O Palaízu ia Ubhe mu Ixi

TALA o mixi ioso íii ia lebha, o ithulu ia iuka ni milundu ionene. Kiki ki kididi kia iuka? Tala o kangulungu ka mudia bhu maku dia mona-ndenge. Tala ué o jihoji ni jikabalu jemana mu iangu. Eie ku mesena ku tunga bhu kididi kála kiki?

Nzambi ua mesena kuma eie u kala ni muenhu ua kalelaku mu palaízu mu ixi. Muéne kandale kuila eie u kala ni ndolo, kála kiala o athu lelu. Íii iene i kanena o Bibidia kua ió, a-nda kala ni muenhu mu palaízu ia ubhe: ‘Nzambi ua-nda kala nâ. Ki kua-nda kala kufuá né kudila, mba ndolo. O ima iokulu ia-nda bhita.’

Jezú ua-nda bhanga kuila o ima íii ia madiuanu i bhita muene. Eie uejiia se kizuua kuxi? Kiene, kioso muéne kia-nda zubha o kuiibha kuoso, ni athu aiibha mu ixi. Lembalala kuma, kioso Jezú kia kexile mu ixi, ua sake o mauhaxi a athu, ni ua bheka athu ku muenhu. Jezú ua bhangele kiki phala ku idikisa ia-nda bhanga mu ixi ioso, kioso muéne kia-nda kála Sobha ia utuminu ua Nzambi.

Xinganeka hanji, kiebhi kia-nda kala o palaízu ia ubhe mu ixi! Jezú ni ió a solo muéne, a-nda tumina ku diulu. O ji nguvulu jiji, a-nda tambula konda ia athu oso mu ixi, phala a kale ni kisangusangu. Ndoko tu tale ihi i tua tokala ku bhanga phala Nzambi a tu bhane muenhu ua kalelaku mu palaízu ia ubhe.