Wamulembalala?

O kwila eye watange mwene kyambote o milongi yoso ya Milangidi ya muvu yú? Se kyene, twakudyondo tala o itambwijilu ya ibhwidisu yakayela:

Ihi i tubhangesa kubhana kijingu kwa Jihova?

Tubhanga kiki mukonda twazolo kyavulu Jihova, tumuxila we kyavulu. Tumubhana we kijingu mukonda twamesena kwila athu amukwa amwijiye we.—w25.01, dif. 3.

Ihi i twatokala kubhanga se muthu utuluwalesa kyavulu?

Kitutokala kulondekesa kwila yoso yala kyambote, maji twatokala kweha kukala ni njinda. O kubhanga o ima yiyi kwanda tukwatekesa kyavulu.—w25.02, maf. 15-16.

Mukonda dyahi o dixibulu Máluku, phangu yambote phala o minzangala?

Máluku waxikinine kikalakalu kyoso-kyoso. Sumbala waluwalele mukonda dya maka abhiti, né kiki Máluku wasuluka mu ukunji wê. Mwene wexile kamba dya poxolo Phawulu ni jiphange ja mukwa akudile mu nzumbi.—w25.04, dif. 27.

Ihi ilombolola o izwelu yiyi ya Jezú: “Eme nga ejidisa o dijina dyé”? (Nzwá 17:26)

O maxibulu mê ejidile kya o dijina dya Nzambi. Maji Jezú wa ejidisa Tat’ê, o vondadi yê, o ikalakalu yê ni idifwa yê.—w25.05, maf. 20-21.

Se tulenduka, twanda bhanga ihi?

Twejiya kwila sayi ima kitwa ijiya. Mu kifika, kitwejiya o kithangana kyanda kwiza o dizubhilu dya mundu yu mba, o ima yanda bhanga Jihova mu kithangana kyenyokyo. Kitwejiya we o ima yanda bhita mungu mba katé bhwebhi Jihova watwijiya.—w25.06, maf. 15-18.

Ihi itena kutukwatekesa kukatula mbote mu milongi yoso-yoso mba mu diskulusu dya katunda?

Tutena kudibhwidisa: ‘Milongi yebhi yala bhabha itena kukwatekesa o athu kuxikina o kidi kya Bibidya? O kwila mwala kifika ki ngitena kukwatekesa nakyu muthu kuxikina o kidi kiki? Nanyi wanda wabhela o milongi yiyi?’—w25.07, dif. 19.

O ukexilu wa Nzambi wa kudibhana ni Davidi, utulonga ihi yalungu ni muloloki wa Nzambi?

Sumbala Davidi watele ituxi ya makota, kyoso mwene kyadyela, Jihova wamuloloka. (1 Jis. 9:​4, 5) Kyoso Jihova kyatuloloka, mwene kadikwatenena mu itondalu yetu mba katufundisa dingi mukonda dya itondalu yetu yokulu.—w25.08, dif. 17.

Ihi i utena kubhanga se o dixibulu dyé kamuxikina milongi imoxi ya Bibidya?

Se wakwatekesa kya o dixibulu dyé kuxikina milongi imoxi, maji né kiki mwene kamu ixikina, suluka mu kudilonga-nê. Ku pholo dya kwenda, sola kizuwa phala kuzwela-nê yalungu ni milongi yiyi.—w25.09, dif. 24.

O Bibidya yamba kwila o kituxi kyala ni kutena. (Jih. 3:13) Kyebhi kyene?

O ituxi yetu itubhangesa kubhanga ima yayibha ni kukala ni phata yalungu ni henda ya Jihova kokwetu.—w25.10, dif. 16.

Ima yebhi itatu itena kutukwatekesa kusamba ni muxima woso?

(1) Tutena kuxinganeka mu idifwa ya Jihova. (2) Tutena kuxinganeka mu maka utwamudibhana nawu, o maka kala o kuloloka muthu. Maka yá, tutena we kwatumbula mu misambu yetu. (3) Kitutokala kusamba ni lusolo. Kiki kyanda tukwatekesa we kuzwela yala ku muxima wetu.—w25.10, maf. 19-20.

Kyebhi kitutena kukwatekesa o adyakime akuka kya?

Tutena kukunda o adyakime ku mabhata mâ mba kwaxindila mu mutelembe. Tutena we kwaxinjikila mu inzo ya kusaka mba kuboka nawu kumoxi.—w25.11, maf. 6-7.

Kyebhi o athu anda kazala kyatena kubhana kijingu kwa Jihova mu kizuwa kya ukaza wâ?

Ene atokala kubelesela o ijila ya jinguvulu ni kubhanga yoso ni yoso phala o fesa ibhane kijingu kwa Nzambi. Atokala we kuzwata kyambote ni kulenga o ijila iluwalesa Jihova. O diyala ni muhatu atokala kudizwelesa kyambote kyoso kyaya ni kusokejeka o ima phala o ukaza.—w25.12, maf. 21-24.