Adá ni Eva ka Belesela Nzambi

Sai kizuua, kioso Eva kia kexile ubheka uê, kua moneka nhoka ia mateka kuzuela-nê. O nhoka iexi: ‘O kuila kidi muene Nzambi ua mi tangela kuila ki mu tokala kudia o ibundu ia mixi ioso?’ Eva ua tambuijila: ‘Tu tena kudia ku ibundu ia mixi ioso, muxi umoxi ngó ki tu tokala kudia-ku. Se tu dia-ku, tua-nda fua.’ O nhoka ia vutuila: ‘Makutu, ki mua-nda fua. Mu kidi, se mu dia-ku, mua-nda sokela ni Nzambi.’ O kuila kiki kidi? Kana, makutu. Maji Eva ua xikina kuila kidi. Mu kutala kiavulu ku kibundu, o vondadi ia ku ki diá, ia dibandekesa. Muene ua di ku kibundu iu ua ki bhana ue Adá. Adá uejiidile kuila eji fua se ka belesele Nzambi. Maji né muene kiki, Adá ua di o kibundu.

Mu ngoloxi, Jihova ua zuela ni Adá ni Eva. Ua ebhuidisa se mukonda diahi ene ka belesela. Eva ua tatela o nhoka, o Adá ua tatela Eva. Mukonda dia ku mu bhukumukina, Jihova ua kaie Adá ni Eva mu jaludim. Phala ene ka vutuke dingi mu jaludim, muene ua te jianju bhu muelu ni xibhata ia mulengu ua túbhia.

Jihova ua zuela kuila o ua nganala Eva ueji mu kaxtikala ue. Mu kidi, o ua zuela ni Eva ki nhoka kana. Mukonda Jihova ka bhange o jinhoka ni uhete ua kuzuela. Anju iaiibha iene ia bhangesa o nhoka kuzuela. Muene ua bhange kiki phala ngó kunganala Eva. O anju ioio a ixana Satanaji o Diabhu. Ku hádia, Jihova ua-nda buikisa Satanaji phala ka nganale dingi o athu mu kubhanga ima iaiibha.