Longa o An’ê mu Sidivisu ia Ukunji
1. O divulu dia Jisálamu 148:12, 13 di suínisa o jitata Kidistá ku bhanga ihi?
1 Jihova uixana o minzangala phala ku mu bhana kijingu. (Jisá. 148:12, 13) Mukonda dia kiki, o jitata Kidistá, ka longa ngó, o tuana o kidi kia Bibidia, ni ijila ia lungu ni ku zela kua muxima. Ene u a longa ué o ku kala akunji a njimbu iambote. Kiebhi kia tena ku bhanga kiki?
2. Kiebhi o phangu iambote ia jitata, i tena ku kuatekesa o tuana?
2 Phangu Iambote: O mufundixi Ngidiione, uambe ku 300 ja maiala: “Mu ngi tala eme, mu kaiela ioso i ngi bhanga.” (Afun. 7:17) Mu kidi, o tuana a kaiela o phangu ia jitata jâ. O tata u kalakala mu usuku, kioso kia vutuka ku salu mu kimene kia Sábhalu, mu veji dia kuia mu zeka, muéne u ambata o tuana tuê mu sidivisu ia kuboka, sumbala ua bhuila. Sé ku tangela kima, muéne ua mu ku a longa kuila o sidivisu ia kuboka, iene ia tokala o ku kala ku pholo. (Mat. 6:33) O kuila o tuana tuê, a ku mona ku di bhakula mu maukexilu alungu ni ubhezelu, kála o ku samba, ku tanga o Bibidia, ku tambuijila o ibhuidisu mu kilunga, ni kuboka? Mu kidi, eie kua-nda bhana phangu ia iuka. Maji o an’ê, a-nda bhanga ioso phala ku kuatekesa o nguzu i u bhanga phala ku a longa ku bheza Jihova, se n’a mono o nguzu i u bhanga phala ku bheza Jihova.—Mate. 6:6, 7; Lom. 2:21, 22.
3. Ikalakalu iebhi mu nzumbi, o jitata a tena ku suínisa o tuana tuâ ku suua mbambe?
3 Ku Suua Mbambe: O jitata sé ku bhuila, a longa o tuana tuâ, phala kuenda, kuzuela, ku zuata ubheka uâ, ni ima ia mukuá dingi. Kioso o tuana aia ni ku kula, ene a tena kuijiia dingi ima iavulu ku muenhu uâ. Se o jitata Jikidistá, ene ué a-nda tena ku kuatekesa o tuana tuâ, ku suua mbambe mu kilunga, mu kaxi ka mivu iâ, ni u hete. (1 Kol. 9:26) O kuila ua mu longa o tuana tuê ku tambuijila o ibhuidisu mu kilunga, mu izuelu iâ, ni ku di pelepalala phala ku bhanga mbandu ku xikola ia ukunji ua Nzambi? (Jisá. 35:18) O kuila ua mu a longa o ku kalakala mu maukexilu oso ua lungu ni sidivisu ia ukunji? O kuila eie ua mu a suínisa ku suua mbambe kála o ku di batizala, ni sidivisu ia thembu ioso? O kuila eie uene mu a kuatekesa o ku kala ni aboki a mukuá a sanguluka kiavulu mu ku bhanga o sidivisu íii, phala ku a suínisa?—Jisa. 13:20.
4. Kiebhi o tuana a tena ku katula mbote kioso o jitata, kiji mateka ku longa o tuana mu sidivisu ia ukunji tundé mu undenge?
4 O mukua jisalamu uambe: ‘Eie, Ngana Nzambi, ua ngi longo tundé undenge katé bhu ngeza, mukumbi uami u ngene mu tanga, o ku kalakala kuê kua madiuanu.’ (Jisá. 71:17) Mateka ku longa o tuana tuê, tundé undenge, ku kala akunji. Ene a-nda katula mbote mu uadiakimi uâ, se u a longa tundé mu undenge!—Jisa. 22:6.