DIAMBU DIA KAPA | O KUILA SAÍ MUTHU U TENA KUIJIIA O IMA IA-NDA BHITA KU HÁDIA?
Saí Ikanenu ia di Kumbidila, Maji Ikanenu Iavulu, Kana
Ua mesena kuijiia ia-nda bhita ku hádia? Athu avulu ku mundu a mesena. Athu avulu a zuela o izulukutu ia-nda bhita ku hádia, saí íii i di kumbidila, maji ia mukuá, kana. Talesa o ifika íii:
JINGIJIIE a kalakala ni ji makina ja katunda, a ngastala kitadi kiavulu phala kuijiia ia-nda bhita ku hádia. Mu kifika, kuijiia ihi ia-nda bhanga o dixi ku athu mu ixi ni kuijiia se ku diembu diê kua-nda noka mungu mba kana.
AKUA KU TOKUESA O IMA a zambula ué kiebhi kia-nda kala o mauenji ni jinguvulu ku pholo. Warren Buffett, ua beta-kota mu ku kala mvuama mu ngongo ioso, a mu i xana kuala o athu kuila polofeta mukonda dia uhete uê ua kuijiia ni kidi kioso kiebhi kia-nda kala o mauenji ku pholo. Nate Silver, mukua ku tokuesa ué o ima, uene mu zuela ioso ia-nda bhita ni jinguvulu ja Estados Unidos ni ditenda dia jifilme, a di xana, Hollywood.
MADIVULU OKULU athu ene mu mona o madivulu enhá kala ikanenu. Saí athu a zuela kuila, o ima iene mu bhita lelu ku mundu, a i sonekene kiá ku hama ia 16 kuala Michel de Notredame (Nostradamus). Mu ku kaiela o kalendalu ka akua Maya, athu avulu akexile mu zuela kuila, o ixi ieji lunguluka mu kizuua kia 21 kia mbeji ia Kaiadi 2012.
ATUAMENI A JINGELEJA saí ithangana a zuela o mavuua a-nda bhita mu ixi phala ku dimuna o athu ni ku bhongolola o akaiedi oso. O mukua ku zambula o dizubhilu dia mundu, polofeta Harold Camping ni maxibulu mê, a bhana ngolokela ku mundu uoso kuila o ixi eji ku i buika ku muvu ua 2011. Maji katé kiki, o ixi i ié hanji.
IMBANDA amba kuila ala ni kutena kua kuijiia ni ku zambula o ima ia-nda bhita ku hádia. O ngana Edgar Cayce ni ngana Jeane Dixon, a zuelele ni kidi kioso o izulukutu ieji bhita ku hama ia 20. Maji kiiadi kiâ, a zuela ué ima iavulu ki i di kumbidila. Mu kifika, o ngana Dixon ua zuelele kuila, kueji moneka Ita ia Katatu ku Mundu Uoso ku muvu ua 1958, o ngana Cayce ua zuelele ué kuila o mbanza ia Nova York, ieji boba bhu menha ku muvu 1970.
O kuila kuala muthu u tena kuijiia ia-nda bhita ku hádia? Kiki kibhuidisu kiambote. Se ua tenene kuijiia o ima ia-nda bhita ku hádia, o muenhu uê ueji kala kiéngi.