MUKANDA WA DYANGA KWA TIMOTE

1 Eme Phawulu poxolo ya Kidistu Jezú, angisolo kwa Nzambi Mubhuludi wetu, ni kwa Kidistu Jezú, o kidyelelu kyetu. 2 Nga mu sonekena Timote* mon’ami wa kidi mu kixikanu.

O ngalasa ya Nzambi ni henda, ni paze itunda kwa Nzambi o Tata, ni kwa Kidistu Jezú Ngana yetu, ikale n’eye.

3 Kala ki nga kubhingi phala kuxala ku Efezu kyoso eme ki ngakexile phala kuya ku Masedonya, kindala ngi kubhinga dingi ni utendelese athu amoxi phala kalonge milongi ya makutu. 4 Kana we kubhana mátwi ku misoso ya makutu ni ku misoso yalungu ni majina a jikuku jenu. O ima yiyi ki ibhekela mbote, maji ibhekela ngó jiphata, ki ibhange mbandu ya ima ibhana Nzambi phala kukolesa o kixikanu kyetu. 5 Mukidi, ngamesena ku mibhana o itendelesu yiyi,* mukonda dya henda ijila ku muxima wazele ni mu kitongolwelu kyazele, ni mu kixikanu kya kidi sé mangonya. 6 Sayi athu aditunu o ima yiyi, kyenyiki a ajimbidisa, ya adite mu maka sé valolo. 7 Ene amesena kukala alongexi a kitumu, maji katendela o ima yazwela ni ima yene muzokela kyavulu.

8 Etu twejiya kwila o kitumu kima kyambote, se muthu u ki kumbidila mu ukexilu watokala. 9 Twejiya we kwila o itumu ka ibhange phala o athu ayuka, maji phala yó axibhaka ni yó abhukumuka, akwa phulu ni akwa ituxi, phala o athu akambe ufiyele,* kaxila o ima ya Nzambi, phala yó ajibha tata ni mama, ni ijibhanganga. 10 Phala yó abhanga undumbu,* ni mala azeka ni mala ni akwa, ni ifumbe ni akwa kutanga makutu, ni akwa kuloka mu makutu, ni oso dingi abhanga ima ki yalungu ni ulongelu wa kidi.* 11 O ulongelu yú watundu kwa Nzambi ya sanguluka walungu ni njimbu yambote yafuma ya ngibhana phala ku itula.

12 Ngasakidila Ngana yetu Kidistu Jezú, wa ngibhana kutena mukonda wangimono kwila ngifiyele mu ku ngibhana o ukunji yú, 13 sumbala m’ukulu ngexile mu xinga Nzambi, ngexile ngi mukwa kuzukutisa, nga kakele kyavulu, maji Nzambi wa ngi kwatela henda, mukonda ki ngejidile o ima i nga kexile mubhanga, kingexile we ni kixikanu. 14 Maji o ngalasa ya ngilondekesa Nzambi ni kixikanu ni henda mwa Kidistu Jezú, yavulu. 15 O maka yá, akidi atokala kwa dyelela ni kwaxikina kwila: Jezú Kidistu weza mu ngongo phala kubhulula akwa ituxi. Bhukaxi ka athu yá, eme nga betakota mu kukala ngi mukwa ituxi. 16 Kuma eme nga betakota mu kukala ngi mukwa ituxi, a ngilondekesa henda, phala bhukaxi kami Jezú Kidistu alondekese o mwanyu wê woso mu ku ngibhanga ngiphangu phala o yó a muxikana, atambule o mwenyu wakalelaku.

17 O Sobha inangenena, kene kufwa, kamoneka ku mesu, o Nzambi imoxyelele, atambule o ujitu ni fuma katé ku hádya ni hádya. Kyene.

18 Timote mon’ami, nga mukuxila o itendelesu yiyi,* ya ima ingevu yalungu n’eye, se ukumbidila o ima yiyi, eye wanda kala kála udisoladi wejiya kulwa kyambote o ita, 19 mu kukala ni kixikanu ni kitongolwelu kyazele, amukwa mukonda dya kudituna o kitongolwelu kiki kyazele, o kixikanu kyâ kyazoza kala kiboba o naviyu mu musanza wa kalunga. 20 Himenewu ni Xandele ala mwaxaxi ka athu enya, eme nga abhakula kwa Satanaji phala adilonge kweha kuxinga Nzambi.

2 Kya dyanga, ngi mi tendelesa ni kuswina kwoso kwila, mwenda ni kudyonda, ni kusamba, ni kubhingila akwenu ni kusakidila Nzambi phala o mbote ya athu oso, 2 kikale jisobha ni athu oso ala bhu kididi kya maungana. Phala tukale ni kutululuka ku mwenyu ni kubatama, ni kukala fiyele kwa Nzambi ni kidi kyoso. 3 Kiki kima kyambote, Nzambi o Mubhuludi wetu wa kiwabhela, 4 mwene wamesena kwila, athu a maukexilu oso abhuluke, anga eza mu kwijiya o kidi. 5 Mukonda kwene ngó Nzambi imoxi, ni Mukunji umoxi bhukaxi ka Nzambi ni athu, o muthu yú, Jezú Kidistu, 6 wadibhakula kala sata ya kukula athu oso.* O athu anda bhana umbangi walungu ni maka enyá mu kithangana kyatokala. 7 Eme angisolo kala mukunji ni poxolo phala kubhana o umbangi yú. Nga muzwela o kidi, ki nga mutanga makutu kana, angisolo phala kulonga o akwa jixi jengi kukala ni kixikanu ni kwijiya o kidi.

8 Mu kyenyiki ngamesena kwila mu ididi yoso o athu akolokote mu kusamba ni kuleka o maku ni muxima wazele, sé njinda, né kuzoka. 9 Kyene kimoxi we, o ahatu atokala kuzwata izwatu yafwama,* ni kuxila kwoso ni kilunji, kana ni ukexilu wayibha wa kwinda o jingindu, né ni ulu mba jiphélula, né izwatu yate kitadi kyavulu, 10 maji muzwata mu ukexilu wambote wa ahatu axila Nzambi, mu kubhanga ikalakalu yambote.

11 O ahatu adilonge mu kudixibha* ni kubelesela kwoso. 12 Eme kingehela o muhatu kulonga mba kukala ni ukota wa kutumina o diyala, maji mwene watokala kudixibha.* 13 Mukonda Adá mwéne adyangele ku mubhanga, mu kusuluka Eva. 14 Ku mbandu ya mukwa, Adá ka munganala, kana, maji o a munganala o muhatu, yu wabhukumukina o kitumu kya Nzambi. 15 Kyenyiki, o muhatu wa ka bhulukila mu kuvwala twana, se usuluka kukala ni kixikanu, ni henda ni kuzela ni kukala ni kilunji kyambote.

3 Maka ya akidi, atokala kwa dyelela: Se muthu wa mubhanga nguzu phala kukala kafunga, wa musota kikalakalu kyambote. 2 O kafunga ki katokala kukala ni kima kya ku mutatela, mwene watokala kukala ngó ni muhatu umoxi,* ulanga we kyambote o wendelu wê, ukala mukwa kilunji, ki mukwa kavwanza, maji mukwa kuzalela kyambote o asonyi, wala ni uhete wa kulonga kyambote o maka a Nzambi. 3 ki katokala kukala hôlwa, né kisweya,* maji watokala kukala mukwa kulenduka, ki mukwa jimvunda kana. Katokala kuzola o kitadi.* 4 Mwene watokala kwendesa kyambote o mwiji wê, o anê atokala kukala akwa kutumaka ni kukala ni wendelu wambote. 5 (Mukonda o muthu se katena kwendesa o mwiji wê, kyebhi-phe kyanda tena kulanga o kilunga kya Nzambi?) 6 Katokala kukala muthu wakituka Kidistá kindala, phala kadizangeleke kyavulu anga utambula o kifundisu kyanda tambula Dyabhu. 7 Ku mbandu yengi, o athu katokala mu kilunga, atokala kubhana umbangi wambote* walungu ni mwene, phala ka mulebhule* anga ubwa ku mubhetu wa Dyabhu.

8 Kyene we kimoxi, o akwatekexi a tufunga atokala kukala akwa kilunji. Katokala kukala a mbombo kumbodi,* katokala kukala akwa kunwa vinyu yavulu, né kunganala akwa phala kunganyala kitadi. 9 Atokala ku dikwatenena mu kixikanu kyejila bhukaxi ka kikutu kikôla ni kitongolwelu kyazele.

10 Abhingi we ku atonginina se ene afwama mwene kutambula o kikalakalu kiki. Mu kusuluka, se kala ni kikuma kya kima, atena kusidivila kala akwatekexi a tufunga.

11 Kyene we kimoxi, o ahatu atokala kukala ni kilunji. Katokala kukala akwa kutatela akwâ, atokala kulanga kyambote o wendelu wâ, ni kukala jifiyele mu ima yoso.

12 O akwatekexi a tufunga atokala kukala ngó ni muhatu umoxi.* Abhingi we kwendesa kyambote o twana ni miji yâ. 13 Mukonda o mayala asidivila kyambote, atambula kijingu. Atena kuzwela ni kidi kyoso yalungu ni kixikanu kyâ mwa Kidistu Jezú.

14 Sumbala kwakambe ngó bhofele nganda kusanga ku waloko, nga mu kusonekena o ima yiyi 15 phala se ngilaleka, eye wijiya kyebhi ki watokala kwenda mwaxaxi ka mwiji wa Nzambi, kifwa o kilunga kya Nzambi ya mwenyu, o ngunji ni kilangidilu kya kidi. 16 Seku phata kwila, o kikutu kikôla kyalungu ni ufiyele kwa Nzambi, kyadikota: ‘Jezú weza kala muthu mu xitu, kyoso kyavutuka ku dyulu, Nzambi wa muxikina kala muthu wayuka. Mwene wamoneka bhu pholo ya jianju, a mubokela ku ifuxi yoso, o athu mu ngongo a muxikina, anga a mutambulula ku dyulu ni fuma yoso.’

4 Bhukaxi ka nzumbi yê Ikôla Nzambi wambe kwila, mu izuwa kupholo sayi athu anda xisa o kixikanu kyâ ni kubhana mátwi ku milongi yedi kala yatundu kwa Nzambi, maji ya makutu ni mu ulongelu wa madimonyo, 2 ni ku milongi ya akwa mangonya atanga makutu, ala ni kitongolwelu kya xixidila kala akite kidimbu ni felu yatema. 3 Ene afidisa akwâ kukazala, afidisa we o athu kudya o makudya abhange Nzambi phala yó ala ni kixikanu ejiya kyambote o kidi, ku adya ni kusakidila. 4 Ima yoso yabhange Nzambi yambote, seku kima atokala kudituna-kyu se a kitambula ni kisakidilu. 5 Mukonda akizelesa bhukaxi ka mak’a Nzambi, ni bhukaxi ka musambu.

6 Se ulonga o ima yiyi ku jiphange, eye wanda kala u mukunji wambote wa Kidistu Jezú, wezala ni maka a kixikanu ni ulongelu wambote u wene mukayela ni ufiyele woso. 7 Ditune o misoso ya makutu ki yalungu ni ima ikôla, kala yóyo yene mutanga o adyakime a ahatu. Kyenyiki-phe, dilonge phala ulondekese kwila wa muxila Nzambi. 8 Kuma o kutungutisa o mukutu kubhanga kyambote, maji o kuxila Nzambi kwa betakota mu ima yoso, mukonda kubhana kidyelelu ku athu kya kutambula o mabesá a Nzambi lelu, ni ku mwenyu wakezaku. 9 O maka ya akidi atokala kwadyelela ni kwaxikina ni muxima woso. 10 Mukonda dya kyenyiki, tu kalakala kyavulu ni kubhanga nguzu mukonda o kidyelelu kyetu kitunda kwa Nzambi ya mwenyu, mwene Mubhuludi wa athu a maukexilu oso, bengebenge yó ala jifiyele.

11 Suluka mu kubhana o itendelesu yiyi, ni ku ilonga ku akwenu. 12 Kana kwehela muthu kukutenda mukonda dya unzangala wé, muveji dya kiki, ubhana phangu yambote kwa yó ala jifiyele, mu kuzwela, mu wendelu, mu henda, mu kixikanu ni mu kuzela. 13 Katé ki ngibhixila ku waloko, suluka mu kutanga o Mikanda Ikôla mwaxaxe ka mundu, mu kubhana itendelesu* ni kulonga akwenu. 14 Kana kuxisa o uhete u wala nawu, akubhana-wu bhukaxi ka kikanenu, kyoso o kibuka kya tufunga kya kutula o maku mâ kuthandu dyé. 15 Sota kuxinganeka* mu ima yiyi, dikwatenene mu ima yenyiyi, phala athu oso amone kwila wa mukula kyambote mu nzumbi. 16 Dilange eye mwene ni ulongelu wé. Kolokota mu ima yiyi, mukonda mu kubhanga kiki, wanda bhulula o mwenyu wé ni wa yó a kwívwa.

5 Kana kubazela mwadyakime, maji sota kuzwela-nê ni henda yoso kala tatenu, o minzangala ya mala, zwela nawu kala jiphange jé, 2 o adyakime a ahatu, zwela nawu kala mamenu, o ilumba, kala jiphange jé ja ahatu, ni kuxila kwoso.

3 Xila o ahatu ala mwene atudi mukidi,* 4 maji se kukala mutudi wala ni twana mba alawula, enyá, kya dyanga asote kuxila Nzambi ku mwiji wâ. Ene atokala kufuta jinga o mbote yatambula ku jitata jâ ni ku jikuku, mukonda kiki kisangulukisa Nzambi. 5 O muhatu wala mwene mutudi, wakambe kima, udyelela ngó kwa Nzambi, mwene ukolokota mu kudyonda ni kusamba suku ni mwanya. 6 Maji o mutudi yó udibhakula ngó mu kubhanga o jihânji jê ja xitu, sumbala wala hanji ku mwenyu, maji wafwe kya. 7 Eye Timote suluka mu kwabhana o itendelesu yiyi, phala ene kakale ni kima kya kwatatela. 8 Se muthu kadikila o ibhindamu ya yó a mutokala, bengebenge ya mwiji wê, waditunu o kixikanu. Mwene wabetakota mukukala muthu wayibha, o yó akambe o kixikanu ndenge.

9 Atokala kusoneka o mutudi wala kya mukitala kya makwinyi a samanu a mivu. 10 Mwene we watokala kukala muthu a mwijiya mu ikalakalu yê yambote, wasase kyambote an’ê, mukwa kuzalela o asonyi, wasukula o inama ya yó a asolo kwa Nzambi, wakwatekesa yó abhindamene, yu wadibhakwile mu kubhanga ikalakalu yambote.

11 Maji kana kusoneka o atudi ala hanji minzangala, mukonda kyoso jihânji jâ jivula anga ji afidisa kusidivila Kidistu, ene asola kukazala. 12 Ene mu kubhanga kiki adibhekela kibwika, mukonda dya kuxisa o kixikanu kyexile nakyu ku dimatekenu.* 13 Ene wa ala imonya, awabhela kunyunga inzo ni inzo. Ene kala ngó imonya maji awabhela we kulongolola akwa, adita mu maka angene, ni kuzwela ima ki yatokala. 14 Eme ngamesena kwila o atudi ala minzangala, a kazale. Akale ni twana, alange kyambote o dibhata dyâ, phala ka azwele kyayibha ku jinguma. 15 Mu kidi, sayi atudi axisa kya o njila ya kidi phala kukayela Satanaji. 16 Se muhatu waxikana Nzambi, wala ni atudi ku mwiji wê, mwene watokala kwa kwatekesa, phala kabheke o kikalakalu kiki mu kilunga. Phala o kilunga kisuluke mu kukwatekesa o atudi akambe muthu u akwatekesa.

17 O tufunga akalakala kyambote, abhingi kwaxila kyavulu, bengebenge yó akalakala kyavulu mu kuzwela ni mu kulonga. 18 O Mikanda Ikôla yambe: “Kana kukuta o dikanu dya ngombe kyoso kya mu titidila o idima.” Yamba we kwila: “O mukalakadi wafwama kutambula o futu yê.” 19 Kana kubhana mátwi ku muthu utatela mwadyakime* wa kilunga, kikale ngó se mwene wiza ni mbangi jiyadi mba jitatu. 20 O yó ate ituxi, u abazela bhupholo ya athu oso, phala kudimuna akwâ.* 21 Nga mu kutendelesa bhupholo ya Nzambi ni ya Kidistu Jezú, ni jianju josole kwila, sota kukayela o itendelesu yiyi sé katombo né katungu.

22 Kana kukala ni lusolo lwa kutula o maku kuthandu dya muthu,* kana kubhanga mbandu ya ituxi ya akwenu, ukala u muthu wazele.

23 Kana kunwa ngó menya, maji nwaku tuvinyu mukonda dya ndolo ya mala mé, ni mukonda dya kukata kyavulu.

24 Sayi yá o ituxi yâ a ijiya ku athu oso, anga yabhangesa kwa fundisa kya. Maji amukwa o ituxi yâ idimonekena kupholo dya kwenda.* 25 Kyene kimoxi we, o ikalakalu yambote a ijiya ku athu oso, ne mwene se a isweka, yene idimonekena.

6 O yó ala abhika atokala kuxila o jingana jâ ni kwabhana ujitu, phala o athu ka xongwene o dijina dya Nzambi ni ilongesu yê. 2 Oso ala we ni jingana ja xikana Nzambi, katokala kwa xibhaka mukonda dya kukala jiphange. Muveji dya kiki, atokala kusidivila mwene kyambote, mukonda o jiphange jâ jakazola ene a katula mbote mu sidivisu yâ.

Suluka mu kulonga ni kutendelesa o ima yiyi. 3 Se bhukala muthu ukwata kulonga ulongelu wengi, anga kaxikina o ulongelu wambote* utunda kwa Ngana yetu Jezú Kidistu ni ulongelu walungu ni kuxila Nzambi, 4 o muthu yu wezala ni ukumbu, katendela kima. Muthu ukala kiki, wa wabhela kyavulu kukwata jiphata, ni kuzoka yalungu ni maka oso-oso. O ima yiyi ibhekela lwimbi, jimvunda, kuditatela,* ni kubanza ima yayibha yalungu ni akwetu. 5 Ene azoka yalungu ni ima ki yala ni valolo bhukaxi ka athu kála ni ibanzelu yambote, axisa o kidi, abanza kusidivila Nzambi phala kutambula kima. 6 Mukidi, kusidivila Nzambi kubhekela mbote yavulu, ni kusanguluka ni ima itwala nayu. 7 Mukonda ki twabheka kima mu ngongo, kitwanda kwambatamu we kima. 8 Kyenyiki, se twala ni kima kya kudya ni kya kuzwata,* ima yiyi itusoke.

9 Maji o yó amesena kyavulu kukala jimvwama, adibhala mu jitendasá ni mu mibhetu ni mu jihânji javulu jayibha ji abhekesa ngó malamba avulu ni kalunga. 10 Mukonda o lwimbi lwa kitadi, lwene o lundanji lubhekela o ima yoso yayibha. Amukwa mukonda dya kuzola o kitadi, axisa o kixikanu anga adibhekela jiphaxi javulu.

11 Maji eye-phe u muthu wa Nzambi, lenga o ima yiyi, sota o kuyuka, o kuxila Nzambi, kukala ni kixikanu, kukala ni henda, kukolokota ni kubatama. 12 Bhanga yoso phala kuzokela o kixikanu, dikwatenene ku mwenyu wakalelaku. Eye akwixanena o mwenyu yu, mukonda dya kyenyiki, eye wabhana umbangi wambote bhupholo ya athu avulu.

13 Ngi kutendelesa bhupholo dya Nzambi, yo wene mulanga o ima yoso yala ku mwenyu ni bhupholo ya Kidistu, yo wabhana umbangi wambote bhupholo ya Pônsyu Pilatu. 14 Belesela o itumu yoso ni kuzela kwoso, sé kutondala, kate kyanda tukuluka Ngana yetu Jezú Kidistu. 15 Mukonda mu kithangana kyatokala o yo wasanguluka, o Sobha, wanda londekesa o kutena kwê. Mwene Sobha ya jisobha ni Ngana ya jingana. 16 Mwene ngó o muthu umoxi katena kufwa, watungu mu kididi mwezala ni kubhenya, kana muthu utena kubhixila-mu. Seku muthu wa mu mwene kya, kanaku we muthu utena ku mumona. Mwene atambule fuma, ni kutena kunangenena. Kyene.*

17 Bhana itendelesu kwa yo ala jimvwama ku mundu yú,* phala kadizangeleke,* kadyelele mu jimbongo jâ jamakutu jitena kubhwa ni lusolo. Maji adyelele kwa Nzambi yo utubhana o ima yoso i tusangulukisa. 18 U atangela phala asuluke mu kubhanga o mbote, akale jimvwama mu ibhangelu yambote. Akale akwa kubhana, ende ni kukwatekesa akwa abhindama. 19 Mu kubhanga kiki ene anda kala ni umvwama utunda kwa Nzambi. O umvwama wenyú, wanda kwabhana o kukondama ku hádya. Mu kubhanga kiki, ene anda dikwatenena ku mwenyu wa kidi.

20 Eye Timote, o ima yakubhana bhaka-yu kyambote, kana kubhana mátwi ku izwelu ki yala ni valolo, ki yalungu ni ima ikôla. Ni kuzoka yalungu ni izwelu, a ixana kwila ya unjimu mbe unjimu wa makutu. 21 Amukwa mukonda dya kukala ni unjimu wenyu, axisa o kixikanu kyâ.

O ngalasa ya Nzambi ikale ni enu.