Kiebhi o Tufunga Kia Langa o Kilunga?

Mu kilunga kietu, o athu ala kupholo kene mua futa. Mu veji dia kiki, a bhanga kala kia kexile mu bhanga mu kilunga kia dianga, a sola tufunga phala “ku inga o kilunga kia Nzambi.” (Ikalakalu 20:28, NW) O tufunga tutu, maiala a kulu mu Mak’a Nzambi, a kala kupholo mu kilunga ni ku inga “kana ni usudi, maji ni vondadi ioso, kioso kia mesena Nzambi. Ki mu ki bhangela nganhu ia xidi, maji a ki bhangela [ni] muxima.” (1 Phetele 5:1-3, NW) Kikalakalu kiebhi kia bhanga phala ku tu kuatekesa?

Ene a tu suua ni ku tu langa. O tufunga endesa ni kulanga o kilunga mu nzumbi. Mu kuijiia kuila Nzambi ua bhana o kikalakalu kiki kia dikota, o tufunga ka tumina o mundu ua Nzambi, maji ene a kuatekesa phala o mbote iâ ni kusanguluka kuâ. (2 Kolindo 1:24) Kala o mubhidi u langa o jimbudi ni henda ioso, o tufunga a bhanga ioso phala kuijiia kiambote o jiphange joso mu kilunga.​—⁠Jisabhu 27:23.

Ene a tu longa kiebhi ki tu bhanga o vondadi ia Nzambi. Mu semana joso, o tufunga endesa o iônge mu kilunga, phala kukolesa o kixikanu kietu. (Ikalakalu 15:32) O maiala iâ, a kala ué kupholo mu sidivisu ia kuboka, a kalakala kumoxi n’etu ni ku tu longa o maukexilu oso a ukunji.

Ene a bhana kikolokotesu kala muthu mudietu. Phala kusuua o ibhindamu ietu ia nzumbi, o tufunga a tu kunda ku mabhata metu, mu Kididi kia Kubheza, phala kubhana kikuatekesu ni ku tu konda o malamba bhu kaxi ka Bibidia.​—⁠Tiiaku 5:14, 15.

Ene a kalakala ué phala ku dikila o muiji. Ene a bhingi ué kithangana phala kukala kumoxi ni muiji. Tua bhingi-phe tua xila.​—⁠1 Tesalonika 5:12, 13.

• Kikalakalu kiebhi kia bhanga o tufunga mu kilunga?

• Kiebhi o tufunga kia londekesa kuila a mesena o mbote ietu?