Ihi i ku “Bhangesa ku Sanguluka?”
1. Ihi i tu bhangesa ku sanguluka ku di sukilu dia mbeji?
1 Kioso ki’bhua o mbeji, etu enioso tu belesela o kitendelesu kia ku bhana o ikalakalu ietu ia ku boka, ihi i ku bhangesa ku “sanguluka?” (Nga. 6:4) Ki kale tu aboki a katunda a bhana 130 a ji ola mu ukunji, mba tu aboki a tu xikina ku bhana 15 dia ithangana, etu enioso tua tokala ku sanguluka mu kikalakalu kietu ki tu bhanga ni muxima uoso kua Jihova.—Jisá. 100:2.
2. Mukonda diahi tua tokala ku di suínisa mu sidivisu ietu kua Jihova?
2 Kuma Jihova muéne Suke-ku mu ngongo ioso, tua tokala tu mu sidivila ni muxima uetu uoso. (Mal. 1:6) Mukonda dia henda ietu kua muene, tua bhakula o mienhu ietu phala ku bhanga o vondadi iê. Mu kiki, ku di sukilu dia kizuua mba dia mbeji, se tuijiia kuila tua bhana o kithangana kietu, uhete ni nguzu mu sidivisu ia Jihova, kala muthu mudietu u tena ku kala ni kisangusangu. (Jisa. 3:9) Maji se o kitongoluelu kietu ki ki tululuka mukonda dia kikalakalu kia tolo ki tua bhange, tua tokala-phe tuijiia se ihi i tua tokala o ku bhanga phala ku bandekesa dingi o sidivisu ietu.—Lom. 2:15.
3. Mukonda diahi ki kima kiambote ku di sokesa ni akuetu?
3 ‘Ki tu Tokala ku di Sokesa ni Akuetu:’ Ki kima kiambote ku di sokesa ni akuetu mba ku di mona kuila m’ukulu ua kexile mu bhanga dingi, lelu ndenge. O ithangana i lunguluka. Kala muthu ni uhete uê. O ukexilu ua ku di sokesa ni akuetu, u bhangesa ku kala ni dixinga mba ku divua kala ki tuala ni valolo. (Nga. 5:26; 6:4) Jezú ka kexile ni ukexilu iú. Mu veji dia kiki, muene ua ximana o athu mu ima ia tenene o ku bhanga.—Mar. 14:6-9.
4. Madisá ahi u tu tena ku di longa mu kifika kia Jezú, kia lungu ni jitalendu?
4 Mu kifika kia Jezú kia lungu ni jitalendu, kala muthu ua tambula “kioso kia soko na-kiu.” (Mat. 25:15) Kioso o Ngana kia vutuka iu ua bhingi o ikalakalu ia bhange, o a kalakala ni nguzu ni uhete uâ, ua a ximana iá a bokona mu kisangusangu kumoxi ni muene. (Mat. 25:21, 23) Kioso ki tuia ni ku kalakala mu ku boka o Utuminu, tu tena ku dielela kuila Jihova ua-nda tu xikina ni ku kala ni kisangusangu!