Kiebhi o Ana Kia Lungulula o Ukaza

O uvualukilu ua mona, u tena ku kala kithangana kia ku sanguluka phala o jitata, maji u tena ku bheka ué ibhidi. Mukonda dia ku kala jitata ja ubhe, mua-nda diuana mu ku mona kuila, mua-nda ta ithangana iavulu ni nguzu mu ku langa mon’enu. O ku bhita usuku sé ku zeka ni ima ia mukuá dingi, i tena ku bheka maka mu ukaza uenu. Ki kale eie mba kaza diê, mua-nda bhinga ku lungulula ima ku muenhu uenu phala mu tene ku langa mon’enu ni ku suínisa o ukaza uenu. Kiebhi o itendelesu ia Bibidia ki tena ku ku kuatekesa ku di bhana ni ibhidi íii?

1 IJIIA KIEBHI O MONA KIA LUNGULULA O MUENHU UÊ

IHI I ZUELA O BIBIDIA: “O henda i kolokota mu jihadi, i lenduka.” O henda ué “ki iene kusota ngo o kiê. O henda ki iene mu kala ni njinda, ki iene kufutuluka.” (1 Kolindo 13:4, 5) Mukonda dia ku kala mama ia ubhe, ua-nda beta ku banza mon’ê. Maji o muadi uê ua-nda divua kala ua mu mu landuka, mukonda dia kiki-phe, kana ku jimba kuila muéne ué ua tokala ku mu suua. Ni muanhu ni henda, u mu kuatekesa ku mona kuila, muéne ué u tena ku langa o mona.

“Enu mala, . . . akaji enu mu tunga-nâ ni kilunji.” (1 Phetele 3:7) Ijiia kuila, muhatu’ê ua-nda beta ku kala ni mon’enu, eie ndenge. Muéne uala ni ikalakalu ia ubhe, ikalakalu i tena ku mu bhekela njinda, ku luuala mba kikote ku muxima. Mu ku bhita thembu, muéne u tena ku di bhonza n’eie maji sota ku tululuka mukonda “muthu u xididika uala kota, kindanda ndenge.” (Jisabhu 16:32) Sota ku tetuluka ni ku kuatekesa muhatu’ê.​—Jisabhu 14:29.

IHI I U TENA O KU BHANGA:

• Tata: Kuatekesa muhatu’ê ku langa mon’enu katé ni mu usuku. Sosolola o kithangana ki u bhita mu ku bhanga ima ia mukuá, phala u tene ku bhita dingi kithangana ni muhatu’ê ni mon’ê-nu

• Mama: Se muadi uê uíza ku kuatekesa o mona, xikina o kikuatekesu kiê. Se ka mu tena ku bhanga kiambote kala kia tokala, kana ku mu bazela, maji ni henda ioso mu londekese kiebhi kia tokala o ku bhanga

2 SUÍNISENU O UKAMBA UENU MU UKAZA

IHI I ZUELA O BIBIDIA: “Ene kiiadi kiâ hé a di bhanga xitu imoxi ngó.” (Dimatekenu 2:24) Né muene ni ku kala ni mona, ijiia kuma eie ni kaza diê mua di bhange hanji “xitu imoxi.” Kienhiki, bhanga ioso phala u suínise o ukamba ni kaza diê.

Enu ahatu, sakidile-nu o nguzu ia mu bhanga adienu phala ku mi kuatekesa. O izuelu ienu i tena ku bheka “ku disanza.” (Jisabhu 12:18) Enu mu mala, tangelenu ahatu’enu kuila mua a zolo kiavulu ni kuila mu a bhana valolo. Mu a ximana mu ku langa kiambote o muiji.—Jisabhu 31:10, 28.

“Muthu ka sote ku bhanga ngó o vondadi iê muene, maji a sote ué ku bhanga o vondadi ia akuâ.” (1 Kolindo 10:24, NW) Sota jinga o mbote ia kaza diê. Katule-nu kithangana kia ku kala kumoxi ni ku di zuelesa, ku di ximanesa ni ku divua kiambote. Kana ku kala ni luímbi lua mukutu uê ku kaza diê. O Bibidia i zuela: “O diiala di bhange muhatu m’onzo o mbote ia mu tokala ku i bhana, o muhatu ue kiene ki a bhanga o mbote ia tokala ku diiala m’ozo.” (1 Kolindo 7:3-5) Mu kiki-phe, di kundienu o maka enhá mudienu. O muanhu uê ni ku tetuluka, kua-nda suínisa o ukamba uenu mu ukaza.

IHI I U TENA O KU BHANGA:

• Katule-nu kithangana kia ku kala kumoxi

• Bhanga ima iofele i sangulukisa kaza diê ni ku mu bhangesa ku mona kuila eie ua mu zolo, kala o ku mu sonekena njimbu mba ku mu sumbila né muene kima kiofele

3 LONGA MON’Ê

IHI I ZUELA O BIBIDIA: “Tundé undenge uejiia Mikanda Ikôla i tena ku ku ijidisa o kubhuluka.” (2 Timote 3:15) Di kundienu mudienu se ihi i mua-nda longa kua mon’enu. Muéne u tena kuívua o ima né muene ande dia ku mu vuala. Kioso mon’enu kia kexile hanji mu divumu, muéne ua tenene kiá kuívua o dízui diê ni ima ia mukua iu ua kexile mu bhanga ni kiebhi ki ua kexile mu divua. Mu tangele madivulu tundé mu undenge. Né muene, ka-nda tendela o ima i ua mu tanga, kiki ki tena ku mu kuatekesa ku uabhela o ku tanga kioso kia-nda kula.

Né muene mu undenge, mon’enu u tena ku di longa ia lungu ni Nzambi. Muehele kuívua o misambu iê i u bhanga kua Jihova. (Matendelelu 11:19) Kioso ki mu samba kumoxi, zuela o ima iene mu bhanga Nzambi. (Jisálamu 78:3, 4) Kioso mon’enu kia-ndaia ni ku kula, muéne ua-nda mona o henda ienu kua Jihova iu ua-nda mi kaiela ué mu ku zola Nzambi.

IHI I U TENA O KU BHANGA:

• Samba mu ku bhinga unjimu kua Nzambi phala ku longa kiambote mon’enu

• Bhitulula o izuelu ia tokala kua mon’ê, kiki kia-nda mu kuatekesa kuijiia o ima tundé undenge