MUKANDA KU AKWA EFEZU

1 Eme Phawulu poxolo ya Kidistu Jezú mu vondadi ya Nzambi, nga mu sonekena o athu akôla ala mu mbanza ya Efezu, ala jifiyele mwa Kidistu Jezú:

2 Mu kale ni ngalasa ni kutululuka kutunda kwa Nzambi, Tat’etu, ni kwa Ngana Jezú Kidistu.

3 Tuximane Nzambi o Tata ya Ngana yetu Jezú Kidistu, mukonda ku dyulu, mwene wa tubesowala mwa Kidistu ni mabesá oso ejila bhukaxi ka nzumbi yê ikôla. 4 Ande dya kubhanga o ngongo, Nzambi watusolele kyá phala tukale kumoxi ni Kidistu, ni tukale tu athu azele sé itondalu bhu pholo ya mwene ni henda. 5 Mukonda mwene waxindi kwila tukala tu an’ê bhukaxi ka Jezú Kidistu, kala kya mesena mwene mu vondadi yê, 6 phala o athu aximane Nzambi mukonda mwene wa tulondekesa o ngalasa yê bhukaxi ka Mon’ê wa kazola. 7 Bhukaxi ka Mon’ê, a tubhulula mu ku tu kula. Bhukaxi ka manyinga mê, atuloloka o ituxi yetu. O ngalasa ya tu idikisa Nzambi, yadikota.

8 Mwene wa twidikisa o ngalasa yiyi ya dikota ni unjimu woso ni kwijiya kwoso* 9 mu ku tu jimbulwila o ikutu ikôla ya vondadi yê kala kya mu wabhela mwene. O ikutu yiyi yalungu ni 10 kwongeka o ima, kyoso kyeji tenena o kithangana kyoxinde kya kwongeka o ima yoso mwa Kidistu, kixi o ima ku dyulu, kixi o ima mu ixi. Kyene, kwongeka o ima yoso mwa Kidistu. 11 Etu twala kumoxi ni mwene, kyenyiki, Nzambi watusolo phala tutambule o mabesá a tukanena, mukonda mu vondadi yê, Nzambi wa tusolele kyá ukulu. Mukonda mwene ubhanga o ima yoso kala kyamesena. 12 Kuma étu twa dyanga kukala ni kidyelelu kwa Kidistu, twatokala kuximana ni kufumanesa Nzambi. 13 Maji enu we mwadyelela kwa Kidistu kyoso ki mwevu o maka a kidi alungu ni njimbu yambote ya kubhuluka kwenu. Mu kuxikana kwa mwene, Nzambi wamite o kidimbu ni nzumbi ikôla ya tukanene, mwene wabhange kiki bhukaxi ka Kidistu. 14 O nzumbi ikôla yedi kala kidyelelu* kidikisa kwila twanda tambula o ima ya tukanena Nzambi. Nzambi wabhange kiki phala kubhulula o mundu wê bhukaxi ka kukúla, phala o fuma yê.

15 Eme we kyoso kingevu yalungu ni kixikanu kyenu mwa Ngana Jezú ni henda i mwene mu londekesa ku jiphange joso,* 16 kingene mufula kusakidila Nzambi mukonda dyenu. Ngene mu mitumbula jinga mu misambu yami, 17 phala Nzambi, o Tata yafuma, Tata ya Ngana yetu Jezú Kidistu a mibhane o kutena kwa kukala ni unjimu ni kutendela o ima yene mujingununa, phala tukale ni kwijiya kwakidi kwalungu ni mwene. 18 Nzambi wa mijikula o mixima, phala mumone ni mwijiye o kidyelelu kya mibhana mwene, ni mabesá akatunda anda bhana ku athu’ê akôla. 19 Phala mwijiye o kutena kwa dikota kwene mu tulondekesa, etu twa muxikana. Mwene walondekesa o kutena kuku 20 kyoso kya fukununa Kidistu mw’alunga, yu wa muxikamesa ku mbandu yê ya kadilu ku dyulu, 21 wa mu tumbika* kuthandu dya jinguvulu joso, maungana, kutena, atumini ni majina moso, mwene a mu zangeleka kuthandu dya mautuminu oso ala ku mundu yú* ni ku mundu wakezaku. 22 Nzambi wa mutudila o ima yoso bhoxi dya inama yê, yu wa mubhangesa kukala o mutwameni wa ima yoso ya kilunga, 23 mukonda o kilunga kyene o mukutu wê, mwene utenesa o ima yoso mu kilunga mu maukexilu oso.

2 Nzambi wa mibhana dingi o mwenyu, sumbala mwa fwile kyá mukonda dya itondalu ni ituxi yenu. 2 M’ukulu kyéne kimwexile mubhanga, kyoso kimwexile mu kwenda kala kyenda o athu a mundu yú ni kubhanga o ima ya mesenene o mutwameni wa mundu yú. Mwéne ufunyisa o ixinganeku* ya athu abhukumuka. O ixinganeku yiyi ya dimwange mu ididi yoso. 3 Kyene, m’ukulu twakexile we mubhanga o ima yene mubhanga ene, mu kusuwa o jihânji jetu ja xitu, ni kubhanga o jivondadi ja xitu ni ima ituxinganeka. Etu we twa fwamene o kutambula o kaxtiku ka Nzambi kala ene. 4 Maji Nzambi mukwa kuloloka, mukonda dya henda yadikota ya tulondekesa, 5 watubhana mwenyu kumoxi ni Kidistu, sumbala twa fwile kyá mukonda dya ituxi yetu. Enu amibhulula mu ngalasa ya Nzambi. 6 Nzambi watubhana o mwenyu, yu wa tuxikamesa ku dyulu, mukonda mwene wala kumoxi n’etu ni Kidistu Jezú. 7 Nzambi wanda bhanga kiki ku mundu* wa ubhe wakezaku, mwene wanda londekesa o ngalasa yê yadikota kyoso kyanda tubhana o ima yoso yambote, mukonda dya kukayela Kidistu Jezú.

8 Mu ngalasa ya Nzambi, enu amibhulula bhukaxi ka kixikanu, maji kiki ki kyabhiti mu nguzu yenu, kana, mu kidi yú ujitu wamibhana Nzambi. 9 O kubhuluka kuku, ki kwijila mu ima i mubhanga, kana, phala kibhukale muthu udizangeleka. 10 Etu twala tu ikalakalu ya maku ma Nzambi, atubhange bhukaxi ka Kidistu Jezú phala kubhanga o ikalakalu yoso yambote yaxindile kyá Nzambi, phala etu ku ibhanga.

11 Kyenyiki, enu mu akwa jixi jengi, lembalalenu kwila o yó “a asaye” kwala o athu, m’ukulu ene a milukile kwila mu “athu akambe ku misaya.” 12 Mu thembu yenyoyo, enu kimwejidile Kidistu, ki mwa tokalele ku kifuxi kya Izalayele, ki mwa bhangele mbandu ku ikutu yo kanene, kimwexile ni kidyelelu, kimwejidile Nzambi. 13 Maji mukonda dya Kidistu Jezú, enu sumbala mwakexile dikanga dya Nzambi, kindala mwa mu zukama bhukaxi ka manyinga ma Kidistu. 14 Mukonda Kidistu mwéne watubhekela o kutululuka, yu wabhangesa kwila o ibuka iyadi ikale ngó kimoxi. Mwene wabulu o kilumbu kyakexile mu wanuna o ibuka iyadi. 15 Mu kusatela o mukutu wê, mwene wasukisa o Kijila ni itumu yexile mu Kijila kya Mozé. O ima yiyi, yene yakexile mubhekela o unguma mwaxaxi ka ibuka iyadi. Mu kusuluka, mwene wabhangesa o ibuka iyadi yiyi kukala kibuka kimoxi ngó. Mukidi, o athu a ibuka iyadi yiyi, maxibulu mê. Kidistu mwene wabheka o paze mwaxaxi kâ. 16 Bhukaxi ka taka,* mwene wakwatekesa o ibuka iyadi kukala mundu umoxi ngó n’a kale ni ukamba ni Nzambi, mwene wazubha o unguma bhukaxi ka kufwa kwê. 17 Mwene weza yu waboko o njimbu yambote ya paze phala enu mwa kambele kwijiya Nzambi, ni kwa yó ejidile kyá Nzambi. 18 Kuma bhukaxi kamwene, etu tu ibuka iyadi, tutena kubhixila kwa Tata, mukonda etu enyoso twatambula nzumbi imoxi ngó.

19 Kyenyiki, enu kimwala dingi mu asonyi mba mu akwa jixi jengi, maji mubhanga mbandu ya mwiji wa Nzambi kumoxi ni athu akôla. 20 Enu mwedi kala mu inzo yotunge kuthandu dya kaboko, o kaboko kaka o jipoxolo ni jipolofeta, maji Kidistu Jezú mwéne o ditadi dya dikota dya kaboko. 21 Mwa mwene, o inzo yoso ikala tembulu ikôla phala Jihova, o jimbandu joso ja inzo ja dibundu kumoxi. 22 Kuma enu mwala kumoxi ni Kidistu, Nzambi wabhangesa kwila enu ni akwenu mu bokone mu inzo mwatungu mwene, mukonda mwéne mwala o nzumbi yê.

3 Eme Phawulu, a ngikase mukonda dya Kidistu Jezú, ni mukonda dya ku mi kwatekesa enu mu akwa jixi jengi. 2 Mwejiya kwila, nga tambula o kikalakalu kya ku mi kwatekesa kukatula mbote mu ngalasa ya Nzambi. 3 Kala ki nga mi sonekena kyá, Nzambi wa ng’ijidisa o ikutu yê ikôla. 4 Mu kutanga o maka enyá, mwanda mona kwila, eme ngejiya kyambote o kikutu kikôla kya Kidistu. 5 M’ukulu Nzambi kejidisile o kikutu kiki ku athu kala kyejidisa kindala ku jipoxolo josole ni ku jipolofeta jê bhukaxi ka nzumbi yê ikôla. 6 O kikutu kyenyiki: O akwa jixi jengi ala kumoxi ni Kidistu Jezú, anda lundula we o ima yanda lundula Kidistu, ni kubhanga mbandu ya mukutu umoxi. Ene anda tambula o ima ya tukanena Nzambi mukonda dya njimbu yambote. 7 Bhukaxi ka ujitu wa ngalasa ya Nzambi ya ngibhana mwene mukutena kwê, nga kituka ngi mukunji wa kikutu kikôla.

8 Eme mwene ngala ngi ndenge ya jindenge mwaxaxi ka athu a asolo.* Nzambi wa ngi londekesa o ngalasa yê, phala ngi bokele akwa jixi jengi o njimbu yambote yalungu ni maumvwama ma Kidistu, katena kwa tongolola. 9 Phala kulondekesa we ku athu oso kyebhi o Nzambi wabhange o ima yoso, kya mu kumbidila o kikutu kyê kikôla kya swekele tundé ukulu. 10 Kiki kyabhiti phala bhukaxi ka kilunga, o jinguvulu ni yó ala ni maungana mu ididi ya dyulu, atene kwijiya o unjimu wonene wa Nzambi. 11 Nzambi wabhange kiki mukonda dya vondadi yê inangenena yalungu ni Kidistu Jezú, Ngana yetu. 12 Bhukaxi ka mwene, twala ni ufôlo wa kuzwela ni kuzukama kwa Nzambi ni kidyelelu kyoso, mukonda twala ni kixikanu kwa Kidistu. 13 Kyenyiki, nga midyóndo, kanenu kubhwila mukonda dya ibhidi ingene mu dibhana nayu phala o mbote yenu. Mukonda o ibhidi yiyi, ilombolola fuma phala enu.

14 Mukonda dya kiki, ngi fukama bhu pholo ya Tata, 15 yó wabhana o majina kumiji yoso kikale ku dyulu ni mu ixi. 16 Ngene mu samba kwa Nzambi phala mu unene wê ni mu kutena kwê, aswinise o mixima yenu bhukaxi ka nzumbi yê, 17 ni kwila ni henda yoso, Kidistu atunge ku mixima yenu mukonda dya kixikanu ki mwala nakyu. Kyenyiki, mwatokala mu kola kala kyakolo o jindanji ja muxi. 18 Phala kumoxi ni athu oso a asolo* mu tene kwijiya kyambote kyebhi kikala o kuzanza, o kukula, o kulebha ni kuzonga. 19 Ni mutene we kwijiya o henda ya Kidistu yabetakota, o unjimu ndenge, ni mutene kwizala ni kutenena kwoso kubhana Nzambi.

20 Nzambi yó bhukaxi ka kutena kwê kwa mu kalakala momwetu, utena kubhanga dingi, o ima itumubhinga ni ituxinganeka ndenge. 21 Mwene atambule o fuma bhukaxi ka kilunga ni bhukaxi ka Kidistu Jezú, ni kumiji yoso katé ku hádya ni hádya. Kyene!*

4 Eme Phawulu, ngi pelezu mukonda dya kusidivila Ngana. Nga midyóndo kwila, kalenu ni wendelu wafwama kala kya mixana Nzambi. 2 Kalenu mu akwa kulenduka, mu akwa kubatâma, mu dilendukile mudyenu ni henda ni mwanyu woso. 3 Bhangenu yoso phala mutunge kumoxi ni kutululuka, mukonda o nzumbi ikôla yéne imi kwatekesa phala mukale kumoxi. 4 Kwene ngó mukutu umoxi, nzumbi imoxi, ni kidyelelu kimoxi kya mixana nakyu; 5 kwene ngó Ngana imoxi, kixikanu kimoxi, ni batizu imoxi. 6 Kwene ngó Nzambi imoxi, Tata ya athu oso, wala kuthandu dya athu oso, o kutena kwê kukalakala moxi dya athu oso, kwala we ku athu oso.

7 Kala muthu mudyetu watambula o ngalasa ya Nzambi, Kidistu mwéne wabhana o ujitu yú ku muthu ni muthu. 8 Mukonda o Mikanda Ikôla yamba: “Kyoso mwene kya bande ku dyulu, wajituna jipelezu yu wajibhana mu ilunga kala maujitu.” 9 O kizwelu “mwene wabande,” kilombolola ihi? Kilombolola kwila, kya dyanga mwene watulukile mu ixi. 10 O yó watuluka mu ixi, mwene we wabande ku kididi kya dileka dingi o dyulu dyoso ndenge, phala o ima yoso idikumbidile.

11 Mwene wabhana amoxi kala jipoxolo, amukwa kala jipolofeta, amukwa kala akunji,* amukwa kala abhidi ni alongexi, 12 phala kukwatekesa* o athu a asolo kwa Nzambi kwenda munjila yatokala, phala kubhanga kyambote o ukunji wâ ni kukolesa o mukutu* wa Kidistu. 13 Katé etu enyoso kitwanda kala kumoxi mu kuxikana, ni kukala ni kwijiya kwa kidi kwalungu ni Mon’a Nzambi, ni tukale tu adyakime, anga tukula katé mukitala kyatenena kya Kidistu. 14 Kyenyiki, kitutokala kukala dingi tu anandenge, ni kukayela o ilongesu ya makutu ya athu akwa mangonya, phala katutakujule kuku ni koko, kala o ulungu mu musanza wa kalunga kya utakujula ku kitembwe. 15 Twatokala kuzwela o kidi ni kulondekesa o henda, se tubhanga kiki, mu ima yoso twanda tena kubhixila mu wadyakime, mukukala ni wendelu wa Kidistu o mutwameni* wa kilunga. 16 Bhukaxi ka mwene o mukutu woso udibunda kumoxi, kala mbandu ikwatekesa o mbandu ya mukwa, phala o mukutu ukalakale kyambote. Kyoso kala mbandu ya mukutu ikumbidila kyambote o kikalakalu kyê, ikwatekesa o mukutu kukola dingi. Kyenyiki o mukutu woso uswina mu henda.

17 Ngi myambela ni ku mi tendelesa mwa Ngana kwila, kanenu kwenda dingi kala kyenda o athu kejiya Nzambi, kuma ene a endesa ku ibanzelu yâ yayibha. 18 Mukonda dya kukola kwa mixima yâ ni mukonda dya kudituna o kwijiya Nzambi, o ilunji yâ yala mwavundu, anga alembwa kutambula o mwenyu utunda kwa Nzambi. 19 Kuma ene axixila kyá, kala dingi ni jisonyi ja kima, a dibhakula mu kubhanga o ima ya uhabhu,* ni kubhanga o ufusa ithangana yoso.

20 Maji enu ki mwadilongo o ima yiyi mwa Kidistu, 21 sumbala mwa mwivu, anga a milongo bhukaxi ka mwene o kidi kyala mwa Jezú. 22 Enu a milongo kwila mwatokala kuxisa o ukexilu wenu wokulu, walungu ni wendelu wenu wokulu, u minganala, anga u mibhangesa kwenda mu jinjila jayibha. 23 Kolokotenu mu kulungulula o ixinganeku yenu, 24 ni kuzwata o ukexilu wa ubhe, wabhange Nzambi mu vondadi yê. Ni kidi kyoso, o ukexilu yú, wayuka, wa fiyele.

25 Kuma kimwene mutanga dingi makutu, kala muthu mudyenu azwele o kidi kwa mukwa, mukonda twala tu idyandu ya mukutu umoxi. 26 Kyoso ki ukala ni njinda, kana kuta kituxi, dikumbi ki dikufwile mu njinda. 27 Kanenu kubhana kididi* kwa Dyabhu. 28 Woso wene munyana, ka nyane dingi, maji amateke o kukalakala ni kuswina kwoso, mu kubhanga kikalakalu kyambote ni maku mê, phala atene kukwatekesa yó wabhindama. 29 Mu kanu dyenu ki mu tunde ndaka, maji mutunde ngó izwelu yambote phala mutene kuswinisa yó a mu kwívwa. 30 Kanenu kuluwalesa o nzumbi ikôla ya Nzambi, mukonda kyene o kidimbu kya mite Nzambi, phala o kizuwa kyanda mibhulula bhukaxi ka kukúla.

31 Ehenu o unguma woso, o kutema, o njinda, o kudikolakola, ni jindaka, ni kuyibha kwoso. 32 Mu kale mu athu abatâma, ni kudilendukila mudyenu, mwenda ni kudiloloka ni muxima woso, kala Nzambi kya miloloka ni muxima woso mwa Kidistu.

5 Kyenyiki, kayelenu o phangu ya Nzambi, kala mu an’ê akazola. 2 Kolokotenu mu kudizola kala kya tuzolo* Kidistu, yu wabhana o mwenyu wê bhu kididi kyetu* kala sata kwa Nzambi yala ni dizumba dinuha kyambote.

3 Enu ki mutokala kuzwela maka alungu ni undumbu,* maufusa moso ni lwimbi, kala kya fwama ku athu atokala kwa Nzambi. 4 Né kutumbula ima i bhekesa jisonyi, kuzwela kwa wôwa ni itonokenu yayibha. Ima yoso yiyi ki ifwama. Maji muveji dya kiki, sotenu kusakidila Nzambi. 5 Mukonda enu mwejiya kyambote o maka enyá kwila: Muthu woso-woso wala ndumbu,* kifusa mba mukwa lwimbi, kuma o lwimbi lwasoko ni kubheza iteka, katena kulundula o Utuminu wa Kidistu ni wa Nzambi.

6 Kanenu kwehela muthu ku minganala ni izwelu ya kingoho, kuma mukonda dya ima yiyi o njinda ya Nzambi yanda kwiza kuthandu dya athu abhukumuka. 7 Kyenyiki, kanenu kubhanga o ima yene mubhanga ene, 8 mukonda m’ukulu mwexile mwavundu, maji kindala mwala kyá mu mukengeji kumoxi ni Ngana. Kolokotenu mu kwenda kala mu an’â mukengeji, 9 mukonda o mukengeji ubheka ima yoso yambote, yayuka ni yakidi. 10 Sotenu kwijiya o ima isangulukisa Ngana. 11 Kanenu kubhanga o ima ya kitombe yakambe valolo, maji mwatokala mudituna o ima yiyi, phala ku ibheka mwazele. 12 Mukonda o ima yene mubhanga ene mu kaswekele, katé ni ku itumbula kubheka jisonyi. 13 Maji kyoso o mukengeji ki umwikina ku ima yoso yayibha, o ima yoso yayibha imoneka. 14 Kyenyiki o Mikanda Ikôla yamba: “Eye wala kukilu, phaphumuka! Fukunuka mwaxaxi ka madifundu, phala Kidistu n’a ku mwikine.”

15 Mu kiki, dilangyenu phala ki mwende kala mu yôwa, maji mwenda kala mu jinjimu, 16 mu kubhanga ima yambote ni kithangana* kimwala nakyu, mukonda o izuwa yiyi yayibha. 17 Kyenyiki, ki mukale dingi mu yôwa, maji tongololenu yebhi o vondadi ya Jihova. 18 Kanenu we kukodiwa ni vinyu, mukonda o vinyu ibhekela kutexika, maji mwatokala kwizala ni nzumbi ikôla. 19 Mwenda ni kudikunda mudyenu ni jisálamu ni mikumbi ya kuximana Nzambi, mu kwimba ni kuximana Jihova ni muxima woso, 20 ni kusakidila jinga Nzambi yetu, Tat’etu mukonda dya ima yoso, mu dijina dya Ngana yetu Jezú Kidistu.

21 Mwenda ni ku ditumaka mudyenu, mu kulondekesa kwila mwa muxila Kidistu. 22 O ahatu atumake o anumi’â kala kyene mu tumaka Ngana, 23 mukonda o diyala mwéne o mutwameni wa muhatu, kala Kidistu kyala o mutwameni wa kilunga ni mubhuludi wa mukutu.* 24 Kyenyiki, kala o kilunga kitumaka Kidistu, o muhatu watokala we kutumaka mwadi wê mu ima yoso. 25 Enu mu anumi, sulukenu mu kuzola ahatu enu, kala Kidistu kyazolo o kilunga yu wafu bhu kididi kyê, 26 mwene wabhange kiki phala ku kikôlesa, mu ku kizelesa ni menya bhukaxi ka mak’â Nzambi, 27 wakibhange we phala o kilunga kifwame bhupholo yê, sé dixaka, né kifuta mba ima yadifu ni yiyi, maji kikale ni kuzela ni kuyuka.

28 Kyene we kimoxi, o munumi watokala kuzola o muhatu wê kala kyazolo o mukutu wê. O diyala wazolo o muhatu wê, mwene we wadizolo. 29 Mukonda sé-ku muthu wazembe o mukutu wê,* maji u udikila, u ulanga kala kyene mubhanga Kidistu ni kilunga, 30 mukonda etu enyoso twala tu idyandu ya mukutu wê. 31 O Mikanda Ikôla yamba: “Mukonda dya kiki, o diyala wanda xisa tat’â ni mam’â, n’a dikwatenene kwa* muhatu wê, ene kiyadi kyâ anga akala xitu imoxi ngó.” 32 O kikutu kiki kikôla ki nga mu mi tangela, kikutu kya dikota. Kyene kyalungu ni Kidistu ni kilunga. 33 Kyenyiki, kala muthu mudyenu azole o muhatu wê kala kya dizolo mwene. O muhatu, watokala kuxila o munumi’ê ni muxima woso.

6 Enu mu ana, beleselenu o jitata jenu kala kyamesena Nzambi, mukonda kiki kima kyambote bhu pholo yê. 2 “Xila tat’enu ni mam’enu,” kiki kyene o kitumu kya dyanga, kibhekela o mabesá. 3 Kyenyiki o “ima yoso yanda kubhita kyambote, ni unangenene mu ixi.” 4 Enu mu jitata, kanenu kuthathamesa o twana twenu, maji kolokotenu mu kwabazela ni kwalonga* kala kya tumu Jihova.

5 Enu mu abhika, tumakenu o jingana jenu ja ngongo ni kuxila kwoso. Mu atumaka ni muxima woso kala mwa mu tumaka Kidistu. 6 Kanenu kwa tumaka ngó kyoso kya mimona* ku athu phala kwa sangulukisa, maji kala mu abhika a Kidistu mu kubhanga o vondadi ya Nzambi ni muxima woso ni nguzu yoso. 7 Sidivilenu o jingana jenu ni vondadi yoso, kala mwa mu sidivila Jihova, kana o athu, 8 mukonda enu mwejiya kwila Jihova wanda mifuta o mbote yoso i mubhanga, kikale se mu abhika mba mwala ni ufôlo. 9 Enu mu jingana, sulukenu mu kutalatala kyambote o abhika enu, sé kwakusa, mukonda mwejiya kwila o Ngana ya ene ni ngana yenu, wala ku dyulu, mwene kene ni katombo* ka athu.

10 Mu kiki-phe, sulukenu mu kutambula nguzu kwa Ngana bhukaxi ka kutena kwê kwa dikota. 11 Zwatenu o kibhakatu kyoso kya mibhana Nzambi, phala mu difikidile ku mibhetu yoso ya* Dyabhu, 12 mukonda ki twa mubhânga ni athu mu xitu,* maji twa mubhânga ni jinguvulu, ni maungana, ni atumini a ngongo yiyi yala mwavundu, ni jinzumbi jayibha mu ididi ya dyulu. 13 Kyenyiki, zwatenu o kibhakatu kyoso kya mibhana Nzambi, ni mutene kubhuluka mu kizuwa kyayibha, phala kyoso kimwanda zubha kubhanga yoso, mutene hanji kwimana mu ididi yenu.

14 Mu kiki, difikidilyenu, mu kukuta kyambote o phonda ya kidi, ni kuzwata o kivunga-thulu kya kuyuka. 15 Mu inama, mu zwata o jihayi ja kuboka o njimbu yambote ya paze. 16 Difikidilyenu we ni ngubu ya dikota ya kixikanu, phala mu tene kujima nayu o mifula ya wama ya Kadya-phemba.* 17 Mwatokala we muta o kapasete ka kubhuluka ni xibhata mu nzumbi, o xibhata yiyi o mak’â Nzambi. 18 O ima yoso yiyi mu ibhanga ni kusamba ni kudyonda mu ithangana yoso. Kyoso ki mwenda ni kusamba ehelenu o nzumbi ikôla ku myendesa. Mukonda dya kiki dilangyenu, mwenda ni kusambela o athu osole.* 19 Eme wami mu ngi dyondela, phala kyoso ki ngijikula o dikanu, Nzambi a ngibhane o izwelu yatokala, phala ngitene kuzwela ni kuswina kwoso mu kwijidisa o ikutu ikôla ya njimbu yambote. 20 Kyene kya ngi bhangesa kukala ngi mukunji wa njimbu yenyiyi mu jikaleya, phala ngizwele ni kuswina kwoso yalungu ni njimbu yiyi, kala ki nga tokala o kubhanga.

21 Nga mu mitumikisa phang’yami ya kazola Tikiku, wa musidivila Ngana ni ufiyele woso, phala ku mijidisa kyebhi kingala. Mwene wanda mitangela yoso yalungu n’eme. 22 Kyenyiki, nga mu mi tumikisa-nê, phala mwijiye kyebhi kitwala ni kukonda o malamba a mixima yenu.

23 O jiphange kwenyóko akale ni paze ni henda, akale we ni kixikanu kitunda kwa Nzambi, o Tata, ni kwa Ngana Jezú Kidistu. 24 O ngalasa ya Nzambi ikale ni athu oso azolo Ngana yetu Jezú Kidistu ni henda inangenena.