Longa Kiambote o Bibidia
1. Kikalakalu kiahi, kiala na-kiu o aboki a longa o Bibidia?
1 Sé-ku muthu u tena ku sidivila Nzambi, sé “ku mu sunga” kua Jihova. (Nzu. 6:44) Né kiki, o aboki a tokala ku bhanga ioso, phala ku kuatekesa o athu ku zukama kua Tata ietu ia diulu. (Tiia. 4:8) Phala ku bhanga kiki, ku bhinga ku di sokeka. O ku tanga ngó o kaxi ni ku bhanga ibhuidisu ki i kuatekesa o maxibulu ku tendela o milongi ni ku kula mu nzumbi.
2. Ihi ia tokala ku bhanga o aboki, phala ku kuatekesa o maxibulu mâ?
2 Phala ku longa kiambote, o aboki a tokala ku kuatekesa o maxibulu mê, (1) ku tendela ihi i longa o Bibidia, (2) ku xikina o milongi ia Bibidia ni (3) ku kumbidila o milongi ia Bibidia. (Nzuá 3:16; 17:3; Tiia. 2:26) Ku bhinga jimbeji, phala ku kuatekesa muthu ku kaiela o ji pondo joso jiji. Kala pondo ia kumbidila, ulondekesa se o ukamba uê ni Jihova, ua mu di bandekesa ni ku sola ku di bhakula kua muéne.
3. Mukonda diahi o alongexi ala ni uhete, a bhanga ibhuidisu ia ku xinganeka?
3 Ihi i Banza o Dixibulu?: Phala kuijiia se o dixibulu dietu, dia mu tendela ni ku xikina o milongi ia mu di longa, kana ku zuela kiavulu, mu suínise ku zuela ia mu di longa. (Tiia. 1:19) O kuila muéne u tendela ihi i longa o Bibidia, mu milongi ia mu di longa? U tena ku jimbulula o milongi íii, mu izuelu iê? Ihi ia banza ia lungu ni milongi ia mu di longa? O kuila u xikina kuila, o milongi ia Bibidia ki i bhonzo? (1 Tes. 2:13) O kuila, muéne uejiia kuila o milongi ia mu di longa, ia tokala ku lungulula o ukexilu ua muenhu uê? (Kol. 3:10) Phala kuijiia o itambuijilu ia ibhuidisu íii, tua tokala kuibhula ni masunga, ihi ia banza ni kuívua kiambote.—Mat. 16:13-16.
4. Ihi i tua tokala o ku bhanga, se dixibulu ka xikina mba ka kumbidila o milongi ia Bibidia?
4 Ku bhinga kithangana phala kueha o ifua ni ibanzelu ia iibha, iokulu. (2 Kol. 10:5) Abha se dixibulu, ka xikina mba ka kumbidila o milongi ia mu di longa? Ku bhinga ku kala ni muanhu ni kuehela kuila, o kithangana ki bhangesa o Mak’a Nzambi ni nzumbi ikôla ku kuatekesa o dixibulu. (1 Kol. 3:6, 7; Jihe. 4:12) Se ka mu tendela milongi ia Bibidia mba ka mu i kumbidila, kima kiambote ku lungulula o milongi. Kioso ki tu suluka ni ku mu longa o Bibidia ni muanhu uoso ni henda, nange mu ku bhita kithangana muéne u lungulula o muenhu uê.