KIBHUIDISU 7
Ihi i Nga Tokala o Kubhanga se a mu Ngi Jijidika Kubhanga Undumbu?
IHI I UEJI BHANGA?
Xinganeka o kifika kiki: Heather uene mu disanga ni Mike luiadi ku mbeji, maji muéne u divua kuila ua muijiia kiá ukulu. Ene a di tumikisa ji njimbu, ithangana ioso a di zuelesa mu mutelembe, a laleka kiavulu! Maji Mike ua mesena kia kukala sai iê.
Mu jimbeji ja bhiti, Mike ni Heather, ene ngó mu di kuata o maku ni ku dibhana ji nzobole. Heather ka mesena hanji kukala ni sai. Maji ka mesene kuzanga o ukamba uê ni Mike. Se-ku muthu u mu bhangesa kudivua kiambote kála Mike. Muéne u zuela mudiê ‘Eme ni Mike tua di uabhela kiavulu . . .’
Se ua kexile bhu kididi kia Heather, anga uala kia mu kitala kia kukala ni sai, ihi i ueji bhanga?
XINGANEKA!
Nzambi ua bhana o ujitu iú phala o makaza ngó. Kubhanga undumbu, ki kulondekesa kuxila o ujitu iú ua bhana Nzambi. Kia difu ni kizuatu kia kubhana ku muthu, anga u komba na-kiu o ixete
Se kuxila o kitumu kia lungu ni ibhangelu, kála o kitumu kia ku lauka, ua-nda dibhana ni ibhidi. Kiene ué kimoxi ni kuxibhaka o kitumu kia lungu ni kubhanga undumbu, kála o kitumu ki tendelesa kuila: “o undumbu mu ueha.”—1 Tesalonika 4:3.
Iebhi o ibhidi i dibhana na-iu o muthu, mu kuxibhaka o kitumu kiki? O Bibidia i zuela: ‘Muthu uoso-phe u ta phánda, ua te kituxi ku mukutu uê.’ (1 Kolindo 6:18) Mukonda diahi kiki kidi muene?
Mu kutokuesa, a mono kuila o minzangala a bhangele kia o undumbu, a bhitile mu ibhidi iavulu.
NDOLO. Minzangala iavulu a bhangele o undumbu ande dia kukazala, ambe kuila a diela.
O KUKAMBA KU KUDIELELA. Kioso kia bhanga o undumbu, o diiala mba muhatu a dibhuidisa: ‘Nanhi ua zeka né dingi?’
KIKOTE KU MUXIMA. O ilumba a uabhela munzangala u mu langa kiambote mu veji dia ku mu zangata. Minzangala iavulu, ka uabhela dingi o ilumba se a xikina kubhanga nau undumbu kioso kia a jijidika.
Mu kusuka-ku: Se u bhanga undumbu, kua mu xila o mukutu uê. (Loma 1:24) O mukutu ué uala ni valolo ia dikota, ka tokala ku u bhana bhane ngó!
Londekesa kuila, u xila o kitumu ni kusuína kuoso, kia lungu ni ‘kueha undumbu.’ (1 Tesalonika 4:3) Ku hádia kioso, ki ua-nda kazala, kiene ki ua-nda zeka ni diiala diê mba muhatu’é. Ua-nda sanguluka, sé kuthandanganha, kukala ni kikote ku muxima mba ndolo mukonda dia kubhanga o undumbu.—Jisabhu 7:22, 23; 1 Kolindo 7:3.
IHI I U BANZA?
O kuila se muthu ua kuzolo mu kidi, ueji ta o muenhu uê mu kiluezu, mba ku u bhangesa kudivua kia iibha?
O kuila o muthu ua kuzolo mu kidi, u kubhangesa kuzanga o ukamba uê ni Nzambi?—Jihebeleu 13:4.