Jezú u Longa ku Mulundu

TALA Jezú ua xikama bhobha. Muéne ua mu longa athu ku mulundu ua Ngalileia. Iâ a xikama bhu mbandu iê, maxibulu’ê. Muéne ua solo 12 phala ku kala jipoxolo jê. O jipoxolo, maxibulu a Jezú. Uejiia o majina mê?

Exile, Ximá Phetele ni phange iê Mandele. A kamúkua, Tiiaku ni Nzuá, exile ué jiphange. O poxolo ia mukuá ué a mu ixanene Tiiaku, ni mukuá a mu ixanene Ximá. O jipoxolo jiiadi akexile ni dijina dia Juda. Ua mukuá Juda dia Kadiota, o Juda ia mukuá, a mu ixanene ué Tadeu. Kua kexile ué hanji Filipe ni Natanaiele (a mu ixanene Matulu) ni Matesu ni Tomé.

Kioso kia vutuka ku Samádia, Jezú ua mateka o kuboka: ‘O utuminu ua diulu ua zukama.’ Eie uejiia se o utuminu iu ihi? O unguvulu ua kidi ua Nzambi. O sobha, Jezú. Muéne ua-nda tumina tundé ku diulu, ni ku bheka o paze mu ixi. Ku utuminu ua Nzambi, o ixi ia-nda kala palaízu ia uabha.

Bhenhobho, Jezú ua longo athu, o maka alungu ni utuminu. Muéne uambe, ‘Kala mu samba kiki.’ ‘Tata Ietu uala mu diulu, o dijina diê a diximane. O utuminu uê uize. O vondadi iê a i bhange bhoxi, kála kia mu i bhanga ku diulu.’ Athu avulu a uixana ‘Musambu ua Ngana.’ A mukuá a uixana ‘Tata Ietu.’ Eie uejiia ku zuela o musambu uoso?

Jezú ua longo ué o mundu, kiebhi ki tu di bhana ni akuetu. Jezú uixi, ‘Bhanga ku akuenu, ioso iu mua mesena ku mi bhanga.’ Ki ki ku uabhele kioso akuenu kia ku bhanga o mbote? Kienhiki, Jezú uambe, tua tokala tu bhanga o mbote ku akuetu. Ki kia-nda uabha mu palaízu, athu oso ku bhanga kiki?