabale. 13 Mu kithangana kyenyokyo, Davidi wambela o mayala mê, wixi: “Tulenu o jixibhata mu mbunda.” Kyenyiki, enyoso atula o jixibhata mu mbunda, Davidi kyene we kyabhange. O mayala ayi ni Davidi, atenesa hama jiwana o axala mulanga o imbamba, atenesa hama jiyadi.

14 Maji, selevende imoxi wambela Abingayíle, muhatu wa Nabale, wixi: “Davidi watumikisa akunji atundu mu kikangalakata phala kumenekena ngana yetu, maji mwene wa alokalala. 15 O mayala yá, atutalatala kyambote, katubhange kima kyayibha, kikutujimbila kima mu kithangana kyoso ki twabhiti kumoxi mu yangu. 16 Mu mwanya ni mu usuku, ene edile kala kilumbu kyexile mu tulangidila, mu kithangana kyoso ki twabhiti kumoxi mu kulanga o kibhanga. 17 Kindala sola se ihi i wanda bhanga, mukonda o kiki kyanda bheka divuwa kwa ngana yetu ni oso atungu ku dibhata dyê. Mwene muthu wayibha* kinéne, séku muthu utena kuzwela-nê.”

18 Kyenyiki, Abingayíle ni lusolo lwoso, wakwata hama jiyadi ja jimbolo, mbinda jiyadi jamakota ja vinyu, mbudi jitanu jobatule kya mu jitumba-jitumba phala ku ilamba. Wakwata we seya* jitanu ja jimbundu jokange, hama ya jibolo jobhange ni jiuva ni hama jiyadi ja jibolo jobhange ni jifiku, yu wajilongo ku jijumendu. 19 Kyenyiki, mwene wambela o jiselevende jê, wixi: “Ngitwamenyenu, nganda mikayela.” Maji mwene katangela kima kwa mwadi wê, Nabale.

20 Kyenyiki, mwene wakulumuka ni jumendu mu njila yengi, ku mulundu, yu wadisange ni Davidi ni mayala mê exile mukwijila mu njila yenyoyo. 21 Davidi wambele, wixi: “O nguzu yoso i ngabhange mukulanga o ima yoso yatokala ku diyala didi mu kikangalakata, yaye ngo mu kingóho. Kikujimbidila kima kya mutokala, maji né kiki, mu ku mubhanga o mbote, mwene wa mu ngivutwila phulu. 22 Nzambi avutwile phonzo, ateku dingi ku jinguma ja Davidi, se kate mungu mu kamene ngikamba kujibha o mayala* oso atokala kwa Nabale.”

23 Kyoso Abingayíle kyamono Davidi, watuluka ni lusolo lwoso ku jumendu, anga ufukamena Davidi ni pholo bhoxi. 24 Kyoso kyafukamene hanji, mwene wambe: “Kikale kikuma kyami ngana yami, ehela o mubhik’é kuzwela, ivwa o izwelu ya mubhik’é. 25 Ngakudyondo ngana yami, kana kubhana mátwi ku diyala didi dyayibha, Nabale. Kala kyala o dijina dyê, kyene kyala mwene. Mwéne Nabale,* mwene wakambe kilunji. Maji eme ngi mubhik’é, kingamono o mayala u watumikisa, ngana yami. 26 Kindala ngana yami, kala Jihova kyene ku mwenyu, ni ngana yami kyene ku mwenyu, Jihova mwéne wa kufidisa phala kukale ni kikuma kya manyinga ni kuvutwila phonzo. O jinguma jé, ni yó asota kubhanga kyayibha kwa ngana yami, akituke kala Nabale. 27 Kindala, bhana o ujitu yú ku mayala mé, o ujitu u ngabheka eme ngi mubhik’ê phala ngana yami. 28 Ngakudyondo, loloka o kikuma kya mubhik’é, kuma Jihova wanda bhana dibhata dinangenena kwa ngana yami, mukonda ngana yami wa mubhânga mu ita ya Jihova. Ku mwenyu wé woso ngana yami, kakusange ni kikuma kya kima. 29 Se bhukala muthu usota ku kujibha, Jihova Nzambi yé, wanda langa o mwenyu wa ngana yami, kala o muthu kyalanga o kima kyavalolo mu mbwenga yê. Maji mwene wanda takula dikanga o mwenyu wa jinguma jé kala kyatakula o ditadi ni mbalafunda. 30 Kyoso Jihova kyanda kubhana o ima yoso yambote yakanena kwa ngana yami, mu ku kutumbika kala sobha mu Izalayele, 31 eye kiwanda dyela* mba kukala ni dilamba ku muxima mukonda dya kuzunzumuna manyinga akambe kikuma mba mu kuvutula phonzo.* Kyoso Jihova kyanda bhana o ima yoso yambote kwa ngana yami, kana kujimba o mubhik’é.”

32 Kyenyiki, Davidi wambela Abingayíle, wixi: “Jihova o Nzambi ya Izalayele, a muximane, wa kutumikisa mu kizuwa kyalelu, phala ku ngisanga. 33 Nga kusakidila we mukukala u muhatu wa kilunji. A kubesowale mu kizuwa kyalelu, mu ku ngifidisa kukala ni kikuma kya manyinga ni kuvutula phonzo.* 34 Se kikyene, kala Jihova o Nzambi ya Izalayele wene ku mwenyu, se kiwejile mudisanga n’eme, mungu mukamene kikweji subhuka ne ngo diyala* dimoxi watokala ku dibhata dya Nabale.” 35 Kyenyiki, Davidi watambula o ima yabheka Abingayíle, yu wa mwambela: “Eme ngevu i wazwela, nganda bhanga kala ki wambe. Ndé kubhata dyé ni kutululuka.”

36 Ku pholo dyakwenda Abingayíle kya vutuka kwa Nabale, mwene wa musange yu udya ni kunwa, kala sobha mu inzo yê. Nabale* wasangulukile, wakodiwile kyavulu. Abingayíle kamutangela kima mu kizuwa kyenyokyo. 37 Mu kamene, kyoso Nabale o uhôlwa wa mubhitile kya, o muhat’wê wa mutangela yoso. Kyenyiki, o muxima wa Nabale wedile kala wa muthu wafu. Wedile kala ditadi, kexile mudizambesa. 38 Mukubhita kwinyi dya izuwa, Jihova wabhangesa Nabale kufwa.

39 Kyoso Davidi kyevu kwila Nabale wafu, mwene wambe: “Jihova ataneku, wa ngizokela, wa ngikatula o jisonyi ja ngibhekela Nabale, yu wafidisa selevende yê kubhanga kima kyayibha. Jihova wabhangesa o kuyibha kwa Nabale kuvutuka kuthandu dyê.” Mukusuluka, Davidi watumikisa njimbu kwa Abingayíle, mu ku mubhinga phala kukala muhat’wê. 40 Kyoso o jiselevende ja Davidi kyayi mudisanga ni Abingayíle ku Kalumelu, a mwambela: “Davidi watumu ku kutakana phala kukala muhat’wê.” 41 Mu kithangana kyenyokyo, mwene wafukama ni pholo bhoxi, yu wambe: “Ngala polondo phala kukala mubhika wakusukula o inama ya jiselevende ja ngana yami.” 42 Kyenyiki, Abingayíle wa disokejeka ni lusolo yu wabande ku jumendu ni kitanu kya jiselevende jê ja ahatu, ayi kumoxi ni akunji anga ukala muhatu a Davidi.

43 Davidi wakazalele we ni Ahinowa mukwa Jezelele, anga o kiyadi kya, akala ahat’wê.

44 Maji Sawulu wabhana mon’ê Mikala, muhatu a Davidi kwa Palati mon’â Layíxi mukwa Ngalime.

26 Mu kubhita thembu, o mayala akwa Zife ayi kwa Sawulu ku Ngibeya, ya a mwambela, exi: “Davidi wadisweka ku mulundu wa Hakila ku Jezimone.”* 2 Kyenyiki, Sawulu wakulumuka kate mu kikangalakata kya Zife ni midi jitatu ja masoladi exile dingi ni uhete mu Izalayele, phala kusota Davidi. 3 Sawulu wexile ku mulundu wa Hakila ku Jesimone, ku mbandu ya kikoka. Davidi watungile mu kikangalakata, yu weza mu kwijiya kwila Sawulu wexile mu musota mu kikangalakata. 4 Kyenyiki, Davidi watumikisa alondi, phala kwijiya se Sawulu wejile mwene. 5 Mukusuluka, Davidi wayi kate bhu kididi bhwexile Sawulu, yu wamono Sawulu ni Abinele mon’â Nele, o kabhitangu ka masoladi. Ene exile muzeka. Sawulu wexile muzeka bhu kididi kyê, o masoladi mê a mukondolokele. 6 Kyenyiki, Davidi webhwidisa Ahimeleke, o mukwa Hiti ni Abizayi, mon’â Zeluya phange a Jowabe, wixi: “Nanyi wandaya n’eme kate bhwala Sawulu?” Abizayi wa mutambwijila, wixi: “Eme ngandaya n’eye.” 7 Davidi ni Abizayi ayi mu usuku kate bhwexile Sawulu, a musange yu zeka. O sosa yê wa ikubu bhoxi bhu mbandu a mútwe wê. Abinele ni masoladi azeka mu jimbandu, o Sawulu amute mukaxi.

8 Abizayi wambela Davidi, wixi: “Lelu Nzambi wa kubhakula o nguma yé bhu maku mé. Kindala ngehele ngi mukube o sosa. Nganda mukuba lumoxi ngo, kikwanda bhinga kukibhanga mu luyadi.” 9 Maji Davidi wambela Abizayi, wixi: “Kana ku mubhanga kima kyayibha. Kuma nanyi ubhanga kima kyayibha ku muthu a mu undu kwa Jihova, anga ukamba kukala ni kikuma?” 10 Davidi wambe dingi, wixi: “Mu dijina dya Jihova wene ku mwenyu, Jihova mwene wanda mujibha mba sayi kizuwa mwene wandafwa, mba mwene wandaya mulwa o ita anga a mujibha kwenyoko. 11 Mukonda dya kuxila Jihova, eme kinganda bhanga kima kyayibha ku muthu a mu undu kwa Jihova. Kyenyiki, tukwate ngo o sosa ni mbinda ya menya yala bhu mbandu a mútwe wê ni tuyetu.” 12 Mukiki, Davidi wakwata ngo o sosa ni mbinda ya menya yexile bhu mbandu a mútwe wa Sawulu, anga aya. Séku muthu wa amono mba weza mukwijiya kwila ene exile bhobho, ne ngo kubalumuka. Enyoso exile muzeka, mukonda Jihova wa abhangesa kuya kukilu kyazongo. 13 Kyenyiki, Davidi wayi ku mbandu ya mukwa, yu wemana ku thandu a mulundu. Mwene wexile dikanga dya Sawulu ni masoladi mê.

14 Davidi wadikola ni dízwi dyaswina ku masoladi ni kwa Abinele mon’â Nele, wixi: “Abinele, eye u ngivwa?” Abinele watambwijila, wixi: “Nanyi wa mukwixana o sobha?” 15 Davidi wambela Abinele, wixi: “Eye kudiyala dya nguzu? Mu Izalayele, nanyi wasoko n’eye? Kyenyiki-phe, mukonda dyahi eye ki ulangidila o ngana yé o sobha? Kuma sayi disoladi wabokona mu balaka mwexile o sobha phala ku mujibha. 16 O kima ki wabhange kyayibha. Mudijina dya Jihova wene ku mwenyu, enu mwatokala kufwa. Mukonda kimwalangidila o ngana yenu a mu undu kwa Jihova. Kindala, tala hanji ku mbandu yé, kwebhi kwala o sosa ni mbinda ya menya yexile bhu mbandu a mútwe wa sobha?”

17 Kyenyiki Sawulu wamono kwila dyodyo dyexile o dízwi dya Davidi yu wa mwibhwidisa: “Eye u mon’ami Davidi?” Davidi wa mutambwijila, wixi: “Xe! Eme mwene ngana yami u sobha.” 18 Mwene wambe dingi, wixi: “Mukonda dyahi eye u ngana wa musota o selevende yé phala ku mujibha? Kima kyahi ki ngabhange? Kikuma kyahi kingala nakyu? 19 Ngakudyondo ngana yami u sobha, ivwa o izwelu ya selevende yé. Se Jihova mwene wakutumu, axikine* o sata yami ya jimbutu. Maji se athu a kufunyisa, Jihova a akaxtikale, mukonda mwa ngikaye. Kimwangehela kubhanga mbandu ku undundu wa Jihova. Ene a ngambela: ‘Ndé, wabheze jinzambi jengi!’ 20 Kyenyiki, kana kwehela o manyinga mami kwa zunzumuna bhoxi, dikanga dya kididi bhu twene mubheza Jihova. Kuma o sobha ya Izalayele watundu phala kusota mbwanana,* kala dinyanga dya musota kukwata ngwadi ku milundu.”

21 Sawulu wambe: “O kima ki ngabhange kyayibha! Vutuka mon’ami Davidi, kinganda kubhanga dingi kima kyayibha mukonda lelu eye wabhana valolo ku mwenyu wami. Mukidi, o kima ki ngabhange wowa. Ngate kituxi kyadikota.” 22 Davidi wambe: “O sosa ya sobha yiyi, tuma muthu n’eze mu itakana. 23 Jihova mwene wanda futa kala muthu mu kima kyambote kyabhange ni mu ufiyele wê, kuma lelu Jihova wa kubhakula bhu maku’ami, maji eme ngaditunu kubhanga kima kyayibha ku muthu a mu undu kwa Jihova. 24 Kala ki ngabhana valolo ku mwenyu wé lelu, Jihova abhane we valolo ku mwenyu wami, anga a ngibhulule mu ibhidi yami yoso.” 25 Sawulu watambwijila Davidi, wixi: “A kubesowale mon’ami Davidi. Ngi kutangela o kidi kwila, eye wanda bhanga ima yamakota ni kwila wanda ditunda kyambote.” Mukusuluka, Davidi waditela njila yê, Sawulu wavutuka we kubhata dyê.

27 Davidi wazwela ku muxima wê, wixi: “Sayi kizuwa Sawulu wanda ngijibha, kota se ngilenga mu ixi ya akwa Fidíxa. Kyenyiki, Sawulu kanda ngisota dingi mu ixi yoso ya Izalayele. Nganda tena kubhuluka bhu maku mê.” 2 Davidi ni hama samanu a mayala exile-nê kumoxi ayi kwa Akiji mon’â Mawoka sobha ya Ngate. 3 Davidi ni mayala mê ayi kumoxi ni miji yâ, anga atunga ni Akiji ku Ngate. Davidi wambata o ahat’wê ayadi, Ayinowa mukwa Jezelele ni Abingayíle mukwa Kalumelu, o mutudi wa Nabale. 4 Kyoso Sawulu kya mutangela kwila Davidi walengela ku Ngate, mwene weha ku musota.

5 Davidi wambela Akiji, wixi: “Se ngasange ngalasa ku mesu mé, ngibhane kididi mu jisanzala ja kutokala phala ngitunge-mu. Mukonda dyahi o selevende yé weji tunga kumoxi n’eye, mu mbonge ya sobha?” 6 Mu kizuwa kyenyokyo, Akiji wa mubhana o mbanza ya Zikilake. Mukonda dyakiki kate mu kizuwa kyalelu o mbanza ya Zikilake yatokala ku jisobha ja Judá.

7 Davidi watungu muvu umoxi ni mbeji jiwana mu ixi ya akwa Fidíxa. 8 Davidi ni mayala mê exile muya mubhanga o ita ni akwa Jesule ni akwa Ngelezita, ni akwa Amaleke, mukonda ene atungile mu jimbandu jiya tunde ku Telame kate ku Sule, mu ku kulumuka mu ixi ya Ijitu. 9 Kyoso Davidi kyexile muya mulwa o ita, mwene wexile mujibha athu oso, kikale diyala mba muhatu. Mwene wexile mukwambata o jimbudi, o jingombe, o jijumendu ni jikamelu ni izwatu. Mukusuluka, Davidi wexile muvutuka ku Akiji. 10 Kyoso Akiji kyexile mu mwibhwidisa: “Lelu wayi mulwa ni ananyi?” Davidi wexile mutambwijila: “Lelu ngayi ku mbandu ya lwiji* ya Judá, mba ku mbandu ya lwiji ya Jelamele, mba ku mbandu ya lwiji ya akwa Makenezewu.” 11 Davidi wexile mujibha o mayala oso ni ahatu oso, phala ka ambate ku Ngate. Mukonda Davidi wexile muzwela: “Ene atena kutuxitala, mu kuzwela o ima i ngabhange.” (Kyene kyakexile mubhanga Davidi, mu kithangana kyoso kyatungu mu ixi ya akwa Fidíxa.) 12 Akiji wexile muxikina mu yoso yexile mu mutangela Davidi. Mwene wexile muxinganeka: ‘Sé phata mwene a muzembe ku* mundu wê wa Izalayele, kyenyiki mwene wanda kala jinga selevende yami.’

28 Mu izuwa yenyoyo, o akwa Fidíxa ongeka o masoladi mâ, phala kuya mubhânga ni akwa Izalayele. Kyenyiki, Akiji wambela Davidi: “Mukidi o masoladi mé, andaya n’eme mu ita.” 2 Davidi wambela Akiji: “Eye ngana wejiya kyambote ihi yanda bhanga o selevende yé. Mukusuluka, Akiji wambela Davidi, wixi: “Mukonda dya kiki wanda kala jinga u mulangidi wami.”*

3 Kyoso Samuwele kyafu, o akwa Izalayele a mudidi, ya a mufundila mu mbanza mwa muvwalela, ku Lamá. Sawulu anga ukaya o imbanda ni akwa kuzambula.

4 O akwa Fidíxa adibhongolola anga akala ku Suneme. Kyenyiki, Sawulu ubhongolola o Izalayele yoso, anga akala ku Jilibowa. 5 Kyoso Sawulu kyamono o masoladi akwa Fidíxa, wôma wa mukwata yu wakexile muteketa kyavulu. 6 Sumbala Sawulu wexile musota o kikwatekesu kya Jihova, maji Jihova kakexile mu mutambwijila, né ngo bhukaxi ka jinzoji, né bhukaxi ka Udimi mba ka jipolofeta. 7 Mukusuka-ku, Sawulu wambela o jiselevende jê, wixi: “Ngisotelenu muhatu mukwa kuzambula, phala ngiye-ku ni ngi mwibhule.” O jiselevende jê, amwambela: “Ku Ene-Ndole, sayi-ku muhatu mukwa kuzambula.”

8 Kyenyiki, Sawulu wazwata izwatu yengi phala ka mu tungunune, anga utunda ni jiselevende jê jiyadi mu usuku phala kuzwela ni muhatu. Kyoso kyabhixila kwenyoko, mwene wambela o muhatu: “Ngakudyondo, ngitangele yanda bhita ku hádya bhukaxi ka kuzambula. Ngixanene o muthu unganda kutangela.” 9 O muhatu wa mutambwijila: “Eye wejiya kyambote yabhange Sawulu, mwene wakaye mu ixi, o imbanda ni akwa kuzambula. Kyenyiki, mukonda dyahi wa mungitela o mubhetu yú, phala n’a ngijibhe?” 10 Sawulu wa mukanena mu dijina dya Jihova mu kwamba: “Mu dijina dya Jihova wene ku mwenyu, eye kiwanda kala ni kikuma mu maka yá.” 11 Mukusuluka, o muhatu wa mwibhwidisa: “Wamesena kwila ngixana nanyi?” Sawulu wa mutambwijila: “Exana Samuwele.” 12 Kyoso o muhatu kyamono Samuwele,* mwene wadikola ni dizwí dyaswina yu wambela Sawulu, wixi: “Mukonda dyahi wa ngi nganala? Ngana, mbe eye mwene Sawulu!” 13 O sobha wa mwambela: “Kana kukala ni wôma, wa mumona ihi?” O muhatu watambwijila: “Nga mumona muthu wedi kala nzambi, wa mutunda kox’a mavu.” 14 Sawulu webhwidisa dingi: “Mwene wadifu kyebhi? O muhatu wa mutambwijila: “Diyala dyakuka kya wa mubanda, wazwata divunga.” Sawulu watongolola kwila, yó wexile “Samuwele.” Kyenyiki, wafukama yu wabhetama ni pholo bhoxi.

15 Samuwele anga webhwidisa Sawulu, wixi: “Mukonda dyahi wa mu ngithandanganyesa mu ku ngibhangesa kwiza?” Sawulu wa mutambwijila: “Ngatate, Nzambi wangyehelela. Mwene, kamungitambwijila, né ngo bhukaxi ka jipolofeta mba ka jinzoji. Mukonda dyakiki, kyene ki ngakwixana, phala ku ngitangela se ihi i ngatokala kubhanga.”

16 Kyenyiki, Samuwele, wambe: “Mukonda dyahi wa mu ngisota, se kindala Jihova wakubhana dikunda, yu wadibhange nguma yé?” 17 Jihova wanda kumbidila yoso yakanena bhukaxi kami. Jihova wanda tambula o ungana bhu maku mé, phala ku ubhana ku muthu wengi. Mwene wanda ubhana kwa Davidi. 18 Mu kizuwa kyalelu, Jihova wa mubhanga o ima yiyi kokwé, mukonda kubelesela o dizwí dya Jihova, kubwikisa akwa Amaleke a mubhekele o njinda yavulu. 19 Jihova wanda bhakula we eye ni Izalayele yoso bhu maku a akwa Fidíxa. Mungu, eye ni twana twé mwanda kala kumoxi n’eme. Jihova wanda bhakula we o kifuxi kya Izalayele bhu maku a akwa Fidíxa.”

20 Mu kithangana kyenyokyo, Sawulu wabu bhoxi ni wôma wavulu, mukonda dya izwelu ya Samuwele. Mwene kakexile ni nguzu mu mukutu, mukonda tunde mu kamene kate mu usuku, kadile kima. 21 Kyoso o muhatu kyazukama kwa Sawulu, yu wamono kwila, wa thandanganyele kyavulu, wamwabela, wixi: “O selevende yé, wa kubelesela ngo, eme ngate o mwenyu wami mu kilwezu, anga ngabhange o kima ki wa ngitumu. 22 Ngakudyondo, ivwa o izwelu ya selevende yé. Ngehele ku kubhana kambolo, phala udye, ni ukale ni nguzu mu mukutu phala kubhanga o njila yé.” 23 Maji mwene waditunu yu wambe: “Kingamesena kudya.” Mukyenyiki, o muhatu ni jiselevende ja Sawulu a mujijidika phala kudya. Kudisukilu mwene wa a evu, wabalumuka bhoxi, yu waxikama ku kyalu. 24 O muhatu wayi ni lusolo, wajibha* kangombe ka kexile monzo. Mukusuluka, wakwata ku fuba ya tiliku, yu wabhange jimbolo ja kambe felemendu. 25 Wakwata o kudya yu wabhana kwa Sawulu ni jiselevende jê, ene anga adya. Mukusuluka, abalumuka ya abhange o njila yâ mu usuku.

29 Akwa Fidíxia anga ongeka o masoladi mâ moso ku Afeke, maji o akwa Izalayele ongeka o masoladi mâ ku fixi ya Jezelele. 2 O jinguvulu ja akwa Fidíxa akexile ku pholo mukwenda kumoxi mu ibuka ya jihama ya masoladi ni ibuka ya jimidi. Davidi ni mayala mê exile kudima kumoxi ni Akiji. 3 Maji o ilamba ya akwa Fidíxa, ambe: “Mukonda dyahi o Jihebelewu jiji a mukwiza kumoxi n’etu?” Akiji wa atambwijila: “Yú Davidi selevende ya Sawulu, o sobha ya Izalayele, mwene wala kya n’eme muvu umoxi ndenge. Tunde o kizuwa kyalenge ngana yê yu weza kokwami kate mu kizuwa kyalelu, kingamono kima kyayibha kwa mwene.” 4 Maji o ilamba ya akwa Fidíxa akala ni njinda anga a mwambela, exi: “Tuma o diyala didi kuvutuka mu kididi ki wa mubhana, kana ku mwehela kuya kumoxi n’etu mu ita phala mwene katulungulukile mu kithangana kya kubhanga o ita. O kwila mwene keji jibha o mayala metu mu ita phala n’a mukwatele henda kwa ngana yê? 5 Yú ki mwene Davidi a mutele mu mwimbu, kyoso athu kyexile mukina, ni kwamba:

6 Kyenyiki, Akiji wexana Davidi yu wa mwambela: “Mu dijina dya Jihova wene ku mwenyu, eye u muthu wambote. Ngasanguluka kyavulu mukwiza kudibunda kumoxi ni kifuxi kyami kya masoladi. Tunde o kizuwa ki weza kokwami kate mu kizuwa kyalelu, kingamono kima kyayibha kokwé, maji o jinguvulu ja akwa Fidíxa, ka kudyelela. 7 Kyenyiki, vutuka ni kutululuka. Kana kubhanga kima kitena kubhekela njinda ku jinguvulu ja akwa Fidíxa.” 8 Maji Davidi webhwidisa Akiji, wixi: “Mukonda dyahi? Ihi i ngabhange? Kima kyahi kyayibha ki wamono kwa selevende yé tunde o kizuwa ki ngadibhakula kokwé kate lelu? Mukonda dyahi kingitena kuya kulwa o ita ni jinguma ja ngana yami, o sobha?” 9 Akiji wa mutambwijila: “Mudyami, eye u muthu wambote, eye wedi kala u anju ya Nzambi. Maji o ilamba ya akwa Fidíxa ambe: ‘Kana ku mwehela kuya kumoxi n’etu mu ita.’ 10 Mukonda dyakiki, mungu mu kamene mu balumuka selu, eye ni jiselevende ja ngana yé eza kumoxi n’eye ni muvutuke.”

11 Kyenyiki, Davidi ni mayala mê abalumuka mu kamene kaselu phala kuvutuka mu ixi ya akwa Fidíxa. Akwa Fidíxa anga ayi ku Jezelele.

30 Kyoso Davidi ni mayala mê, kyabhixila mu Zikilake mu kizuwa kya katatu, ene amono kwila o akwa Amaleke ayile mubhanga ita ku mbandu ya lwiji,* ya abhixila ku mbanza ya Zikilake anga a ita mu túbhya. 2 Ene ambata o ahatu ni ima yoso yakexile mu mbanza, tunde ku mona-ndenge kate ku mwadyakime. Ambata o ima yoso, maji kajibha-ku muthu. 3 Kyoso Davidi ni mayala mê kyabhixila mu mbanza, ene amono kwila o mbanza a ite túbhya ni kwila o ahatu ni twana twâ, a ambata. 4 Kyenyiki, Davidi ni mayala mê amateka kudila ni dízwi dyaswina kate bhwasuku o nguzu yâ. 5 O ahatu ayadi a Davidi Ahinowa mukwa Jezelele ni Abingayíle, mutudi wa Nabale mukwa Kalumelu, kiyadi kya, a ambata wa. 6 Davidi anga utata kyavulu, kuma o mayala* mê moso atatele we kyavulu mukonda ambatele o twana twâ ni kwila ene akexile muzwela kwila anda mububa ni matadi. Maji Davidi ukala ni nguzu mu kudyelela kwa Jihova Nzambi yê.

7 Mukusuluka, Davidi wambela o mukunji Abiyatale mon’â Ahimeleke, wixi: “Ngakudyondo ngibhekele o efode bhabha.” Abiyatale anga wambata o efode kwa Davidi. 8 Davidi webhwidisa Jihova: “O kwila ngitena kukayela o mayala ambata o ima? O kwila nganda ku akwata?” Mwene wa mutambwijila: “Ndé wa akayele, wanda kwakwata mwene, wanda kwatambula o ima yoso yambata.”

9 Mu kithangana kyenyokyo, Davidi wayi kumoxi ni hama samanu a mayala exile-nê. Kyoso kyabhixila mu honga* ya Bezolo, sayi yá, axala kwenyoko. 10 Mu kukayela o mayala enyó, Davidi wasuluka ni hama jiwana ja mala, maji o hama jiyadi ja mala axalele kudima mukonda atohokele kyavulu, katenene kuzawuka o honga ya Bezolo.

11 O mayala ayile ni Davidi, asange diyala mukwa Ijitu mu mukáwu ya a mwambata kwa Davidi. Anga a mubhana kudya ni menya. 12 A mubhana kibhasu* kya bolo kyobhange ni jifiku ni ibhasu iyadi ya bolo yobhange ni jiuva, mukonda mwene wabhiti izuwa itatu sé ngo kudya kama mba kunwa menya. Kyoso kyazubha o kudya o nguzu yeza dingi mu mukutu. 13 Davidi wa mwibhwidisa: “Eye u selevende ya nanyi? Kwebhi ku watundu?” Mwene watambwijila: “Ngimukwa Ijitu, ngimubhika wa diyala mukwa Amaleke, maji o ngana yami wa ngibwazeka mukonda ngakate kya mu izuwa itatu. 14 Etu twayi mubhânga ni akwa Makeleti ku mbandu ya lwiji* mu mbanza ya Judá ni ku lwiji* ya mbambe ya Kalebe. Etu twate mu túbhya o mbanza ya Zikilake. 15 Kyenyiki, Davidi wa mwibhwidisa: “O kwila utena ku ngambata kate bhwala o mayala yá?” Mwene wa mutambwijila: “Se u ngikanena mu dijina dya Nzambi kwila, kiwanda ngijibha mba ku ngibhakula bhu maku a ngana yami, eme nganda kwambata ku mayala yá.”

16 Kyenyiki, mwene wambata Davidi kate bhwakexile ene. O akwa Amaleke a dimwangene mu mukawu woso wenyo, akexile mudya, munwa, kubhanga fesa, mukonda dya imbamba yavulu yakatwile mu ixi ya akwa Fidíxa ni mu ixi ya Judá. 17 Mukiki-phe, Davidi wayi ni ku ajibha tunde ku makolombolo kate mu usuku wa kizuwa* kya mukwa. Kwabhuluka ngo hama jiwana ja mayala alenge ni jikamelu. 18 Davidi watambula o ima yoso yambatele akwa Amaleke, yu wabhulula o ahat’wê ayadi. 19 Kibhukambele kima mba muthu. Mwene watambula o ana, ni imbamba yoso. Davidi watambula o imbamba yoso yambatele. 20 Davidi wakwata o jimbudi joso ni jingombe, o mayala mê ene ajendesa ku pholo dya ibhaku yâ, ya ambe: “O ima yoso yatokala kwa Davidi.”

21 Mukusuluka, Davidi wavutuka kate bhwoso bhwexile o hama jiyadi ja mala, atohokele kyavulu mu ku mukayela, ya axalele mu honga ya Bezolo. Ene eza mu disanga ni Davidi ni yó akexile-nê kumoxi. Davidi wazukama yu wa ebhwidisa: “Kyebhi kimwala?” 22 Maji sayi mayala ayibha abhumu, ayile ni Davidi, ambe: “Kuma o mayala yá kayile n’etu, kitwanda kwabhana kima ku ima i twatambula. Kala muthu mudyâ, wanda kwambata ngo o muhat’wê ni twana twê.” 23 Kyenyiki, Davidi watambwijila: “Phange jami, kanenu kubhanga kiki ni ima yatubhana Jihova. Mwene watulange, yu wabhakula bhu maku metu o mayala ambata o imbamba yetu. 24 Nanyi weji xikina mu ima imwa muzwela? O mbandu yanda tambula yó ayi mu ita, yanda sokela ni mbandu yanda tambula yó axala mukulanga o imbamba. Enyoso anda sokela mu imbamba yanda tambula. 25 Tunde o kizuwa kyenyokyo, o yazwela Davidi ya dibhange kijila ni kitumu mu Izalayele kate mu kizuwa kyalelu.

26 Kyoso Davidi kyabhixila ku Zikilake, watumikisa mbandu ya ima kwa adyakime a Judá, exile o makamba mê, ni njimbu ya kwila: “O ujitu* yú, phala enu, a ukatula ku ima yatambula ku jinguma ja Jihova.” 27 Davidi watumikisa ujitu kwa yó akexile ku Betele ni ku Lamote ya Nengebe* ni ku Jatile 28 ni ku jimbanza ja akwa Alowele ni ku Sifimote ni ku Xitimowa 29 ni ku Lekele ni ku Jelamele ni mu mbanza ya akwa Makenezewu 30 ni ku Holoma, ni ku Bolaxane ni ku Ataka 31 ni ku Hebolone ni mu ididi yoso mwabhitile Davidi ni mayala mê.

31 O akwa Fidíxa exile mubhânga ni akwa Izalayele, o mayala akwa Izalayele alenge o akwa Fidíxa. Athu avulu akwa Izalayele a ajibha ku mulundu wa Jilibowa. 2 O akwa Fidíxa akayela Sawulu ni an’ê anga ajibha Jonatá, Abinadabe ni Malekizuwa, o an’â Sawulu. 3 O ita yabhonzele kyavulu phala Sawulu. O akwa kutakula o mifula a musange, anga a mutakula mifula, ya a mukwama kyavulu. 4 Kyenyiki, Sawulu wambela o mukwatekexi wê, wixi: “Kwata o xibhata ni u ngijibhe, phala o yá akambe kwa saya, kangitalatale ni kuyibha kwoso anga a ngijibha.” Maji o mukwatekexi wê, kamesenene ku mujibha, mukonda wexile ni wôma wavulu. Kyenyiki, Sawulu usunga o xibhata yê, anga udikuba-yu, yu wabu bhoxi. 5 Mu kumona kwila Sawulu wafu, o mukwatekexi wê wakwata o xibhata yu wadikubu we, kiyadi kyâ anga afwa. 6 Sawulu ni an’ê atatu ni mukwatekexi wê ni mayala mê, afu mu kizuwa kyenyokyo. 7 O akwa Izalayele exile mu honga ya Jezelele, ni mu jimbandu ja Njolodá, kyoso kyamono kwila Sawulu ni an’ê afu ni kwila o kifuxi kya masoladi kya Izalayele kyalenge, ene axisa o mbanza, ya alenge. Mukusuluka, o akwa Fidíxa eza anga atambula o mbanza.

8 Mu kizuwa kyakayela, kyoso akwa Fidíxa kyayi mu bhongolola o ima ya athu afu, asange o kimbi kya Sawulu ni kya an’ê atatu ku mulundu wa Jilibowa. 9 Ene anga abatula o mútwe wa Sawulu, a muzula o kibhakatu kyê, ya atumikisa akunji phala kutula o ngonge mu jinzo ja iteka yâ, ni ku mundu. 10 Kyenyiki, akwata o kibhakatu kya Sawulu ya akitula mu inzo ya Axitolote. O kimbi kyê akinyenga ku ilumbu ya Betesane. 11 Kyoso o akwa Jabeze mu Ngiliyade, kyeza mu kwijiya yabhange akwa Fidíxa kwa Sawulu, 12 o masoladi oso, ende o usuku woso, ya akatula o kimbi kya Sawulu ni ya an’ê ku ilumbu ya Betesane. Mukusuluka, avutuka ku Jabeze, anga oha o imbi kwenyoko. 13 Akatula o ifuba, ya a ifundu bhu mbandu a muxi wa Mutamala, anga ajejuwala mu sambwadi dya izuwa.