O Kwijiya Nzambi Kulombolola Ihi Phala Eye?

Katé bhabha, twa tena kusanga o kitambwijilu kya kibhwidisu kiki: Nzambi Nanyi? Twa mateka kumona mu Bibidya kwila o dijina dyê Jihova ni kwila o henda yene o kidifwa kyê kya beta-o-kota. Twa mono wê se ihi yene mu bhanga mwene ni ihi ya-nda bhanga dingi phala o mbote ya athu. Kyoso ki uya ni kudilonga ya lungu ni Nzambi, wa-nda mona dingi se kubhanga kiki kulombolola ihi phala eye?

Jihova wa kanena kwila “eye se u mu sota, wa-nda ku mu sanga.” (1 Malunda 28:9) Xinganeka mu ujitu wa mu ku kingila mukonda dya kusota ni kwijiya Nzambi—‘ukamba wa kidi ni Jihova’! (Jisálamu 25:14) O ukamba yú ulombolola ihi phala eye?

Kusanguluka kwa kidi. Jihova a mwixana ‘Nzambi ya kusanguluka.’ (1 Timote 1:11) O ku mu zukama ni kukayela o idifwa yê, kwa-nda ku bhekela kusanguluka kwa kidi, kubhanga kiki, kutena ku kubheka mbote ya kuzela kwa muxima, o kuzela kwa kilunji, ni kuzela kwa mukutu. (Jisálamu 33:12) Wa-nda tena we kukala ni kusanguluka kwa kidi ku mwenyu, mu kuxisa o ifwa yayibha, kukala ni ifwa ya mbote ni kukala ni ukamba wambote ni akwenu. Wa-nda xikina mu izwelu ya mukwa jisálamu wambe: “Eme-phe kya ngi wabhela o kuzukama kwa Nzambi.” —Jisálamu 73:28.

U suwa o ibhindamu ni kulanga o athu. Jihova wa kanena o jiselevende jê: “Ngi ku bhana kayula, kuma nga ku te mwene dyesu.” (Jisálamu 32:8) Kiki kilombolola kwila Jihova u langa o jiselevende jê ni kubhanga yoso phala ku a bhana yoso ya bhindamena. (Jisálamu 139:1, 2) Kyoso ukamba wê ni Jihova u dibandekesa, wa-nda mona kwila mwene wa ku zukama dingi mu ithangana yoso.

O kidyelelu kya yuka ku hádya. Nzambi ka-nda kubhana ngó sabhi ya kuzediwa ni kusanguluka ku mwenyu kindala, maji Jihova wa-nda jikula o mabhitu a kusanguluka ku hádya. (Izaya 48:17, 18) O Bibidya yamba: ‘O mwenyu ki wabhwa wenyú: Kwila oso a ku ijiye eye u Nzambi ya kidi imoxi-èlele, ni kwijiya we Jezú Kidistu’. (Nzwá 17:3)) Mu ithangana ya bhonzo o kidyelelu ki tu bhana Nzambi, kya difwangana ni kifikidilu mba ngunji ya baluku, ki tu kwatekesa ‘ku di kwatenena ni kukolamena.’—Jihebelewu 6:19.

Kiki, kilondekesa kwila, kima kyambote kwijiya kyambote Nzambi ni kukolesa o ukamba wetu ni mwene. Phala kwijiya dingi o maka yá, bhinga kikwatekesu ku Jimbangi ya Jihova mba bokona mu jw.org.