“O Kuijiia Kuku ku Bheka Muenhu ua Kalelaku”

“O kuijiia kuku ku bheka muenhu ua kalelaku: Kuila oso a ku ijiie eie u Nzambi ia kidi imoxi-élele, ni kuijiia ué Jezú Kristu, ió ua mu tumu eie.”—NZUÁ 17:3, NW.

O KUIJIIA, ku tena ku bhulula o muthu. Kioso Nouhou kia kexile ni dikuinhi dia mbeji, ua kate, manh’â—u kalakala mu inzo ia ku saka, ku ixi ia Niger—uejidile ihi ia tokalele o ku bhanga. Muéne ua bhange solo phala ku bhana mon’ê ua kate, mu ku funga sukidi, móngua ni menha. Kala ki zuela o UNICEF, muéne “ua bhange ioso ni lusolo, mukonda ua kexile mu mona kiebhi kia kexile mu saka o athu mu inzo ia ku saka mua kexile mu kalakala, iu ua kuatekesa o mon’ê ku disanza.”

O milongi ia Bibidia, i tena ué ku bhulula o muthu. O musoneki ua dianga ku soneka o Bibidia Mozé, uambe: ‘Mbata o maka enhá, ki maka a ngoho, uene o muenhu uenu; ene a-nda ku mi bhana izuua iavulu.’ (Matendelelu 32:47) O kuila o Bibidia i tena muene ku tu bhana izuua iavulu ia muenhu? Ihi ilombolola phala o muenhu uetu?

Mu milongi itanu i tua di longo kiá, ia londekesa kuila se-ku divulu di tu sokesa ni Bibidia, mukonda, o ikanenu iê ioso i dikumbidila, izuela ué ni kidi o milongi ia jingijiie, izuela kima kimoxi ngó, iala ni valolo lelu. O ukexilu iú uene ulondekesa kuila se-ku divulu dia sokela ni Bibidia. Kienhiki, kioso ki izuela kuila, i tena ku tu bhana izuua iavulu ia muenhu—o muenhu ki uábhua—kiki ki kilondekesa kuila eie ua tokala u bhana valolo ku Bibidia?

Tua ku suínisa ku dilonga kiebhi ki u tena kuijiia o milongi ia Bibidia, i tena ku ku bhana o ku tululuka lelu, ni ku zediua ku hádia. O Jimbangi ja Jihova, a mesena ku u kuatekesa kuijiia ihi i longa o Bibidia.

[Kidikisu/​Foto ku mbandu 9]

Se-ku divulu dia sokela ni Bibidia mukonda diene di bhana itambuijilu ia tokala ia ibhuidisu i tuene mu di bhanga kála:

• Mukonda diahi tuala ku muenhu?

• Mukonda diahi tuene mu tala hadi?

• O kuila saí kidielelu phala o jindandu jami jafú?

Eie u tena ku sanga o itambuijilu ia ibhuidisu íii mu divulu didi, a di bhange ku Jimbangi ja Jihova. Mu Kidi Ihi i Longa o Bibidia?