EIE UA KIJIDILE?
Mukonda diahi o ifumbe akexile mu a bukula o inama ande dia kua jibha?
Ia lungu ni kithangana kia kexile mu jibha Jezú ni ifumbe iiadi ku taka, o divulu dia Matesu, Marku, Luka ni Nzuá, alondekesa kuila o Jijudé “a [bhingi] Pilatu a a bukujule o inama, a a katule-ku.”—Nzuá 19:31.
O kitumu kia Jijudé kia zuelele kuila, o kimbi kia kifumbe kia fuile ku taka, ‘ki ki tokalele ku xala bhulu dia taka, kana.’ (Matendelelu 21:22, 23) O Jijudé nange akexile mu kumbidila uá o kitumu kiki katé ku ió a a jibhile ku taka ku akua Loma. Kienhiki, o ku bukula o inama ia athu enhá, ia kexile mu fuisa o muthu ni lusolo luoso ni ku bhangesa kuila a mu funda ande dia kizuua kia Sábhalu.
Mu ku jibha, o ifumbe akexile mu a phaphela ku taka ni ku a phaphela ni jipheleku bhu maku ni inama iâ. Kioso kia kexile mu imanesa o taka, ene a kala mu divua ndolo iavulu mukonda o pezu iâ ioso i kala mu jipheleku jojo. Phala ku bhuima, ene a tokalele ku di sunga bhulu. Maji se o inama a i bukuile, ene keji tena ku bhanga kiki. Kienhiki eji fua mukonda dia ku kamba o ku bhuima—keji nanga-ku phala kufua.
Kiebhi o masoladi kia kexile mu luua ni mbalafunda?
O mbalafunda, o uta ua kuatekesa Davidi ku jibha o dizonda Ngoliia. Nange Davidi ua di longo o ku luua ni uta iú mu undenge uê kioso kia kexile mu kuinga o jimbudi.—1 Samuuele 17:40-50.
Fikula ia mu londekesa masoladi akua Asídia a kuata ji mbalafunda ia a mu bhânga ni jijudé
O mbalafunda ia kexile mu londekesa ué o ixi ia Ijitu ni Asídia m’ukulu kioso kia kexile mu soneka o Bibidia. O uta iú uexile kala jibela ja kibha mba ditele a di kutile ni ngoji jiiadi. O mukua ku loza ni mbalafunda íii u ta-mu ditadi dia 5 mba 7.5 a ji sentimetulu mu ku koma, o mu ku nema, dia kexile mu nema 250 a ji kilograma. Kienhiki-phe, o disoladi di nhunga o mbalafunda bhulu ni ku takula ngoji imoxi, o ditadi anga ditunda ni nguzu iavulu ni kuia kuoso kua lozela o disoladi.
Ku Oriente Médio a kande-ku makungu ia a sange-ku matadi akexile mu a ta ku jimbalafunda mu kithangana kia ita m’ukulu. O masoladi akexile ni uhete a lozele matadi akexile mu tula dikanga ku 160 mba 240 a ji kilómetulu ku ola. Akua ku tokuesa o Bibidia ka xikina kuila o ji mbalafunda jexile kala mifula, maji tua tokala kuijiia kuila o ji mbalafunda jexile mu jibha muéne.—Afundixi 20:16.