Phala o Atangi a Madivulu Metu
O Mulangidi u ua mu tanga, ene mu u bhanga tundé ku muvu ua 1879.Tundé ku muvu uenhó, o mulangidi iú a u lungulula kiá kiavulu. (Tala o ji foto ku thandu.) Kienhiki, mu Mulangidi iú, ua-nda mona-mu ima ia mukuá a i lungulula. Ihi ia lungulula-mu?
Mu jixi javulu, kuene athu avulu a uabhela ku sota milongi mu internete. Ki ku bhonzo ku sanga o milongi mu mutelembe ua internete. Mu internete, tu tena ku tanga-mu madivulu avulu, kala o Mulangidi ni Despertai! ni madivulu a mukuá.
Mukonda athu avulu a uabhela ku tanga mba ku sota milongi mu internete, tua lungulula o Kijimbuete kietu, www. jw.org, phala ki ki bhonzese o athu ku ki jikula. O athu a jikula o kijimbuete kiki, a tena ku tanga o madivulu metu mu internete mu 430 a madimi, ndenge. Maji tundé o mbeji íii, saí milongi ia kexile mu kuíza mu Mulangidi uetu, ia-nda moneka ngó mu Kijimbuete kietu kia internete.a
Mukonda dia kuila, tua-nda beta-kota o ku ta milongi mu internete, O Mulangidi iú ki ua-nda kala dingi ni 32 a jimbandu, maji ua-nda kala ngó ni 16 dia jimbandu. Mu kindal’iki, O Mulangidi a mu u lungulula mu 204 a madimi. Mu kuijiia kuila o mulangidi a-nda u sosolola o jimbandu, kiki kia-nda kuatekesa o ibuka ia ku lungulula o madivulu metu, ku lungulula O Mulangidi mu madimi avulu.
Tua kingila kuila o ukexilu iú, u tu kuatekesa ku longa dingi o athu o njimbu iambote ia Bibidia i bhulula. Tua-nda kolokota o ku jimbulula ni ku bhana milongi ia tokala—ki kale mu madivulu metu, mba mu internete—phala ku kuatekesa o atangi a madivulu metu, a xila o Bibidia, a mesena kuijiia ihi i longa o Bibidia.
Edika
a O milongi ia-nda moneka ngó mu internete, íii: “Phala o Minzangala,” i tanga maka alungu ni milongi ia Bibidia phala o minzangala, ni milongi iambe: “ Madisá’mi a Bibidia,” o milongi íii phala o jitata n’a tene ku longa o tuana tuâ tuala ni mivu itatu mba ndenge.