KIBHUIDISU 5

Ihi i Ngi Bhanga se a Ngi Lokalala mu Xikola?

MUKONDA DIAHI UA TOKALA KUIJIIA O MAKA ENHÁ?

O ukexilu ua kutambuijila, u bhangesa kuila o ima i tunda kiambote—mba kia iibha.

**IHI I UEJI BHANGA?**

Xinganeka o kifika kiki: Tomaji ka-ndala kuia dingi bhu xikola, né lelu né mungu mba nuka dingi. Kua bhiti kia mbeji jitatu, tundé kia mu tatela kima kia iibha ka ki bhange, ku jikoleka jê. A muixana majina ka tokalele. Sai kizuua, koleka ia Tomaji, ua beta ni nguzu ku madivulu a Tomaji a kexile bhu maku, ene a bua bhoxi, mba muthu uéngi mu xilu dia xikola, u mu xinjika mba u mu lutula, kioso Tomaji kia sakuka ku dima, ka mono se nanhi ua bhange kiki. Mazá a mu tesa dingi uôma, kioso kia tambula njimbu mu internete . . .

Se ua kexile bhu kididi kia Tomaji, ihi i ueji bhanga?

XINGANEKA!

Eie uala ni kutena kua-soko! Mu kidi, u tena kudibhana ni maka enhá sé kubhânga. Kiebhi?

KANA KUBHANGA KIMA. O Bibidia i longa: ‘Kióua, njinda iê ioso u ilondekesa; maji o njimu-phe u ximbakata anga o njinda iê u i kondeka.’ (Jisabhu 29:11) Se u tululuka—o ilokalalu ienii ki ia-nda kala ni valolo.
KANA KUVUTULA PHONZO. O Bibidia i longa: “Kana kuvutula muthu uoso-uoso phulu mu phulu.” (Loma 12:17) Kuvutula phonzo, kua-nda vudisa ngó o maka.
KANA KUDITA MU IBHIDI. O Bibidia i longa: “Njimu kiluezu u ki muena di kanga, anga u suam’é kiá.” (Jisabhu 22:3) Kana kudilunga ni athu a uabhela kulokalala, kana kukala ué mu ididi muene mu kala akuâ kulokalala.
ZUELA NI KUTULULUKA. O Bibidia i longa: “Kuvutula kua kulenduka, kubhuisa jimvunda.” (Jisabhu 15:1) Fikisa kuelela bhofele. Mu kifika, se o mukuâ kulokalala u kuamba kuila ua mu neta kiavulu, u tena ku mu vutuila kuila, kiene muene, “nga bhingi muene kubhela bhofele!”
SE KIBHANA NDAIÉ. Nora, uala ni 19 dia mivu uambe: “Se u tululuka, ua-nda londekesa kuila u njimu, ni kuila eie ua beta kota o athu a mu kulokalala ndenge. Kiki kilondekesa kulenduka—o akuâ kulokalala kàla ni kídifua kiki.”—2 Timote 2:24.
LONDEKESA KUILA EIE UALA NI VALOLO. O akuâ kulokalala ejiia kiambote o athu, a banza kia iibha ia lungu ni ene, ejiia ué se a nanhi kioso kia a a lokalala ka vutula phonzo. Ku mbandu ia mukuá, akuâ kulokalala ka-nda suluka ni ku kulokalala se a mona kuila kua mu a bhana mátui.
TANGELA-KIU MUTHU UENGI. Saí mesene io kulu uambe: “Ni lusolo luoso, ngeji tumina o muthu a mu mu lokalala n’a zuele ni muthu uéngi. Kiki kiene o kima kia tokala ki ngeji bhanga, kiki kieji langa athu a mukuá a mu a lokalala uá.”

Muzangala ua mu londekesa kuila uala ni valolo kioso kia mu lokalala — O kulondekesa kuila eie uala ni valolo, kua-nda kubhana o kutena phala kudibhana ni ilokalalu

EIE UA KIJIDILE?

O kulokalala ki kua lungu ngó ni kubhânga, kua lungu uê ni:

Izuelu ia bolo. Celine, uala ni 20 a mivu uambe: “Nuka nga-nda jimba o izuelu ia bolo ni ndaka ia ngi bhanene. Nga kexile mu divua kia iibha, kala ki ngala ni valolo. Kota se a ngi betele, o ndolo ki ieji nangenena.”
Kuta kamukonde. Haley, uala ni 18 dia mivu uambe: “Jikoleka jami ka mesenene kudibhana n’eme. A zuelele kuila se-ku dingi kididi ku meza, phala ki ngi xikame nau. Ku muvu ua muvimba, nga kexile mu dia ngó ubheka uami.”
Kulokalala bhu kaxi ka internete. Daniel, uala ni 14 ia mivu uambe: “Kabasa u soneka ngó njimbu imoxi ia iibha bhu kaxi ka mutelembe, u tena kuzanga o ukexilu uambote ua muthu—mba o muenhu uê. Nange i nga mu zuela i moneka kala nga mu vudisa o maka, maji kiene mu bhita muene!”

**IBHUIDISU IA LUNGU NI KULOKALALA**
KIDI MBA MAKUTU	ITAMBUIJILU
1 O kifua kia kulokalala kiene kiá tundé ukulu.	1 Kidi. Mu kifika o Bibidia izuela ia lungu ni an’a Mazonda—o dijina didi dilombolola, “Athu a Bhangesa Akua Kudibhala.”—Dimatekenu 6:4.
2 O kulokalala, kutonoka ngó. Ki kima kia iibha, kana.	2 Makutu. O kulokalala kuene mu bhangesa minzangala iavulu ku di jibha.
3 O kima kia uabha kia kudibhana ni kulokalala, o kubhânga.	3 Makutu. Nange o akuâ kulokalala, a beta kota mu kutena akuá ndenge, mu kiki, ki kima kiambote kubhânga nau.
4 Se u dibhana ni maka enhá, eie muene uala ni kikuma.	4 Makutu. Sé-ku muthu a tokalele ku mu lokalala. Se a mu kulokalala anga u dixibhé, eie ua-nda kala ni kikuma mu veji dia kubatula o maka.
5 Saí iá a a lokalele kiá, mukonda dia kiki a lokalala ué athu engi.	5 Kidi. O akuâ kulokalala a uabhela kudizangeleka, saí iá a kala ué ni uôma anga a lokalala akuá phala n’a divue kiambote.
6 O mukuâ kulokalala, u tena kulungulula o ukexilu uê.	6 Kidi. Ni kikuatekesu, o mukuâ kulokalala u tena kulungulula o ukexilu uê.