O Sabhalalu Ionene ia Tungu o Maiala

KUA bhitile kia mivu iavulu. An’â Noué a vualele ana avulu. A laula a kulu ni a vuala ué ana. Mu kienhiki o ixi iezalele ni athu avulu.

Mukuá uexile mululu ua Noué, dijina diê Nimilodi. Muéne uexile diiala diaiibha, uakexile mu tomba ni ku jibha iama ni athu. Nimilodi ué ua di bhange sobha phala ku tumina mua’xaxi ka athu. Nzambi ka zolele Nimilodi.

Athu oso mu izuua iná akexile mu zuela dízui dimoxi ngó. Nimilodi ua mesenene kuila athu oso a kala bhu kididi kimoxi ngó, phala muéne ku a tumina. Eie uejiia se ua bhange kima kiahi? Ua tumina athu ku tunga mbanza ni sabhalalu ionene. Ua mu a mona mu fikula, ku bhanga matijolo.

Jihova Nzambi ka sangulukile ni ku tunga o sabhalalu íii. Nzambi ua mesenene kuila athu a tunga mu ixi ioso. Maji athu exi: ‘Ndokuenu! Tu tunge mbanza ni sabhalalu ia-nda suka ku diulu. Kienhiki, tua-nda kala ni fuma!’ Athu iâ, a mesene kijingu phala ene muene, Nzambi kana.

Mukonda dia kiki, Nzambi ua fidisa athu ku tunga o sabhalalu. Uejiia ihi ia bhange muéne? Ua bhangesa athu ku zuela mazui iéngi, mu veji ia dízui dimoxi ngó. O atungi ka kexile mu di tendela dingi. Mukonda dia kiki o mbanza a ixana Babele mba Babilonha, ilombolola “Kavuanza.”

Athu a mateka kuia dikanga dia Babele. O ibuka ia athu akexile mu zuela dízui dimoxi, endele kumoxi mu jimbandu jengi ja ixi.