Kiebhi ki u Tena Kulondekesa o Kisakidilu Kié mu Ujitu ua Beta-o-kota ua Nzambi?

O UJITU UA BETA-O-KOTA, u tu bhangesa kusakidila kiavulu. Jezú ua londekesa o disá didi kioso kia sake o dikuinhi dia athu a kexile ni uhaxi ua bhonzo, ki u kexile ni milongo. Muthu umoxi ku dikuinhi dia athu anga “u vutuka kua tundu, hé u kala mù ximana Nzambi ni dízui dia zangumuka.” Jezú uambe uixi: “Abha, o dikuinhi dioso ki dieluka? O dívua-phe, dia xala kuebhi?” (Luka 17:12-17) Ihi ia mesenene kulonga Jezú? Se ki tu dilange, tu tena kujimba ni lusoso o mbote ia tu bhange akuetu!

O ujitu ua kukula ki u difu ni maujitu a mukuá. Iú uene o ujitu ua beta-o-kota. Mu kienhiki, kiebhi ki u tena kulondekesa o kisakidilu kié mu ioso ia bhange Nzambi, phala o mbote ié?

• Ijiia o Mubhani ua ujitu iú. O ujitu ua kukula, ki u bhana o muenhu ua kalelaku ku athu uoso mu ki ngoho, kana. Jezú ua zuela mu musambu kua Nzambi: “O muenhu ki uábhua uenhú: Kuila oso a ku ijiie eie u Nzambi ia kidi imoxi-èlele, ni kuijiia ue Jezú Kristu, ió ua mu tumu eie.” (Nzuá 17:3) Se kumoneka muthu u ku tangela kuila sai muthu ua bhulula o muenhu ué kioso ki ua kexile hanji u mona-ndenge, kueji mesena kuijiia kiambote o muthu iú, ni kuijiia se mukonda diahi muene ua ku bhulula? Jihova Nzambi, ua bhana o ujitu ua kukula, ka mesena ngó kuila eie u muijiia, maji ua mesena ue kuila u kala ni ukamba uambote ni muene. O Bibidia iamba: “Zukamenu kua Nzambi, muène u mi zukama enu.”​—Tiiaku 4:8.

• Kala ni kixikanu ku ujitu ua kukula. “Kala kiki, uoso ua xikana o Mona, uala ni muenhu ki uábhua.” (Nzuá 3:36) Ihi i lombolola kukala ni kixikanu? Kukala ni kixikanu kubhinga kubhanga kima. (Tiiaku 2:17) Kima kiahi? O ujitu u kala ngó ué se eie u u xikina ni ku u tambula. Mu kiki, ua tokala u bhanga nguzu phala kuxikina ni kutambula o ujitu ua kukula. Kiebhi ki u tena kubhanga kiki? Mu ku dilonga o vondadi ia Nzambi, ni ku i kumbidila ku muenhu ué.a Samba kua Nzambi mu kubhinga o muloloki ua ituxi, ni muxima ua zele. Dielela kua Nzambi ni muxima ué uoso, kuila o ujitu ua kukula u bhana kidielelu ni kutululuka kua kidi ku hádia, ni kukondama ni kusanguluka phala ió ala ni kixikanu kia kidi!​—Jihebeleu 11:1.

• Ndé mu kiônge kia Lembalasa ia Kufua kua Jezú. Jezú ua bhange fesa phala ku tu lembalesa, muvu ni muvu o ujitu ua kukula. Ia lungu ni lembalasa íii Jezú uambe: “Bhangenu jinga kienhiki mu ku ngi banza eme.” (Luka 22:19) O Jimbangi ja Jihova a-nda lembalala o kufua kua Jezú, kia Tersa 11 kia Mbeji ia Kasamanu ka 2017, mu ngoloxi ki fua o dikumbi. O kiônge kia-nda bhanga ola imoxi, mu kiônge kiki a-nda bhanga-mu diskursu dia-nda londekesa se ihi ilombolola o kufua kua Jezú, ni kiebhi o kufua kuê kubheka mabesá lelu ni ku hádia. Ku muvu ua bhiti 20 a mazunda athu ku mundu uoso a ile mu Lembalasa ia Kufua kua Jezú. Tua mu kuixana phala kukala kumoxi n’etu, phala kusakidila o ujitu ua beta-o-kota ua tu bhana Nzambi.