Nzambi ua Kanena o Palaízu

OFIKULA íii, ilondekesa o palaízu kála kiedikisa Nzambi kuala polofeta Izaia. Izaia uakexile mu thembu kioso kiafú Jona.

Palaízu ilombolola “kididi kia uabha.” O kuila i ku lembalala kima ki ua mono kiá, mu divulu didi? Ki i difu ni palaízu ia bhangele Jihova Nzambi phala Adá ni Eva, ki kiene? Maji o kuila o ixi ku hádia ia-nda kala muene palaízu?

Jihova ua tumina polofeta Izaia ku soneka maka alungu ni palaízu iobhe, ia-nda kuíza phala o mundu ua Nzambi. Muéne uixi: ‘O imbungu, ni jimbudi, a ka tunga bhuamoxi ni kutululuka. O kangombe ni kahoji a kadia iangu bhuamoxi, o mona-ndenge ua-nda ku a tambula konda. Katé ué o kamona ka-nda tonoka mu ngenda ia dizuaa-mbinga se ku mu numata.’

Athu avulu a zuela kuma ‘Íii nuka ia-nda bhita.’ ‘Tundé u kulu kuene ibhidi mu ixi, inga kua-nda kala ué ibhidi katé ku hádia.’ Maji, xinganeka ngó: Dibhata diahi dia bhele Nzambi kua Adá ni Eva?

Nzambi ua tele Adá ni Eva mu palaízu. Ene a texi o dibhata diâ, dia uabha, mukonda dia ku xibhaka Nzambi, kienhiki, ene a kuka ni afú. Nzambi ua kanena ku bhana ku iá a mu zolo, o ima ia texi Adá ni Eva.

Mu palaízu iobhe, ki mua-nda kala muthu ua-nda kuama, mba ku zanga. Mua-nda kala kutululuka. Athu a-nda kala ni sauidi ni ku sanguluka. Ia-nda kala kála kia mesenene Nzambi ku dimatekenu. Maji, tua-nda dilonga dingi kiebhi Nzambi kia-nda bhanga kiki.