Kiebhi ki u Tena ku di Bhana Kiambote ni Jindandu Jê

O ukaza, u bhanga muiji ua ubhe. Sumbala eie ua-nda zola jinga o jitata jê ni ku a xila, ijiia-kiu kuma o kaza diê o muthu ua beta dingi o kota phala eie mu ixi. Kiki ki tena ku bhonzesa o jindandu jê ku xikina o kidi kiki. Maji o ijila ia Bibidia i tena ku ku kuatekesa ku di bhana kiambote ni maka enhá, ku dibhana kiambote ni jindandu jê ni ku suínisa o ukamba ni muiji uê ua ubhe.

1 KALA NI IBANZELU IAMBOTE IA LUNGU NI JITATA JÊ

IHI I ZUELA O BIBIDIA: “Xila tat’enu ni mam’enu.” (Efezo 6:2) Ki kale se u munzangala mba u muadiakimi, eie ua tokala ku xila jinga o jitata jê. Ijiia kuila o kaza diê, ua tokala ué ku suua o jitata jê-muene. O Bibidia i zuela kuila ‘mu henda ki mu moneka difuba,’ kienhiki kana ku kala ni uôma mu ku mona kaza diê ku suua o jitata jê.​—1 Kolindo 13:4; Ngalásia 5:26.

IHI I U TENA O KU BHANGA:

• Kana kuzuela: “O jindandu jê kene mu ngi bhana valolo” mba “ioso i ngi bhanga manh’enu u i zemba”

• Sota ku di ta mu kididi kia kaza diê

2 KANA KU XIKINA IOSO I MESENA O JITATA JÊ

IHI I ZUELA O BIBIDIA: “Mukonda dia kiki, ki bhangesa diiala u xisa tat’â ni mam’â anga u di banda kua mukaji’ê, ene kiiadi kiâ hé a di bhanga xitu imoxi ngó.” (Dimatekenu 2:24) Kioso ki u kazala, o jitata jê nange a banza kuila ene a tena ku tumina hanji ku muenhu uê, mukonda dia kiki a sota ku di ta mu ukaza uê.

Maji eie ni kaza diê mua tokala ku di kunda katé bhebhi o jitata jenu a tokala kuijiia ni ku di ta mu ukaza uenu. U a tangela ni kidi kioso, kala ki ua di kundu ni kaza diê. (Jisabhu 15:1) O ku lenduka, ku tululuka ni ku xididika, kua-nda ku kuatekesa ku suínisa o ukamba uê ni jitata jê, ni ku suluka ku di “londekesa jinga henda mu ku di kuatekesa kala muthu ni mukuâ.”​—Efezo 4:2.

IHI I U TENA O KU BHANGA:

• Se uejiia kuila o jindandu jê a mu di ta ku muenhu uê, di kunde o maka enhá ni kaza diê mu ukexilu ua tululuka

• Kalenu ni kibanzelu kimoxi, mu ku di bhana ni maka enhá